Bible—N̄wed Ndida Ndu Uwem

“IKỌ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, . . . onyụn̄ enyene ukeme ndidụn̄ọde ekikere ye uduak esịt owo.” (Mme Hebrew 4:12) Nditịn̄ se Ikọ Abasi ekemede ndinam emi enen̄ede anam ẹdiọn̄ọ nte ke Bible akan sụk eti n̄wed.

Ewetn̄wed ido ukpono kiet etịn̄ enye ibio ibio ete: “Etop esie edi akpan n̄kpọ ọnọ uwem nnyịn ukem nte edikot ibifịk.” Ekem enye ama adian do ete: “Ke ini afo ekerede nte nnyịn iyomde usọbọ mfịn onyụn̄ okotde Bible ye emi ke ekikere, oro oyosụn̄ọ ke mme utịp oro ẹkpade owo idem.” Ukem nte utuenikan̄ oro ayamade, Bible esịn un̄wana ke ediwak awak-n̄kukọhọ mbụme ye mfịna uwem eyomfịn.—Psalm 119:105.

Ke akpanikọ, ọniọn̄ oro ẹwụtde ke Bible enyene odudu ndifori ekikere nnyịn, ndin̄wam nnyịn ikọk mme mfịna, ndifori uwem nnyịn, onyụn̄ ọnọ nnyịn ukeme ndiyọ mme idaha oro nnyịn mîkemeke ndikpụhọde. Ke edide akpan n̄kpọ akan, Bible an̄wam nnyịn ndifiọk nnyụn̄ mma Abasi.

N̄wed Oro Ọnọde Uduak

Andiwet Bible, Jehovah Abasi, ‘ọfiọk kpukpru usụn̄ nnyịn.’ Enye ọfiọk aban̄a mme udọn̄ nnyịn ke n̄kan̄ eke ikpọkidem, eke ntụk, ye eke spirit akan nte nnyịn ikam ifiọkde. (Psalm 139:1-3) Ke owụtde edikere mban̄a, enye enịm mme in̄wan̄în̄wan̄ adan̄a ọnọ edu uwem owo. (Micah 6:8) Owụt ifiọk ndiyom ndifiọk mme adan̄a ye mme ndausụn̄ oro nnyụn̄ n̄kpep ndida mmọ ndu uwem. Andiwet psalm ọdọhọ ete ke ọfọfọn ọnọ owo oro ‘mbet Jehovah adatde enye esịt. Kpukpru se enye anamde ẹyewọrọ usụn̄.’ (Psalm 1:1-3) Ke akpanikọ, odot nnyịn idụn̄ọde utọ idotenyịn oro.

Maurice, andikpep emi ama ọkọkpọn̄ utom, ekesinịm ke akpanikọ nte ke Bible enyene ndusụk ufọn ke n̄kan̄ mbụkeset ye ifiọkn̄wed. Kpa ye oro, enye ama eyịk nte ke ẹkeda odudu spirit Abasi ẹwet enye. Ke ama okokop nte ẹkenamde ntak emi Abasi ọkọnọde mme owo Ikọ esie oro ẹwetde-wet an̄wan̄a, Maurice ama odụn̄ọde nsio nsio ntịn̄nnịm ikọ Bible. Nte akparawa, enye ama ekpep mbụkeset, ndikot n̄wed nnyụn̄ n̄wet n̄kpọ, ifiọk ntaifiọk, ye ukpepn̄kpọ aban̄ade isọn̄. Enye enyịme nte ke imọ ima itan̄ idem  ikaha ndinyịme ata ediwak uwụtn̄kpọ oro ẹsọn̄ọde nte ke Bible edi akpanikọ. “Mma nduọ ndụk nnan nnan edibịne inem uwem, uforo, ye inemesịt. Ke ndiọkiso, mma n̄ka iso nnana ifiọk akpanikọ aban̄ade akakan n̄wed oro akanam ẹwetde.”

Ke etịn̄de aban̄a nte Jesus okowụtde apostle Thomas idem, Maurice, emi odude ke iduọk isua 70 idahaemi, ọdọhọ ye esịtekọm ete: “Ẹmụm mi ubọk ẹsịn ke ‘nde unan’ emi anamde nnen̄ede nnịm nte ke Bible edi akpanikọ.” (John 20:24-29) Nte apostle Paul eketịn̄de nte enende, Bible esiyarade uduakesịt, onyụn̄ anam uwem enyene se ọwọrọde. Enye enen̄ede edi n̄wed ndida ndu uwem.

Anam Uwem Oro Ọyọhọde ye Mfịna Enyene Iwụk

Bible ọnọ item oro n̄ko an̄wamde mme owo ndikịbe mbọhọ ndiọi ido. Daniel ama ekeme ndikan ndedehe edu un̄wọn̄ sika, onyụn̄ etre idat idat usọrọ ye edida n̄kpọsọn̄ mmịn ke idiọk usụn̄. (Rome 13:13; 2 Corinth 7:1; Galatia 5:19-21) Ke akpanikọ, ndisio mme utọ edu oro mfep nnyụn̄ mmen “obufa owo” nsịne oyom ọkpọsọn̄ ukeme. (Ephesus 4:22-24) Daniel ọdọhọ ete: “Ekedi n̄kpọ-ata koro nnyịn idide mme anana mfọnmma.” Kpa ye oro, enye ama okụt unen. Idahaemi Daniel esikot Ikọ Abasi kpukpru usen, ndien oro anam enye enyene n̄kpet n̄kpet itie ebuana ye Jehovah.

Nte enye ọkọkọride, Daniel ama enyene ntotụn̄ọ ukpono ọnọ Bible kpukpru ini—idem okposụkedi akanam mîkokotke enye—ndien enye ama esibọn̄ akam ọnọ Abasi kpukpru okoneyo. Edi, n̄kpọ ama anana. Enye ikenyeneke inemesịt. Ukpụhọde ama ada itie ke ini enye okokụtde enyịn̄ Abasi ke Bible ke akpa ini. (Exodus 6:3; Psalm 83:18) Ke oro ebede, enye ama esida enyịn̄ oro Jehovah ke ini enye ọbọn̄de akam, ndien mme akam esie ẹma ẹkabade ẹdi ata ọkpọkpọ. “Jehovah ama akabade edi n̄kpet n̄kpet ufan mi, ndien enye ke osụk ededi n̄kpet n̄kpet ufan mi.”

Mbemiso ekekpepde aban̄a Bible, Daniel ekesinyene mfụmmfụm ekikere aban̄a ini iso. Enye ọdọhọ ete: “Iyomke akwa ifiọk mbemiso owo ekemede ndikụt se ikade iso ke ererimbot. Mma nsikop ndịk, ndien mma nsidomo ndiyọhọ ye utom man n̄kûnyene ini ndikere mban̄a oro.” Ekem enye ama ekpep nte ke Abasi ọyọnọ kpukpru owo unenikpe ke isọn̄ oro ẹnamde asana, ebiet emi mme okopitem owo ẹdikemede ndinyene nsinsi emem ye inemesịt. (Psalm 37:10, 11; Daniel 2:44; Ediyarade 21:3, 4) Idahaemi Daniel enyene idotenyịn oro enyenede nsọn̄ọ. Odudu Bible oro enyenede nsọn̄ọ mi aman̄wam enye ndika iso nnyene in̄wan̄în̄wan̄ ekikere ke uwem.

An̄wam ke Ndikan Mme Mfịna eke Ntụk

George ekedi isua itiaba ke ini eka esie akakpade. Enye ama esikop ndịk ndide idap ke okoneyo, sia mîkọfiọkke m̀mê iyedemede ke ndan̄nsiere. Ekem enye ama okot se Jesus eketịn̄de aban̄a n̄kpa ye ediset ke n̄kpa: “Ini ke edi eke kpukpru mme andidu ke udi ẹdikopde [Jesus] uyo ẹwọn̄ọ ẹdi.” Mme ikọ Jesus emi n̄ko ẹma ẹtụk enye: “Ami ndi ediset ye uwem: owo eke ọbuọtde idem ye Ami, okposụk edi nte enye ama akpa, enye oyodu uwem.” (John 5:28, 29; 11:25) Mme utọ ekikere oro ẹma ẹwụt eti ibuot, ẹsịne ifiọk, ẹnyụn̄ ẹnọ ndọn̄esịt. George ọdọhọ ete: “Akpanikọ emi idemekede ekikere kpọt edi n̄ko otụk esịt.”

Daniel, oro ẹketịn̄de ẹban̄a ke mbemiso, ama esikop ndịk n̄ko. Eka esie ikekemeke ndibọk enye ikpọn̄, ntre ẹma ẹsinọ enye okodụn̄ ke ediwak itie ubọk nditọ. Enye ekesitie nte esenowo kpukpru ini ndien ama ọdọn̄ enye ndinyene ifụre edidu ke ima ima ubon. Ke akpatre, enye ama okụt se enye okoyomde ebe ke ukpepn̄kpọ Bible esie. Daniel ama edibuana  ye esop Christian eke Mme Ntiense Jehovah onyụn̄ akabade edi ubak ubon eke spirit, ebiet emi enye okokụtde nte mbon efen ẹnyịmede ẹnyụn̄ ẹmade imọ. Ke akpanikọ, Bible enyene ufọn ke ata ata usụn̄ ye ke usụn̄ oro ọnọde uyụhọ ke n̄kan̄ eke ntụk.

Ti, Jehovah okụt se idude nnyịn ke esịt onyụn̄ ọfiọk se nnyịn iyomde. Abasi “odomo esịt,” onyụn̄ ọnọ “kpukpru owo nte ekemde ke usụn̄ mmọ.”—Mme N̄ke 21:2; Jeremiah 17:10.

Eti Item Kaban̄a Uwem Ubon

Bible ọnọ eti item ke edide edisịm mme n̄kpọ ẹban̄ade mme itie ebuana owo. George ọdọhọ ete: “Ndutan̄uyo ye utọk ẹdu ke otu mme idaha oro ẹnen̄erede ẹkama editịmede esịt ke uwem.” Didie ke enye esise aban̄a mmọ? “Edieke etiede mi nte ke owo enyene ikọ ye ami, mmesinam in̄wan̄în̄wan̄ item oro odude ke Matthew 5:23, 24: ‘Nam emem ye eyen-ete fo.’ In̄wan̄în̄wan̄ akpanikọ oro nte ke mmekeme ndibiere ndutan̄uyo oro esinọ nti utịp. Mmekeme ndinyene emem Abasi oro Bible etịn̄de aban̄a. Enye enen̄ede enyene ufọn.”—Philippi 4:6, 7.

Ke ini ebe ye n̄wan ẹnyenede ndutan̄uyo, oyom mmọ mbiba “ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.” (James 1:19) Utọ item oro esifori nneme. George adian do ete: “Ke ini nnamde item oro ọdọhọde ete mma n̄wan mi nte idemmi, mmesikụt utịp usọp usọp. Esidi mmemmem n̄kpọ enye ndikpono mi.” (Ephesus 5:28-33) Ih, Bible ekpep nnyịn nte ikpenyịmede inyụn̄ inamde n̄kpọ iban̄a unana mfọnmma idem nnyịn ye nte ikpokụtde unen ke ndiyọ unana mfọnmma mmọ efen.

Item Oro Ebịghide

Enyene-ọniọn̄ Edidem Solomon ama ọdọhọ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:5, 6) Mme ikọ emi ẹdi mmemmem ẹnyụn̄ ẹtụn̄ọ didie ntem!

Bible esinụk owo ndinam se ifọnde. Enye an̄wam mme andima Abasi ndinam uwem mmọ ẹkekem ye uduak esie ndinyụn̄ n̄kop inemesịt ke ‘ndisan̄a ke n̄wed ido Jehovah.’ (Psalm 119:1) Inamke n̄kpọ m̀mê nso idi mme idaha nnyịn, Bible esịne ndausụn̄ ye item oro nnyịn iyomde. (Isaiah 48:17, 18) Kot enye ke usen ke usen, tie kere se afo okotde, nyụn̄ da enye sịn ke edinam. Enye ayanam ekikere fo an̄wan̄a onyụn̄ owụhọ ke mme n̄kpọ oro ẹsanade ẹnyụn̄ ẹfọnde. (Philippi 4:8, 9) Afo udukpepke nte okpodude onyụn̄ adarade uwem kpọt edi n̄ko nte akpamade Andibot uwem.

Ebede ke nditiene utọ usụn̄ uwem oro, Bible ayakan sụk eti n̄wed ọnọ fi—nte enye edide ọnọ ediwak miliọn mbon efen. Enye ke akpanikọ eyedi n̄wed ndida ndu uwem!

[Ndise ke page 6]

Bible ekeme ndisọn̄ọ ubiere oro afo anamde ndikan mme edu oro ẹnọde unan

[Ndise ke page 7]

Bible ekpep fi nte akpasan̄ade ekpere Abasi