Didie ke Afo Esibiere Edikụt Unen?

N̄WED ukabadeikọ kiet akabade edikụt unen nte “edinyene uforo, unyịme, m̀mê uwọrọiso.” Nte oro edi ọyọhọ edikabade? Ndi uforo, unyịme, m̀mê uwọrọiso kpọt ke ẹsida ẹbiere edikụt unen? Mbemiso ọbọrọde, kere ban̄a emi: Jesus Christ ikenyeneke inyene obụkidem ke ini uwem esie. Enye ikenyeneke unyịme ata ediwak owo; m̀mê mme adausụn̄ eyo esie ndikabat enye ke ọwọrọiso owo. Edi, Jesus ekedi owo oro okokụtde unen. Ntak-a?

Ke adan̄aemi okodude ke isọn̄, Jesus ama enyene “inyene ke n̄kan̄ Abasi.” (Luke 12:21) Ke enye ama ekeset ke n̄kpa, Abasi ama ọnọ enye utịp ebe ke ndinọ enye “ubọn̄ ye ukpono.” Jehovah ama emenede Eyen esie “enịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄.” (Mme Hebrew 2:9; Philippi 2:9) Usụn̄ uwem Jesus ama adat Jehovah esịt. (Mme N̄ke 27:11) Uwem esie eke isọn̄ ama okụt unen koro enye ama ọyọhọ uduak esie. Jesus ama anam uduak Abasi onyụn̄ ada ukpono ọsọk enyịn̄ Esie. Nte utịp, Abasi ama ọnọ Jesus orụk uforo, unyịme, ye uwọrọiso oro ọfiọkn̄wed, ebre mbre ukara, m̀mê ata ebre mbre mbuba ndomokiet mîdinyeneke tutu amama. Jesus  ke akpanikọ ekedi owo oro okokụtde unen akan owo ekededi oro akanam odude uwem ke isọn̄.

Mme ete ye eka ẹdide Christian ẹfiọk ẹte ke edieke n̄kpri nditọ mmimọ ẹtienede nde ikpat Christ, ẹnyenede inyene ke n̄kan̄ Abasi ke usụn̄ifiọk oro Jesus ekenyenede, mmọ ẹyedọk akpakịp edidiọn̄ idahaemi ẹnyụn̄ ẹnyene mme utịp oro inua mîkemeke nditịn̄ ke editịm n̄kpọ oro edide. Idụhe eti usụn̄ oro akparawa owo ekpetienede nde ikpat Christ akan ndinam utom oro Jesus akanamde—ebe ke ndibuana ke utom ukwọrọikọ uyọhọ ini edieke ekemede ndinam oro.

Nte ededi, ke ndusụk obio, edi ọsọ ido ọnọ n̄kparawa owo nditre ndidụk utom ukwọrọikọ uyọhọ ini. Ke ini akparawa owo okụrede ufọkn̄wed, ẹkeme ndidori enyịn enye ndinyene utom idịbi udia uyọhọ ini, ndidọ ndọ, nnyụn̄ nsụhọde ntie ọtọkiet. Ke ndusụk idaha, n̄kparawa owo oro ẹtode mme utọ obio oro ke ndudue ẹsitre ndidụk utom ukwọrọikọ uyọhọ ini. (Mme N̄ke 3:27) Ntak-a? Ke ntak mfịghe, mmọ ẹsidu uwem ẹkekem ye mme ọsọ idaha ido obio. Oro edi se iketịbede inọ Robert. *

Ke Ini Ido Obio Atuahade ye Ubieresịt

Ẹkebọk Robert nte kiet ke otu Mme Ntiense Jehovah. Ke mme isua uyen esie, edu uwem esie ye mme nsan̄a oro enye ekemekde iketịmke idot. Eka esie ama ọtọn̄ọ nditịmede esịt mban̄a enye. Ke ntre, enye ama eben̄e asiakusụn̄ kiet, kpa ọkwọrọ ikọ uyọhọ ini eke Mme Ntiense Jehovah, ete esịn udọn̄ ọnọ enye. Robert anam an̄wan̄a se iketịbede ke oro ebede.

“Mma nnen̄ede mma nte asiakusụn̄ eyenete eren oro ekenyenede udọn̄ ke idem mi. Eti uwụtn̄kpọ esie ama anam mi nyom nditọn̄ọ utom usiakusụn̄ nte ubọkọkọ ndondo oro n̄kụrede ufọkn̄wed. Ini oro ke Mama akafiak ọtọn̄ọ nditịmede esịt—edi ke isio isio ntak. Omokụt, ke ido obio nnyịn ọfọn eyenan̄wan ndidụk utom usiakusụn̄ ke ndondo oro okụrede ufọkn̄wed, edi ẹsidori enyịn eyeneren ndibem iso nnyene okụk, ndien ekem enye ekeme ndikere mban̄a ndinam utom usiakusụn̄.

“Mma nnyene ubọkutom nnyụn̄ ntọn̄ọ mbubehe idemmi. Ikebịghike mma nnen̄ede nsịn idem ke mbubehe oro nnyụn̄ nnam edidụk mme mbono esop ye edikwọrọ ikọ ẹdi sụk eto eto edinam. Ubieresịt mi ama afịna mi—mma mfiọk ke n̄kpekekeme ndinam n̄kpọ Jehovah ata ọyọhọ ọyọhọ. Nte ededi, ekedi ata en̄wan ndikịbe mbọhọ se mbon efen ẹkeyomde ẹto mi, edi mmokop inemesịt ke mma nnam oro. Mmọdọ ndọ idahaemi, ndien ami ye n̄wan mi idi mme asiakusụn̄ ke isua iba emi ẹkebede. Ke ndondo emi, ẹma ẹmek mi nte asan̄autom unamutom ke esop. Mmekeme nditịn̄ ke esịt akpanikọ nte ke ami idahaemi mmokop ata uyụhọ ndinam n̄kpọ Jehovah ke ofụri esịt, ke ofụri ukeme mi.”

Magazine emi esisịn udọn̄ ọnọ n̄kparawa owo ediwak ini ete ẹkpep ubọkutom m̀mê ẹkọri ndusụk enyene-ufọn n̄kpọ oro ẹnamde owo odot—ke adan̄aemi ẹsụk ẹdude ke ufọkn̄wed edieke edide mmemmem. Kaban̄a nso uduak? Man ẹnyene uforo? Baba. Akpan ntak edi man mmọ ẹkeme nditịm nse mban̄a idemmọ nte ikpọ owo ẹnyụn̄ ẹnam n̄kpọ Jehovah ata ọyọhọ ọyọhọ nte mmọ ẹkekeme, akpan akpan ke utom ukwọrọikọ uyọhọ ini. Nte ededi, esiwak nditịbe nte ke n̄kparawa owo ẹsiyak idem ẹsịn ke ndibịne ubọkọkọ ererimbot tutu utom ukwọrọikọ idịghe aba akpan n̄kpọ. Ndusụk mmọ isikam ikereke-kere iban̄a edidụk utom ukwọrọikọ uyọhọ ini. Ntak-a?

Mme ikọ Robert ẹsịn un̄wana ke ibuot nneme emi. Ke enye ama okokụre ndikpep ubọkutom, Robert ama ọtọn̄ọ  mbubehe. Ikebịghike, enye okodu uwem unana inemesịt oro mîkenyeneke ufọn ndomokiet inọ enye. Utịtmbuba esie ekedi ndinyene okụk. Edi nte akanam owo ekededi ke an̄wa m̀mê ke esịt esop Christian esịm utịtmbuba oro ọyọhọ ọyọhọ? Mme Christian ẹkpenyene ndidomo ndibiom mbiomo mmọ ke n̄kan̄ okụk, ẹsede ẹban̄a mme mbiomo mmọ ke n̄kan̄ okụk ifịk ifịk; edi mmọ ẹkpenyene n̄ko ndifiọk nte ke mme anana-iwụk ini emi, ibat ibat owo kpọt akanam ẹsịm idaha oro mmọ ẹkemede ndikere ke mmimọ imenyene okụk oro ekemde. Ntak edi oro un̄wọn̄ọ Jesus oro ẹwetde ke Matthew 6:33 enen̄erede edi n̄kpọ ndọn̄esịt ọnọ mme Christian.

Robert okop inemesịt nte ke imọ ima ibiere nditiene mme udọn̄ esịt imọ utu ke ido obio. Mfịn, enye ke anam utom ukwọrọikọ uyọhọ ini nte ubọkọkọ. Ih, utom ukwọrọikọ uyọhọ ini edi ubọkọkọ oro ọnọde owo ukpono. Robert enyene emem esịtidem koro enye anamde n̄kpọ Jehovah, nte enye ọdọhọde, ‘ke ofụri ukeme esie.’

Da Mme Ndammana Ukeme Fo Nam N̄kpọ nte Ọfọnde

Odu ediwak owo emi ẹnyenede ndammana ukeme ke otu Mme Ntiense Jehovah. Ndusụk ẹnyene mme n̄wọrọnda ukeme ufiọk n̄kpọ; mbon eken ẹnyene ukeme edinam ọkpọsọn̄ utom. Kpukpru ukeme emi ẹto Jehovah, emi ọnọde “kpukpru owo uwem, ye ibifịk, ye kpukpru n̄kpọ.” (Utom 17:25) Ke uwem mîkpodụhe, kpukpru ukeme emi ikpenyeneke ufọn ndomokiet.

Do, etịm odot ete nnyịn ida uwem nnyịn oro ima ikayak inọ isịn ke utom Jehovah. Oro edi se akparawa kiet oro ekenyenede ndammana ukeme ekebierede ndinam. Enye okodu uwem ke akpa isua ikie E.N. Nte andibuana ke ọwọrọiso ubon, enye ama abiat ini uyen esie ke ọwọrọetop obio Tarsus eke Cilicia. Okposụkedi ekedide owo Jew ke emana, enye ama ọbọ itie eyenisọn̄ Rome oto ete esie. Oro ama anam enye enyene ediwak unen ye ifetutom. Ke enye ama ọkọkọri okpon, enye ama ekpep Ibet oto kiet ke otu mme ọwọrọetop “prọfesọ” ini oro—Gamaliel. Eketie nte ke enye ekpekenyene ‘uforo, unyịme, ye uwọrọiso,’ ke mîbịghike.—Utom 21:39; 22:3, 27, 28.

Anie ke akparawa emi ekedi? Enyịn̄ esie ekedi Saul. Edi Saul ama akabade Christian ndien ke akpatre ama akabade edi apostle Paul. Enye ama esịk akpa ikpọ udọn̄ esie enịm onyụn̄ ayak ofụri uwem esie esịn ke utom Jehovah nte Christian. Owo ikọdiọn̄ọke Paul nte ọwọrọetop ekpeibet, edi ẹkediọn̄ọ enye nte ifịk ifịk ọkwọrọ eti mbụk. Ke ama akabiat se ikperede ndisịm isua 30 nte isụn̄utom, Paul ama ewet leta ọnọ ẹsọk nditọete ke Philippi. Ke leta emi enye ama odụn̄ọde mme n̄kpọ oro enye akanamde ke ini edem mbemiso enye akakabarede edi Christian, ndien ekem enye ama ọdọhọ ete: ‘Mmayak kpukpru n̄kpọ ẹtak kaban̄a [Jesus Christ], mmonyụn̄ nsịn mmọ ke mbio, man mbọ Christ nda nnyene.’ (Philippi 3:8) Baba, Paul ikatuaha n̄kpọfiọk iban̄a usụn̄ oro enye akadade uwem esie anam n̄kpọ!

Nso kaban̄a ukpep oro Paul ọkọbọde oto Gamaliel? Nte akananam emi ama enyene ufọn ọnọ enye? Ih! Ke ediwak idaha enye ama etịp esịn ke “ndikpeme nnyụn̄ nsọn̄ọ n̄wụk eti mbụk nte ekemde ye ibet.” Edi akpan utom Paul ekedi ndidi ọkwọrọ eti mbụk—kpa n̄kpọ oro akpa ukpep oro enye ọkọbọde mîkpekekemeke ndikpep enye tutu amama.—Philippi 1:7; Utom 26:24, 25.

Ukem ntre mfịn, ndusụk owo ẹmeda mme enọ ye ndammana ukeme mmọ idem ye ifiọkn̄wed mmọ ndinam mme ufọn n̄kpọ Obio Ubọn̄ ẹka iso. Ke uwụtn̄kpọ, Amy enyene n̄weditoro ufọkn̄wed ntaifiọk ke ukpepn̄kpọ unyamurua ye n̄weditoro efen ke ukpeibet. Inikiet enye ama enyene ata eti utom ke ufọkutom ukpeibet, edi mfịn enye anam utom nte asan̄autom unyịmesịt oro owo mîkpehe okụk ke kiet ke otu mme ọfis n̄kọk itieutom Watch Tower Society. Emi edi nte Amy etịn̄de aban̄a uwem esie idahaemi: “Ami nnịm ke akpanikọ nte ke mmanam mfọnn̄kan edimek ke uwem. . . . Nnyeneke udọn̄ ndimia mbuba ye ekededi ke otu uke mi ke ufọkn̄wed ntaifiọk. Mmokop inemesịt mban̄a usụn̄ uwem oro mmekde. Mmenyene kpukpru n̄kpọ oro nyomde nnyụn̄ mmade—kpa inem inem uwem ye ubọkọkọ oro enyenede se ọwọrọde onyụn̄ ọnọde uyụhọ.”

Amy ama emek usụn̄ uwem oro ọnọde enye ifụre ekikere, uyụhọ, ye edidiọn̄ Jehovah. Ke akpanikọ, mme ete ye eka ẹdide Christian ẹyom ukem emi ẹnọ nditọ mmọ!

 Edikụt Unen ke Utom Ukwọrọikọ Christian

Nte ededi, edi akpan n̄kpọ ndinyene nnennen ekikere mban̄a edikụt unen ke utom ukwọrọikọ Christian ke idemesie. Isọn̄ke ndikere ke imokụt unen ke ini ikopde inem an̄wautom, inịmde mme n̄wed Bible m̀mê ibuande mme enyeneufọk ke mme edemede-udọn̄ nneme Bible. Edi edieke nnyịn mîwakke ndikụt mbon oro ẹnọde n̄kpan̄utọn̄, nnyịn imekeme ndisịm ubiere nte ke nnyịn ibiat ini nnyịn. Nte ededi, ti ete ke kiet ke otu edikabade edikụt unen edi ‘edinyene unyịme.’ Unyịme anie ke nnyịn iyom ndinyene? Ke akpanikọ, unyịme Jehovah. Nnyịn imekeme ndinyene emi edide mme owo ẹkpan̄ utọn̄ ẹnọ etop nnyịn m̀mê ikpan̄ke. Jesus ama ekpep mme mbet esie okopodudu ukpepn̄kpọ ke afan̄ emi.

Afo eyeti nte ke Jesus ama osio mme ọkwọrọ Obio Ubọn̄ 70 ọdọn̄ “ẹka ẹkedụk ke kpukpru obio ye ebiet, eke Enye ke Idem Esie oyomde ndika.” (Luke 10:1) Mmọ ẹkenyene ndikwọrọ ikọ ke ikpọ obio ye mme obio-in̄wan̄ ye unana edisan̄a ye Jesus. Emi ekedi obufa ifiọkutom ọnọ mmọ. Ntem, Jesus ama ọnọ mmọ item ọyọhọ ọyọhọ mbemiso osiode mmọ ọdọn̄. Ke ini mmọ ẹsobode “eyen emem,” mmọ ẹkenyene ndinọ enye ọyọhọ ikọ ntiense aban̄ade Obio Ubọn̄. Nte ededi, ke ini ẹkesịnde mmọ, mmọ ẹkenyene ndika iso, idọn̄ke enyịn. Jesus ama anam an̄wan̄a nte ke mbon oro ẹkesịnde ndikpan̄ utọn̄ nnọ mmọ ẹkenen̄ede ẹsịn Jehovah ke idemesie.—Luke 10:4-7, 16.

Ke ini owo 70 oro ẹma ẹkekụre utom ukwọrọikọ mmọ, mmọ ẹma ẹfiak ẹdi “ye idatesịt ẹdọhọde [Jesus] ẹte, Ọbọn̄, kpa mme demon ẹsụk ibuot ẹnọ nnyịn ke enyịn̄ Fo.” (Luke 10:17) Anaedi ekedi n̄kpọ nduaidem ọnọ mme anana-mfọnmma owo emi ndibịn mme okopodudu edibotn̄kpọ eke spirit nduọn̄ọ! Nte ededi, Jesus ama ọnọ mme mbet esie oro ẹkekopde nduaidem mi item ete: “Ẹkûdat esịt koro mme spirit ẹsụkde ibuot ẹnọ mbufo, edi ẹdat esịt koro ẹma ẹwet enyịn̄ mbufo ke heaven.” (Luke 10:20, sịghisịghi ubọkn̄wed edi eke nnyịn.) Ekeme ndidi owo 70 oro idinyeneke odudu kpukpru ini ndibịn mme demon nduọn̄ọ, m̀mê mmọ ndinyene nti utịp kpukpru ini ke utom ukwọrọikọ. Edi edieke mmọ ẹsọn̄ọde ẹda ẹnam akpanikọ, mmọ ẹyenyene unyịme Jehovah kpukpru ini.

Nte Afo Emesidara Mme Asan̄autom Uyọhọ Ini?

Akparawa kiet ama asian ebiowo Christian inikiet ete: “Ke ini n̄kụrede akamba ufọkn̄wed, nyodomo ndiyom utom. Edieke mmen̄kemeke ndikụt utom, do nyekere mban̄a ndidụk ndusụk orụk utom uyọhọ ini.” Nte ededi, oro idịghe ekikere ata ediwak owo oro ẹdụkde utom usiakusụn̄. Man ẹnam utom usiakusụn̄, ndusụk owo ẹsana mme ifet edibịne nti ubọkọkọ ẹyak. Mmọ eken ẹmesịn akama-nduaidem ifet uka n̄wed. Ukem nte apostle Paul, mmọ ẹmenam n̄waidem, edi ukem nte Paul, Robert, ye Amy, mmọ ituaha n̄kpọfiọk iban̄a mme edimek oro mmọ ẹkenamde. Mmọ ẹwụt esịtekọm ẹban̄a ifet oro mmọ ẹnyenede ndida mme ukeme mmọ ntoro Jehovah, oro odotde ndibọ mfọnn̄kan n̄kpọ oro mmọ ẹkemede ndinọ.

Ke nsio nsio ntak, ediwak mme anam-akpanikọ Ntiense Jehovah ikemeke ndinam utom usiakusụn̄. Ekeme ndidi mmọ ẹnyene mme mbiomo N̄wed Abasi ndise mban̄a. Kpa ye oro, edieke mmọ ẹnamde n̄kpọ Abasi ke ofụri ‘esịt, ukpọn̄, ye ekikere,’ Jehovah enem esịt ye mmọ. (Matthew 22:37) Okposụkedi mmọ ke idemmọ mîkemeke ndinam utom usiakusụn̄, mmọ ẹfiọk ẹte ke mbon oro ẹnamde utom usiakusụn̄ ẹmek eti ubọkọkọ.

Apostle Paul ekewet ete: ‘Ẹkûkabade ẹbiet eyo emi.’ (Rome 12:2) Ke n̄kemuyo ye item Paul, inaha nnyịn iyak mme ido obio m̀mê mme idaha ererimbot eke editịm n̄kpọ emi ẹkara ekikere nnyịn. Edide afo emekeme ndinam utom usiakusụn̄ m̀mê ukemeke, nam utom Jehovah edi akpan n̄kpọ ke uwem fo. Afo oyokụt unen adan̄a nte edide afo emenyene unyịme Jehovah.

[Mme Ikọ idakisọn̄]

[Ndise ke page 19]

Kûsọn̄ọ uyịre ke anana-inem utom oro mînyeneke ufọn ndomokiet