Ntọt Mme Anditan̄a Obio Ubọn̄

Jehovah Ọnọ Ikọt Esie Ebiet Nduọkodudu

MFỤT MFỤT ebiet nduọkodudu ke afan̄ odude ke obot esinen̄ede enem akaisan̄ oro akpade mba. Ke Nepal, ẹkot mme utọ ebiet nduọkodudu oro chautara. Chautara kiet ekeme ndidu n̄kpere akamba eto banyan, mfụt mfụt ebiet nditie nduọk odudu. Ndibọp chautara edi edinam mfọnido, ndien ata ediwak ke otu mme anamufọn emi iyomke ẹsiak mmimọ enyịn̄.

Mme ifiọkutom ẹtode Nepal ẹwụt nte Jehovah Abasi akabarede edi Ebiet idatesịt ye nduọkodudu eke spirit ọnọ ediwak “akaisan̄” oro ẹkpade mba ke editịm n̄kpọ emi.—Psalm 23:2.

• Lil Kumari odụn̄ ke ediye obio Pokhara, oro ẹkemede ndinen̄ede nda n̄kụt Obot Himalaya oro snow ofụkde. Edi ke okopde editịmede esịt aban̄a nte okụk ubon ekpride, Lil Kumari ama ekere ke idotenyịn imọ akpa mfụhọ. Ke ini kiet ke otu Mme Ntiense Jehovah akawahade ekese enye, nyayama idotenyịn Bible ama otụk enye ndien enye ama ọsọsọp oyom ukpepn̄kpọ Bible.

Okposụkedi Lil Kumari okokopde inem ukpepn̄kpọ oro, ikedịghe mmemmem n̄kpọ inọ enye ndika iso ke ntak ọkpọsọn̄ ubiọn̄ọ otode ubon. Edi enye ikakpaha mba. Enye ama esidụk mme mbono esop Christian kpukpru ini onyụn̄ ada se enye ekekpepde esịn ke edinam, akpan akpan ke se iban̄ade n̄wan ndisụk ibuot. Nte utịp, ebe esie ye eka esie ẹma ẹdifiọk ẹte ke ukpepn̄kpọ Bible Lil Kumari ama enyene ufọn ọnọ ofụri ubon.

Ebe esie ye ediwak iman esie ke ẹkpep Ikọ Abasi idahaemi. Ke mbono oro ẹkenịmde ke Pokhara ke ndondo emi, Lil Kumari ama odụk edinam oro ọkọrọ ye iman esie 15. Enye ọdọhọ ete: “Ufọk mi edidi ebiet nduọkodudu koro ubon nnyịn adianade kiet idahaemi ke utuakibuot akpanikọ, ndien mmenyene ata ifụre ekikere.”

• Okposụkedi ibet akpande asari ke ntak idaha ke Nepal, enye osụk enyenyene odudu ke usụn̄ uwem mme owo. Ntem, ediwak owo ẹnyene udọn̄ ke se Bible enyenede nditịn̄ mban̄a unana utụk ye unana asari. Ndikpep nte ke “Abasi iten̄eke owo enyịn” ama enen̄ede okpụhọde uwem Surya Maya ye ubon esie.—Utom 10:34.

Surya Maya ama okop mfụhọ aban̄a ukwan̄ikpe eke n̄ka mme asari-asari ye mfịghe otode mme ido edinam oro ẹnen̄erede ẹdọn̄ n̄kam. Sia ekedide n̄wan oro ekenyenede ifịk ke ido ukpono, ke ediwak isua Surya Maya ama eben̄e ndem esie un̄wam. Edi owo ikọbọrọke akam esie. Usen kiet ke ini enye okosụk esemede oyom un̄wam, Babita eyeyen esie emi ekedide isua itiokiet ke emana ama aka ebịne enye okobụp ete: “Ntak emi afo oyomde un̄wam oto ndem oro mîkemeke ndinam n̄kpọ ndomokiet?”

Ẹma ẹdidiọn̄ọ nte ke eka Babita ke ekekpep Bible ye kiet ke otu Mme Ntiense Jehovah. Babita ye ifiopesịt ama ọnọ ekaeka esie ikot ndidụk mbono esop Christian. Ke ini Surya Maya okodụkde, idem ama akpa enye ndikụt mme owo ke nsio nsio idaha ẹdarade itie ebuana ye kiet eken ye unana asari ekededi. Enye ama oyom ukpepn̄kpọ Bible ke ebe oro. Okposụkedi emi okosụn̄ọde ke mme mbọhọidụn̄ esie ndisio enye mfep ke otu, enye ikokopke mmemidem; unana ukeme esie ndikot n̄wed nnyụn̄ n̄wet n̄kpọ ikonyụn̄ ikpanke enye ndinam n̄kọri eke spirit.

Isua itiaita ẹmebe, ndien mbonubon esie itiokiet, esịnede ebe esie ye nditọ esie ita, ẹmekabade ẹdi Mme Ntiense Jehovah. Surya Maya edi asan̄autom uyọhọ ini idahaemi, kpa asiakusụn̄ ofụri ini, adatde esịt ndin̄wam mbon efen ẹbiomode ndodobi mbiomo mmọ ke ata ebiet nduọkodudu oro Jehovah ikpọn̄ ekemede ndinọ.