Isọn̄—Sụk Itie Ndomonse?

NSO ubọhọ ke emi edi ntem! Enye ama ebe udomo. Eyen ufọkn̄wed oro eketiede n̄kpọsọn̄ udomo oro akadade urua iba ama ọbọ ibọrọ udomo oro ọnọde enye inemesịt ke akpatre. Idahaemi enye ekeme ndibe n̄kenyene utom oro enye ekesiyomde kpukpru ini.

Ediwak owo ẹda uwem ke isọn̄ ke ukem usụn̄ oro. Mmọ ẹda enye nte akpa udomo oro anade kpukpru owo ẹtie. Mbon oro “ẹbede udomo” oro ẹbe ẹkenyene uwem oro ọfọnde akan ke n̄kpa ebede. Ke akpanikọ, ekpedi n̄kpọ mfụhọ edieke uwem oro idude idahaemi—emi edide ndinyụn̄ ndodu kpọt ọnọ ediwak owo—ekpedide ofụri se mme owo ẹkemede ndidori enyịn mban̄a. Okposụkedi ekenyenede nsọn̄idem ye uforo ke akamba ubak ini uwem esie, Job eke Bible ama ọdọhọ ete: “Owo eke n̄wan amande omụhọ usen, onyụn̄ oyụhọ ukụt.”—Job 14:1.

Ke owụtde ekikere ediwak owo, New Catholic Encyclopedia ọdọhọ ete: “Ubọn̄ eke heaven edi akan̄a oro Abasi enịmde ọnọ owo. . . . Ẹkeme ndidọhọ ke inemesịt owo ọkọn̄ọ ke enye ndinyene ọyọhọ inemesịt ke heaven.” Ndụn̄ọde oro Church of Christ akanamde ndondo emi ke United States owụt nte ke mbahade 87 eke ikie ke otu mbon oro ẹkebụpde mmọ mbụme ẹnịm ẹte ke eyedi idika heaven ke ikpade.

Ediwak mbon oro mîdịghe mme Christian ẹdori enyịn n̄ko ndikpọn̄ isọn̄ n̄ka ebiet oro ọfọnde akan ke ẹma ẹkekpan̄a. Ke uwụtn̄kpọ, mbon Muslim ẹdori enyịn ndika paradise eke heaven. Mme anditiene mme n̄ka Edisana Isọn̄ eke Ido Ukpono Buddha ke China ye Japan ẹnịm ẹte ke ebede ke mmimọ ndika iso n̄kot “Amitabha,” kpa enyịn̄ Anana-Utịt Un̄wana Buddha, iyafiak imana ke Edisana Isọn̄, m̀mê ke Paradise N̄kan̄ Edem Usoputịn, ebiet emi ididụn̄de ke akakan inemesịt.

Nte enemde, Bible, edisana n̄wed oro ẹkabarede ẹnyụn̄ ẹsuande atara akan ke ererimbot, iwụtke isọn̄ nte ebiet ndifehe mbọhọ, kpa mbiet itiat utọ-ukot. Ke uwụtn̄kpọ, enye ọdọhọ: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ke Bible n̄ko ke ẹkụt ọwọrọetop utịn̄ikọ Jesus oro: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.”—Matthew 5:5.

Ekikere oro ẹnyenede ke ofụri ofụri nte ke nnyịn ndidụn̄ ke isọn̄ edi ke ibio ini ọnọ ekikere nte ke n̄kpa edi usụn̄ adade esịm uwem inemesịt. Ke edide ntre, do n̄kpa enen̄ede edi edidiọn̄. Edi nte mme owo ke ofụri ofụri ẹkere ẹban̄a n̄kpa ke usụn̄ oro, mîdịghe nte mmọ ẹdomo ndinam uwem emi akaka iso? Ifiọk n̄kpọntịbe owụt ke ini mme owo ẹnyenede ndusụk udomo nsọn̄idem ye ifụre, mmọ isiyomke ndikpa.

Nte ededi, ke ntak oro uwem ke isọn̄ ọyọhọde ye idiọkn̄kpọ ye ndutụhọ, ediwak owo ẹsụk ẹkekere ẹban̄a heaven nte n̄kukụre ebiet ẹkemede ndinyene ata emem ye inemesịt. Nte heaven edi sụk ebiet ata emem, emi ọbọhọde idiọkn̄kpọ ye unana edidianakiet ofụri ofụri? Ndien nte uwem ke n̄kpa ebede enyene ndidu n̄kukụre ke ndusụk ikpehe n̄kan̄ heaven? Mme ibọrọ Bible ẹkeme ndikpa fi idem. Mbọk kot ka iso.