“Mme Ini Edifiak N̄wụk” Ẹmekpere!

Esisịt ini mbemiso Jesus ọkọdọkde aka heaven, ndusụk ke otu mme anam-akpanikọ mbet esie ẹma ẹbụp enye ẹte: “Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel ke emi?” Ibọrọ Jesus ama owụt nte ke ndusụk ini ẹyebe mbemiso Obio Ubọn̄ oro edide. Ke ini oro, mme anditiene enye ẹyenyene akamba utom ndinam. Mmọ ẹkenyene ndidi mme ntiense Jesus “ke Jerusalem, ye ke ofụri Judea ye Samaria, tutu esịm utịt ererimbot.”—Utom 1:6-8.

 OWO ikpekemeke ndikụre utom oro ke n̄kpọ nte ufan̄ usen, urua, m̀mê ọfiọn̄ ifan̄. Nte ededi, ye unana ubiatini, mme mbet ẹma ẹtọn̄ọ ndikwọrọ ikọ. Edi mmọ ikefreke n̄kpọ aban̄ade edifiak n̄wụk. Apostle Peter ama etịn̄ ọnọ akwa otuowo oro ẹkesopde idem ke Jerusalem aban̄a oro, ọdọhọde ete: “Ẹkabade esịt . . . ẹnyụn̄ ẹfiak edem, man ẹsọhi mme idiọk-n̄kpọ mbufo ẹfep; man oto do ini edidemede edito ke iso Jehovah esịm mbufo; man Enye onyụn̄ ọdọn̄ Christ emi ẹkenịmde ẹnọ mbufo edi, kpa Jesus: emi heaven enyenede ndibọ kan̄a n̄kama, tutu esịm [mme ini edifiak n̄wụk kpukpru n̄kpọ, “NW”], kpa ini emi Abasi eketịn̄de aban̄a enye ke inua ndisana prophet Esie, emi ẹkedude toto ke editọn̄ọ ererimbot.”—Utom 3:19-21.

“Mme ini edifiak n̄wụk” emi ẹkenyene ndida “ini edidemede” otode Jehovah ndi. Edifiak n̄wụk oro ẹkebemde iso ẹtịn̄ ekenyene ndidi ke ikpehe iba. Akpa, ẹkenyene ndifiak n̄wụk eti idaha eke spirit, emi akade iso idahaemi. Ọyọhọ iba, ediwụk ata paradise ke isọn̄ eyetiene emi.

Ini Edifiak N̄wụk Ọtọn̄ọ

Nte apostle Peter okosiode owụt otuowo oro ke Jerusalem, heaven ama ‘ọbọ Jesus kan̄a akama.’ Emi ekedi ntre tutu ke 1914, ke ini Jesus akadade odudu ubọn̄ esie ọtọn̄ọ ndikara nte Edidem oro Abasi emekde. Ke ini oro, nte Peter ekebemde iso etịn̄, Jehovah ama “ọdọn̄” Eyen esie ke usụn̄ifiọk nte ke Enye ayayak Jesus anam udeme esie nte akpan owo ke mme uduak Abasi. Bible ada ndamban̄a usem etịn̄ aban̄a n̄kpọntịbe oro ete: “Ekem [Esop Abasi eke heaven] aman eyen, erenowo [Obio Ubọn̄ Abasi ke ubọk Jesus Christ], emi edidade esan̄ ukwak akara kpukpru mme idụt.”—Ediyarade 12:5.

Edi mme idụt ikoyomke ndisụk ibuot nnọ itie edikara Christ. Ke akpanikọ, mmọ ẹma ẹsụn̄i mme anam-akpanikọ andidu ke idak esie ke isọn̄, oro ẹdiọn̄ọde mfịn nte Mme Ntiense Jehovah. Ukem nte mme apostle oro ẹkebemde mmọ iso, Mme Ntiense ẹma ẹnam utom edinọ “ikọ-ntiense Jesus” ye unana ubiatini. (Ediyarade 12:17) Ubiọn̄ọ ama edemede ke utom oro mme ata Christian emi ẹkenamde oto ke idụt kiet esịm en̄wen. Ke 1918, ẹma ẹda mme akamautom ke ibuot itieutom Watch Tower Society ke Brooklyn, New York, ẹka esop ke ntak nsunsu edori ikọ ẹnyụn̄ ẹbiere n̄kpọkọbi anyan ini ẹnọ mmọ ke ufịk. Ke  ndusụk ini eketie nte utom edinọ ikọ ntiense eke eyomfịn “tutu esịm utịt ererimbot” idikwe unen.—Ediyarade 11:7-10.

Nte ededi, ke 1919, ẹma ẹsana mbonutom ibuot itieutom oro ẹkekọbide ẹyak ndien ke ukperedem ẹma ẹtebe mmọ ikpe ofụri ofụri ke kpukpru nsunsu ikọ oro ẹkedoride mmọ. Mmọ ikabiatke ini ndifiak ntọn̄ọ utom edifiak n̄wụk eke spirit. Ọtọn̄ọde ke ini oro, ikọt Jehovah ke ẹnyene anana-mbiet uforo eke spirit.

Ẹma ẹtọn̄ọ ntatara ubịnikọt edikpep mme owo ẹtode kpukpru idụt ndinam kpukpru n̄kpọ oro Christ eketemede mme anditiene enye ete ẹnam. (Matthew 28:20) Ekedi inem inem n̄kpọ didie ntem ndikụt mme owo oro ke akpa ẹkenyenede mme edu ẹbietde eke unam ẹkpụhọrede idaha ekikere mmọ! Mmọ ẹma ẹsio akani owo, emi esinyenede mme utọ edu nte “ifụtesịt,” “idiọk iban̄a,” ye “mbubiam ikọ” ẹduọk, ẹnyụn̄ ẹmen obufa owo ẹsịne, “emi ẹdiọn̄de diọn̄ ẹnam enye edi obufa, enyene mbiet [Abasi] Andibot enye.” Ke usụn̄ifiọk eke spirit, mme ikọ prọfet Isaiah ke ẹsu idem idahaemi: “Ndien wolf [owo oro ke akpa ekenyenede mme edu ẹbietde eke wolf] oyodụn̄ ye eyenerọn̄ [owo oro osụkde idem], nawụri-ekpe oyonyụn̄ ọsụhọde ana ye eyen-ebot: eyen-enan̄, ye abak lion, ye enan̄ ubom, ẹyenyụn̄ ẹna ọtọ kiet.”—Colossae 3:8-10; Isaiah 11:6, 9.

Edifiak N̄wụk Efen Efen Emekpere!

Ke adianade ye edifiak n̄wụk oro osụn̄ọde ke paradise eke spirit mfịn, ini emi ofụri ekondo nnyịn edikabarede edi ata paradise ke asan̄a ekpere usọp usọp. Ekpri ubak isọn̄ ekedi paradise ke ini Jehovah ekesịnde akpa ete ye eka nnyịn, Adam ye Eve, ke in̄wan̄ Eden. (Genesis 1:29-31) Ntak edi oro nnyịn ikemede nditịn̄ mban̄a edifiak n̄wụk Paradise. Nte ededi, mbemiso oro etịbede, ana ẹsio nsunsu ido ukpono oro mînọhọ Abasi ukpono ẹfep ke isọn̄. Ukara ukaraidem ererimbot emi edinam emi. (Ediyarade 17:15-18) Ekem, ẹyesobo mbon ukaraidem ye mbon unyamurua, adianade ye mbon oro ẹnọde mmọ ibetedem. Ke akpatre, ẹyekọbi akpatre ke otu andibiọn̄ọ Abasi—Satan kpa Devil ye mme demon esie—ke tọsịn isua—kpa uniọn̄ ini utom edifiak n̄wụk oro. Ke ini oro, “wilderness ye nsat-isọn̄ ẹyedara; desert oyonyụn̄ ebre, onyụn̄ asiaha ikọn̄ nte rose.” (Isaiah 35:1) Ofụri isọn̄ ọyọduọk odudu. (Isaiah 14:7) Ẹyekam ẹnam ediwak miliọn mbon oro ẹkekpan̄ade ẹfiak ẹdidu uwem ke isọn̄. Kpukpru owo ẹyekụt mme ufọn edifiak n̄wụk otode uwa ufak. (Ediyarade 20:12-15; 22:1, 2) Mme nnan, inan, m̀mê mbụn̄ọ ididụhe ke isọn̄. “Andidụn̄ ididọhọke ite, Ndọdọn̄ọ.” (Isaiah 33:24) Esisịt ini ke Tọsịn Isua Ukara Christ ama ekesịm utịt, ẹyekpọhọde Devil ye mme demon esie ke ibio ini ndien mmọ ẹyekụt nte uduak Abasi kaban̄a isọn̄ osude edisịm udomo oro. Ke akpatre, ẹyesobo mmọ ke nsinsi.—Ediyarade 20:1-3.

Ke ini ẹkụrede edifiak n̄wụk isọn̄ ke tọsịn isua, “kpukpru n̄kpọ eke ẹduọkde ibifịk” ẹyetoro Jehovah, ndien mmọ ẹyenam oro ke nsinsi nsinsi. (Psalm 150:6) Nte afo oyodu ke otu mmọ? Afo emekeme ndidu.