Nte Afo Ekemede Ndisan̄a N̄kpere Abasi

“Ẹsan̄a ẹkpere Abasi, ndien enye ayasan̄a ekpere mbufo,” ntem ke James 4:8 ọdọhọ. Ke ndiwụt adan̄a nte Jehovah Abasi oyomde mme owo ẹnyene n̄kpet n̄kpet itie ebuana ye imọ, enye ama ọnọ Eyen esie ke ibuot nnyịn.

KE ETỊN̄DE aban̄a ima ima usio-ukot oro, apostle John ama ewet ete: “Nnyịn ima [Abasi], koro enye ekebemde iso ama nnyịn.” (1 John 4:19) Edi man nnyịn owo kiet kiet isan̄a ikpere Abasi, ana nnyịn inam ndusụk usio-ukot. Mmọ ẹdi ukem ye usụn̄ inan̄ oro nnyịn isisan̄ade ikpere mme ekemmọ owo, nte ẹkewụtde ke ibuotikọ oro ekebemde iso. Ẹyak nnyịn idụn̄ọde mmọ emi idahaemi.

Kụt Mme Utịbe Utịbe Edu Abasi

Abasi enyene ediwak utịbe utịbe edu, ndusụk ke otu ata n̄wọrọnda ẹdi ima, ọniọn̄, unenikpe, ye odudu esie. Ẹtịm ẹkụt ọniọn̄ ye odudu esie ke ekondo oro odude nsannsan ye ke ererimbot oro akande nnyịn okụk, ọtọn̄ọde ke mme akaka ndutịm ntantaọfiọn̄ tutu esịm ata n̄kpri atọm. Andiwet psalm ama ewet ete: “Mme heaven ke ẹbụk ubọn̄ Abasi, ikpa-enyọn̄ onyụn̄ etịn̄ se ubọk esie anamde.”—Psalm 19:1; Rome 1:20.

N̄kpọ obot n̄ko owụt ima Abasi. Ke uwụtn̄kpọ, usụn̄ nte ẹnamde nnyịn owụt ete ke Abasi oyom nnyịn idara uwem. Enye ama ọnọ nnyịn ukeme ndikụt mme uduot, nditabi nnyụn̄ n̄n̄wụne n̄kpọ, ndikop inem ikwọ, ndisak imam, ndidara ndiye n̄kpọ, onyụn̄ ọnọ nnyịn ediwak ukeme ye mme edu en̄wen oro mînen̄ekede idi se ẹyomde man uwem aka iso. Ih, Abasi enen̄ede atat ubọk, ọfọn ido, onyụn̄ enyene ima—mme edu oro nte eyịghe mîdụhe ẹtịpde ẹsịn ke enye ndidi “Abasi inemesịt.”—1 Timothy 1:11, NW; Utom 20:35.

Jehovah okop inemesịt ke akpanikọ oro nte ke nte enye akamade itie edikara esie ye ibetedem oro mme enyene-ifiọk edibotn̄kpọ esie ẹnọde itie edikara oro ẹkọn̄ọ akpan akpan ke ima. (1 John 4:8) Edi akpanikọ, Jehovah edi Andikara Ofụri Ekondo, edi enye anam n̄kpọ ye mme owo, akpan akpan mme anam-akpanikọ asan̄autom esie, nte ima ima ete anamde ye nditọ esie. (Matthew 5:45) Enye imụmke n̄kpọ ndomokiet oro edide ke ufọn mmọ ikama. (Rome 8:38, 39) Nte ima iketetịn̄, enye ama akam ọnọ uwem ikpọn̄îkpọn̄ edibon Eyen esie ke ibuot nnyịn. Ih, ima Abasi anam nnyịn idu uwem inyụn̄ inyene idotenyịn nsinsi uwem.—John 3:16.

Jesus ama ọnọ nnyịn ntotụn̄ọ ikike aban̄a edu Abasi koro enye ama ekpebe Ete esie ke mfọnmma usụn̄. (John 14:9-11) Enye ama enen̄ede owụt unana ibụk, mfọnido, ye edikere mban̄a. Ke idaha kiet, ẹma ẹda owo oro ekedide inan mînyụn̄ ikemeke nditịm ntịn̄ ikọ ẹsọk Jesus. Afo emekeme ndikụt nte ke ekeme ndidi owo oro ama okop bụt ke otuowo. Nte enemde, Jesus ama ada owo oro aka ndedịbe ebiet onyụn̄ ọkọk udọn̄ọ esie do. (Mark 7:32-35) Nte afo emesima mme owo oro ẹkerede ẹban̄a mme ntụk fo ẹnyụn̄ ẹkponode uku fo? Ke edide ntre, do nte afo ekpepde n̄kpọ efen efen aban̄a mmọ, afo ke akpanikọ ayasan̄a ekpere Jehovah ye Jesus akan.

Kere Ban̄a Mme Edu Abasi

Owo ekeme ndinyene nti edu, edi oyom nnyịn ikere iban̄a owo oro man ikeme ndisan̄a n̄kpere enye. Ukem oro ke edi ye Jehovah. Nditie n̄kere mme edu esie edi udiana akpan usio-ukot ke ndisan̄a n̄kpere enye. Edidem David, owo oro ekenen̄erede ama Jehovah okonyụn̄ “ekemde esịt ye” Jehovah, ama ọdọhọ ete: “Mmeti eyo oko; mmese ofụri utom fo; mmetie n̄kere se ubọk fo ẹkenamde.”—Utom 13:22; Psalm 143:5.

 Ke ini afo okụtde mme utịbe utịbe n̄kpọ obot m̀mê okotde Ikọ Abasi, kpa Bible, ukem nte David, nte afo emesitie ekere se afo okụtde onyụn̄ okotde? Kere ban̄a eyen oro ọbọde leta oto ata edima ete esie. Didie ke enye edise leta oro? Ke akpanikọ enye idikam itopke enyịn ise se isịnede ndien ọsọsọp otop enye esịn ke ekebe. Utu ke oro, enye eyekpep enye, odụn̄ọrede ofụri ntọt ye ukpụhọde oro ẹdude ke enye. Kpasụk ntre, nnyịn ikpenyene ndida Ikọ Abasi ke ọsọn̄urua n̄kpọ, kpa nte andiwet psalm akadade, oro ọkọkwọde ete: “Mmama ido fo didie! enye ke ntie n̄kere ofụri usen.”—Psalm 119:97.

Ka Iso Ndinyene Eti Nneme

Eti nneme edi iyịp-uwem ọnọ itie ebuana ekededi. Enye abuana editịn̄ ikọ ye edikpan̄ utọn̄—inyụn̄ idịghe ye ekikere kpọt edi n̄ko ye esịt. Nnyịn itịn̄ ikọ inọ Andibot ebe ke akam, emi edide ikọ utuakibuot oro ẹtịn̄de ẹnọ Abasi. Jehovah esikop idatesịt aban̄a akam mbon oro ẹmade ẹnyụn̄ ẹnamde n̄kpọ ẹnọ enye ẹnyụn̄ ẹnyịmede Jesus Christ nte akpan andida ke ibuot Esie.—Psalm 65:2; John 14:6, 14.

Ke eset, Abasi ama esitịn̄ ikọ ke nsio nsio usụn̄ ọnọ mme owo, esịnede ke n̄kukụt, ke ndap, onyụn̄ ebe ke mme angel. Nte ededi, mfịn enye anam ntre ebe ke Ikọ esie oro ẹwetde-wet, kpa Edisana Bible. (2 Timothy 3:16) Ikọ oro ẹwetde-wet enyene ediwak ufọn. Ẹkeme ndika mbịne enye ke ini ekededi. Ukem nte leta, ẹkeme ndikot enye ediwak ini. Ndien owo ikemeke ndikpụhọde enye nte ẹsiwakde ndikpụhọde mbụk oro ẹbụkde ẹfiak ẹbụk. Ntre kere ban̄a Bible nte udịm udịm leta oro ẹtode ima ima Ete fo eke heaven, ndien yak enye etịn̄ ikọ ọnọ fi ke usen ke usen ebe ke mme leta emi.—Matthew 4:4.

Ke uwụtn̄kpọ, Bible etịn̄ ekikere Jehovah kaban̄a eti ye idiọk. Enye anam uduak esie kaban̄a ubonowo ye isọn̄ an̄wan̄a. Ndien enye ayarade mme edinam esie ye nsio nsio owo ye idụt, ọtọn̄ọde ke mme anam-akpanikọ andituak ibuot tutu esịm mme idiọk asua. Ebede ke enye ndikanam ẹwet mme edinam esie ye mme owo ẹnịm ke usụn̄ emi, Jehovah ọmọnọ n̄wọrọnda ọyọhọ ntọt aban̄a edu esie. Enye ayarade ima, idatesịt, mfụhọ, edikpu, iyatesịt, mbọm, udọn̄—ih, udịm udịm ekikere ye ntụk esie, ye mme isọn̄ ntak kaban̄a mmọ emi—kpukpru ke usụn̄ oro mme owo ẹkemede ndisọsọp mfiọk.—Psalm 78:3-7.

Ke afo ama okokot ikpehe kiet ke Ikọ Abasi, didie ke afo ekeme ndibọ ufọn nto se afo okotde? Ndien, akpan akpan, didie ke afo ekeme ndinen̄ede nsan̄a n̄kpere Abasi? Akpa, kere ban̄a se afo okokotde onyụn̄ ekpepde aban̄a Abasi nte owo, ayakde mme akpan n̄kpọ oro ẹdụk fi esịt. Ekem tịn̄ mme ekikere ye mme ntụk fo kaban̄a se afo okotde ye nte afo edidomode ndibọ ufọn nto enye nọ Jehovah ke akam. Oro edi nneme. Nte ededi, edieke afo enyenede mme n̄kpọ en̄wen n̄ko ke ekikere, emekeme ndisịn mmọ emi ke akam fo.

Nam N̄kpọ Ọtọkiet ye Abasi

Bible etịn̄ aban̄a ndusụk anam-akpanikọ iren ke eset nte ke mmọ ẹma ẹsan̄a ye, m̀mê ke iso, ata Abasi. (Genesis 6:9; 1 Ndidem 8:25) Nso ke oro ọwọrọ? Enen̄ede ọwọrọ ete ke mmọ ẹkedu uwem usen kiet kiet nte n̄kpọ eke Abasi okodude do ye mmọ. Edi akpanikọ, mmọ ẹkedi mme anamidiọk. Edi mmọ ẹma ẹma mme ibet ye mme edumbet Abasi, ndien mmọ ẹma ẹdu uwem ẹkekem ye uduak Abasi. Jehovah esisan̄a ekpere utọ mbon oro, ndien enye esise aban̄a mmọ, nte ẹwụtde ke Psalm 32:8: “Nyeteme fi,  nnyụn̄ n̄wụt fi usụn̄ eke afo edisan̄ade: nyeteme fi, nyetịn̄ fi enyịn mi ke idem.”

Afo n̄ko emekeme ndinyene Jehovah nte n̄kpet n̄kpet ufan—enye oro asan̄ade ye afo, esede aban̄a fi, onyụn̄ ọnọde fi item ebietde eke ete. Prọfet Isaiah ama etịn̄ aban̄a Jehovah nte enye ‘emi ekpepde fi usụn̄ udori, adade fi usụn̄ eke afo edisan̄ade.’ (Isaiah 48:17) Nte nnyịn ibọde mme ufọn emi, nnyịn iyokụt nte Jehovah odude ke “ubọk nnasia” nnyịn, yak idọhọ ntre, kpa nte David okokụtde.—Psalm 16:8.

Enyịn̄ Abasi —Se Inamde Ẹkụt Mme Edu Esie

Ediwak ido ukpono ye edikabade Bible oro ibat ọdiọn̄de-diọn̄ ọkọri ẹkpu ndida nnyụn̄ nnam ẹdiọn̄ọ ọkpọkpọ enyịn̄ Abasi. (Psalm 83:18) Edi, ke akpasarade uwetn̄kpọ Hebrew, enyịn̄ oro—Jehovah—odu ekpere ndisịm utịm ike 7,000! (Nte mîdotke, ke adan̄aemi ẹsiode enyịn̄ Abasi ẹfep, n̄wakn̄kan ibat mme akabade Bible ẹsụk ẹsesịn enyịn̄ ediwak nsunsu abasi oro ẹsiakde ke akpasarade uwetn̄kpọ oro,  utọ nte Baal, Bel, Merodach, ye idem Satan!)

Ndusụk owo ẹkere ẹte ke edisio enyịn̄ Abasi mfep edi ekpri n̄kpọ. Edi kere: Nte edi ọkpọsọn̄ n̄kpọ m̀mê mmemmem n̄kpọ ndikọri n̄kpet n̄kpet itie ebuana oro ọkọn̄ọde ke ifiọk ye owo oro mînyeneke enyịn̄? Mme utọ udorienyịn̄ nte Abasi ye Ọbọn̄ (oro ẹsidade n̄ko ẹkot mme nsunsu abasi) ẹkeme ndidụri ntịn̄enyịn n̄wụt odudu, ukara, m̀mê idaha Jehovah, edi edi ọkpọkpọ enyịn̄ esie kpọt anam ẹdiọn̄ọ enye in̄wan̄în̄wan̄. (Exodus 3:15; 1 Corinth 8:5, 6) Ọkpọkpọ enyịn̄ ata Abasi akara mme edu esie. Ekpep ukpepn̄kpọ ido ukpono oro Walter Lowrie ama etịn̄ nte enende ete: “Owo oro mîfiọkke enyịn̄ Abasi inen̄ekede ifiọk enye nte owo.”

Kere ban̄a uwụtn̄kpọ Maria, enyene-ifịk owo Catholic oro odụn̄de ke Australia. Ke ini Mme Ntiense Jehovah ẹkesobode ye enye ke akpa ini, Maria ama enyịme Mme Ntiense oro ẹwụt imọ enyịn̄ Abasi ke Bible. Didie ke enye akanam n̄kpọ aban̄a? “Ke ini n̄kokụtde enyịn̄ Abasi ke akpa ini ke Bible, mma ntua eyet. Ifiọk oro nte ke mmekeme ndinen̄ede mfiọk nnyụn̄ n̄kot ọkpọkpọ enyịn̄ Abasi ama enen̄ede otụk mi.” Maria ama aka iso ndikpep Bible, ndien ke akpa ini ke uwem esie, enye ama edifiọk Jehovah nte owo ama onyụn̄ ekeme ndikọri itie ebuana oro ebịghide ye enye.

Ih, nnyịn imekeme ‘ndisan̄a n̄kpere Abasi,’ idem okposụkedi nnyịn mîkemeke ndida ata enyịn nnyịn n̄kụt enye. Nnyịn imekeme “ndikụt” ata ediye edu esie ke ekikere ye esịt nnyịn ndien ke ntre ikọride ke ima oro inyenede inọ enye. Utọ ima oro edi “se ibọpde uwem adiana inam ọfọn ama.”—Colossae 3:14.

[Ekebe/Ndise ke page 6]

Jehovah Esinam N̄kpọ Aban̄a Ima Oro Afo Amade Enye

Mme itie ebuana ẹdi ubọk otụk edem, edem otụk ubọk. Nte nnyịn isan̄ade ikpere Abasi, enye esinam n̄kpọ aban̄a ebe ke ndinen̄ede nsan̄a n̄kpere nnyịn. Kere ban̄a ima oro enye ekenyenede ọnọ Simeon ye Anna oro ẹma ẹkesọn̄, oro ẹsiakde mbiba enyịn̄ san̄asan̄a ke Bible. Luke andiwet Gospel asian nnyịn ete ke Simeon ekedi “edinen owo emi eten̄ede Abasi,” oro eketiede ebet Messiah. Jehovah ama okụt nti edu emi ke idem Simeon onyụn̄ enyene ima ọnọ akanieren emi ebe ke ndiyarade nnọ enye nte ke “enye idikpaha tutu enye okụt Christ.” Jehovah ama anam un̄wọn̄ọ esie onyụn̄ owụt Simeon nsekeyen oro Jesus, oro ete ye eka Esie ẹkedade ẹdi temple ke Jerusalem. Ke okopde inemesịt onyụn̄ owụtde ntotụn̄ọ esịtekọm, Simeon ama afat nsekeyen oro onyụn̄ ọbọn̄ akam ete: “Ke emi, O Ọbọn̄, Afo ke ayak owo Fo ọnyọn̄ ke ifụre, nte Afo ọkọdọhọde; koro enyịn mi ẹmekụt edinyan̄a Fo.”—Luke 2:25-35.

“Kpa idaha oro,” Jehovah ama owụt ima oro enye ekenyenede ọnọ Anna emi ekedide isua 84 ke emana ebe ke ndiwụt enye Jesus n̄ko. Bible asian nnyịn ete ke edima ebeakpa emi ekesidu ke temple kpukpru ini “atuak ibuot” ọnọ Jehovah. Ke ọyọhọde ye esịtekọm, ukem nte Simeon, enye ama ọkọm Jehovah ke n̄wọrọnda mfọnido esie, ndien ke oro ebede enye ama etịn̄ aban̄a eyen oro “ọnọ kpukpru owo emi ẹtiede ẹbet edifak Jerusalem.”—Luke 2:36-38.

Ih, Jehovah ama okụt ntotụn̄ọ ima ye mbak oro Simeon ye Anna ẹkenyenede ẹnọ enye ye nte mmọ ẹkenyenede udọn̄ ẹban̄a edisu uduak esie. Nte mme utọ mbụk Bible oro inamke fi asan̄a ekpere Jehovah?

Ukem nte Ete esie, Jesus n̄ko ama esikụt ata owo esịtidem. Ke adan̄aemi ekekpepde n̄kpọ ke temple, enye ama okụt “ubuene ebe-akpa” kiet nte ọnọde “n̄kpri okudọk iba.” Ke enyịn mme andida nse eken, enọ esie ekedi ata ekpri edi ikedịghe ntre ye Jesus. Enye ama otoro n̄wan emi koro enye ọkọnọ kpukpru se enye ekenyenede. (Luke 21:1-4) Ntem, nnyịn imekeme nditịm nnịm nte ke Jehovah ye Jesus ẹma nnyịn edieke nnyịn inọde mmọ mfọnn̄kan inyene nnyịn, edide enọ nnyịn edi akamba m̀mê ekpri.

Ke adan̄aemi Abasi esikopde idatesịt aban̄a mbon oro ẹmade enye, enye esiyat esịt ke ini mme owo ẹwọn̄ọrede ẹkpọn̄ enye ẹnyụn̄ ẹtienede idiọk usụn̄ edinam. Genesis 6:6 asian nnyịn ete ke ‘esịt ama ayat’ Jehovah ke ntak idiọkn̄kpọ ubonowo mbemiso Ukwọ usen Noah. Ke ukperedem, mme ọsọn̄ibuot nditọ Israel ẹma ‘ẹdomo Abasi ediwak ini, ẹnyụn̄ ẹsuene Edisana Abasi Israel,’ ntem ke Psalm 78:41 ọdọhọ. Ih, Abasi idịghe nsannsan “Akpa Andinam” oro mînyeneke mme ntụk. Enye ke akpanikọ edi owo, idịghe enye emi mme ntụk esie mîdaha ukem ukem m̀mê ẹma ẹkemem ke ntak unana mfọnmma, nte eke nnyịn.

[Mme ndise ke page 7]

Ndikere mban̄a n̄kpọ obot Jehovah edi usụn̄ kiet ndisan̄a n̄kpere enye