Nsinsi Inemesịt—Ke Heaven m̀mê ke Isọn̄?

NDI inemesịt fo ọkọn̄ọ akpan akpan ke ebiet oro afo odụn̄de? Ediwak owo ẹyesọsọp ẹnyịme nte ke inemesịt enen̄ede ọkọn̄ọ ke mme n̄kpọ nte nsọn̄idem, uduak ke uwem, ye eti itie ebuana ye mbon efen. N̄ke Bible kiet esịn enye ke usụn̄ emi: “Ikọn̄ eke owo adiade ke ebiet eke ima odude, ọfọn akan edisehe unam ye usua ke esịt.”—Mme N̄ke 15:17.

Nte ededi, ke mfụhọ, mbụk ebietidụn̄ isọn̄ nnyịn ọyọhọ ye usua, afai, ye mme orụk idiọkido eken ke anyan ini. Edi nso kaban̄a heaven, m̀mê obio mme spirit, ebiet emi ediwak owo ẹdoride enyịn ndika ke mmọ ẹma ẹkpan̄a? Nte enye edi ebiet ata emem ye ifụre kpukpru ini, ananade orụk mfịna ekededi, nte ẹwakde ndikere?

Bible ekpep ete ke Abasi odụn̄ ke heaven ke adianade ye ediwak miliọn edibotn̄kpọ eke spirit oro ẹkotde mme angel. (Matthew 18:10; Ediyarade 5:11) Ẹtịn̄ ẹban̄a mmọ emi nte “nditọ Abasi” eke spirit. (Job 38:4, 7) Ukem nte mme owo, mme angel n̄ko ẹnyene ifụre ndimek n̄kpọ nnọ idem; mmọ idịghe ukwakutom. Ke ntre, ọwọrọ ke mmọ n̄ko ẹkeme ndimek ndinam se inende m̀mê ndinam se ikwan̄ade. Nte mme angel ẹkpemek ndinam se ikwan̄ade? Ekeme ndikpa ndusụk owo idem ndifiọk nte ke ediwak tọsịn isua emi ẹkebede, ediwak mme angel, ke akpanikọ, ẹma ẹnam idiọk ẹdian Abasi—mmọ ẹma ẹsọn̄ ibuot ye enye!—Jude 6.

Mbon Nsọn̄ibuot ke Heaven

Idiọkn̄kpọ ama owụt idem ke obio mme spirit ke ntak nsọn̄ibuot angel kiet, oro ẹkedikotde Satan (Andibiọn̄ọ) ye Devil (Ọdọk-Edidọk). Angel emi ekesisụkde ibuot inikiet mi ama emek ndinam se ikwan̄ade ke ifụre uduak esie. Ke oro ebede enye ama akabade enyene idiọk odudu ke idem mme edibotn̄kpọ eke spirit eken, anamde ke eyo Noah, mbemiso Ukwọ, ata ediwak mmọ ẹma ẹdiana ye Satan ke ndisọn̄ ibuot ye Abasi.—Genesis 6:2, ikọ idakisọn̄, NW; 2 Peter 2:4.

Owo ikebịnke mme angel oro ẹkeduọde ẹkpọn̄ usụn̄ mi ision̄o ke heaven ke ndondo oro. Utu ke oro, ẹma ẹyak mmọ ẹka iso ẹdu—nte an̄wan̄ade ye ndusụk ukpan—ke ediwak tọsịn isua. * Nte ededi, ke ini Abasi mîkekemeke ndiyọ mme anamidiọk emi aba, ẹma “ẹsion̄o” mmọ ke heaven ẹduọn̄ọ, man ẹkpesobo mmọ ke akpatre. Ekem uyo ama oto heaven ọdọhọ ete: “Ntre ẹdara, O mme heaven, ye mbufo emi ẹdụn̄ọde ke esịt.” (Ediyarade 12:7-12) Nte an̄wan̄ade, mme anam-akpanikọ angel ẹma ẹnen̄ede ẹdat esịt nte ke ẹma ẹsion̄o oburobụt mbon ntịme oro ẹfep ke heaven ke akpatre!

Ke ikerede iban̄a ọyọhọ ntọt emi mîdịghe kpukpru owo ẹdiọn̄ọ mi, ana in̄wan̄în̄wan̄ nte ke ata emem ikemeke ndidu ini ekededi oro mme enyene-ifiọk edibotn̄kpọ ẹfụmide mme ibet ye mme edumbet Abasi. (Isaiah 57:20, 21; Jeremiah 14:19, 20) Ke n̄kan̄ eken, ke ini kpukpru owo ẹnịmde ibet Abasi, emem ye ifụre ẹsidu. (Psalm 119:165; Isaiah 48:17, 18) Ntre edieke kpukpru owo ẹkpemade Abasi ẹnyụn̄ ẹsụkde ibuot ẹnọ enye ẹnyụn̄ ẹmade kiet eken, nte isọn̄  ikpenen̄ekede idi inem inem, ebietidụn̄ inemesịt? Bible ọbọrọ ete ih!

Edi nso kaban̄a mbon oro ẹsịnde ndikpụhọde ndiọi usụn̄ mmọ ke ntak ibụk? Nte mmọ ẹyetịmede emem mbon oro ẹnen̄erede ẹyom ndinam uduak Abasi ke nsinsi? Baba, Abasi ama anam n̄kpọ ye mme idiọk angel oro ke heaven, ndien enye ayanam n̄kpọ n̄ko ye mme idiọk owo mi ke isọn̄.

Isọn̄ Emi Ẹnamde Asana

Abasi ama ọdọhọ ete: “Enyọn̄ edi ebekpo mi, isọn̄ onyụn̄ edi udorukot mi.” (Isaiah 66:1) Sia edide ata edisana, Abasi idiyakke idiọkn̄kpọ asabade “udorukot” esie ke nsinsi. (Isaiah 6:1-3; Ediyarade 4:8) Kpa nte enye okosion̄ode mme idiọk spirit efep ke heaven, ntre ke enye edinyụn̄ osion̄o kpukpru ndiọi owo efep ke isọn̄, nte mme ufan̄ikọ Bible oro ẹtienede mi ẹwụtde:

“Ẹyekpok mme idiọk owo ẹfep: edi mmọ eke ẹbetde Jehovah ẹyeda isọn̄ ẹnyene.”—Psalm 37:9.

“Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt. Edi ẹyesobo mme idiọk owo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”—Mme N̄ke 2:21, 22.

‘Enen Abasi ke enyịn ndida ukụt nsio usiene nnọ mmọ emi ẹsịnde mbufo ẹkụt ukụt, ndinyụn̄ nda nduọk-odudu nnọ mbufo emi ẹkụtde ukụt, kpa nte Enye edinamde ye nnyịn n̄ko, ke ini emi Ọbọn̄ Jesus editode ke heaven ọbiọn̄ọde ke ikan̄ emi asakde, ye mme angel odudu Esie, edisio usiene ọnọ mmọ emi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus; emi ẹdidian̄arede ke iso Ọbọn̄ ye ke iso ubọn̄ odudu Esie, ẹdibọ ufen nsinsi nsobo.’—2 Thessalonica 1:6-9.

“Ererimbot [idiọk ubonowo] ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.

Nte Isọn̄ Ayaka Iso Ndidu ke Emem?

Okposụkedi N̄wed Abasi owụtde in̄wan̄în̄wan̄ nte ke Abasi ndiyọ mme idiọkowo enyene adan̄a, didie ke nnyịn ikeme nditịm mfiọk nte ke idiọkn̄kpọ idifiakke itọn̄ọ, ke ẹma ẹkesio ẹfep inikiet? Kamse, ke etienede Ukwọ usen Noah enye ama ọsọsọp afiak ọtọn̄ọ ekesịm udomo oro Abasi ekenyenede ndibiat mme idiọk uduak ubonowo ebe ke nditịmede usem mmọ.—Genesis 11:1-8.

Akpan ntak nnyịn ndinyene mbuọtidem nte ke idiọkn̄kpọ idifiakke itọn̄ọ edi nte ke idịghe mme owo ẹdikara isọn̄ aba nte ekedide esisịt ini ke Ukwọ ama ekebe. Utu ke oro, edi Obio Ubọn̄ Abasi edikara. Ke akarade oto heaven, Obio Ubọn̄ emi edidi n̄kukụre ukara isọn̄. (Daniel 2:44; 7:13, 14) Enye ayanam n̄kpọ usọp usọp aban̄a owo ekededi oro edidomode ndifiak ntọn̄ọ idiọkn̄kpọ. (Isaiah 65:20) Ke akpanikọ, enye ke akpatre oyosobo ata andikọtọn̄ọ idiọkido—Satan kpa Devil—ke adianade ye mme demon, kpa mme idiọk angel oro ẹketienede enye.—Rome 16:20.

Adianade do, ubonowo idinyeneke ntak nditịmede esịt mban̄a udia, edisịnen̄kpọ, itie udakibuot, ye utom—emi unana mmọ anamde ndusụk owo mfịn ẹdu uwem ubiatibet. Ih, ẹyenam ofụri isọn̄ akabade edi paradise oro edision̄ode ekese mbun̄wụm ọnọ kpukpru owo.—Isaiah 65:21-23; Luke 23:43.

Ke edide akpan n̄kpọ akan, Obio Ubọn̄ oro eyekpep mme andidu ke idak esie usụn̄ uwem emem ke adan̄aemi anamde mmọ ẹsịm ọyọhọ mfọnmma eke owo ke ukem ini oro. (John 17:3; Rome 8:21) Ke oro ebede, ubonowo idinyeneke ndin̄wana aba ye mme mmeme ye mme ntụhọ idiọkn̄kpọ, anamde ọyọhọ nsụkibuot nnọ Abasi edi mmemmem ye inem inem n̄kpọ, nte ekedide ye mfọnmma owo oro Jesus. (Isaiah 11:3) Ke akpanikọ, Jesus ama ọsọn̄ọ ada anam akpanikọ  ọnọ Abasi idem kpa ye akamba idomo ye ndutụhọ—mme n̄kpọ oro mîdidụhe aba ke Paradise.—Mme Hebrew 7:26.

Ntak Ndusụk Owo Ẹkade Heaven

Nte ededi, ediwak mme andikot Bible ẹdiọn̄ọ mme ikọ Jesus emi: “Ediwak ufọk ẹdu ke ebiet Ete Mi . . . mmọn̄ n̄ka n̄ketịm itie nnịm nnọ mbufo.” (John 14:2, 3) Nte emi ituahake ye ekikere nsinsi uwem ke paradise isọn̄?

Mme ukpepn̄kpọ emi inyeneke ntuaha. Ke akpanikọ, kiet ọsọsọn̄ọ eken. Akpa kan̄a, Bible ọdọhọ ete ke ibat ibat mme anam-akpanikọ Christian kpọt—oro edi, owo 144,000 ke otu mmọ—ke ẹbon nte mme edibotn̄kpọ eke spirit ndidu uwem ke heaven. Ntak ẹnọde mmọ utịbe utịbe utịp emi? Koro mmọ ẹnam otu oro John okokụtde ke n̄kukụt, oro ‘ẹdude uwem, ẹnyụn̄ ẹdade ubọn̄ ye Christ ke thousand isua.’ (Ediyarade 14:1, 3; 20:4-6) Ke ẹmende ẹdomo ye ediwak biliọn owo ke isọn̄, 144,000 oro ẹnen̄ede ẹdi “ekpri otu erọn̄.” (Luke 12:32) Akan oro, sia ẹma ẹkesobo mme ọsọ mfịna ubonowo, ukem nte Jesus mmọ ẹyekeme “nditiene nnyịn n̄kụt mmem-idem nnyịn” nte mmọ ẹsede enyịn ẹban̄a edifiak nnam ubonowo ye isọn̄ ẹdu ke eti idaha.—Mme Hebrew 4:15.

Isọn̄—Nsinsi Ebietidụn̄ Ubonowo

Ebede ke ndinọ uwa ufak Jesus Christ, Abasi ama ọtọn̄ọ nditan̄ owo 144,000 mbok ke se ikperede ndisịm isua 2,000 emi ẹkebede, ndien mme uyarade ẹwụt nte ke otu emi idahaemi ekem ibat. (Utom 2:1-4; Galatia 4:4-7) Nte ededi, uwa Jesus ikedịghe kaban̄a idiọkn̄kpọ eke 144,000 kpọt, “edi eke ofụri ererimbot nde.” (1 John 2:2) Ntem, kpukpru owo oro ẹbuọtde idem ye Jesus ẹnyene idotenyịn nsinsi uwem. (John 3:16) Owo idinamke mbon oro ẹdede ke udi edi oro ẹdude ke ibuot uti n̄kpọ Abasi ẹset ke n̄kpa ẹka heaven, edi ẹdinam ẹset ẹdidu uwem ke isọn̄ oro ẹma ẹkanam asana. (Ecclesiastes 9:5; John 11:11-13, 25; Utom 24:15) Nso idina ibet mmọ do?

Ediyarade 21:1-4 ọnọ ibọrọ, ọdọhọde ete: “Sese, ebiet idụn̄ Abasi omodu ye owo. . . . Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” (Sịghisịghi ubọkn̄wed edi eke nnyịn.) Kere ban̄a oro—ẹnam mme owo ẹbọhọ n̄kpa, ndien ubiak ye ntuan̄a oro enye esikamade ẹbe ẹfep ke nsinsi! Ke akpatre, akpa uduak Jehovah kaban̄a isọn̄ ye ubonowo eyenyene ubọn̄ ubọn̄ edisu esie.—Genesis 1:27, 28.

Edimek Nnyịn—N̄kpa m̀mê Uwem

Akananam owo ikọnọhọ Adam ye Eve edimek ndika heaven. Edimek mmọ ekedi ndisụk ibuot nnọ Abasi nnyụn̄ ndu nsinsi uwem ke paradise isọn̄ m̀mê ndisọn̄ ibuot ye enye nnyụn̄ n̄kpa. Ke mfụhọ, mmọ ẹma ẹmek ndisọn̄ ibuot ndien ke ntre ẹma ẹfiak ke “ntan” isọn̄. (Genesis 2:16, 17; 3:2-5, 19) Akananam ikedịghe uduak Abasi inọ ofụri ubonowo ndikpa nnyụn̄ nto udi n̄kodụn̄ ke heaven. Abasi ama obot akwa udịm angel ndidụn̄ ke heaven; mme edibotn̄kpọ eke spirit emi idịghe mme owo oro ẹma ẹkekpan̄a oro ẹnamde ẹset ẹkedu uwem ke heaven.—Psalm 104:1, 4; Daniel 7:10.

Nso ke ana nnyịn inam man ibọ edidiọn̄ edidu uwem ke nsinsi ke Paradise ke isọn̄? Akpa usio-ukot edi ndikpep Ikọ Abasi, kpa Edisana Bible. Jesus ọkọbọn̄ akam ete: “Ndien nsinsi uwem oro edi ndifiọk fi, ata Abasi kierakiet, ye Enye emi Afo ọkọdọn̄de, kpa Jesus Christ.”—John 17:3.

Ndida ifiọk oro nsịn ke edinam edi usio-ukot efen oro adade esịm nsinsi inemesịt ke Paradise. (James 1:22-24) Mbon oro ẹdade Ikọ Abasi ẹdu uwem ẹnyene idotenyịn edida enyịn mmọ n̄kụt edisu mme utọ aduai-owo-idem ntịn̄nnịm ikọ nte enye oro ẹwetde ke Isaiah 11:9, emi ọdọhọde ete: “Mmọ [ubonowo] idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.”—Sịghisịghi ubọkn̄wed edi eke nnyịn.

[Mme Ikọ idakisọn̄]

 [Mme ndise ke page 7]

“Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” —Psalm 37:29