Mme Idaha Ido Uwem ke Ẹsụhọde

“AKANAM utọ n̄kpọ oro itịbeke,” ntem ke Helmut Schmidt, akani akwa asan̄autom Germany ọkọdọhọ. Enye ekeseme aban̄a ntatara unana edinam akpanikọ eke ikpọ owo ukara oro ẹdide mme akpan ibuotikọ n̄wedmbụk n̄kpọntịbe ke ndondo emi. Enye ama ọdọhọ ete: “Mme idaha ido uwem ẹmesop ke ntak idiọkitọn̄.”

Ediwak owo ẹyenyịme ye enye. Ẹmefụmi mme idaha ido uwem oro ẹkọn̄ọde ke Ikọ Abasi, kpa Bible, oro ẹnyịmede ntatara ntatara ke anyan ini nte ndausụn̄ ke se inende ye se ikwan̄ade. Emi edi ntre idem ke mme idụt oro ẹdade ẹkebuan ye Ido Ukpono Christ.

Nte Idaha Ido Uwem eke Bible Enyene Ufọn?

Idaha ido uwem oro ọkọn̄ọde ke mme ukpepn̄kpọ Bible esịne edinam akpanikọ ye nsọn̄ọnda. Edi utụk, n̄wo, ye udia inọ ẹtara. The Times eke London ọtọt ete ke “ẹdọhọ ke [ndusụk mme anam ndụn̄ọde] ẹsibọ se iwakde isịm £100,000 ini kiet man ẹfiak ẹyak n̄kpọsọn̄ ibọk oro ukara ọkọbọde mme abiatibet ẹnọ m̀mê man ẹfụmi uyarade aban̄ade mme akpan edinam ubiatibet.” Ke Austria, ẹdọhọ ke udia n̄wo ke insurance edi ọsọ edinam. Ndien ke Germany ama akpa ntaifiọk idem ke ini mme anam ndụn̄ọde ke  ndondo emi ẹkeyararede “kiet ke otu ndiọkn̄kan edinam n̄wo ke ifiọk ntaifiọk Germany.” Ẹma ẹdori prọfesọ kiet, kpa “n̄wọrọnda owo ke otu mme ekpepn̄kpọ mban̄a nsenubon,” ikọ ẹte ke ama okpụhọ m̀mê ewet abian̄a abian̄a ntọt ke akamba usụn̄.

Idaha ido uwem oro ọkọn̄ọde ke Bible esịne n̄ko edinam akpanikọ ke ndọ, oro ẹyomde edi nsinsi ebuana. Edi ibat mme ọdọ ndọ oro ọkọride-kọri ẹsion̄o ndọ ke esopikpe usiondọ. N̄wedmbụk n̄kpọntịbe Catholic oro Christ in der Gegenwart (Christian Idahaemi) ọtọt ete ke “idem ke Switzerland oro ẹtienede ‘akani ido,’ ediwak ndọ ke ẹwụre.” Ke Netherlands, mbahade 33 eke ikie ke kpukpru ndọ ẹtre ke usiondọ. N̄wan kiet oro okokụtde ukpụhọde ke edinam n̄kaowo ke Germany ke mme isua ifan̄ emi ẹkebede ama ewet aban̄a editịmede esịt esie ete: “Ẹbat ndọ idahaemi nte n̄kpọeset ye akani ido. Mme owo idọhọ aba owo ke ofụri eyouwem.”

Ke n̄kan̄ eken, ediwak miliọn owo ẹda mme idaha ido uwem oro ẹkpepde ke Bible nte se ẹkemede ndiberi edem ye se inyenede ufọn inọ uwem ke ererimbot eyo nnyịn. Ebe ye n̄wan oro ẹdụn̄de ke adan̄a Switzerland ye Germany ẹma ẹkụt nte ke ndikpep ndidu uwem ekekem ye mme idaha ido uwem eke Bible anam mmimọ inen̄ede ikop inemesịt. Ye mmọ, “ndausụn̄ kiet kpọt odu ọnọ kpukpru ikpehe uwem. Ndausụn̄ oro edi Bible.”

Afo ekere didie? Nte Bible ekeme ndidi eti ndausụn̄? Nte mme idaha ido uwem oro ẹkọn̄ọde ke Bible ẹnyene ufọn mfịn?