Akwa Ntatubọk Ada Idatesịt Edi

NTE ima ima esenyịn Christian, apostle Paul ama enen̄ede enyene mfọnọn̄kpọ mme ekemmọ andinịm ke akpanikọ ke ekikere. (2 Corinth 11:28) Ntem, ke ini okodude ke ufọt ufọt iduọkisua 50 eke akpa isua ikie Eyo Nnyịn enye ama anam ndutịm kaban̄a editịp okụk ke ufọn mme Christian ke Judea oro ẹkedude ke unana, enye ama ada ifet oro ndinọ eti ukpep aban̄ade edu ntatubọk. Paul ama ọsọn̄ọ etịn̄ ete ke Jehovah abat edinọ ke inemesịt ke ata ọsọn̄urua n̄kpọ: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.”—2 Corinth 9:7.

Ẹdu ke Ọkpọsọn̄ Unana, Edi Ẹtat Ubọk

Ata ediwak Christian akpa isua ikie ikedịghe mme ọwọrọiso owo ke edinam n̄kaowo. Paul ekewet ete ke ediwak mmọ ikedịghe “mme enyene odudu.” Mmọ ẹkedi “n̄kpọ eke ẹdide mmeme ke ererimbot,” “n̄kpọ eke ẹdude ke usụhọde-itie.” (1 Corinth 1:26-28) Ke uwụtn̄kpọ, mme Christian oro ẹkedụn̄de ke Macedonia ẹkedu ke “ọkpọsọn̄ unana” ye “akwa ukụt.” Kpa ye oro, mme osụhọdeidem andinịm ke akpanikọ ke Macedonia ẹma ẹben̄e ẹte ẹnọ mmimọ ifet nditịp okụk nsịn ke “edikama ikọt Abasi”; ndien se mmọ ẹkenọde, nte Paul eketiede ntiense aban̄a, ama “ebe nte ukeme mmọ edide”!—2 Corinth 8:1-4.

Edi, owo ikadaha ibat okụk ẹnọde ibiere utọ edinọ ke ntatubọk oro. Utu ke oro, uduakesịt, edinyịme ndinyene udeme, ye idaha esịt ẹkedi akpan n̄kpọ. Paul ama owụt mme Christian ke Corinth ete ke ekikere ye esịt ẹbuana ke nditịp etịbe. Enye ọkọdọhọ ete: “Mmọfiọk nte mbufo ẹnyịmede ndinam utom emi, mmonyụn̄ nda mbufo nnam mbụre nsian mbon Macedonia, . . . ndien ifiopesịt mbufo ama edemede ediwak mmọ.” Mmọ ẹma ‘ẹduak ke esịt mmọ’ ndinọ ke ntatubọk.—2 Corinth 9:2, 7.

‘Spirit Mmọ Anam Mmọ Ẹnyịme’

Ekeme ndidi apostle Paul ekenyene akpa uwụtn̄kpọ enọ ntatubọk ke ekikere, enye oro akadade itie ke wilderness ke se iwakde ibe isua ikie 15 mbemiso eyo esie. Ẹma ẹnam esien Israel 12 ẹwọrọ ufụn ke Egypt. Idahaemi mmọ ẹkedu ke unaisọn̄ Obot Sinai, ndien Jehovah ama owụk mmọ ete ẹbọp ataya utuakibuot ẹnyụn̄ ẹdọn̄ n̄kpoduoho utuakibuot ke esịt. Emi oyoyom ediwak okụk, ndien ẹma ẹdọhọ idụt oro ẹtịp etịbe.

Didie ke nditọ Israel ẹkenam n̄kpọ? “Kpukpru owo eke esịt mmọ edemerede mmọ, ye kpukpru owo eke spirit mmọ anamde mmọ ẹnyịme, ẹdi, ẹda enọ Jehovah ẹdisọk ke edinam tent esop.” (Exodus 35:21) Nte idụt oro ama ọnọ enọ ke ntatubọk? Ata etieti! Ẹma ẹnọ Moses ntọt etienede mi: “Mbio emi ẹda n̄kpọ ẹbe adan̄a nte ẹkemde, ẹdinọ ke edinam utom, emi Jehovah okowụkde ete ẹnam enye.”—Exodus 36:5.

Nso ikedi idaha nditọ Israel ke n̄kan̄ okụk ke ini oro? Esisịt ini mbemiso, mmọ ẹkedi ifịn emi ẹnyenede mbọm, oro ‘ẹkefịkde ke mbiomo,’ ẹdude ‘ndotndot uwem,’ kpa uwem “ukụt.” (Exodus 1:11, 14; 3:7; 5:10-18) Do, itiehe nte ke mmọ ẹma ẹforo ke n̄kan̄ eke obụk. Edi akpanikọ, nditọ Israel ẹma ẹda n̄kpri ufene ye enan̄ ẹwọrọ ke idụt oro mmọ ẹkedude ke ufụn. (Exodus 12:32) Edi ekeme ndidi mmọ oro ikawakke, sia ibịghike ke ẹma ẹkekpọn̄ Egypt, mmọ ẹma ẹsụk uyo ẹte ke mmimọ ikenyeneke unam m̀mê udia ndidia.—Exodus 16:3.

 M̀mọ̀n̄, ndien, ke nditọ Israel ẹkeda inyene oro mmọ ẹketịpde ẹsịn ke edibọp ataya? Ẹkeda ẹto n̄kani etubom mmọ, nditọ Egypt. Bible ọdọhọ ete: ‘Nditọ Israel ẹben̄e nditọ Egypt n̄kpọ silver, ye n̄kpọ gold, ye edisịne-n̄kpọ. Nditọ Egypt ẹnyụn̄ ẹnọ mmọ ke ima.’ Mme edinam ntatubọk nditọ Egypt emi ẹkedi edidiọn̄ ẹtode Jehovah, ikotoho Pharaoh. N̄wetnnịm n̄kpọ Abasi ọdọhọ ete: “Jehovah esịn nditọ Egypt ẹnen iso ye mmọ, ẹnyụn̄ ẹnọ mmọ ke ima.”—Exodus 12:35, 36.

Do, kere nte eketiede nditọ Israel ke idem. Ediwak emana mmọ ẹma ẹbọ ufen ndotndot ufụn ye unana. Idahaemi mmọ ẹma ẹnyene ifụre ye uwak inyene obụkidem. Editie mmọ didie ke idem nditan̄ ndusụk inyene oro nnyọn̄? Ekeme ndidi mmọ ẹma ẹkere ke mmimọ ikan̄wana mmọ ndien ke ima inyene unen ndida mmọ nnyene. Nte ededi, ke ini ẹkedọhọde ẹtịp okụk ndinọ edisana utuakibuot ibetedem, mmọ ẹma ẹnam ntre—inyụn̄ inamke mmen̄e mmen̄e m̀mê efam efam! Mmọ ikefreke ite ke Jehovah akanam edi mmemmem ọnọ mmimọ ndinyene mme n̄kpọ obụkidem oro. Ntem, mmọ ẹma ẹnọ silver ye gold ye ufene mmọ uwak uwak. ‘Esịt mmọ ama enyịme.’ ‘Esịt ama edemede mmọ.’ ‘Spirit mmọ ama anam mmọ ẹnyịme.’ Enye ekenen̄ede edi ‘enọ ima esịt oro ẹkenọde Jehovah.’—Exodus 25:1-9; 35:4-9, 20-29; 36:3-7.

Edinyịme Ndinọ

Udomo n̄kpọ oro ẹtịpde inen̄ekede iwụt ntatubọk andinọ enọ. Inikiet Jesus Christ ama ese nte mme owo ẹsịnde okụk ke usịn-etịbe temple. Mbon inyene ẹma ẹsịn ediwak okụk, edi ama otụk Jesus ke ini enye okokụtde nte ubuene ebeakpa kiet esịnde n̄kpri okudọk iba. Enye ama ọdọhọ ete: “Ebe-akpa emi ama esịn okụk akan kpukpru mmọ. . . . Ke unana esie enye osio kpukpru se enye akpadade odu uwem ọnọ.”—Luke 21:1-4; Mark 12:41-44.

Mme ikọ oro Paul eketịn̄de ọnọ mbon Corinth ẹkedu ke n̄kemuyo ye ekikere Jesus emi. Ke edide edisịm edinọ mme etịbe man ẹda ẹn̄wam mme ekemmọ andinịm ke akpanikọ oro ẹdude ke unana, Paul ama ọdọhọ ete: “Edieke edinyịme esịt odude, enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” (2 Corinth 8:12) Ih, mme etịbe ikpedịghe n̄kpọ umia mbuba m̀mê ndomoidem. Owo ekpenyene ndinọ nte ekemde ye ukeme esie, ndien Jehovah adara edu ntatubọk.

Okposụkedi baba owo kiet mîkemeke ndinen̄ede mfori Jehovah, oro enyenede kpukpru n̄kpọ, ndinọ etịbe edi idaha oro ọnọde mme andituak ibuot ifet ndiwụt ima oro mmọ ẹmade enye. (1 Chronicles 29:14-17) Mme etịbe oro owo mîtịpke ke n̄wụtidem m̀mê ke ntak ibụk ibụk uduakesịt eken, edi ẹnọde ye nnennen  edu ndida nnam utuakibuot akpanikọ aka iso, ẹsida idatesịt ye edidiọn̄ Abasi ẹdi. (Matthew 6:1-4) Jesus ọkọdọhọ ete: “Ekese inemesịt odu ke ndinọnọ akan nte odude ke ndibọbọ.” (Utom 20:35, NW) Nnyịn imekeme ndinyene udeme ke inemesịt oro ebe ke ndisịn odudu nnyịn ke utom Jehovah ye ke ndisio n̄kpọ ke inyene nnyịn nnịm kaban̄a edinọ utuakibuot akpanikọ ibetedem ye edinọ mbon oro ẹdotde un̄wam.—1 Corinth 16:1, 2.

Edinyịme Ndinọ Mfịn

Mfịn, Mme Ntiense Jehovah ẹkop nduaidem ndikụt n̄kọri ke edikwọrọ “gospel Ubọn̄ Abasi emi” ke ofụri ererimbot. (Matthew 24:14) Ke akpatre isua duop eke ọyọhọ isua ikie 20, se iwakde ibe owo 3,000,000 ẹma ẹna baptism ndiyarade uyakidem mmọ nnọ Jehovah Abasi, ndien ẹma ẹtọn̄ọ n̄kpọ nte mbufa esop 30,000. Ih, ẹketọn̄ọ mbahade kiet ke itie ita ke otu mme esop Mme Ntiense Jehovah oro ẹdude mfịn ke isua duop emi ẹkebede! Ekese n̄kọri emi edi utịp ọkpọsọn̄ utom mme ata Christian iren ye iban oro ẹsịnde ini ye odudu mmọ man ẹka ẹbịne mme mbọhọidụn̄ mmọ ẹnyụn̄ ẹtịn̄ ẹnọ mmọ ẹban̄a mme uduak Jehovah. Ndusụk n̄kọri ẹdi utịp utom mme isụn̄utom, oro ẹkpọn̄de mme ufọk mmọ ẹka mme esenidụt ndikan̄wam ke utom ukwọrọikọ Obio Ubọn̄. N̄kọri oro osụn̄ọ ke edisiak mbufa circuit, emi anamde oyom ẹmek mbufa esenyịn circuit. Ke adianade do, ẹmeyom mme Bible efen efen ndikama ke ukwọrọikọ ye ọkpọkpọ ukpepn̄kpọ. Ẹmeyom mme n̄wed efen efen. Ndien ke ediwak idụt, ẹkenyene nditat mme ufọkutom n̄kọk itieutom m̀mê ndibọp ikpọ ufọkutom ke itie mmọ. Ẹda mme etịbe unyịmesịt ẹtode ikọt Jehovah ẹse ẹban̄a mme n̄kaiso udọn̄ emi.

Ẹyom Mme Ufọkmbono Obio Ubọn̄

N̄wọrọnda udọn̄ oro anade in̄wan̄în̄wan̄ ke ntak n̄kọri ke ibat Mme Ntiense Jehovah edi udọn̄ kaban̄a mme Ufọkmbono Obio Ubọn̄. Mme ndụn̄ọde ẹkenamde ke ntọn̄ọ ntọn̄ọ isua 2000 ẹma ẹyarade nte ke ẹyom se iwakde ibe Ufọkmbono Obio Ubọn̄ 11,000 ke mme idụt oro ẹtọn̄ọde-tọn̄ọ uforo, emi okụk ananade. Kere ban̄a Angola. Kpa ye ekọn̄ mbio obio ke ediwak isua, ibat mme asuanetop Obio Ubọn̄ ke idụt oro ọmọkọri esịm mbahade duop eke ikie ke isua ke isua ke ẹbaharede ukem ukem. Nte ededi, n̄wakn̄kan ke otu esop 675 oro ẹdude ke akamba idụt Africa emi ẹsisop idem ke an̄wa. Ufọkmbono Obio Ubọn̄ 22 kpọt ẹdu ke idụt emi, ndien ke otu emi 12 kpọt ẹnyene ndusụk orụk ọkọm.

Ukem idaha emi odu ke Democratic Republic of Congo. Okposụkedi se ikperede ndisịm esop 300 ẹdude ke ibuot obio, Kinshasa, Ufọkmbono Obio Ubọn̄ duop kpọt ẹdu. Ẹyom se iwakde ibe Ufọkmbono Obio Ubọn̄ 1,500 usọp usọp ke ofụri idụt oro. Ke ntak usọp usọp n̄kọri ke mme idụt N̄kan̄ Edem Usiahautịn Europe, Russia ye Ukraine ẹtọt ẹte ke mmimọ imoyom ediwak Ufọkmbono Obio Ubọn̄ ke mme itie ikie. Ẹkụt usọp usọp n̄kọri ke Latin America ke Brazil, emi se iwakde ibe Mme Ntiense tọsịn ikie ition ẹdude ẹnyụn̄ ẹnen̄erede ẹyom mme Ufọkmbono Obio Ubọn̄ efen efen.

Man ẹyụhọ mme udọn̄ oro ke mme utọ idụt oro, Mme Ntiense Jehovah ke ẹnam usọp usọp ndutịm kaban̄a edibọp mme Ufọk Mbono Obio Ubọn̄. Ẹda mme etịbe ntatubọk ẹtode nditọete ofụri ererimbot ẹse ẹban̄a ndutịm emi, man otodo idem mme esop oro ẹbuenede ẹkan ẹkpekeme ndinyene iwụk ebiet utuakibuot oro odotde.

Kpa nte ekedide ke eyo Israel eset, ẹkeme ndinam ekese koro mme ata Christian ‘ẹkpono Jehovah ke inyene mmọ.’ (Mme N̄ke 3:9, 10) Otu Ukara eke Mme Ntiense Jehovah akpama ndida ifet emi nnen̄ede n̄kọm kpukpru owo oro esịt edemerede mmọ ndibuana ke edinọ enọ unyịmesịt emi. Ndien nnyịn imekeme ndinyene mbuọtidem nte ke spirit Jehovah ayaka iso ndidemede esịt ikọt esie ndinọ mme udọn̄ utom Obio Ubọn̄ oro akade-ka iso ndikọri mi ibetedem.

Nte n̄kọri akade iso ke ofụri ererimbot, nnyịn ikpakam ika iso ndiyom mme ifet ndiwụt inemesịt ye unyịmesịt nnyịn ndinọ odudu nnyịn, ini nnyịn, ye inyene nnyịn. Ndien nnyịn ikpakam inyene ata idatesịt oro utọ edu edinọ enọ oro esidade edi.

[Ekebe ke page 29]

“ẸDA ENYE ẸNAM N̄KPỌ KE ỌNIỌN̄!”

“Ami ndi isua duop ke emana. Nnọ okụk emi ẹsọk mbufo man mbufo ẹda ẹdep babru m̀mê n̄kpọ efen ekededi ndida nnam mme n̄wed.”—Cindy.

“Mmama ndinọ okụk emi ẹsọk mbufo man ẹda ẹnam mme n̄wed efen efen ẹnọ nnyịn. N̄kọbọk okụk emi nnịm oto ndin̄wam ete mi. Ntre ẹda enye ẹnam n̄kpọ ke ọniọn̄!”—Pam, isua itiaba.

“Mma mfụhọ ke ntak oyobio oro. Mmekere ke n̄kpọ inamke mbufo. Emi [$2, U.S.] edi kpukpru okụk ke itie unịm okụk mi.”—Allison, isua inan̄.

“Ami n̄kere Rudy, ndien ndi isua 11 ke emana. Ralph eyeneka mi edi isua itiokiet. Ndien Judith eyeneka mi edi isua iba ye ubak. Nnyịn ikọbọk okụk emi inịm ito okụk ekpatọfọn̄ nnyịn ke ọfiọn̄ ita man in̄wam nditọete nnyịn ke [ebiet oro ekọn̄ ọnọmọde]. Nnyịn ima ibọk dollar 20 inịm oro nnyịn inọde ẹdi idahaemi.”

“Ami mmokop mbọm mban̄a nditọete nnyịn oro [oyobio ọkọnọmọde]. Mma nnyene dollar 17 nto ndinam utom ye ete mi. Nnọhọ okụk emi ẹdi kaban̄a n̄kpọ ekededi akpan akpan, ntre nyayak mbufo ẹbiere se ẹdidade enye ẹnam.”—Maclean, isua itiaita.

 [Ekebe ke page 31]

Mme Usụn̄ Emi Ndusụk Owo Ẹmekde Ndinọ

MME ETỊBE ẸNỌDE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a, ibatokụk oro mmọ ẹdisịnde ke mme ekebe etịbe oro ẹdiande idiọn̄ọ: “Contributions for the Society’s Worldwide Work—Matthew 24:14.” Ke ọfiọn̄ kiet kiet mme esop ẹsinọ okụk emi aka edide ibuot itieutom ofụri ererimbot ke Brooklyn, New York, m̀mê ọfis n̄kọk itieutom n̄kann̄kụk.

Ẹkeme ndinọ okụk imaesịt nnennen ẹsọk Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, m̀mê ọfis N̄ka oro esede aban̄a idụt mbufo. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken ke etịbe. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄în̄wan̄ nte ke emi edi enọ.

NDUTỊM ẸNAMDE ẸNỌ SE ẸNỊMDE KE UBIỌN̄

Ẹkeme ndinọ okụk ẹsọk Watch Tower Society ke ndutịm oro ẹnamde san̄asan̄a emi edide, edieke andinọ enyenede ọkpọkpọ n̄kpọ ndida enye nnam, ẹnọ ẹfiak ẹsọk enye. Kaban̄a ntọt efen efen, mbọk nyene nneme ye Treasurer’s Office ke adres ẹwụtde ke enyọn̄ emi.

ENỌ EMI ẸDIOMIDE-DIOMI

Ke adianade ye edinọ okụk nte ata enọ ye mme etịbe okụk oro ẹsịnde ke ubiọn̄, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọ emi ẹsịne:

Insurance: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom.

Ibatokụk Itie Unịm Okụk: Ẹkeme ndinam ibatokụk itie unịm okụk, n̄wed okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo ẹdu ke enyịn̄ mîdịghe ẹnam ẹkpe ke ini ẹkpade ẹnọ Watch Tower Society, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower Society inyene ye mbubehe nte ata enọ.

Isọn̄ ye Inyene: Ẹkeme ndinọ Watch Tower Society isọn̄ ye inyene oro ẹkemede ndinyam edide ke edinọ nte ata enọ m̀mê ke ndimụm n̄kpọ akpa ke isọn̄ ye inyene n̄kama nnọ andinọ, emi ekemede ndisụk n̄ka iso ndụn̄ do ke eyouwem esie. Owo oro ekpenyene nditọt N̄ka mbemiso ayakde isọn̄ ye inyene ekededi ọnọ N̄ka.

Unen N̄kpọ Akpa ye Mme Ebuọt: Ẹkeme ndiyak inyene m̀mê okụk nnọ Watch Tower Society ke ndinọ enye unen ndidia n̄kpọ akpa oro ibet enyịmede, mîdịghe ẹkeme ndiwet enyịn̄ N̄ka nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinam ẹsụhọde urua tax.

Nte ikọ oro “enọ emi ẹdiomide-diomi” owụtde, mme utọ enọ emi nte ido edide ẹyom andinọ anam ndutịm. Man ẹn̄wam mme owo oro ẹnyenede udọn̄ ndinam N̄ka ọbọ ufọn ebe ke ndusụk orụk enọ ẹmi ẹdiomide-diomi, N̄ka etịm ediye uduot ekpri n̄wed ke Ikọmbakara ye Spanish ẹkotde Planned Giving to Benefit Kingdom Service Worldwide. Ẹkewet ediye uduot ekpri n̄wed emi ke ntak ediwak mbụme oro ẹbụpde N̄ka kaban̄a mme enọ, unen n̄kpọ akpa, ye ebuọt. Enye n̄ko esịne mme ntọt efen efen kaban̄a ufọk, okụk, ye ndutịm tax. Ndien ẹtịm enye man an̄wam mme owo ke United States emi ẹdiomide ndinọ N̄ka san̄asan̄a enọ idahaemi m̀mê ndikpọn̄ n̄kpọ akpa nnọ ke ini ẹkpade man ẹmek usụn̄ oro ọfọnde onyụn̄ okụtde unen akan ndinam ntre ke ẹkerede ẹban̄a mme idaha ubon ye ọkpọkpọ idaha mmọ. Ẹkeme ndinyene ediye uduot ekpri n̄wed emi ebe ke ndiben̄e idem esie kiet nnennen nnennen nto Itieutom Esede Aban̄a Enọ Emi Ẹdiomide-Diomi.

Ke ẹma ẹkekot ediye uduot ekpri n̄wed emi ẹnyụn̄ ẹnyene nneme ye Itieutom Esede Aban̄a Enọ Emi Ẹdiomide-Diomi, ediwak owo ẹma ẹkeme ndin̄wam N̄ka ndien ke ukem ini oro ẹbọ n̄kponn̄kan ufọn ukpe tax ẹto edinam ntre. Ẹkpenyene ndinam Itieutom Esede Aban̄a Enọ Emi Ẹdiomide-Diomi ọfiọk aban̄a onyụn̄ ọbọ n̄wetnnịm n̄kpọ oro odotde ke ekededi ke otu ndutịm emi. Edieke afo enyenede udọn̄ ke ekededi ke otu ndutịm enọ oro ẹdiomide-diomi mi, afo ekpenyene ndinyene nneme ye Itieutom Esede Aban̄a Enọ Emi Ẹdiomide-Diomi, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi m̀mê ke ọfis N̄ka emi esede aban̄a idụt mbufo.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (845) 306-0707