Ntak Emi Afo Ọkpọbọn̄de Akam?
Ntak Emi Afo Ọkpọbọn̄de Akam?
“MBUFO ẹben̄e, edi inọhọ mbufo, koro mbufo ẹben̄ede ke idiọk usụn̄ . . . Ẹsan̄a ẹkpere Abasi, ndien enye ayasan̄a ekpere mbufo.” (James 4:3, 8) Mme ikọ James, mbet Jesus oro, ẹkeme ndinam nnyịn ikere mme ntak oro nnyịn isibọn̄de akam.
Akam idịghe sụk usụn̄ ndisian Abasi se nnyịn iyomde. Ke ọwọrọetop Ukwọrọikọ esie oro ke Obot, Jesus ama ọdọhọ ete: “Ete mbufo ọmọfiọk n̄kpọ eke ẹnanade mbufo, ndien mbufo ẹdiben̄e Enye.” Kpa ye oro, Jesus ama ọdọhọ n̄ko ete: “Ẹben̄e, ndien ẹyenọ mbufo.” (Matthew 6:8; 7:7) Ntre Jehovah oyom nnyịn iben̄e enye se nnyịn ikerede ke imoyom. Edi akam esịne se ikande oro.
Mme ufan akpanikọ isinemeke nneme n̄kukụre ke ini mmọ ẹyomde n̄kpọ. Mmọ ẹsinyene udọn̄ ke idem kiet eken, ndien itie ufan mmọ esikọri ke ini mmọ ẹtịn̄de mme ekikere mmọ. Ukem ntre, uduak akam akan ikpîkpu ediben̄e se nnyịn iyomde. Enye ọnọ nnyịn ifet ndinam itie ebuana nnyịn ye Jehovah ọsọn̄ idem ebe ke ndinọ enye utuakibuot ofụri esịt.
Ih, Abasi ọnọ nnyịn ifet ndibọn̄ akam man nnyịn ikeme ndisan̄a n̄kpere enye. Emi ekeme nditịbe n̄kukụre edieke nnyịn itịn̄de mme ekikere nnyịn inọ Abasi utu ke nditịn̄ mme akam oro ẹkemụmde-mụm ẹsịn ke ibuot. Nso n̄kpọ idatesịt ke edi ntem nditịn̄ ikọ nnọ Jehovah ke akam! Akan oro, n̄ke Bible kiet ọdọhọ ete: “Akam mbon eti ido enem enye esịt.”—Mme N̄ke 15:8.
Psalm 73:28) Edi man isan̄a ikpere Abasi, ana nnyịn inam se ikande edibọn̄ akam. Tịm fiọk nte mbụk etienede mi owụtde emi:
Asaph andiwet psalm ama ọkwọ ete: “Ama edi ami, ọfọn mi ndikpere Abasi.” (“Kiet ke otu mbet [Jesus] ọdọhọ Enye ete, Ọbọn̄, kpep nnyịn ndibọn̄ akam.” Ke ibọrọ Jesus ama ọdọhọ ete: “Ke ini mbufo ẹbọn̄de akam, ẹdọhọ ẹte, Ete, yak ikpono enyịn Fo. Yak Ubọn̄ Fo edi.” (Luke 11:1, 2) Nte nnyịn imekeme ndibọn̄ akam ntem ke usụn̄ enyenede se ọwọrọde ye unana edibem iso n̄kpep se enyịn̄ Abasi edide ye nte ẹdikponode enyịn̄ oro? Ndien nte nnyịn imekeme ndibọn̄ akam ke n̄kemuyo ye mme ikọ Jesus emi edieke nnyịn mîfiọkke se Obio Ubọn̄ Abasi edide? Nnyịn ikeme ndifiọk mme n̄kpọ emi edieke idụn̄ọrede Bible ye ntịn̄enyịn. Ifiọk oro nnyịn inyenede ito emi ayan̄wam nnyịn ndifiọk Abasi ye mme usụn̄ esie. N̄ko-n̄ko, ndimehe ye Jehovah Abasi ayan̄wam nnyịn inen̄ede ikpere inyụn̄ iyak idem inọ enye. Nte utịp, emi ayan̄wam nnyịn nditịn̄ ikọ nnọ enye ifụre ifụre ke akam.
Akam Ekeme Ndikọk Mme Mfịna
Ndikọri n̄kpet n̄kpet itie ebuana ye Jehovah ayan̄wam nnyịn ndikọk mme mfịna. Tịm fiọk nte emi ekedide ntre ke kiet kiet ke otu mme idaha ẹtienede mi. Mmọ ẹwụt nte ke mbon oro ẹkebọn̄de akam ẹma ẹkeme ndisọn̄ọ itie ebuana mmọ ye Jehovah.
Ke Brazil n̄wan emi ekerede Maria ama ọbọn̄ akam ọnọ Abasi oyom un̄wam. Enye ama odomo ndibiọn̄ọ mme idaha oro ẹnyịmede ke obio ke ntak mbubịk oro enye okokụtde ke n̄kaowo. Maria ama akam ọkpọn̄ ebe, nditọ, ye ufọk esie. Enye n̄ko ama ọtọn̄ọ ndida n̄kpọsọn̄ ibọk. Edi ke ini enye mîkokopke inemesịt, enye ama etịn̄ se idude enye ke esịt ọnọ Abasi onyụn̄ ọbọn̄ akam oyom un̄wam.
Ikebịghike, owo iba ke otu Mme Ntiense Jehovah ẹma ẹdise Maria ẹnyụn̄ ẹnọ enye nsiondi Enyọn̄-Ukpeme oro esịnede ibuotikọ aban̄ade ufọn edinyịme ndausụn̄ Abasi. Emi ama otụk enye esịt, ndien enye ama ọtọn̄ọ ndikpep Bible ye Mme Ntiense oro kpa ke usen oro. Ke akpatre emi ama osụn̄ọ ke ndifiak nnam uwem ubon esie ọfọn. Nte enye ekekpepde n̄kpọ aban̄a Jehovah, enye ama oyom ndinanam ima oro enye ekenyenede ọnọ Jehovah n̄wụt. Maria ọkọdọhọ ete: “Mma nnam mme ukpụhọde. Ebe mi ye ubon mi ke akpa ẹma ẹbiọn̄ọ mi ndikpep Bible. Edi nte mmọ ẹkekụtde mme ukpụhọde oro n̄kanamde, mmọ ẹma ẹtọn̄ọ ndisịn udọn̄ nnọ mi.” Ke ukperedem, Maria ama ayak uwem esie ọnọ Andikop akam man anam n̄kpọ esie.
Okposụkedi oro José ama ekenyene ediye n̄wan ye mbubehe oro ekenyenede uforo ke Bolivia, enye ikokopke inemesịt. Enye ndikenyene ebuana idan̄ ye owo en̄wen ama anam n̄wan esie ọkpọn̄ enye. Enye ama esin̄wọn̄ mmịn ọkpọsọn̄ ọkpọsọn̄ esinyụn̄ ekere ke imọ iwọrọke n̄kpọ. José ọdọhọ ete: “Mma ntọn̄ọ ndibọn̄ akam ke ofụri esịt, mbụpde se n̄kpanamde man nnem Abasi esịt. Ikebịghike Mme Ntiense Jehovah ẹma ẹwaha itie mbubehe mi ndinịm ukpepn̄kpọ Bible mfọn, edi mma mbịn mmọ. Emi ama etịbe utịm ikata. Kpukpru ini oro n̄kọbọn̄de akam nyom un̄wam, mmọ ẹma ẹsidi. Ke akpatre, mma mbiere nte ke nyọnọ n̄kpan̄utọn̄ ini efen. Mma n̄kot ofụri Bible ndien mma nnyene ediwak mbụme, edi kpukpru ini mmọ ẹma ẹsinyene mme ibọrọ oro ẹkeyụhọde mi. Ndikpep mban̄a Jehovah ama ọnọ mi obufa uduak ke uwem, ndien mme ufan mi ke otu Mme Ntiense ẹkedi nti uwụtn̄kpọ! Mma n̄kpọn̄ ufan mi an̄wan ye mme nsan̄a un̄wọn̄ mmịn mi. Ikebịghike, mma mfiak n̄kodu ye n̄wan ye nditọ mi. Mma nna baptism ke ntọn̄ọ ntọn̄ọ 1999.”
Ke Italy, ndọ Tamara okodu ke mfịna, ntre enye ama ọbọn̄ akam eben̄e eti ibuot. Ke ẹma ẹkemia ẹnyụn̄ ẹbịn enye ẹsio ke ubon ke ini ekedide isua 14 ke emana, enye ama ọkọri ibak ibak edu. Tamara ọdọhọ ete: “Mma mfiọhọ Bible nnyụn̄ ntọn̄ọ ndikot enye. Ke mbubịteyo kiet, mma n̄kot nte ke ‘ndikụt eti ibuot edi ukem nte ndikụt n̄kpọ-uto eke edịbede.’ Mma mbọn̄ akam mben̄e eti ibuot oro. (Mme N̄ke 2:1-6) Ke ndan̄nsiere, Mme Ntiense Jehovah ẹma ẹdise mi. Mma ntọn̄ọ ndikpep Bible ye mmọ, edi ama ada mi ndusụk ini ndida se n̄kekpepde nsịn ke edinam. Ke akpatre, mma mbiere nditiene usụn̄ uwem Christian ndien mma nna baptism. Idahaemi, ke adianade ye ebe mi, ami ke n̄n̄wam mbon en̄wen ndibọ ufọn nto eti ibuot otode Abasi.”
Beatriz ekedi kiet ke otu mme ọwọrọiso owo ke Caracas, Venezuela. Edi ẹma ẹsio enye ndọ ndien enye ama okop mfịghe. Ke mbrenyịn, inikiet enye ama abiat ediwak hour ndibọn̄ akam. Ke ndan̄nsiere, n̄kanika enyịnusụn̄ ama amia. Ke okopde idiọkesịt, enye ama onyụn̄ọ ke odudu ese an̄wa onyụn̄ okụt owo iba oro ẹkekamade ekpat. Enye ama anam nte imọ ikodụhe ke ufọk, edi mbemiso ebe ye n̄wan oro ẹkenyọn̄de, mmọ ẹma ẹnụk n̄wedikot ẹsịn ke idak usụn̄. N̄wedikot oro ọkọdọhọ ete: “Diọn̄ọ Bible Fo.” Nte ediwaha mmọ ekeme ndinyene ebuana ye akam oro enye ọkọbọn̄de okoneyo oro ekebede? Enye ama okot mmọ ete ẹfiak ẹdi. Ikebịghike enye ama ekpep Bible, onyụn̄ ana baptism ke ukperedem. Ke okopde inemesịt ke akpatre, idahaemi Beatriz esikpep mbon en̄wen nte ẹkemede ndikop inemesịt.
Carmen ama ọbọn̄ akam aban̄a ukeme esie ndibọhọ unana. Enye ekenyene nditọ duop ye ebe oro ekedide akpammịn, Rafael. Carmen ọkọdọhọ ete: “Mma nsịn ukeme ndinyene okụk ebe ke ndiyet ọfọn̄.” Edi edu un̄wọn̄ mmịn Rafael ọkọdọdiọn̄ ọdiọk. “Ibọhọke ke nnyịn ima ikọtọn̄ọ ndikpep Bible ye Mme Ntiense Jehovah ke ebe mi ọkọtọn̄ọ ndinam ukpụhọde. Nnyịn ima ikpep iban̄a un̄wọn̄ọ Obio Ubọn̄—nte ke ibịghike Jehovah oyosio unana ye ufịk efep ke ererimbot. Ẹma ẹbọrọ akam oro n̄kọbọn̄de nnọ Abasi ke akpatre!” Ndikpep mban̄a mme usụn̄ Jehovah ama an̄wam Rafael nditre un̄wọn̄ mmịn, ndien enye ama emen “obufa owo” esịne. (Ephesus 4:24) Enye ye ubon esie ẹma ẹkeme ndifori idaha udu uwem mmọ. Rafael ọdọhọ ete: “Okposụkedi nnyịn mîdịghe imọ, mînyụn̄ inyeneke ufọk idem nnyịn, nnyịn imenyene mme n̄kpọ oro ẹyomde ke uwem, imonyụn̄ ikop inemesịt.”
Ke Ini Ẹdibọrọde Kpukpru Akam
Nte ndibọn̄ akam ama enyene ufọn ọnọ mme owo emi? Ke akpanikọ ama enyene! Ndien nte afo ama okụt nte ke n̄wakn̄kan idaha ẹkebọrọ akam mmọ ke ini owo ke esop Christian akan̄wamde mmọ ndisan̄a n̄kpere Jehovah Abasi ebe ke ndikpep Bible?—Utom 9:11.
Ntre, ndien, nnyịn imenyene nti ntak ndibọn̄ akam. Ke mîbịghike, ẹyebọrọ akam oro ẹbọn̄de ẹte Obio Ubọn̄ Abasi edi ẹnyụn̄ ẹnam uduak esie ke isọn̄. (Matthew 6:10) Ke Abasi ama okosion̄o mbon oro ẹbiọn̄ọde enye efep ke ekondo nnyịn, “ifiọk Jehovah ọyọyọhọ ke ererimbot.” (Isaiah 11:9) Ndien kpukpru mbon oro ẹmade Jehovah ẹyenyene “ubọn̄ eke nditọ Abasi”—ndien ke akpanikọ ẹyebọrọ akam mmọ.—Rome 8:18-21.
[Ndise ke page 7]
Nte afo ọmọfiọk ntak emi nnyịn ikpọbọn̄de akam?