Nnyịn Idi Mmọ Emi Ẹbuọtde Idem

Ndinọ Ntọt Obio Ubọn̄ Abasi ke Mme Isuo Fiji

JESUS CHRIST ama etịn̄ inikiet aban̄a usụn̄ iba. Kiet an̄wan̄a onyụn̄ ada esịm n̄kpa. Enye eken esịre edi ada esịm uwem. (Matthew 7:13, 14) Man an̄wam mme owo ẹmek nnennen usụn̄, Jehovah Abasi ama aduak ete ẹkwọrọ eti mbụk Obio Ubọn̄ ke ofụri ererimbot. (Matthew 24:14) Ntem, mme owo ke kpukpru ebiet ke ẹkpan̄ utọn̄ ẹnọ etop Obio Ubọn̄, ndien ndusụk mmọ ke ẹmek uwem ebe ke ndikabade ndi “mmọ emi ẹbuọtde idem ẹsịm edinyan̄a ukpọn̄.” (Mme Hebrew 10:39) Nnyịn imesịn udọn̄ inọ fi ndikot mban̄a nte ndusụk owo ke Fiji ye mme n̄kpet n̄kpet isuo Edem Usụk Pacific eken ẹmekde uwem.

Mmọ Ẹma Ẹbuọt Idem ke Jehovah

Mere okosụk edi eyen ufọkn̄wed ke ini enye okokopde etop Obio Ubọn̄ ke akpa ini ke 1964. Ke ntak oro enye okodụn̄de ikpọn̄ ke isuo oro odude nsannsan, enye ikesiwakke ndisobo ye Mme Ntiense Jehovah. Nte ededi, nte ini akakade enye ama ekeme ndinyene nnennen ifiọk Bible. Etisịm ini oro, enye ama ọdọ ọbọn̄ obio mmọ. Nte utịp edimek oro Mere ekemekde ndida mme edumbet Bible ndu uwem, ebe esie ye mme iman esie ẹma ẹsinam n̄kpọ ibak ibak ye enye, ndien mbon obio mmọ ẹma ẹsisịn enye ke ndek. Kpa ye oro, enye ama ana baptism ke 1991.

Esisịt ini ke oro ebede, ebe Mere, Josua, ama okpụhọde edu esie onyụn̄ akam ọtọn̄ọ nditie n̄kop mme nneme Bible oro Mere ekesinyenede ye nditọ mmọ. Josua ama etre ndika Ufọkabasi Methodist. Kpa ye oro, nte ọbọn̄ obio, enye okosụk etetie ibuot ke mbono obio eke urua ke urua. Ke enyịn mbio obio, Josua ikanamke akpanikọ, koro Ufọkabasi Methodist ekedi akpan ubak uwem mbon obio-in̄wan̄ Fiji oro. Ntem, pastọ n̄kann̄kụk oro ama akpak Josua ete afiak edi akani ido ukpono esie.

Josua ama etịn̄ uko uko ete ke imọ ye ubon imọ ima inam edimek mmimọ inyụn̄ ibiere ndituak ibuot nnọ Jehovah Abasi “ke spirit ye ke akpanikọ.” (John 4:24) Ke mbono obio oro eketienede, ọbọn̄ ikpaisọn̄ ama ebiere ete Josua ye ubon esie ẹwọrọ ẹkpọn̄ obio nte mbon mbịn mfep. Ẹkenọ mmọ usen itiaba ndikpọn̄ isuo oro ye ufọk, isọn̄, ye mbun̄wụm mmọ—ih, ofụri n̄kpọ udu uwem mmọ.

Nditọete mmọ eke spirit ke isuo efen ẹma ẹn̄wam Josua ye ubon esie, ẹnọde mmọ ufọk ndidụn̄ ye isọn̄ nditọ mme mfri. Josua ye akpan esie ẹna baptism idahaemi, ndien eyen esie efen anam utom nte asuanetop eti mbụk oro mînaha baptism. Ke ndondo emi Mere ama esịn enyịn̄ nte asiakusụn̄ ofụri ini (anditan̄a Obio Ubọn̄ uyọhọ ini). Mmọ ndimek ndinam n̄kpọ Jehovah ama osụn̄ọ ke mmọ nditaba idaha ye inyene obụkidem, edi ukem nte apostle Paul, mmọ ẹbat emi ke ikpîkpu ke ẹmende ẹdomo ye se mmọ ẹbọde nte utịp.—Philippi 3:8.

Edimek Oro Abuanade Ubieresịt

Ndimek nditiene ubieresịt oro Bible ọnọde ukpep oyom mbuọtidem ye uko. Ntre ke ekedi ye Suraang n̄kaiferi oro akanade baptism obufa onyụn̄ odụn̄de ke Tawara, kiet ke otu isuo Kiribati. Suraang ama eben̄e ete ẹsio imọ ke ikpehe utom kiet ke utom imọ nte nurse ke ufọkibọk. Owo ikenemke esịt iban̄a eben̄e esie, osụn̄ọde ke ndinọ enye ekese aban̄a ekpri ufọkibọk kiet ke isuo oro odude nsannsan emi enye mîdikwe mbon en̄wen emi ẹdude ke ido ukpono esie.

Ke isuo oro esidi ido kpukpru mbufa owo ndiwa uwa nnọ “ekpo” n̄kann̄kụk oro. Mme owo oro ẹnịm ẹte ke owo nditre ndinam ntre edisụn̄ọ  ke n̄kpa. Sia Suraang mîkenyịmeke ẹnam edinam ukpono ndem emi ẹnọ enye ye mme nsan̄a esie, mbio obio-in̄wan̄ oro ẹma ẹbet ndikụt nte ekpo oro enye ekeduede mi owotde enye. Ke ini n̄kpọ ndomokiet mîkanamke Suraang m̀mê mme nsan̄a esie, ediwak ifet ẹma ẹberede ẹnọ enye ndinọ eti ikọ ntiense.

Edi mme idomo Suraang ikokụreke. Ndusụk n̄kparawa isuo oro ẹda edisabade n̄kpri iban oro ẹdide isuo oro nte n̄kpọ nduaidem. Nte ededi, Suraang ama esibiọn̄ọ mme etabi mmọ onyụn̄ omụm nsọn̄ọnda esie ke Abasi akama. Ke akpanikọ, enye ama ekeme ndinam utom nte asiakusụn̄ ofụri ini, idem okposụkedi oro enye ekesinamde utom nte nurse hour 24 ke usen.

Mbemiso usọrọ kiet oro ẹkenamde ẹnọ Suraang ke ini enye okoyomde ndikpọn̄ isuo oro, ikpọ owo obio oro ẹma ẹtịn̄ ẹte ke enye ekedi akpa ata isụn̄utom oro ekedide edise mmimọ. Ke ntak oro enye ọkọsọn̄ọde ada ọnọ mme edumbet Bible, mbon eken ke isuo oro ẹmenam n̄kpọ nte ọfọnde ẹban̄a etop Obio Ubọn̄.

Mme Ata N̄kpọ-Ata

Ndusụk obio-in̄wan̄ ndidu nsannsan ọwọrọ ke ikọt Jehovah ẹnyene ndisịn akamba ukeme ndibuana ke utom ukwọrọikọ ye edidụk mme mbono esop Christian. Kere ban̄a uwụtn̄kpọ Ntiense inan̄ oro ẹma ẹkena baptism—eren kiet ye iban ita—oro ẹsidade ediwak hour ndisan̄a n̄ka nnyụn̄ nnyọn̄ mme mbono esop. Isan̄ mmọ ama esịne edibe inyan̄ ita ke uka, ntre n̄ko ke unyọn̄. Ke ini mmọn̄ ọtọde, eyenete eren oro esibem iso ọwọk ebe, odụride akamba eso emi mme ekpat, n̄wed, ye mme ọfọn̄ mbono esop mmọ ẹdọn̄ọde. Ekem enye ayafiak ọwọk edin̄wam nditọete iban ita oro.

Ekpri otu efen, emi ẹsidụkde mme mbono esop ke isuo Nonouti oro odude nsannsan ke Kiribati, ẹsisobo mme n̄kpọ-ata oro ẹdide isio. Ufọk oro mmọ ẹsisopde idem esidụk owo itiaba m̀mê itiaita kpọt. Mbon eken oro ẹdụkde ẹsitie ke an̄wa ẹnyụn̄ọ ke ndudu ibibene esie oro ẹdade waya ẹbọp. Mbio obio-in̄wan̄ eken ẹsikụt itie mbono oro nte mmọ ẹbede ẹka ẹnyụn̄ ẹbede ẹnyọn̄ọ ndiye ufọkabasi mmọ. Nte ededi, mme asan̄autom Jehovah ẹfiọk ẹte ke edi mme owo, idịghe mme ufọk, ẹnen̄ede ẹdi se iyede ke enyịn Abasi. (Haggai 2:7) Eyenete an̄wan kiet oro anade baptism ke isuo oro ọsọn̄ inyụn̄ ikemeke ndisan̄a anyan usụn̄ isan̄. Edi n̄kaiferi kiet edide asuanetop oro mînaha baptism esin̄wam enye ke an̄wautom, akpatde enye ke ukpatn̄kpọ. Mmọ ẹwụt esịtekọm didie ntem ẹnọ akpanikọ!

Se iwakde ibe mme asuanetop 2,100 oro ẹnamde utom ke mme isuo Fiji ẹbiere ndika iso nnọ ntọt eti mbụk Obio Ubọn̄ Abasi. Ndien mmọ ẹnyene mbuọtidem nte ke ediwak owo efen efen ẹyekabade ẹdi “mmọ emi ẹbuọtde idem isịm edinyan̄a ukpọn̄.”

[Ndise obio ke page 8]

(Ama oyom ndikụt nte enye enen̄erede etie, se n̄wed)

Australia

Fiji