Mmanie Ẹdi Mme Asan̄autom Abasi Mfịn?
Mmanie Ẹdi Mme Asan̄autom Abasi Mfịn?
“Nnyịn nditịm ndot oto Abasi; emi ke akpanikọ anamde nnyịn itịm idot ndidi mme asan̄autom obufa ediomi.”—2 CORINTH 3:5, 6, NW.
1, 2. Nso mbiomo ke kpukpru Christian akpa isua ikie ẹkenyene, edi didie ke mme n̄kpọ ẹkekpụhọde?
KE AKPA isua ikie Eyo Nnyịn, kpukpru Christian ẹma ẹbuana ke akpan utom kiet—utom edikwọrọ eti mbụk. Kpukpru mmọ ẹkedi mbon oro ẹyetde aran ẹkenyụn̄ ẹdi mme asan̄autom obufa ediomi. Ndusụk mmọ ẹma ẹnyene mme utom efen efen, utọ nte edinọ ukpep ke esop. (1 Corinth 12:27-29; Ephesus 4:11) Mme ete ye eka ẹma ẹnyene mme ndodobi mbiomo ke esịt ubon. (Colossae 3:18-21) Edi kpukpru mmọ ẹma ẹbuana ke akpan utom edikwọrọ ikọ. Ke akpasarade usem Greek emi ẹkedade ẹwet N̄wed Abasi eke Christian, mbiomo emi ekedi di·a·ko·niʹa—utom.—Colossae 4:17.
2 Nte ini akakade, mme n̄kpọ ẹma ẹkpụhọde. Otu kiet ama ọwọrọ edi, oro ẹkediọn̄ọde nte mme ọkwọrọ ederi, oro ẹkemụmde ifet utom ukwọrọikọ ẹkama ke idemmọ kpọt. (Utom 20:30) Mme ọkwọrọ ederi oro ẹkedi ibat ibat owo kpọt ke otu mbon oro ẹkekotde idemmọ Christian. Ẹkedidiọn̄ọ n̄wakn̄kan owo nte usụhọde mbon ido ukpono. Ke adan̄aemi ẹkpepde usụhọde mbon ido ukpono nte ke mmọ ẹnyene ndusụk mbiomo, esịnede edinọ etịbe man ẹda ẹse ẹban̄a mme ọkwọrọ ederi, ata ediwak mmọ ẹma ẹkabade ẹdi sụk mme ndebe ndebe andikpan̄ utọn̄ ke se iban̄ade ukwọrọikọ.
3, 4. (a) Didie ke mme owo ẹsikabade ẹdi mme asan̄autom ke Christendom? (b) Anie ke ẹda nte asan̄autom ke Christendom, ndien ntak emi mme n̄kpọ ẹdide isio ke otu Mme Ntiense Jehovah?
3 Mme ọkwọrọ ederi oro ẹdọhọ ke mmimọ idi mme asan̄autom (ẹdade ẹto minister, nte ẹkabarede di·aʹko·nos, “eyenufọk,” ke usem Latin). * Man ẹkabade ẹdi mme asan̄autom, mmọ ẹnyene ndikụre ukpep ke akamba ufọkn̄wed m̀mê mme itie unọ mme oku ukpep ẹnyụn̄ ẹdi se ẹdoride ubọk. The International Standard Bible Encyclopedia ọdọhọ ete: “‘Dori ubọk’ ye ‘edidori ubọk’ ẹtịn̄ ẹban̄a san̄asan̄a idaha oro ẹnọde mme asan̄autom m̀mê mme oku ebe ke mme an̄wan̄wa edinam unọ unyịme, oro ẹsidoride nsọn̄uyo ke odudu oro ẹnọde mmọ nditan̄a Ikọ Abasi m̀mê ndinam mme edinam ido ukpono, m̀mê ndinam mbiba.” Anie esidori mme asan̄autom emi ubọk? The New Encyclopædia Britannica ọdọhọ ete: “Ke mme ufọkabasi oro ẹsụk ẹnyenede itieutom bishop, asan̄autom oro esidoride mme owo ubọk esiwak ndidi bishop. Ke mme ufọkabasi Presbyterian, mme akama ukara ufọkabasi ẹsidori owo ubọk.”
4 Ntem, ke mme ufọkabasi Christendom, ibat ibat owo ẹnyene ifet ndidi asan̄autom. Edi, emi idịghe ntre ke otu Mme Ntiense Jehovah. Ntak mîdịghe? Koro ikedịghe ntre ke esop Christian akpa isua ikie.
Mmanie Ẹnen̄ede Ẹdi Mme Asan̄autom Abasi?
5. Nte Bible ọdọhọde, mbon oro ẹnamde n̄kpọ nte mme asan̄autom esịne mmanie?
5 Nte Bible ọdọhọde, kpukpru andituak ibuot nnọ Jehovah—eke heaven ye eke isọn̄—ẹdi mme asan̄autom. Mme angel ẹma ẹnam n̄kpọ ẹnọ Jesus. (Matthew 4:11; 26:53; Luke 22:43) Mme angel n̄ko “ẹnam n̄kpọ ẹnọ mmọ emi ẹdidade edinyan̄a ẹnyene.” (Mme Hebrew 1:14; Matthew 18:10) Jesus ekedi asan̄autom. Enye ama ọdọhọ ete: “Eyen Owo ikedịghe, man ẹsan̄a utom ẹnọ Enye, edi man Enye asan̄a utom ọnọ owo.” (Matthew 20:28, NW; Rome 15:8) Ke ntre, sia mme anditiene Jesus ẹkenyenede ‘nditiene nsan̄a ke nde ikpat Esie,’ idịghe n̄kpọ n̄kpaidem nte ke mmọ n̄ko ẹnyene ndidi mme asan̄autom.—1 Peter 2:21.
6. Didie ke Jesus okowụt nte ke mme mbet imọ ẹkpenyene ndidi mme asan̄autom?
6 Esisịt ini mbemiso ọdọkde aka heaven, Jesus ama ọdọhọ mme mbet esie ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Mme mbet Jesus ẹkenyene ndidi mme anam-mbet—mme asan̄autom. Mbufa mbet oro mmọ ẹdinamde ẹyekpep ndinam kpukpru n̄kpọ eke Jesus eketemede, esịnede ewụhọ ndika n̄kanam mme mbet. Edide eren m̀mê n̄wan, akwa owo m̀mê eyenọwọn̄, ata mbet Jesus Christ ekpenyene ndidi asan̄autom.—Joel 2:28, 29.
7, 8. (a) Mme itien̄wed ewe ẹwụt nte ke kpukpru ata Christian ẹdi mme asan̄autom? (b) Mme mbụme ewe idemede iban̄a edidori ubọk?
7 Ke n̄kemuyo ye emi, ke usen Pentecost 33 E.N., kpukpru mbet Jesus oro ẹkedude do, iren ye iban, ẹma ẹdiana ke nditịn̄ “ata n̄kpọsọn̄ utom Abasi.” (Utom 2:1-11) Ke adianade do, apostle Paul ama ewet ete: “Owo ada esịt enịm ke akpanikọ enyene edinen ido; onyụn̄ ada inua enyịme enyene edinyan̄a.” (Rome 10:10) Paul ikewetke mme ikọ oro inọ otu mme ọkwọrọ ederi, edi ekewet “ọnọ ẹsọk kpukpru mmọ emi [ẹkedude] ke Rome, emi Abasi amade.” (Rome 1:1, 7) Ukem ntre, kpukpru ‘ikọt Abasi emi ẹkedude ke Ephesus, ye mbon akpanikọ ke Christ Jesus’ ẹkenyene ndida ‘mben̄e-idem ndikwọrọ gospel emem nsịne nte ikpa-ukot.’ (Ephesus 1:1; 6:15) Ndien kpukpru mbon oro ẹkekotde leta oro ẹkewetde ẹnọ Mme Hebrew ẹkenyene ‘ndisọn̄ọ mmụm ikọ eke ẹdade ẹyarade idot-enyịn mmọ n̄kama mbak edibọhọ mmọ oyok.’—Mme Hebrew 10:23.
8 Nte ededi, ini ewe ke owo akabade edi asan̄autom? Ke ikọ efen, ini ewe ke ẹdori enye ubọk? Ndien anie odori enye ubọk?
Edidori Ubọk nte Asan̄autom—Ini Ewe?
9. Ini ewe ke ẹkedori Jesus ubọk, ndien anie akanam oro?
9 Kaban̄a ini oro ẹdoride owo ubọk ye m̀mê anie esidori owo ubọk, kere ban̄a uwụtn̄kpọ Jesus Christ. Enye ikenyeneke setifiket edidori ubọk m̀mê n̄weditoro otode ufọkn̄wed ukpep utom oku ndiwụt nte ke imọ ikedi asan̄autom, ndien idịghe owo ndomokiet okodori enye ubọk. Do, ntak ikemede ndidọhọ ke enye ekedi asan̄autom? Koro mme ikọ Isaiah eke odudu spirit ẹma ẹsu enye ke idem: “Spirit Jehovah odoro Mi ke idem, koro Enye emeyet Mi aran enịm, ete, n̄kwọrọ eti mbụk.” (Luke 4:17-19; Isaiah 61:1) Mme ikọ oro iyakke eyịghe ndomokiet odu nte ke ẹma ẹnọ Jesus odudu ndikwọrọ eti mbụk. Anie akanam oro? Sia spirit Jehovah ekeyetde enye aran ọnọ utom oro, ana in̄wan̄în̄wan̄ nte ke Jehovah Abasi okodori Jesus ubọk. Ini ewe ke emi eketịbe? Spirit Jehovah ke akpanikọ okodoro Jesus ke ini enye akanade baptism. (Luke 3:21, 22) Ke ntre, ekedi ke baptism esie ke ẹkedori enye ubọk.
10. Anie anam asan̄autom Christian ‘etịm odot’?
10 Nso kaban̄a mme anditiene Jesus eke akpa isua ikie? Idaha mmọ nte mme asan̄autom okoto Jehovah n̄ko. Paul ọkọdọhọ ete: “Nnyịn nditịm ndot oto Abasi; emi ke akpanikọ anamde nnyịn itịm idot ndidi mme asan̄autom obufa ediomi.” (2 Corinth 3:5, 6, NW) Didie ke Jehovah esinam mme andituak ibuot nnọ enye ẹdot ndidi mme asan̄autom? Kere ban̄a uwụtn̄kpọ Timothy, oro Paul okokotde “anam-utom Abasi ke gospel Christ.”—1 Thessalonica 3:2.
11, 12. Didie ke Timothy akanam n̄kọri ebịne ndikabade ndi asan̄autom?
11 Mme ikọ ẹtienede mi oro ẹkewetde ẹnọ Timothy ẹyen̄wam nnyịn ndifiọk nte enye akakabarede edi asan̄autom: “Edi afo, yịre ke se afo ekekpepde, onyụn̄ etịmde ọfiọk ete edi akpanikọ; koro ọmọdiọn̄ọ owo emi ekekpepde fi, omonyụn̄ ọfiọk ete, toto ke uyen afo ama ọfiọk Edisana N̄wed Abasi, emi ekemede ndinam fi ọwọrọ ọniọn̄ ọbọ edinyan̄a ke edibuọt idem ye Christ Jesus.” (2 Timothy 3:14, 15) Itiat idakisọn̄ mbuọtidem Timothy, emi edinụkde enye ndikwọrọ ikọ an̄wan̄wa, ekedi ifiọk N̄wed Abasi. Nte ọkpọkpọ edikot n̄wed ekedi ofụri se ẹkeyomde man enye anam emi? Baba. Ama oyom ẹn̄wam Timothy man enye enyene nnennen ifiọk ye ikike eke spirit ke se enye okokotde. (Colossae 1:9) Ntem ẹma ẹkpek Timothy ‘etịm ọfiọk ete edi akpanikọ.’ Sia enye ama ọkọfiọk N̄wed Abasi “toto ke uyen,” anaedi eka esie ye eka-eka esie ẹkedi mme akpa andikpep esie, sia ete esie nte an̄wan̄ade mîkedịghe andinịm ke akpanikọ.—2 Timothy 1:5.
12 Nte ededi, se ikande emi ama abuana ke Timothy ndikabade ndi asan̄autom. Akpa kan̄a, enye ndikodụk nsan̄a ye mme Christian ke mme n̄kpet n̄kpet esop ama ọsọn̄ọ mbuọtidem esie. Nnyịn isan̄a didie ifiọk? Koro ke ini Paul okosobode Timothy ke akpa ini, ‘nditọete emi ẹdude ke Lystra ye Iconium ẹma ẹbụk eti mbụk ẹban̄a’ akparawa emi. (Utom 16:2) Adianade do, ke ini oro, ndusụk nditọete ẹma ẹsiwet leta ẹnọ ẹsọk mme esop man ẹsọn̄ọ mmọ idem. Ndien mme esenyịn ẹma ẹsika ẹkese mmọ man ẹkesịn udọn̄ ẹnọ mmọ. Mme utọ ndutịm oro ẹma ẹn̄wam mme Christian nte Timothy ndinam n̄kọri ke n̄kan̄ eke spirit.—Utom 15:22-32; 1 Peter 1:1.
13. Ini ewe ke ẹkedori Timothy ubọk nte asan̄autom, ndien ntak ọkpọdọhọde nte ke n̄kọri esie ke n̄kan̄ eke spirit iketreke do?
13 Ke ikerede iban̄a ewụhọ Jesus oro ẹwetde ke Matthew 28:19, 20, nnyịn imekeme nditịm nnịm ke nte ini akakade, mbuọtidem Timothy ama onụk enye ndikpebe Jesus nnyụn̄ nna baptism. (Matthew 3:15-17; Mme Hebrew 10:5-9) Emi ekedi idiọn̄ọ uyakidem ofụri ukpọn̄ emi Timothy akayakde ọnọ Abasi. Timothy ama akabade edi asan̄autom ke ama akana baptism. Ọtọn̄ọde ke ini oro ka iso, uwem esie, odudu esie, ye kpukpru se enye ekenyenede ẹkenyene Abasi. Emi ekedi akpan ubak utuakibuot, “edisana utom,” esie. Nte ededi, Timothy ikokopke uyụhọ n̄kukụre ke ndidi asan̄autom. Enye ama aka iso ndinam n̄kọri ke n̄kan̄ eke spirit, akabarede edi asan̄autom Christian oro ọkọride esịm ọyọhọ idaha. Emi ekedi ntre ke ntak n̄kpet n̄kpet ebuana oro Timothy ekenyenede ye mme utọ Christian oro ẹkekọride ẹsịm ọyọhọ idaha nte Paul, ọkpọkpọ ukpepn̄kpọ, ye ifịk ifịk utom ukwọrọikọ esie.—1 Timothy 4:14; 2 Timothy 2:2; Mme Hebrew 6:1.
14. Mfịn, didie ke owo emi ‘enyịmede nsinsi uwem’ esinam n̄kọri ebịne ndidi asan̄autom?
14 Mfịn, edidori ubọk man ẹnam utom ukwọrọikọ Christian edi ukem oro. Ẹsin̄wam owo emi ‘enyịmede nsinsi uwem’ ndikpep mban̄a Abasi ye mme uduak esie ebe ke ukpepn̄kpọ Bible. (Utom 13:48, NW) Owo emi esikpep ndida mme edumbet Bible nsịn ke edinam ke uwem esie ndinyụn̄ mbọn̄ akam ke ofụri esịt nnọ Abasi. (Psalm 1:1-3; Mme N̄ke 2:1-9; 1 Thessalonica 5:17, 18) Enye esidụk nsan̄a ye mme andinịm ke akpanikọ eken onyụn̄ ọbọ ufọn oto mme ndutịm oro “asan̄autom emi anamde akpanikọ, onyụn̄ enyenede ọniọn̄” anamde. (Matthew 24:45-47; Mme N̄ke 13:20; Mme Hebrew 10:23-25) Ntem enye esinam n̄kọri ke eti ndutịm ubọ ukpep oro ẹnamde.
15. Nso isitịbe ke ini owo anade baptism? (Se n̄ko ikọ idakisọn̄.)
15 Nte ini akade, eyen ukpepn̄kpọ Bible oro, ke ama ọkọkọri ima ọnọ Jehovah Abasi ye ọkpọsọn̄ mbuọtidem ke uwa ufak, esiyom ndiyak idemesie ọyọhọ ọyọhọ nnọ Ete esie eke heaven. (John 14:1) Enye esinam uyakidem emi ke ọkpọkpọ akam ndien ekem ana baptism nte an̄wan̄wa idiọn̄ọ uyakidem oro enye akanamde ke ndịbe. Baptism esie edi edinam edidori enye ubọk koro ini oro ke ẹdiọn̄ọ enye nte asan̄autom, di·aʹko·nos, oro ama akayak idem ọyọhọ ọyọhọ ọnọ Abasi. Enye enyene ndida san̄asan̄a n̄kpọn̄ ererimbot. (John 17:16; James 4:4) Enye amayak ofụri idemesie nte “odu-uwem uwa, emi asanade, emi onyụn̄ enemde Abasi ndibọ” ọnọ ye unana edifam n̄kpọ nnịm m̀mê ke ubiọn̄. (Rome 12:1) * Enye edi asan̄autom Abasi, emi ekpebede Christ.
Nso Idi Utom Christian?
16. Nso ikedi ndusụk utom Timothy nte asan̄autom?
16 Utom Timothy ekesịne nso? Enye ama enyene mme akpan utom nte nsan̄a ukaisan̄ Paul. Ndien ke ini enye akakabarede edi ebiowo, Timothy ama anam utom ọkpọsọn̄ ke ndikpep nnyụn̄ nsọn̄ọ mme ekemmọ Christian idem. Edi, nte ekedide ye Jesus ye Paul, akpan ikpehe ke utom esie, ekedi ndikwọrọ eti mbụk nnyụn̄ nnam mme mbet. (Matthew 4:23; 1 Corinth 3:5) Paul ama ọdọhọ Timothy ete: “Edi ama edi afo, fara ke idem ke kpukpru n̄kpọ, biom ukụt, nam utom ọkwọrọ-gospel, nam utom fo ma.”—2 Timothy 4:5, sịghisịghi ubọkn̄wed edi eke nnyịn.
17, 18. (a) Mme Christian ẹsibuana ke utom ewe? (b) Utom ukwọrọikọ edi akpan n̄kpọ adan̄a didie ọnọ asan̄autom Christian?
17 Edi ukem oro ye mme asan̄autom Christian mfịn. Mmọ ẹsibuana ke an̄wan̄wa utom, kpa utom ukwọrọikọ, ẹmende mmọ en̄wen ẹwụt edinyan̄a ebe ke isọn̄ uwa Jesus ẹnyụn̄ ẹkpepde mbon nsụhọdeidem ndiseme n̄kot enyịn̄ Jehovah. (Utom 2:21; 4:10-12; Rome 10:13) Mmọ ẹsida Bible ẹsọn̄ọ nte ke Obio Ubọn̄ edi n̄kukụre idotenyịn ọnọ ubonowo oro okụtde ndutụhọ ẹnyụn̄ ẹwụt nte ke idem idahaemi nnyịn iyadia ufọn edieke nnyịn idude uwem ekekem ye mme edumbet Abasi. (Psalm 15:1-5; Mark 13:10) Edi asan̄autom Christian isikwọrọke gospel n̄kaowo. Utu ke oro, enye esikpep nte ke ‘un̄wọn̄ọ uwem emi odude ke emi ye eke uwem emi edidide ẹsan̄a ye uten̄e Abasi.’—1 Timothy 4:8.
18 Edi akpanikọ, ata ediwak asan̄autom ẹnyene mme usụn̄ efen oro mmọ ẹnamde utom, oro eke Christian kiet ekemede ndikpụhọde n̄kpọn̄ efen. Ediwak mmọ ẹnyene mme mbiomo ubon. (Ephesus 5:21–6:4) Mbiowo ye mme asan̄autom unamutom ẹnyene mme utom ke esop. (1 Timothy 3:1, 12, 13; Titus 1:5; Mme Hebrew 13:7) Ediwak Christian ẹn̄wam ke ndibọp mme Ufọkmbono Obio Ubọn̄. Ndusụk ẹnyene utịbe utịbe ifet edinam utom nte mme anamutom unyịmesịt ke kiet ke otu mme ufọkidụn̄ Bethel Watch Tower Society. Nte ededi, kpukpru asan̄autom Christian ẹsibuana ke ndikwọrọ eti mbụk. Owo isioho owo eto. Edi ndibuana ke utom emi anam ẹdiọn̄ọ owo an̄wan̄wa nte ata asan̄autom Christian.
Edu Asan̄autom Christian
19, 20. Nso edu ke ana mme asan̄autom Christian ẹkọri?
19 Ata ediwak asan̄autom Christendom ẹsidori enyịn mme owo ndinọ mmọ san̄asan̄a ukpono, ndien mmọ ẹsinyịme mme utọ udorienyịn̄ nte “reverend” (odot-ukpono) ye “father” (ete). Nte ededi, asan̄autom Christian ọfiọk ete ke Jehovah ikpọn̄ odot ukpono. (1 Timothy 2:9, 10) Asan̄autom Christian ndomokiet idotke ndibọ utọ akakan ukpono oro m̀mê ndiyom mme san̄asan̄a udorienyịn̄. (Matthew 23:8-12) Enye ọfiọk ete ke di·a·ko·niʹa enen̄ede ọwọrọ “utom.” Ndusụk ini ẹsida ikọedinam oro enyenede ebuana ye ikọ emi ẹtịn̄ ikọ ke Bible ke ebuana ye mme ọkpọkpọ utom, utọ nte edida mbet ke ini udia. (Luke 4:39; 17:8; John 2:5) Idem okposụkedi nte ẹdade enye ẹtịn̄ ikọ ke ebuana ye utom Christian enen̄erede odobi, di·aʹko·nos osụk edi asan̄autom.
20 Ke ntre, asan̄autom Christian ndomokiet ikpenyeneke ntak ndibat idem ke akpan n̄kpọ. Mme ata asan̄autom Christian—idem mbon oro ẹkamade mme akpan utom ke esop—ẹdi mme usụhọde ifịn. Jesus ama ọdọhọ ete: “Owo ekededi eke oyomde ndikabade n̄kpon ke otu mbufo eyedi asan̄a-utom mbufo; owo ekededi eke onyụn̄ oyomde ndidi ebe-iso owo ke otu mbufo oyodụk ufịn ọnọ mbufo.” (Matthew 20:26, 27) Ke ini okowụtde mme mbet esie nnennen edu oro mmọ ẹkpekọride, Jesus ama eyet mmọ ukot, anamde utom ata usụhọde ofụn. (John 13:1-15) Nso utom nsụhọdeidem ke oro ekedi ntem! Ntem, mme asan̄autom Christian ẹsinam n̄kpọ Jehovah Abasi ye Jesus Christ ke nsụhọdeidem. (2 Corinth 6:4; 11:23) Mmọ ẹsiwụt nsụhọde esịt ke ndinam n̄kpọ nnọ kiet eken. Ndien ke ini mmọ ẹkwọrọde eti mbụk, mmọ ke unana ibụk ẹnam n̄kpọ ẹnọ mbọhọidụn̄ mmọ oro mînịmke ke akpanikọ.—Rome 1:14, 15; Ephesus 3:1-7.
Me Ime ke Utom Ukwọrọikọ
21. Didie ke ẹkenọ Paul utịp ke ndikeme ime ke utom ukwọrọikọ?
21 Ye Paul, ndidi asan̄autom ama oyom ime. Enye ama ọdọhọ mbon Colossae ete ke imọ ima ikụt ekese ndutụhọ man ikwọrọ eti mbụk inọ mmọ. (Colossae 1:24, 25) Nte ededi, ke ntak oro enye ekemede ime, ediwak owo ẹma ẹnyịme eti mbụk ẹnyụn̄ ẹkabade ẹdi mme asan̄autom. Ẹma ẹbon mmọ nte nditọ Abasi ye nditọete Jesus Christ, ye idotenyịn ndikabade ndi mme edibotn̄kpọ eke spirit ye enye ke heaven. Nso ubọn̄ ubọn̄ utịp edime ime ke emi edi ntem!
22, 23. (a) Ntak oyomde mme asan̄autom Christian mfịn ẹme ime? (b) Nso utịbe utịbe mbun̄wụm esisụn̄ọ oto ime Christian?
22 Oyom mbon oro ẹnen̄ede ẹdi mme asan̄autom Abasi mfịn ẹme ime. Ediwak ẹsin̄wana ke usen ke usen ye udọn̄ọ m̀mê mme ubiak isua usọn̄. Mme ete ye eka ẹsinam utom ọkpọsọn̄—ediwak ke otu mmọ ye unana nsan̄andọ—ndibọk nditọ mmọ. Nditọwọn̄ ke ufọkn̄wed ẹsibiọn̄ọ mme ukwan̄ odudu oro ẹkande mmọ ẹkụk uko uko. Ediwak Christian ẹsobo ọkpọsọn̄ en̄wan ndutịm uforo. Ndien ediwak ẹsisobo ukọbọ m̀mê nsọn̄ọn̄kpọ ke ntak “ndiọk eyo” emi odude mfịn! (2 Timothy 3:1) Ih, se ikperede ndisịm mme asan̄autom Jehovah miliọn itiokiet mfịn ẹkeme nditịn̄ ye apostle Paul ẹte: “Ke kpukpru usụn̄ imowụt ite idi ata mme asan̄autom Abasi, ke akwa edime ime.” (2 Corinth 6:4) Mme asan̄autom Christian ikpaha mba. Ke akpanikọ ẹkpenyene nditoro mmọ ke ime mmọ.
23 Akan oro, nte enye akanamde ọnọ Paul, ime esin̄wụm utịbe utịbe mbun̄wụm. Ke ndime ime, nnyịn imụm itie ebuana nnyịn ye Jehovah ikama inyụn̄ idat enye esịt. (Mme N̄ke 27:11) Nnyịn isọn̄ọ mbuọtidem nnyịn inyụn̄ inam mme mbet, inamde ibat nditọete Christian ọkọri. (1 Timothy 4:16) Jehovah ọsọn̄ọ mme asan̄autom esie idem onyụn̄ ọdiọn̄ utom mmọ ke ukperedem ini emi. Nte utịp, ẹtan̄ mme nsụhọ ke otu 144,000 ẹbọk, ndien ediwak miliọn efen efen ẹnyene ọkpọsọn̄ idotenyịn ndidu nsinsi uwem ke paradise isọn̄. (Luke 23:43; Ediyarade 14:1) Ke akpanikọ, utom ukwọrọikọ Christian owụt mbọm oro Jehovah enyenede. (2 Corinth 4:1) Kpukpru nnyịn ikpakam ida enye ke ọsọn̄urua n̄kpọ inyụn̄ iwụt esịtekọm nte ke mfri esie oyodu ke nsinsi.—1 John 2:17.
[Mme Ikọ idakisọn̄]
^ ikp. 3 Ikọ Greek oro di·aʹko·nos edi ntọn̄ọ ikọ oro “deacon,” kpa akama-itie ke ufọkabasi. Ke mme ufọkabasi oro iban ẹkemede ndidi mme deacon, ẹkeme ndikot mmọ deacon an̄wan.
^ ikp. 15 Ke adan̄aemi Rome 12:1 enyenede n̄kpọ ndinam akpan akpan ye mme Christian oro ẹyetde aran, edumbet odude enyene n̄kpọ ndinam n̄ko ye “mme erọn̄ en̄wen.” (John 10:16) Mmọ emi ‘ẹdian idemmọ ye Jehovah, ndinam utom nnọ enye nnyụn̄ mma enyịn̄ Jehovah, man ẹkabade ẹdi mme asan̄autom esie.’—Isaiah 56:6, NW.
Nte Afo Emekeme Ndinam An̄wan̄a?
• Nso utom ke kpukpru Christian akpa isua ikie ẹkenam?
• Ini ewe ndien anie odori asan̄autom Christian ubọk?
• Nso edu ke asan̄autom Christian ọkpọkọri?
• Ntak emi asan̄autom Christian ekpemede ime kpa ye mme mfịna?
[Mme Mbụme Ukpepn̄kpọ]
[Mme ndise ke page 16, 17]
Ẹma ẹkpep Timothy Ikọ Aba si toto ke uyen. Enye akakabade edi asan̄autom oro ẹdoride ubọk ke ini akanade baptism
[Ndise ke page 18]
Baptism edi idiọn̄ọ uyakidem nnọ Abasi ẹnyụn̄ ẹda enye ẹdiọn̄ọ ke ẹdori owo ubọk nte asan̄autom
[Ndise ke page 20]
Mme asan̄autom Christian ẹnyịme ndinam utom