Mme Christian Ẹsikop Inemesịt ke Ndinam Utom

“Ekese inemesịt odu ke ndinọnọ akan nte odude ke ndibọbọ.”—UTOM 20:35, NW.

1. Nso ukwan̄ edu itara isuana mfịn, ndien ntak emi enye ekemede ndinọ unan?

 KE MME akpatre iduọkisua 1900, ẹma ẹsiwak ndikop ikọ oro “ami-ami.” Ke nditịm ntịn̄, “ami-ami” ọwọrọ, “ami-ndi-akpa” onyụn̄ owụt edu ibụk ye idiọkitọn̄ ye unana edikere mban̄a mbon en̄wen. Nnyịn imekeme nditịm nnịm nte ke isua 2000 emi, edu ami-ami ikụreke ke baba usụn̄ kiet. Ikafan̄ ke afo esikop mme mbụme emi: “Nso ufọn ke enye edinyene inọ mi?” m̀mê, “Nso ke ndinyene nto oro?” Utọ ibụk ibụk edu oro isinọhọ inemesịt. Enye edi ata isio ye edumbet oro Jesus eketịn̄de ete: “Ekese inemesịt odu ke ndinọnọ akan nte odude ke ndibọbọ.”—Utom 20:35, NW.

2. Didie ke ẹkụt nte ke edinọ esida inemesịt edi?

² Nte edi akpanikọ nte ke ekese inemesịt esidu ke ndinọnọ akan nte odude ke ndibọbọ? Ih. Kere ban̄a Jehovah Abasi. ‘Obube mmọn̄ uwem’ odu ye enye. (Psalm 36:9) Enye ọnọ nnyịn kpukpru n̄kpọ oro iyomde man nnyịn ikop inemesịt inyụn̄ idu uwem oro enyenede se ọwọrọde. Ke akpanikọ, enye edi Ebiet emi “kpukpru eti edinọ ye kpukpru enọ eke ẹfọnde ẹma,” ẹtode. (James 1:17) Jehovah, “Abasi inemesịt,” esinọ enọ kpukpru ini. (1 Timothy 1:11, NW) Enye ama edibotn̄kpọ esie edide owo, emi enye ọnọde ata ekese n̄kpọ. (John 3:16) Kere n̄ko ban̄a ekpụk ubonowo. Edieke afo edide ete m̀mê eka, afo ọmọfiọk adan̄a n̄waidem, adan̄a edinọ, oro ẹsiyomde man ẹbọk eyen. Ndien ke ediwak isua eyen oro isifiọkke mme n̄waidem oro afo anamde. Enye esida kpukpru mmọ mfefere mfefere. Kpa ye oro, esinem fi ndikụt nte eyen fo ọkọride nte utịp edinọ fo ye unana ibụk. Ntak-a? Koro afo amade enye.

3. Ntak edide n̄kpọ idatesịt ndinam n̄kpọ nnọ Jehovah ye mme ekemmọ andinịm ke akpanikọ?

³ Ke ukem usụn̄ oro, edinọ oro ọkọn̄ọde ke ima enịm utuakibuot akpanikọ idiọn̄ọ. Sia nnyịn imade Jehovah inyụn̄ imade mme ekemmọ andinịm ke akpanikọ, edi n̄kpọ idatesịt ndinam n̄kpọ nnọ mmọ, ndinọ mmọ idem nnyịn. (Matthew 22:37-39) Owo ekededi oro atuakde ibuot ke ntak ibụk ibụk uduakesịt esinyene ata esisịt idatesịt ke akpatre. Edi mbon oro ẹnamde utom ye unana ibụk, ẹnyenede udọn̄ ke se mmọ ẹkemede ndinọ ẹkan se mmọ ẹdoride enyịn ndibọ, ẹsinen̄ede ẹnyene inemesịt. Ẹkụt akpanikọ emi ke ndikere mban̄a nte ẹdade ndusụk ikọ Bible oro ẹnyenede ẹbuana ye utuakibuot nnyịn ẹtịn̄ ikọ ke N̄wed Abasi. Nnyịn iyeneme ita ke otu mme ikọ emi ke ibuotikọ emi ye enye oro etienede.

Utom Ufọn Jesus

4. Nso idi “utom ufọn” ke Christendom?

⁴ Ke akpasarade usem Greek, akpan ikọ kiet oro enyenede n̄kpọ ndinam ye utuakibuot edi lei·tour·giʹa, emi ẹkabarede nte “utom ufọn” ke New World Translation. Ke Christendom lei·tour·giʹa  emedemede ikọ oro “edinam utuakibuot.” * Nte ededi, mme enyọn̄ enyọn̄ edinam utuakibuot Christendom inen̄ekede idi utom ufọn.

5, 6. (a) Nso utom ufọn ke ẹkenam ke Israel, ye mme ufọn ewe? (b) Ewe utom ufọn oro enen̄ede okpon akan akada itie enye oro ẹkenamde ke Israel, ndien ntak-a?

⁵ Apostle Paul akada ikọ Greek oro enyenede ebuana ye lei·tour·giʹa etịn̄ aban̄a mme oku Israel. Enye ọkọdọhọ ete: “Kpukpru oku ẹda ẹnam [utom ufọn, NW; orụk ikọ oro lei·tour·giʹa] ke usen ke usen ẹnyụn̄ ẹwak ndiwa orụk uwa kiet.” (Mme Hebrew 10:11) Mme oku ẹdide Levite ẹma ẹsinam ata utom ufọn ke Israel. Mmọ ẹma ẹsikpep Ibet Abasi ẹnyụn̄ ẹwa mme uwa oro ẹkefụkde idiọkn̄kpọ mme owo. (2 Chronicles 15:3; Malachi 2:7) Ke ini mme oku ye mme owo ẹkenịmde Ibet Jehovah, idụt oro ama enyene ntak ndidat esịt.—Deuteronomy 16:15.

⁶ Ndinam utom ufọn ke idak Ibet ekedi akwa ifetutom ọnọ mme oku Israel, edi utom mmọ ikenyeneke ufọn ekededi aba ke ini ẹma ẹkesịn Israel ke ntak unana edinam akpanikọ. (Matthew 21:43) Jehovah ama anam ndutịm kaban̄a n̄kpọ oro ekenen̄erede okpon akan—utom ufọn oro Jesus, Akwa Oku, akanamde. Kaban̄a enye, nnyịn ikot ite: “Enye, koro Enye odude uwem ke nsinsi, enyene idaha oku eke mîkemeke ndikpụhọde. Ke ntak emi Enye onyụn̄ ekeme ndinyan̄a mmọ emi ẹsan̄ade ke Enye ẹkpere Abasi ọyọhọ-ọyọhọ, sia Enye odude uwem ke nsinsi ndinam n̄kpe-ubọk nnọ mmọ.”—Mme Hebrew 7:24, 25.

7. Ntak emi utom ufọn Jesus adade mme anana-mbiet ufọn edi?

⁷ Jesus anam utom nte oku ke nsinsi, ye unana mme owo ndida itie esie. Ntem, enye ikpọn̄ ekeme ndinyan̄a mme owo ọyọhọ ọyọhọ. Enye inamke anana-mbiet utom ufọn oro ke temple ubọkowo, edi anam ke ndamban̄a temple, akwa ndutịm utuakibuot Jehovah oro ọkọtọn̄ọde edinam ke 29 E.N. Jesus ke anam utom idahaemi ke Ata Edisana eke temple oro, ke heaven. Enye edi “asan̄autom [lei·tour·gosʹ] ke edisana ebiet ye ata Ataya, emi Jehovah okowụkde, mîdịghe owo.” (Mme Hebrew 8:2; 9:11, 12) Okposụkedi Jesus enyenede n̄kokon̄ idaha, enye osụk ededi “asan̄autom.” Enye ada akwa odudu esie ndinọnọ, idịghe ndibọbọ. Ndien utọ edinọ oro ada idatesịt ọsọk enye. Enye edi ubak ‘idatesịt oro akanade Enye ke iso,’ oro okonyụn̄ ọsọn̄ọde enye idem ndiyọ ke ofụri ini uwem esie ke isọn̄.—Mme Hebrew 12:2.

8. Didie ke Jesus akanam utom ufọn oro adade itie Ibet ediomi?

⁸ Ikpehe efen odu ke utom ufọn Jesus. Paul ekewet ete: “[Jesus] ọmọbọ [utom ufọn, NW] oro enen̄ede ọfọn akan, adan̄a nte Enye edide esịne-ufọt ke ediomi eke ọfọnde akan, kpa ediomi emi ẹkedade mme un̄wọn̄ọ eke ẹfọnde ẹkan ẹbọp.” (Mme Hebrew 8:6) Moses ekedi esịne-ufọt ediomi oro ekedide isọn̄ ọnọ itie ebuana Israel ye Jehovah. (Exodus 19:4, 5) Jesus ekedi esịne-ufọt obufa ediomi, emi akanamde obufa idụt ekeme ndimana, “Israel Abasi,” emi mme Christian oro ẹyetde aran ke spirit emi ẹtode ediwak idụt ẹnamde. (Galatia 6:16; Mme Hebrew 8:8, 13; Ediyarade 5:9, 10) Nso mfọnn̄kan utom ufọn ke oro ekedi ntem! Nnyịn ikop inemesịt didie ntem ndifiọk Jesus, kpa asan̄autom emi otode ke enye nnyịn ikeme ndinọ Jehovah utuakibuot emi enye enyịmede!—John 14:6.

Mme Christian N̄ko Ẹnam Utom Ufọn

9, 10. Nso idi ndusụk orụk utom ufọn oro mme Christian ẹnamde?

⁹ Idụhe owo oro anamde utom ufọn oro okponde nte eke Jesus. Nte ededi, ke ini mme Christian oro ẹyetde aran ẹbọde utịp mmọ eke heaven, mmọ ẹda itie mmọ ye Jesus ẹnyụn̄ ẹbuana ke utom ufọn esie nte ndidem ye mme oku eke heaven. (Ediyarade 20:6; 22:1-5) Mme Christian ke isọn̄ ke ẹnam utom ufọn idahaemi, ndien mmọ ẹnyene akwa idatesịt ke ndinam ntre. Ke uwụtn̄kpọ, ke ini udia akananade ke Palestine, apostle Paul ama ada mme etịbe nditọete ke Europe an̄wam ke ndisụhọde ukụt mme Christian ẹdide mme Jew ke Judea. Oro ekedi utom ufọn. (Rome 15:27; 2 Corinth 9:12) Mfịn, mme Christian ẹsikop inemesịt ndinam ukem utom oro, ẹnọde un̄wam usọp usọp ke ini nditọete mmọ ẹsobode ukụt, mme oto-obot afanikọn̄, m̀mê mme afanikọn̄ eken.—Mme N̄ke 14:21.

 ¹⁰ Paul ama etịn̄ aban̄a utom ufọn efen ke ini enye ekewetde ete: “Edi edieke ẹn̄wan̄ade mi ẹduọk ke enyọn̄ uwa [ye utom ufọn, NW] eke mbuọtidem mbufo adade ọsọk Abasi, ndat esịt nnyụn̄ ntiene kpukpru mbufo ndara.” (Philippi 2:17) Ọkpọsọn̄ utom Paul ke ufọn mbon Philippi ekedi utom ufọn oro ẹkenamde ye ima ye ifịk. Mme Christian oro ẹyetde aran akpan akpan, oro ẹnamde utom nte “asan̄autom emi anamde akpanikọ, onyụn̄ enyenede ọniọn̄,” oro ọnọde udia eke spirit ke edikem ini, ke anam ukem utom ufọn oro mfịn. (Matthew 24:45-47) Ke adianade do, nte otu, mmọ emi ẹdi “ndisana oku,” oro ẹnọde utom “ndiwa uwa spirit, eke Abasi adarade ndibọ oto ke Jesus Christ” ndinyụn̄ ‘n̄katan̄a mme utịbe edinam Esie, emi okokotde mmọ osio ke ekịm, esịn ke utịbe un̄wana Esie.’ (1 Peter 2:5, 9) Ukem nte Paul, mmọ ẹdat esịt ke mme utọ ifetutom oro idem nte mmọ ‘ẹn̄wan̄ade idemmọ ẹduọk’ ke ndinam mme utom mmọ. Ndien nsan̄a mmọ ẹdide “mme erọn̄ en̄wen” ẹdiana ye mmọ ẹnyụn̄ ẹn̄wam mmọ ke utom editịn̄ nnọ ubonowo mban̄a Jehovah ye mme uduak esie. * (John 10:16; Matthew 24:14) Nso utịbe utịbe ye idara idara utom ufọn ke oro edi ntem!—Psalm 107:21, 22.

Nam Edisana Utom

11. Didie ke prọfet an̄wan oro Anna ekenịm eti uwụtn̄kpọ ọnọ kpukpru Christian?

¹¹ Ikọ Greek efen oro enyenede n̄kpọ ndinam ye utuakibuot nnyịn edi la·treiʹa, oro ẹkabarede “edisana utom” ke New World Translation. Edisana utom enyene n̄kpọ ndinam ye mme edinam utuakibuot. Ke uwụtn̄kpọ, ẹtịn̄ ẹban̄a Anna, ebeakpa onyụn̄ edide prọfet an̄wan oro ekedide isua 84 ke emana nte ‘mîkpọn̄ke temple, edi anamde edisana utom [ikọ Greek oro enyenede ebuana ye la·treiʹa] ke editre udia ye n̄kpeubọk okoneyo ye uwemeyo.’ (Luke 2:36, 37, NW) Anna ekesituak ibuot ọnọ Jehovah kpukpru ini. Enye edi eti uwụtn̄kpọ ọnọ kpukpru nnyịn—n̄kpri ye ikpọ, iren ye iban. Kpa nte Anna ekesibọn̄de akam ifịk ifịk ọnọ Jehovah onyụn̄ atuakde ibuot ọnọ enye kpukpru ini ke temple, edisana utom nnyịn esịne ndibọn̄ akam ye ndidụk mbono esop.—Rome 12:12; Mme Hebrew 10:24, 25.

12. Nso idi akpan ikpehe edisana utom nnyịn, ndien didie ke emi n̄ko edi utom ufọn?

¹² Apostle Paul ama etịn̄ aban̄a akpan ikpehe edisana utom nnyịn ke ini enye ekewetde ete: “Abasi, emi ndade spirit mi nnam n̄kpọ [edisana utom, NW] nnọ Enye ke gospel Eyen Esie, edi ntiense ọnọ mi, adan̄a nte mmendopke ndisiak enyịn̄ mbufo ke akam mi kpukpru ini.” (Rome 1:9) Ih, edikwọrọ eti mbụk idịghe sụk utom ufọn inọ mbon oro ẹkopde enye, edi edi n̄ko edituak ibuot nnọ Jehovah Abasi. Edide nnyịn imokụt mbon oro ẹkpan̄de utọn̄ m̀mê ikwe, utom ukwọrọikọ edi edisana utom oro ẹnamde ẹnọ Jehovah. Nnyịn ndidomo nditịn̄ nnọ mbon en̄wen mban̄a nti edu ye mme ọnọ-ufọn uduak edima Ete nnyịn eke heaven ke akpanikọ ọnọ nnyịn akwa idatesịt.—Psalm 71:23.

M̀mọ̀n̄ ke Nnyịn Inam Edisana Utom?

13. Nso idi idotenyịn mbon oro ẹnamde edisana utom ke esịt okụre temple Jehovah eke spirit, ndien mmanie ẹdara ye mmọ?

¹³ Paul ekewet ọnọ mme Christian oro ẹyetde aran ete: “Sia nnyịn inyenede Obio Ubọn̄ eke n̄kpọ mîkemeke ndinyen̄e, yak nnyịn inyene esịt ekọm, inyụn̄ ida emi inọ Abasi, [edisana, NW] utom eke enemde Enye esịt ke ukpono ye uten̄e.” (Mme Hebrew 12:28) Ye ọyọhọ idotenyịn ndida Obio Ubọn̄ nnyene, mbon oro ẹyetde aran ẹnyene mbuọtidem oro n̄kpọ mîkemeke ndinyen̄e  nte mmọ ẹtuakde ibuot ẹnọ Ata Edikon̄. Mmọ kpọt ẹkeme ndinam edisana utom nnọ enye ke Edisana ubet ye esịt okụre temple Jehovah eke spirit, ndien mmọ ẹdori enyịn ye ọkpọsọn̄ udọn̄ ndinam utom ye Jesus ke Ata Edisana, ata heaven. Mme nsan̄a mmọ, mme erọn̄ en̄wen, ẹdara ye mmọ ke utịbe utịbe idotenyịn mmọ.—Mme Hebrew 6:19, 20; 10:19-22.

14. Didie ke akwa otuowo ẹbọ ufọn ẹto utom ufọn Jesus?

¹⁴ Nte ededi, nso kaban̄a mme erọn̄ en̄wen? Nte apostle John ekebemde iso okụt, akwa otuowo ẹmewụt idem ke ukperedem ini emi, ndien mmọ ‘ẹyet ọfọn̄idem mmọ ẹnam afia ke iyịp Eyen-erọn̄.’ (Ediyarade 7:14) Emi ọwọrọ nte ke, ukem nte mme ekemmọ andituak ibuot ẹdide mbon oro ẹyetde aran, mmọ ẹwụt mbuọtidem ke utom ufọn Jesus, enye ndiwa mfọnmma uwem esie eke owo ke ufọn ubonowo. Mme erọn̄ en̄wen n̄ko ẹbọ ufọn ẹto utom ufọn oro Jesus anamde koro mmọ “ẹmụmde ediomi [Jehovah] ẹkama.” (Isaiah 56:6) Baba, mmọ ibuanake ke obufa ediomi, edi mmọ ẹmụm enye ẹkama ke ndisụk ibuot nnọ mme ibet oro ẹnyenede ẹbuana ye enye nnyụn̄ mbere ye mme ndutịm oro ẹnamde ebe ke obufa ediomi emi. Mmọ ẹsan̄a ye Israel Abasi, ẹdiade n̄kpọ ke ukem okpokoro eke spirit, ẹnyụn̄ ẹnamde utom ye mme andibuana ke enye, ẹtorode Abasi an̄wan̄wa ẹnyụn̄ ẹwade mme uwa eke spirit oro ẹnemde enye esịt.—Mme Hebrew 13:15.

15. M̀mọ̀n̄ ke akwa otuowo ẹnam edisana utom, ndien nso utịp ke edidiọn̄ emi enyene ke idemmọ?

¹⁵ Ntem, ẹkụt akwa otuowo nte ‘ẹdade ke iso ebekpo ye ke iso Eyen-erọn̄, ẹsịne mfia ọfọn̄idem.’ Ke adianade do, ‘mmọ ẹdu ke iso ebekpo Abasi, ẹnyụn̄ ẹnam [edisana utom, NW] ẹnọ Enye uwemeyo ye okoneyo ke temple Esie: ndien Enye emi etiede ke ebekpo ayatat ataya Esie ofụk mmọ.’ (Ediyarade 7:9, 15) Ke Israel, mme okpono Abasi ke ido mme Jew ẹkesituak ibuot ke an̄wa okụre temple Solomon. Ke ukem usụn̄ oro, akwa otuowo ẹtuak ibuot ẹnọ Jehovah ke an̄wa okụre temple esie eke spirit. Ndinam utom do anam  mmọ ẹdat esịt. (Psalm 122:1) Idem ke akpatre ke otu mme nsan̄a mmọ oro ẹyetde aran ama ọkọbọ udeme esie eke heaven, mmọ ẹyeka iso ndinam edisana utom nnọ Jehovah nte ikọt esie.—Ediyarade 21:3.

Edisana Utom Emi Owo Mînyịmeke

16. Nso ntọt ke ẹnọ kaban̄a edisana utom?

¹⁶ Ke eyo Israel eset, ẹkenyene ndinam edisana utom ke n̄kemuyo ye mme ibet Jehovah. (Exodus 30:9; Leviticus 10:1, 2) Kpasụk ntre mfịn, odu mme n̄kpọ oro ẹyomde ẹnam edieke anade Jehovah enyịme edisana utom nnyịn. Oro edi ntak Paul ekewetde ọnọ mbon Colossae ete: “Nnyịn . . . idopke ndibọn̄ akam mban̄a mbufo, ndinyụn̄ nnam n̄kpe-ubọk ite, Abasi akpakam anam mbufo ẹyọhọ ye ifiọk uduak Esie ke kpukpru eti ibuot ye ikike ke n̄kpọ Spirit; man mbufo ẹsan̄a ke ido nte odotde Ọbọn̄, ẹnem Enye esịt ke kpukpru usụn̄, ẹnyụn̄ ẹn̄wụm mfri ke edinam kpukpru nti utom, ẹnyụn̄ ẹkọri ke ifiọk Abasi.” (Colossae 1:9, 10) Idịghe nnyịn inyene ndibiere nnennen usụn̄ oro ẹkpetuakde ibuot ẹnọ Abasi. Nnennen ifiọk N̄wed Abasi, ikike ke n̄kpọ eke spirit, ye ọniọn̄ Abasi ẹdi akpan n̄kpọ. Mîdịghe ntre, mme utịp ẹkeme ndikama afanikọn̄.

17. (a) Didie ke ẹkesabade edisana utom ke eyo Moses? (b) Didie ke ẹkeme ndisabade edisana utom mfịn?

¹⁷ Ti nditọ Israel ke eyo Moses. Nnyịn ikot ite: “Abasi ọwọn̄ọde ọkpọn̄ mmọ, onyụn̄ asana mmọ ayak ete, ẹnam n̄kpọ ẹnọ udịm enyọn̄.” (Utom 7:42) Nditọ Israel oro ẹma ẹkụt mme utom odudu oro Jehovah akanamde ke ufọn mmọ. Edi, mmọ ẹma ẹwọn̄ọde ẹbịne mme abasi efen ke ini mmọ ẹkekerede ke emi edidi ke ufọn mmimọ. Mmọ ikanamke akpanikọ, ndien edinam akpanikọ edi akpan n̄kpọ edieke iyomde edisana utom nnyịn enem Abasi esịt. (Psalm 18:25) Edi akpanikọ, ibat ibat owo mfịn ẹdiwọn̄ọde ẹkpọn̄ Jehovah ẹketuak ibuot ẹnọ ntantaọfiọn̄ m̀mê eyen enan̄ o-gold, edi mme orụk ukpono ndem efen ẹdu. Jesus ama odụri owo utọn̄ aban̄a edisan̄a utom nnọ “Mammon,” ndien Paul okokot edisịn esịt ke n̄kpọ owo ukpono ndem. (Matthew 6:24; Colossae 3:5) Satan emenede idemesie nte abasi. (2 Corinth 4:4) Mme orụk ukpono ndem oro ẹdu ntatara ntatara ẹnyụn̄ ẹdi afia. Ke uwụtn̄kpọ, kere ban̄a owo oro ọdọhọde nte itienede Jesus edi oro ata utịtmbuba esie ke uwem edide ndidi imọ m̀mê oro enen̄erede ọbuọt idem ke idemesie ye mme ekikere esiemmọ. Anie ke enye enen̄ede anam n̄kpọ ọnọ? Didie ke enye okpụhọde ye mme Jew eke eyo Isaiah oro ẹketomode enyịn̄ Jehovah edi ẹkotde ikpọ edinam esie ẹkedian ndidehe ndisọi mbiet?—Isaiah 48:1, 5.

18. Didie ke ẹkenam edisana utom ke ukwan̄ usụn̄ ke eset ye mfịn?

¹⁸ Jesus ama odụri owo utọn̄ n̄ko ete: “Ini ke  onyụn̄ edi eke owo ekededi eke ediwotde mbufo eyese ete imọ inam [edisana utom, NW] inọ Abasi.” (John 16:2) Saul, oro akakabarede edi apostle Paul, nte eyịghe mîdụhe ama ekere ete ke imọ ikanam n̄kpọ Abasi ke ini imọ ‘ikenyịmede ẹwot Stephen’ inyụn̄ ‘ifịmede ikọ-ndịghe ye ikọ nsobo idian mbet Ọbọn̄.’ (Utom 8:1; 9:1) Mfịn, ndusụk mbon oro ẹnamde edinam unam ekpụk asana ẹnyụn̄ ẹsobode ofụri orụk ẹdọhọ n̄ko ke ituak ibuot inọ Abasi. Odu ediwak owo oro ẹdọhọde nte ituakde ibuot inọ Abasi, edi oro utuakibuot mmọ enen̄erede aka ebịne mme abasi ufreidụt, usua eke ekpụk, uforo, idemmọ, m̀mê ndusụk abasi efen.

19. (a) Didie ke nnyịn ikpese edisana utom nnyịn? (b) Nso utọ edisana utom edinọ nnyịn inemesịt?

¹⁹ Jesus ọkọdọhọ ete: “Tuak ibuot nọ Jehovah nyụn̄ nam [edisana utom, NW] nọ Enye ikpọn̄-ikpọn̄.” (Matthew 4:10) Enye eketịn̄ emi ọnọ Satan, edi edi akpan n̄kpọ didie ntem ete kpukpru nnyịn inam mme ikọ esie oro! Ndinam edisana utom nnọ Ọbọn̄ Andikara ekondo edi n̄kokon̄, ye uku uku ifetutom. Ndien nso ke ẹkeme nditịn̄ mban̄a edinam utom ufọn oro ẹbuande ye utuakibuot nnyịn? Ndinam emi ke ufọn ekemmọ owo edi utom idatesịt oro ọnọde ekese inemesịt. (Psalm 41:1, 2; 59:16) Edi, utọ utom oro esida ata inemesịt edi n̄kukụre edieke ẹnamde enye ke ofụri esịt ye ke nnennen usụn̄. Mmanie ẹnen̄ede ẹtuak ibuot ẹnọ Abasi ke nnennen usụn̄? Edisana utom mmanie ke Jehovah enyịme? Nnyịn imekeme ndibọrọ mme utọ mbụme oro edieke nnyịn inemede ọyọhọ ikọ Bible ita oro enyenede n̄kpọ ndinam ye utuakibuot nnyịn. Nnyịn iyanam emi ke ibuotikọ oro etienede.

[Mme Ikọ idakisọn̄]

Didie Ke Afo Ọkpọbọrọ?

• Nso utịbe utịbe utom ufọn ke Jesus akanam?

• Nso utom ufọn ke mme Christian ẹnam?

• Nso idi edisana utom Christian, ndien m̀mọ̀n̄ ke ẹnam enye?

• Nso ke oyom nnyịn inyene edieke anade edisana utom nnyịn enem Abasi esịt?

[Mme Mbụme Ukpepn̄kpọ]

[Ndise ke page 10]

Mme ete ye eka ẹsinyene akwa idatesịt ke edinọ

[Mme ndise ke page 12, 13]

Mme Christian ẹnam utom ufọn ke ini mmọ ẹn̄wamde mbon efen ye ke ini mmọ ẹtan̄ade eti mbụk

[Ndise ke page 14]

Nnyịn imoyom nnennen ifiọk ye ikike man itịm ikụt nte ke Abasi enyịme edisana utom nnyịn