Nte Ndibọn̄ Akam Esinyene Ufọn?

NDUSỤK ini, ekpere ndidi kpukpru owo ẹsinyene udọn̄ ndibọn̄ akam. Ke akpanikọ, mme owo ke se ikperede ndidi kpukpru otu ido ukpono ẹsibọn̄ akam ifịk ifịk. Ke uwụtn̄kpọ, owo Buddha ekeme ndibọn̄ akam oro “N̄kọn̄ mbuọtidem mi ke Amida Buddha” ediwak tọsịn ini ke usen.

Ke ikerede iban̄a mme mfịna oro ẹkade-ka iso ke ofụri ererimbot, owụt eti ibuot ndibụp: Nso ke mme owo ẹdori enyịn ndinyene nto ndibọn̄ akam? Nte kpukpru akam emi ẹnyene ufọn?

Ntak Emi Mme Owo Ẹsibọn̄de Akam?

Ediwak mbon Edem Usiahautịn ẹsibọn̄ akam ẹnọ mme ete ete mmọ ye mme abasi Shinto m̀mê Tao. Mmọ ẹnam ntre ye idotenyịn ndibe mme udomo ke ufọkn̄wed, ndidọk ekese mbun̄wụm, m̀mê ndibiọn̄ọ mme udọn̄ọ. Mbon Buddha ẹsibọn̄ akam ye idotenyịn ndinyene ọyọhọ ifiọk. Mbon Hindu ẹsibọn̄ akam ifịk ifịk ẹnọ mme abasi ye abasi-an̄wan oro mmọ ẹnen̄erede ẹma ẹben̄e ifiọk, uforo, ye ukpeme.

Ndusụk mbon Catholic ẹdori enyịn nte ke mmimọ iyanam ufọn inọ ubonowo ke ndidu uwem nte mme mọn̄k m̀mê mme nun ke ufọkidụn̄ n̄ka mọn̄k m̀mê eke nun oro ẹbọpde ọkọ ẹkanade, ibọn̄de akam kpukpru ini. Ediwak miliọn mbon Catholic ẹsiyom ufọn ẹto Mary ebe ke ndibọn̄ mme akam oro ẹkemụmde-mụm ẹsịn ke ibuot, eyedi ke ndikama mme n̄kwa akam. Ke mme idụt Edem Usiahautịn, ediwak owo ẹsikama mme wheel akam. Mbon Protestant ẹsitịn̄ ẹfiak ẹtịn̄ mme ikọ Akam Ọbọn̄, okposụkedi mmọ ẹkemede  n̄ko nditịn̄ mme ekikere mmọ ke ndammana usụn̄ nnọ Abasi. Ediwak mme Jew ẹsisan̄a anyan usụn̄ ẹka ndibọn̄ akam ke Ibibene N̄kan̄ Edem Usoputịn Jerusalem, ẹdoride enyịn ẹban̄a edifiak n̄wụk temple ye obufa emana uforo ye emem.

Okposụkedi ediwak miliọn owo ẹbọn̄de akam ifịk ifịk, mme mfịna unana, mbumehe, n̄wụre ubon, ubiatibet, ye ekọn̄ ke ẹka iso ndinọmọ n̄kaowo. Ndi ekeme ndidi nte ke kpukpru owo emi ibọn̄ke akam ke nnennen usụn̄? Ke ntak oro, ndi owo ekededi esinen̄ede okop akam?

Ndi Owo Ekededi Esikop Akam?

Akam ikemeke ndinyene ata ufọn ekededi ibọhọke odu owo oro okopde. Ke ini owo ọbọn̄de akam, enye nte an̄wan̄ade enịm ke akpanikọ ete ke owo odu ke obio mme spirit oro enyịn mîkwe oro akpan̄de utọn̄. Nte ededi, idịghe sụk uyo ikọ esinam ẹkop akam. Ediwak owo ẹnịm ke akpanikọ ẹte ke odu owo oro akam ekemede ndifiọk ekikere owo oro ọbọn̄de akam. Anie ekpedi oro?

Nte mme ekikere ẹsikam ẹtọn̄ọde ke ediwak biliọn esịp oro ẹnamde enyọn̄ enyọn̄ ikpehe mfre nnyịn ẹnen̄ede ẹdi n̄kpọ oro ayan̄ade ifiọk mme anam-ndụn̄ọde. Nte owụtde ifiọk, Enye emi okobotde mfre ekeme ndifiọk mme utọ ekikere oro. Owo oro idịghe owo efen ikan Andibot nnyịn, Jehovah Abasi. (Psalm 83:18; Ediyarade 4:10b) Ẹkpenyene ndibọn̄ akam nnọ enye. Edi nte Jehovah esikpan̄ utọn̄ ke kpukpru utọ akam oro?

Ndi Ẹsikop Kpukpru Akam?

Edidem David eke Israel eset ekedi owo oro akamade ndibọn̄ akam. Nte andiwet psalm ke idak ndausụn̄ odudu spirit Abasi, enye ama ọkwọ ete: “Afo emi okopde akam, kpukpru obụkidem ẹyetiene fi.” (Psalm 65:2) Jehovah ekeme ndifiọk kpukpru akam oro ẹbọn̄de ke ediwak tọsịn usem oro ubonowo esemde. Akpanikọ oro nte ke idụhe ekikere owo oro ekemede ndimụm adan̄a ediwak ntọt ntre iwọrọke nte ke Abasi ikemeke ndikpan̄ utọn̄ nnọ kpukpru mbon oro ẹbọn̄de akam ẹnọ enye ke usụn̄ oro enye enyịmede.

Edi Jesus Christ—owo oro akamade ndibọn̄ akam n̄ko—ama owụt ete ke idịghe kpukpru akam ẹsinem Abasi esịt. Tịm fiọk se Jesus eketịn̄de aban̄a editịn̄ mfiak ntịn̄ mme akam oro ẹkemụmde-mụm ẹsịn ke ibuot oro ekedide ọsọ edinam ini oro. Nte ekemde ye Jerusalem Bible eke Catholic, enye ọkọdọhọ ete: “Kûtịn̄ ediwak ikọ ke akam fo nte mme okpono ndem ẹsitịn̄de, koro mmọ ẹkere ẹte ke nditịn̄ uwak ikọ edinam ẹkop akam mmimọ.” (Matthew 6:7) Nnyịn ikemeke ndidori enyịn Jehovah ndikpan̄ utọn̄ ke mme akam oro nnyịn mîtịn̄ke mme ata ntụk nnyịn.

Ke ndiwụt ntak oro ndusụk akam mîsinemke Abasi esịt, n̄ke Bible kiet ọdọhọ ete: “Owo eke ọwọn̄ọrede utọn̄ esie man okûkop mbet, idem akam esie edidi n̄kpọ ndek.” (Mme N̄ke 28:9) N̄ke efen ọdọhọ ete: “Jehovah ada nsannsan ye mme idiọk owo: edi okop akam nti owo.” (Mme N̄ke 15:29) Ke ini mme adausụn̄ Judah eset ẹkenyenede ndodobi ubiomikpe, Jehovah ama ọdọhọ ete: “Ke ini mbufo ẹmenerede ubọk mbufo, ndịp mbufo enyịn mi: ndien n̄ko ke ini mbufo ẹwakde ndibọn̄ akam, ami n̄kopke: iyịp ọmọyọhọ mbufo ke ubọk.”—Isaiah 1:1, 15.

Apostle Peter ama asiak n̄kpọ en̄wen oro ekemede ndinam Abasi okûkop akam. Peter ekewet ete: “Mbufo mme ebe ẹdu uwem ye iban mbufo nte mme enyene-ibuot owo; ẹnọ iban ukpono, nte mmọ emi ẹmemde ẹkan mbufo, sia mmọ ẹnyụn̄ ẹtienede mbufo ẹbuana ke ufọn uwem; mbak n̄kpọ edibiọn̄ọ akam mbufo.” (1 Peter 3:7) Akam owo oro ofụmide utọ item oro ikemeke ndibe ọkọm ufọk esie!

Nte an̄wan̄ade, ana ẹsịm ndusụk n̄kpọ oro ẹyomde edieke anade ẹkop akam. Nte ededi, ediwak mbon oro ẹsibọn̄de akam isinyeneke udọn̄ iban̄a ndinam se Abasi oyomde oto nnyịn. Ntak edi oro ọkpọsọn̄ ifịk ẹsịnde ke ndibọn̄ akam mînamke ererimbot ọfọn akan.

Do, nso ke Abasi oyom man okop akam nnyịn? Ibọrọ enyene n̄kpọ ndinam ye ntak oro nnyịn isibọn̄de akam. Ke akpanikọ, edieke nnyịn iyomde ndifiọk m̀mê akam esinyene ufọn ekededi, ana nnyịn ifiọk uduak mmọ. Ntak emi Jehovah anamde nnyịn ikeme nditịn̄ ikọ nnọ enye?

[Ebiet Ẹdade Ndise Ẹto ke page 3]

G.P.O., Jerusalem