Ndi Mmanam Edisana Spirit Edi Ọkpọkpọ Andin̄wam Mi?

MME ekpep ukpepn̄kpọ ido ukpono, ye mme owo ke ofụri ofụri, ẹnyene nsio nsio ekikere ẹban̄a se edisana spirit Abasi edide. Edi, utọ eyịghe oro inyeneke ufọn. Bible anam se edisana spirit edide enen̄ede an̄wan̄a. Utu ke ndidi owo, nte ndusụk owo ẹdọhọde, enye edi okopodudu anamutom odudu oro Abasi adade ndinam uduak esie.—Psalm 104:30; Utom 2:33; 4:31; 2 Peter 1:21.

Sia edisana spirit enyenede n̄kpet n̄kpet ebuana ntre ye edinam uduak Abasi, nnyịn ikpenyene ndiyom uwem nnyịn odu ke n̄kemuyo ye enye. Nnyịn ikpenyene ndiyom enye edi ọkpọkpọ andin̄wam nnyịn.

Andin̄wam—Ntak Ẹyomde?

Ke ekerede aban̄a ini enye edikpọn̄de isọn̄, Jesus ama ọsọn̄ọ ọnọ mme mbet esie ete: “Nyeben̄e Ete, ndien Enye ọyọnọ mbufo andin̄wam efen, man Enye edidu ye mbufo ke nsinsi.” Ndien afiak etịn̄ ete: “Edi ntịn̄ akpanikọ nnọ mbufo; edinyọn̄ Mi ọyọfọn ye mbufo: koro edieke mmenyọn̄ke, andin̄wam iditieneke mbufo; edi mma nnyọn̄, nyọdọn̄ Enye etiene mbufo.”—John 14:16, 17; 16:7, NW.

Jesus ama ọnọ mme mbet esie akpan utom ke nditeme mmọ ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Emi ikedịghe mmemmem utom, koro ẹkenyene ndinam enye kpa ye ubiọn̄ọ.—Matthew 10:22, 23.

Ubiọn̄ọ otode an̄wa ekenyene ndisan̄a ye ndusụk udomo ntuaha ke esịt esop. Paul ama ewet n̄wed ọnọ ẹsọk mme Christian ke Rome ke n̄kpọ nte 56 E.N., ete: “Mmekpe mbufo ubọk nditọ-ete, ẹkama enyịn ẹse mmọ emi ẹtọde ubahade ke otu mbufo, ẹnyụn̄ ẹnamde n̄kpọ ẹsịn owo ẹduọ, mînyụn̄ isan̄ake ikekem ye edikpep eke ẹkekpepde mbufo ẹte ẹnam. Ẹdian̄ade ẹkpọn̄ mmọ.” (Rome 16:17, 18) Idaha emi eyenen̄ede ọdiọk ke ini mme apostle ẹkpan̄ade. Paul ama ọtọt ete: “Mmọfiọk nte, ke mma nnyọn̄, mme idiọk unam ẹyedụk ke otu mbufo, idinyụn̄ ituaha otu erọn̄ mbọm; mme owo ẹyenyụn̄ ẹdaha ẹda ke otu mbufo ẹtịn̄ ukwan̄ ikọ, man ẹdụri mbet ẹtiene mmọ.”—Utom 20:29, 30.

Ama oyom un̄wam Abasi man ẹkan mme n̄kpọ ubiọn̄ọ emi. Enye ama ọnọ un̄wam oro ebe ke Jesus. Ke enye ama ekeset ke n̄kpa, ke usen Pentecost 33 E.N., ‘edisana spirit ama ọyọhọ kpukpru’ mme anditiene enye ẹkedide n̄kpọ nte owo 120 ke idem.—Utom 1:15; 2:4.

Mme mbet ẹma ẹfiọk ẹte ke edisana spirit ẹken̄wan̄ade ẹduọk mmimọ ke edinam emi ekedi un̄wam oro Jesus ọkọn̄wọn̄ọde. Idahaemi mmọ nte eyịghe mîdụhe ẹma ẹtịm ẹfiọk idiọn̄ọ oro Jesus ọkọnọde: “[Andin̄wam, NW], kpa Edisana Spirit, emi Ete edinọde edi ke enyịn̄ Mi, Enye eyekpep mbufo kpukpru n̄kpọ, onyụn̄ anam mbufo ẹti kpukpru se Ami n̄ketịn̄de nnọ mbufo.” (John 14:26, sịghisịghi ubọkn̄wed edi eke nnyịn.) Enye ama okot enye n̄ko ‘[andin̄wam, NW], kpa Spirit akpanikọ.’—John 15:26.

Didie ke Spirit Edi Andin̄wam?

Spirit ekenyene ndinam n̄kpọ nte andin̄wam ke nsio nsio usụn̄. Akpa, Jesus ama ọn̄wọn̄ọ ete ke enye eyeti mme mbet esie mme n̄kpọ oro enye eketịn̄de ọnọ mmọ. Se ikọ esie ọkọwọrọde ama akan ikpîkpu edin̄wam mmọ ẹti mme ikọ.  Spirit ekenyene ndin̄wam mmọ ẹfiọk se mme n̄kpọ oro enye ekekpepde ẹkenen̄erede ẹwọrọ. (John 16:12-14) Ke ibio ibio, spirit oro ekenyene ndinam mme mbet esie ẹtịm ẹfiọk akpanikọ. Apostle Paul ama ewet ke ukperedem ete: “Abasi akayarade mme n̄kpọ emi ọnọ nnyịn ke Spirit Esie; koro Spirit ọdọdụn̄ọde kpukpru n̄kpọ, kpa nditụn̄ọ n̄kpọ Abasi.” (1 Corinth 2:10) Man mme anditiene Jesus oro ẹyetde aran ẹkeme ndiyak nnennen ifiọk nnọ mbon efen, ama oyom ifiọk mmọ enyene eti nsọn̄ọ.

Ọyọhọ iba, Jesus ama ekpep mme mbet esie ndibọn̄ akam nnyụn̄ nnam ntre ndien ndien. Edieke mmọ ke ndusụk ini mîkọfiọkke se ẹkpeben̄ede, spirit ama ekeme ndinam n̄kpeubọk nnọ m̀mê ndin̄wam mmọ. “Kpa ntre n̄ko ke Spirit onyụn̄ anyan̄a mmemidem nnyịn: koro nnyịn mîfiọkke ndibọn̄ akam nte nnyịn ikpọbọn̄de: edi Spirit ke Idem Esie anam n̄kpe-ubọk ọnọ nnyịn ye mmụm eke owo mîkemeke nditịn̄.”—Rome 8:26.

Ọyọhọ ita, spirit ekenyene ndin̄wam mme mbet Jesus ke ndida nnọ akpanikọ an̄wan̄wa. Enye ama ọtọt mmọ ete: “Mmọ ẹyeyak mbufo ẹsịn ke ubọk mme esop, ndien ẹyemia mbufo ke mme synagogue mmọ; ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi, kpan̄ mbufo ẹdi ntiense ẹnọ mmọ ye mme Gentile. Edi ke ini ẹdiyakde mbufo ẹnọ, ẹkûtịmede esịt ẹkere, m̀mê ẹdidọhọ didie m̀mê ẹditịn̄ nso; koro kpa idaha oro ke ẹyenọ mbufo se ẹditịn̄de. Koro idịghe mbufo ẹtịn̄ ikọ, edi Spirit Ete mbufo esịne mbufo ke esịt etịn̄.”—Matthew 10:17-20.

Edisana spirit ayan̄wam n̄ko ndinam ẹdiọn̄ọ esop Christian onyụn̄ onụk mme andibuana ke enye ndinam mme ọkpọkpọ ubiere oro ẹwụtde eti ibuot. Ẹyak nnyịn ineme ikpehe iba eke ibuot nneme emi ọyọhọ ọyọhọ inyụn̄ ise se mmọ ẹwọrọde ẹnọ nnyịn mfịn.

Ndinam N̄kpọ Nte Idiọn̄ọ

Ke ediwak isua ikie mme Jew ẹma ẹnam utom ke idak Ibet Moses nte ndimek ikọt Abasi. Ke ntak oro mmọ ẹkesịnde Jesus nte Messiah, enye ama ebem iso etịn̄ ete ke ibịghike ẹyesịn mmọ ke idemmọ: “Nte akanam mbufo ikotke n̄wed, ẹte, Itiat emi mme ọbọp-ufọk ẹsịnde amakabade edi etubom inụk: Emi oto Jehovah, nnyịn inyụn̄ ise enye ke utịbe? Mmọdo ndọhọ mbufo nte, Ẹyebọ mbufo Obio Ubọn̄ Abasi, ẹyak ẹnọ idụt emi edin̄wụmde mfri esie.” (Matthew 21:42, 43) Ke ndondo oro ẹma ẹketọn̄ọ esop Christian ke Pentecost 33 E.N., mme anditiene Christ ẹma ẹkabade ẹdi ‘idụt emi on̄wụmde mfri esie.’ Ọtọn̄ọde ke ini oro ka iso, esop emi ekedi usụn̄ unyene nneme Abasi. Man an̄wam mme owo ndifiọk idụt oro ẹkewọn̄ọrede mfọn Abasi emi ẹnọ, Abasi ama ọnọ in̄wan̄in̄wan̄ idiọn̄ọ.

Ke Pentecost edisana Spirit ama anam mme mbet ẹkeme ndisem mme usem oro akanam mmọ mîkekpepke, anamde mme andida nse ẹdu ke n̄kpaidem ẹnyụn̄ ẹbụp ẹte: “Nsidi ntak ndien eke kpukpru nnyịn ikopde nte mmọ ẹsemde usem eke ikamanade ke esịt?” (Utom 2:7, 8) Ukeme ndisem mme usem oro mmọ mîkekpepke, ke adianade ye ‘mme apostle ndinam ediwak utịbe-n̄kpọ ye mme idiọn̄ọ,’ ama anam n̄kpọ nte owo tọsịn ita ẹfiọk ẹte ke enen̄ede edi spirit Abasi akanam utom.—Utom 2:41, 43.

N̄ko, ebede ke mmọ ndision̄o “mbun̄wụm spirit”—ima, idatesịt, emem, ime, mfọn-ido, eti ido, edinam akpanikọ, ifụre ifụre ido, mfara ke idem—ẹma ẹtịm ẹdiọn̄ọ ke mme mbet Christ ẹdi mme asan̄autom Abasi. (Galatia 5:22, 23) Ke akpanikọ, ima ama anam ẹdiọn̄ọ ata esop Christian ke n̄wọrọnda usụn̄. Jesus ama ebem iso etịn̄ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”—John 13:34, 35.

Mme andibuana ke akpa esop Christian ẹma ẹnyịme ndausụn̄ edisana spirit Abasi ẹnyụn̄ ẹbọ ufọn ẹto un̄wam oro enye ọkọnọde. Ke adan̄aemi mme Christian mfịn ẹfiọkde ẹte ke Abasi inamke mme akpan̄kpa ẹset inyụn̄ inamke mme utịben̄kpọ idahaemi nte enye akanamde ke akpa isua ikie, mmọ ẹyak mbun̄wụm spirit Abasi anam ẹdiọn̄ọ nte ke mmọ ẹdi mme ata mbet Jesus Christ.—1 Corinth 13:8.

Andin̄wam ke Ndinam Mme Ọkpọkpọ Ubiere

Ẹkeda edisana spirit ẹwet Bible. Ntem, ke ini nnyịn iyakde Bible ada nnyịn usụn̄, enye etie  nte n̄kpọ eke edisana spirit ọnọde nnyịn ukpep. (2 Timothy 3:16, 17) Enye ekeme ndin̄wam nnyịn inam mme ubiere oro ẹwụtde eti ibuot. Edi nte nnyịn imesiyak enye anam ntre?

Nso kaban̄a utom oro nnyịn imekde? Edisana spirit ayanam nnyịn ikeme ndise utom oro iyomde ndimek ke idaha use n̄kpọ Jehovah. Utom nnyịn ekpenyene ndidu ke n̄kemuyo ye mme edumbet Bible, ndien ke ọfọnde akan enye ekpenyene ndin̄wam nnyịn ibịne mme utịtmbuba ukara Abasi. Okụkọfiọn̄ m̀mê uwọrọiso ye uku oro ẹdude ke utom inen̄ekede idi akpan n̄kpọ. Se idide akpan n̄kpọ ikan edi m̀mê enye ọnọ nnyịn mme n̄kpọ oro ẹyomde ke uwem onyụn̄ ayak nnyịn inyene ini ye ifet oro ekemde man ibiom mme mbiomo Christian nnyịn.

Udọn̄ ndikop inem uwem edi ndammana onyụn̄ enen. (Ecclesiastes 2:24; 11:9) Ntre Christian oro adade ukem ukem ekeme ndibịne unọ idem nduọkodudu man enyene odudu ye inemesịt. Edi enye enyene ndimek unọ idem nduọkodudu oro owụtde mbun̄wụm spirit, idịghe orụk oro owụtde “ubọk-utom obụkidem.” Paul anam an̄wan̄a ete: “Ndien ubọk-utom obụkidem ayarade, oro edi use, ye mbubiam ido, ye obukpo ido, ye edikpono-ndem, ye edibre-idiọn̄, ye usua, ye utọk, ye ufụp, ye iyatesịt, ye ndomoidem, ye ubahade, ye edisiak isio n̄ka, ye udu, ye ediyụhọ mmịn, ye etịme-etịme ido, ye mme ido eke ẹtiede ntre.” Ẹkpenyene n̄ko ndifep ‘nditan̄ idem, ndiyat kiet eken esịt, ndinyụn̄ mfịbe ufụp ye kiet eken.’—Galatia 5:16-26.

Ntre ke edi ke se iban̄ade edimek mme ufan. Owụt eti ibuot ndimek mmọ nte ekemde ye idaha eke spirit, idịghe nte ekemde ye nte owo etiede ke enyọn̄ enyọn̄ idem m̀mê se owo enyenede. Nte an̄wan̄ade David ekedi ufan Abasi, koro Abasi eketịn̄ aban̄a enye nte “owo emi ekemde esịt ye [imọ].” (Utom 13:22) Ke ofụmide nte enye etiede ke enyọn̄ enyọn̄ idem, Abasi ama emek David ndidi edidem Israel, nte ekemde ye edumbet emi: “[Nsehe] nte owo esede; koro owo esede enyịn, edi Jehovah ese esịt.”—1 Samuel 16:7.

Ediwak tọsịn itie ufan ẹmebiara ke ntak oro mmọ ẹkekọn̄ọde ke nte owo etiede ke enyọn̄ enyọn̄ idem m̀mê se owo enyenede. Mme itie ufan oro ẹkọn̄ọde ke abian̄a abian̄a inyene ẹkeme nditre ke mbuari. (Mme N̄ke 14:20) Ikọ Abasi eke odudu spirit ọnọ nnyịn item ete ke ini imekde mme ufan, nnyịn ikpenyene ndimek mbon oro ẹkemede ndin̄wam nnyịn inam n̄kpọ Jehovah. Enye asian nnyịn ete iwụk ntịn̄enyịn ke ndinọnọ utu ke ndibọbọ koro ndinọnọ esida ekese inemesịt edi. (Utom 20:35) Ini ye ima ẹsịne ke otu mme ata ọsọn̄urua n̄kpọ oro nnyịn ikemede ndinọ mme ufan nnyịn.

Ye Christian oro oyomde nsan̄a ndọ, Bible ọnọ item eke odudu spirit. Ke n̄kan̄ kiet, enye ọdọhọ ete: ‘Se be iso ye nte owo etiede. Se ukot.’ Ukot? Ih, ke usụn̄ifiọk emi: Nte ẹda mmọ ẹnam utom Jehovah edide edikwọrọ eti mbụk, ndien ke ntem nte mmọ ẹye, yak idọhọ ntre, ke enyịn esie? Nte mmọ ẹsịne etop akpanikọ ye eti mbụk emem nte ikpaukot? Nnyịn ikot ite: “Ukot owo eti mbụk eye didie ke enyọn̄ ikpọ obot! ukot owo eke ọkwọrọde emem, eke obụkde eti n̄kpọ, eke ọkwọrọde edinyan̄a; ọdọhọ Zion, ete, Abasi fo ada ubọn̄!”—Isaiah 52:7; Ephesus 6:15.

Sia idude uwem ke “ndiọkeyo,” nnyịn imoyom un̄wam ke ndinam uduak Abasi. (2 Timothy 3:1) Andin̄wam oro, edisana spirit Abasi, ama ọnọ utom mme Christian ke akpa isua ikie okopodudu ibetedem, esịnede ndidi ọkpọkpọ andin̄wam mmọ. Ifịk ifịk edikpep Ikọ Abasi, kpa n̄wed oro ẹdade edisana spirit ẹwet, edi akpan usụn̄ oro nnyịn n̄ko ikemede ndinam edisana spirit edi ọkpọkpọ andin̄wam nnyịn. Nte nnyịn imanam oro?

 [Ndise ke page 23]