Jehovah Ọnọ Mbon Mba Odudu

“[Jehovah] ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem.”—ISAIAH 40:29.

1. Nam odudu oro odude ke mme n̄kpọ emi Abasi obotde an̄wan̄a.

 ODUDU Jehovah inyeneke adan̄a. Ndien nso akwa odudu idu ntem ke mme n̄kpọ emi enye okobotde! Ata ekpri atọm—kpa se ẹdade ẹbot kpukpru n̄kpọ—enen̄ede ekpri ke udomo oro ntọi mmọn̄ kiet esịnede atọm biliọn ikie ke itie biliọn. * Kpukpru uwem ke ekondo nnyịn ẹberi edem ke odudu oro atọm ọnọde utịn. Edi ẹyom odudu utịn okponde adan̄a didie man ẹnam uwem aka iso ke isọn̄? Sụk ata ekpri odudu otode utịn esisịm isọn̄. Kpa ye oro, ata ekpri ubak odudu utịn oro esịmde Isọn̄ enen̄ede okpon akan ofụri odudu oro ẹdade ẹnam n̄kpọ ke mme usiakifia ererimbot.

2. Ke nditịm ntịn̄, nso ke Isaiah 40:26 etịn̄ aban̄a odudu Jehovah?

² Edide nnyịn ikere iban̄a atọm m̀mê iwọn̄ọde ntịn̄enyịn nnyịn ibịne akaka ekondo, akwa odudu Jehovah akpa nnyịn idem. Eyịghe idụhe enye ekemede ndidọhọ ete: “Ẹmenede enyịn mbufo ke enyọn̄, ẹnyụn̄ ẹse! Anie okobot mme mmọ emi? Anie ada otu mmọ ọwọrọ ke ibat mmọ? Enye osio kpukpru mmọ enyịn̄: koro nsọn̄idem esie okponde, enye onyụn̄ ọsọn̄ odudu; baba owo mmọ kiet isopke”! (Isaiah 40:26) Ih, Jehovah  “ọsọn̄ odudu,” enye onyụn̄ edi Enye Emi “nsọn̄idem” emi ẹkedade ẹbot ofụri ekondo otode.

Ẹyom Odudu Oro Akande eke Owo

3, 4. (a) Nso idi ndusụk n̄kpọ oro ẹkemede ndinam nnyịn ikpa mba? (b) Nso mbụme oyom ẹkere ẹban̄a?

³ Ke adan̄aemi odudu Abasi mînyeneke adan̄a, mme owo ẹsikpa mba. Ebiet ekededi emi nnyịn ikade, nnyịn imesikụt mme owo emi ẹkpade mba. Mmọ ẹsidemede idap ye mmemidem, ẹka ufọkn̄wed m̀mê utom ye mmemidem, ẹnyọn̄ ẹdi ufọk ye mmemidem, inyụn̄ idụkke idap ye mmemidem kpọt edi ẹnen̄ede ẹkpa mba n̄ko. Esidọn̄ ndusụk owo nte mmọ ẹkpekade ebiet ekededi ẹkebọ nduọkodudu oro idemmọ enen̄erede oyom. Nte mme asan̄autom Jehovah, nnyịn n̄ko imesikpa mba, koro uwem uten̄e Abasi nnyịn oyom in̄wana eti-eti. (Mark 6:30, 31; Luke 13:24; 1 Timothy 4:8) Ndien ediwak n̄kpọ en̄wen ẹdu oro ẹsibọde nnyịn odudu.

⁴ Idem okposụkedi nnyịn idide mme Christian, nnyịn ibọhọke mme mfịna oro mme owo ke ofụri ofụri ẹsobode. (Job 14:1) Udọn̄ọ, unana okụk, m̀mê mme ọsọ mfịna eken ke uwem ye iduọesịt oro esisan̄ade ye emi, ẹkeme ndinam idem emem owo. N̄kpọ efen oro adianade ye mme n̄kpọ-ata emi edi mme idomo oro mbon oro ẹkọbọde ke ntak edinen ido ẹsisobode. (2 Timothy 3:12; 1 Peter 3:14) Ke ntak mfịghe eke usen ke usen oro ẹtode ererimbot ye ubiọn̄ọ oro ẹbiọn̄ọde utom ukwọrọikọ Obio Ubọn̄ nnyịn, ndusụk nnyịn imekeme ndinen̄ede n̄kop mmemidem tutu nnyịn ikere ke akpana itehede ube ke utom Jehovah. N̄ko-n̄ko, Satan kpa Devil ada kpukpru usụn̄ oro enye enyenede odomo ndibiat nsọn̄ọnda nnyịn nnọ Abasi. Do, didie ke nnyịn ikeme ndinyene odudu eke spirit oro iyomde man ikûkpa mba ikûnyụn̄ ifiak edem?

5. Ntak emi ẹyomde odudu oro akande eke owo man ẹnam utom ukwọrọikọ Christian?

⁵ Man inyene odudu eke spirit, nnyịn inyene ndiberi edem ke Jehovah, kpa Andibot oro enyenede ofụri odudu. Apostle Paul ama owụt ete ke utom ukwọrọikọ Christian oyoyom odudu oro akande eke mme anana-mfọnmma owo. Enye ekewet ete: “Nnyịn ikama ọsọn̄-urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.” (2 Corinth 4:7) Mme Christian oro ẹyetde aran ke ẹnam ‘utom edinam owo etie ke emem ye Abasi’ ye un̄wam otode mme nsan̄a mmọ oro ẹnyenede idotenyịn eke isọn̄. (2 Corinth 5:18; John 10:16; Ediyarade 7:9) Sia nnyịn mme anana-mfọnmma owo inamde utom Abasi kpa ye ukọbọ, nnyịn ikemeke ndinam enye ke odudu nnyịn kpọt. Jehovah an̄wam nnyịn ebe ke edisana spirit esie, ndien ke ntem mmeme nnyịn anam odudu esie okpon. Ndien nnyịn ikop ndọn̄esịt didie ntem ke akpanikọ oro nte ke “Jehovah omụm nti owo akama”!—Psalm 37:17.

‘Jehovah Edi Odudu Nnyịn’

6. Didie ke N̄wed Abasi ọsọn̄ọ ọnọ nnyịn nte ke Jehovah edi Ebiet emi odudu nnyịn otode?

⁶ Ete nnyịn eke heaven “ọsọn̄ odudu” onyụn̄ ekeme ndinọ nnyịn odudu. Ke akpanikọ, ẹsian nnyịn ẹte: “[Jehovah] ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem. Idem n̄kparawa ẹyekpa mba ẹnyụn̄ ẹkpọt, nyara owo ẹyenyụn̄ ẹduọn̄ọ: edi mmọ eke ẹberede ye Jehovah ẹyekop obufa nsọn̄idem; ẹyedọk ke mba nte ntrukpom; ẹyefen̄e, ndien idikpọtke; ẹyesan̄a, edi idikpaha mba.” (Isaiah 40:29-31) Ke ntak mme mfịghe oro ẹkade-ka iso ndikọri, ndusụk ini ekeme nditie nnyịn ke idem nte efehe mbuba oro idem ememde, emi etiede nte ke ikemeke ndika iso aba. Edi utịt mbuba uwem enen̄ede ekpere, ndien inaha nnyịn ikpa mba. (2 Chronicles 29:11) Asua nnyịn, kpa Devil, ke oyoyo “nte lion eke okụnide,” ndien enye oyom ndibiọn̄ọ nnyịn. (1 Peter 5:8) Ẹyak nnyịn iti ite ke ‘Jehovah edi odudu nnyịn, ye otu-ekọn̄ nnyịn,’ ndien enye anam ediwak ndutịm ‘ndinọ mbon mba odudu.’—Psalm 28:7.

7, 8. Nso uyarade idu nte ke Jehovah ama ọsọn̄ọ David, Habakkuk, ye Paul idem?

⁷ Jehovah ama ọnọ David odudu oro enye okoyomde man aka iso kpa ye ikpọ ubiọn̄ọ. Ke ntre David ama ewet ye ọyọhọ mbuọtidem ye uko, ete: “Nnyịn iyada Abasi inam uko: ndien enye eyedịghi mme asua nnyịn.” (Psalm 60:12) Jehovah ama ọnọ Habakkuk n̄ko odudu man  enye ekpekeme ndikụre utom esie nte prọfet. Habakkuk 3:19 ọdọhọ ete: “Jehovah Ọbọn̄ edi odudu mi, enye ayanam ukot mi ebiet eke edop, onyụn̄ anam mi nsan̄a ke edikon̄ ebiet mi.” Se idotde ẹtịm ẹfiọk n̄ko edi uwụtn̄kpọ Paul, emi ekewetde ete: “Mmenyene ukeme ndinam kpukpru n̄kpọ ke odudu [Abasi] Andisọn̄ọ mi idem.”—Philippi 4:13.

⁸ Ukem nte David, Habakkuk, ye Paul, nnyịn ikpenyene ndiwụt mbuọtidem ke ukeme Abasi ndisọn̄ọ nnyịn idem ye ke odudu esie ndinyan̄a nnyịn. Sia ifiọkde ite ke Jehovah Ọbọn̄ Andikara edi Ebiet emi “odudu” nnyịn otode, ẹyak nnyịn idahaemi ikere iban̄a ndusụk usụn̄ ndibọ odudu eke spirit nto akpakịp ndutịm oro Abasi anamde.

Mme Ndutịm eke Spirit Ndisọn̄ọ Nnyịn Idem

9. Nso udeme ke mme n̄wed Christian ẹnyene ke edibọk nnyịn?

⁹ Ndikpep N̄wed Abasi ifịk ifịk ye un̄wam mme n̄wed Christian ekeme ndisọn̄ọ nnyịn idem onyụn̄ omụm nnyịn akama. Andiwet psalm ama ọkwọ ete: “Ọfọfọn ọnọ owo eke . . . mbet Jehovah [adatde] enye esịt; enye onyụn̄ osụk ekere mbet esie ke uwemeyo ye ke okoneyo. Ndien enye ebiet eto eke ẹtọde ke mben akpa mmọn̄, eke osion̄ode mfri esie ke ekem ini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.” (Psalm 1:1-3) Kpa nte anade nnyịn idia udia man ika iso inyene odudu, oyom nnyịn idia udia eke spirit oro Abasi ọnọde ebe ke Ikọ esie ye mme n̄wed Christian man ika iso inyene odudu ke n̄kan̄ eke spirit. Ke ntre, ifịk ifịk ukpepn̄kpọ ye editie n̄kere ẹdi akpan n̄kpọ.

10. Ini ewe ke nnyịn ikeme ndinyene ini nnọ ukpepn̄kpọ ye editie n̄kere?

¹⁰ Nditie n̄kere “nditụn̄ọ n̄kpọ Abasi” enen̄ede akama utịp. (1 Corinth 2:10) Edi ini ewe ke nnyịn ikeme ndinyene ini nnọ editie n̄kere? Isaac eyen Abraham ama “ọwọrọ aka ke in̄wan̄ ndisan̄a n̄kere ke mfụn̄-mfụn̄ mbubịteyo.” (Genesis 24:63-67) David andiwet psalm ‘ama ana ekere Abasi ke efen okoneyo.’ (Psalm 63:6) Nnyịn imekeme ndikpep inyụn̄ itie ikere Ikọ Abasi ke usenubọk, ke mbubịteyo, ke okoneyo—ke nditịm ntịn̄, ke ini ekededi. Utọ ukpepn̄kpọ ye editie n̄kere oro ada esịm n̄kpọ efen ke otu ndutịm oro Jehovah adade ndinọ odudu eke spirit—akam.

11. Ntak emi nnyịn ikpadade edibọn̄ akam ofụri ini ke ata akpan n̄kpọ?

¹¹ Ndibọn̄ akam nnọ Abasi ofụri ini an̄wam ndisọn̄ọ nnyịn idem. Ke ntre, ẹyak nnyịn ‘ikọbọ ke edibọn̄ akam.’ (Rome 12:12) Ke ndusụk idaha, esiyom nnyịn inam akpan eben̄e kaban̄a eti ibuot ye odudu oro iyomde ke ndiyọ idomo. (James 1:5-8) Ẹyak nnyịn n̄ko ikọm inyụn̄ itoro Abasi ke ini nnyịn ikụtde nte mme uduak esie ẹsude m̀mê ikụtde ke enye ọsọn̄ọ nnyịn idem man ika iso ke utom esie. (Philippi 4:6, 7) Edieke nnyịn isịkde ikpere Jehovah ke akam, enye idikpọn̄ke nnyịn tutu amama. David ama ọkwọ ete: “Sese, Abasi edi andinyan̄a mi.”—Psalm 54:4.

12. Ntak emi nnyịn ikpeben̄ede Abasi edisana spirit esie?

¹² Ete nnyịn eke heaven ọnọ nnyịn odudu onyụn̄ ọsọn̄ọ nnyịn idem ebe ke edisana spirit m̀mê anamutom odudu esie. Paul ekewet ete: “Ntọn̄ọ edọn̄ nnọ Ete . . . nte, Enye akpakam ada Spirit Esie anam mbufo ẹsọn̄ọ idem ẹnyene odudu ke ukpọn̄, nte ekemde ye uwak ubọn̄ Esie.” (Ephesus 3:14-16) Nnyịn ikpenyene ndibọn̄ akam mben̄e edisana spirit, inyenede mbuọtidem nte ke Jehovah ọyọnọ nnyịn. Jesus ama ọkọk ibuot ete: Edieke eyen eben̄ede iyak, nte ima ima ete ọyọnọ enye urụkikọt? Ke akpanikọ idinọhọ. Ntem, enye ama eberi ete: “Edieke mbufo emi [ẹdide mme anamidiọk ndien ke ntem ke ndusụk udomo] ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak Edisana Spirit ọnọ mmọ eke ẹben̄ede enye?” (Luke 11:11-13) Ẹyak nnyịn ibọn̄ akam ye utọ mbuọtidem oro inyụn̄ iti kpukpru ini ite ke ẹkeme ndinam mme  anam-akpanikọ asan̄autom Abasi “ẹsọn̄ọ idem” ẹnyene odudu ebe ke spirit Esie.

Esop—Ebiet Nsịnudọn̄

13. Didie ke nnyịn ikpese mme mbono esop Christian?

¹³ Jehovah ọsọn̄ọ nnyịn idem ebe ke mme mbono esop Christian. Jesus ama ọdọhọ ete: “Ọtọ nte owo iba m̀mê ita ẹsopde idem ke enyịn̄ Mi, do ke ndodu ke ufọt mmọ.” (Matthew 18:20) Ke ini Jesus ọkọn̄wọn̄ọde un̄wọn̄ọ oro, enye ekeneme mme n̄kpọ oro okoyomde mbon oro ẹdade usụn̄ ke esop ẹnọ ntịn̄enyịn. (Matthew 18:15-19) Nte ededi, edumbet oro odude ke mme ikọ esie enyene n̄kpọ ndinam ye kpukpru mbono esop, n̄kpri ye ikpọ mbono nnyịn, emi ẹsibererede ẹnyụn̄ ẹberide ke akam ke enyịn̄ esie. (John 14:14) Mmọdo edi akwa ifet ndidụk mme utọ mboho Christian oro, edide esisịt ibat m̀mê ediwak tọsịn owo ẹdụk. Ẹyak nnyịn ke ntre iwụt esịtekọm iban̄a mme edinam emi, oro ẹtịmde ndisọn̄ọ nnyịn idem ke n̄kan̄ eke spirit ndinyụn̄ ndemede nnyịn nnọ ima ye nti utom.—Mme Hebrew 10:24, 25.

14. Nso ufọn ke nnyịn ibọ ito mme ukeme mbiowo Christian?

¹⁴ Mbiowo Christian ẹsinọ un̄wam ye nsịnudọn̄ eke spirit. (1 Peter 5:2, 3) Paul ama an̄wam onyụn̄ esịn udọn̄ ọnọ mme esop oro enye akakade ekese, nte mme esenyịn oro ẹsan̄ade-san̄a ẹsinamde mfịn. Ke akpanikọ, ama ọdọn̄ enye ndidu ye mme ekemmọ andinịm ke akpanikọ man abuana nsịnudọn̄ oro ọbọpde-bọp. (Utom 14:19-22; Rome 1:11, 12) Nnyịn ikpakam iwụt esịtekọm kpukpru ini inọ mbiowo nnyịn eke n̄kann̄kụk ye mme esenyịn Christian eken, emi ẹnyenede akamba udeme ke ndisịn udọn̄ nnọ nnyịn ke n̄kan̄ eke spirit.

15. Didie ke mme ekemmọ andinịm ke akpanikọ ke esop nnyịn ẹdi “n̄kpọ nsịnudọn̄”?

¹⁵ Mme ekemmọ andinịm ke akpanikọ oro ẹdude ke esop nnyịn ẹkeme ndidi “n̄kpọ nsịnudọn̄.” (Colossae 4:10, 11, NW) Nte ‘mme ufan,’ mmọ ẹkeme ndin̄wam nnyịn ke mme ini nnanenyịn. (Mme N̄ke 17:17) Ke uwụtn̄kpọ, ke ini ẹkesion̄ode asan̄autom Abasi 220 ke itienna ekikere Sachsenhausen ke idak ukpeme Nazi ke 1945, mmọ ẹkenyene ndisan̄a kilomita 200. Mmọ ẹkesan̄a ke otu kiet, ndien mbon oro ẹkekopde idem ẹma ẹkpat mbon oro mîkokopke idem ke n̄kpri ukpatn̄kpọ ifan̄. Nso ikedi utịp? Ke isan̄ n̄kpa oro se iwakde ibe mbon itienna ekikere 10,000 ẹkekpan̄ade, owo ndomokiet ke otu Mme Ntiense Jehovah ikakpaha. Mme utọ mbụk oro emi ẹsidude ke mme n̄wed Watch Tower, esịnede Yearbook of Jehovah’s Witnesses ye Jehovah’s Witnesses—Proclaimers of God’s Kingdom, ẹwụt nte ke Abasi esinọ ikọt esie odudu, man mmọ ẹkûkpa mba.—Galatia 6:9. *

Ẹsọn̄ọ Idem ebe ke Utom Ukwọrọikọ Nnyịn

16. Didie ke ndibuana kpukpru ini ke utom ukwọrọikọ ọsọn̄ọ nnyịn idem ke n̄kan̄ eke spirit?

¹⁶ Ndibuana kpukpru ini ke utom ukwọrọikọ  Obio Ubọn̄ esisọn̄ọ nnyịn idem ke n̄kan̄ eke spirit. Utọ edinam oro an̄wam nnyịn ndiwụk ntịn̄enyịn ke Obio Ubọn̄ Abasi nnyụn̄ nnyene nsinsi ini ye mme idotenyịn edidiọn̄ esie ke ekikere. (Jude 20, 21) Mme un̄wọn̄ọ N̄wed Abasi oro nnyịn isitịn̄de iban̄a ke utom ukwọrọikọ nnyịn ẹnọ nnyịn idotenyịn ẹnyụn̄ ẹkeme ndinam nnyịn ibiere nte prọfet Micah, emi ọkọdọhọde ete: “Nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.”—Micah 4:5.

17. Mme ekikere ewe ke ẹnọ ẹban̄a mme ukpepn̄kpọ Bible?

¹⁷ Nnyịn ndida N̄wed Abasi nnam n̄kpọ akamba akamba ke ndikpep mbon en̄wen anam itie ebuana nnyịn ye Jehovah ọsọn̄. Ke uwụtn̄kpọ, ke ini inịmde ukpepn̄kpọ Bible ye un̄wam n̄wed Ifiọk Oro Adade Osịm Nsinsi Uwem, edi se iwụtde ifiọk ndikot nnyụn̄ nneme ediwak ke otu itien̄wed oro ẹsiakde ẹsịn. Emi an̄wam eyen ukpepn̄kpọ onyụn̄ anam ifiọk nnyịn eke spirit atara. Edieke ekikere Bible m̀mê uwụtn̄kpọ mîn̄wan̄ake eyen ukpepn̄kpọ, ẹkeme ndida se iwakde ibe ini ukpepn̄kpọ kiet ndikụre ibuotikọ kiet ke n̄wed Ifiọk. Nnyịn isikop idatesịt didie ntem nditịm idem nte ọfọnde nnyụn̄ nsịn ukeme efen efen ndin̄wam mbon en̄wen ẹsan̄a ẹkpere Abasi!

18. Nam an̄wan̄a nte ẹdade n̄wed Ifiọk ẹnam n̄kpọ uforo uforo.

¹⁸ Ke isua kiet kiet, ẹsida n̄wed Ifiọk ẹnam n̄kpọ uforo uforo ke ndin̄wam ediwak tọsịn owo ẹkabade ẹdi mme asan̄autom Jehovah oro ẹyakde idem ẹnọ, ndien emi esịne ediwak mbon oro mînyeneke ifiọk Bible. Ke uwụtn̄kpọ, ke ini ekedide eyenọwọn̄, owo Hindu kiet ke Sri Lanka ama okop nte Ntiense kiet etịn̄de aban̄a Paradise. Ndusụk isua ke ukperedem enye ama aka ebịne Ntiense oro, ndien ikebịghike ebe Ntiense oro ama ọtọn̄ọ ukpepn̄kpọ Bible ye enye. Ke akpanikọ, akparawa oro ama esidi kpukpru usen ndikpep n̄kpọ, ndien ẹma ẹkụre ndikpep n̄wed Ifiọk ke ata ekpri ini. Enye ama ọtọn̄ọ ndidụk kpukpru mbono esop, ọwọrọ ọkpọn̄ akani ido ukpono esie, onyụn̄ akabade edi asuanetop Obio Ubọn̄. Ke ini enye akanade baptism, enye ke ekenịm ukpepn̄kpọ Bible ye ufan esie.

19. Nte nnyịn ibemde iso iyom Obio Ubọn̄, nso ke nnyịn ikeme nditịm nnịm ke akpanikọ?

¹⁹ Ndibem iso nyom Obio Ubọn̄ ada akwa idatesịt ọsọk nnyịn. (Matthew 6:33) Okposụkedi nnyịn isobode nsio nsio idomo, nnyịn ke ika iso nditan̄a eti mbụk ifịk ifịk ye inemesịt. (Titus 2:14) Ediwak nnyịn ke isịm se ẹyomde ke utom usiakusụn̄ uyọhọ ini, ndien ndusụk nnyịn inam utom ke ebiet oro udọn̄ kaban̄a mme ọkwọrọikọ okponde akan. Edide nnyịn imenede mme ufọn n̄kpọ Obio Ubọn̄ ke mme usụn̄ emi m̀mê ke mme usụn̄ efen, nnyịn imenịm ite ke Jehovah idifreke utom nnyịn ye ima enyịn̄ esie emi nnyịn iwụtde.—Mme Hebrew 6:10-12.

Ka Iso ke Odudu Jehovah

20. Didie ke nnyịn ikeme ndiwụt nte ke nnyịn iberi edem ke Jehovah kaban̄a odudu?

²⁰ Ẹyak nnyịn isịn ofụri ukeme iwụt ite ke nnyịn idori enyịn ke Jehovah inyụn̄ iberi edem ke enye kaban̄a odudu. Nnyịn imekeme ndinam ntre ebe ke ndida mme ndutịm eke spirit oro enye anamde ebe ke “asan̄autom emi anamde akpanikọ” nnam n̄kpọ ọyọhọ ọyọhọ. (Matthew 24:45) Ndikpep Ikọ Abasi ọkpọkpọ ye ke esop ye un̄wam mme n̄wed Christian, akam ofụri esịt, un̄wam eke spirit otode mbiowo, nti uwụtn̄kpọ mme anam-akpanikọ ekemmọ andinịm ke akpanikọ, ye edibuana kpukpru ini ke utom ukwọrọikọ ẹdu ke otu ndutịm oro ẹnamde itie ebuana nnyịn ye Jehovah ọsọn̄ ẹnyụn̄ ẹnọde nnyịn odudu ndika iso ke edisana utom esie.

21. Didie ke apostle Peter ye Paul ẹketịn̄ ẹban̄a ufọn odudu oro Abasi ọnọde?

 ²¹ Kpa ye mmeme nnyịn, Jehovah ọyọsọn̄ọ nnyịn idem ndinam uduak esie edieke nnyịn iberide edem ke enye kaban̄a un̄wam. Ke ọdiọn̄ọde ufọn utọ un̄wam oro, apostle Peter ekewet ete: “Edieke owo anamde n̄kpọ ọnọ ekemmọ owo, yak enye anam nte ada odudu eke Abasi ọnọde anam.” (1 Peter 4:11) Ndien Paul ama owụt nte enye ekeberide edem ke odudu oro Abasi ọnọde ke ini enye ọkọdọhọde ete: “Mmadara ke mmem-idem, ye esuene, ye afanikọn̄, ye isịn-enyịn, ye mbaba, kaban̄a Christ; koro ke adan̄aemi idem ememde mi, adan̄aoro ke ntịm nnyene nsọn̄idem.” (2 Corinth 12:10) Nnyịn ikpakam inyene ukem mbuọtidem oro inyụn̄ ida ubọn̄ isọk Jehovah Ọbọn̄ Andikara, emi ọnọde mbon mba odudu.—Isaiah 12:2.

[Mme Ikọ idakisọn̄]

Didie ke Afo Ọkpọbọrọ?

• Ntak emi ikọt Jehovah ẹyomde odudu oro akande eke owo?

• Nso uyarade N̄wed Abasi odu nte ke Abasi esinọ mme asan̄autom esie odudu?

• Nso idi ndusụk ndutịm eke spirit oro Jehovah anamde man ọsọn̄ọ nnyịn idem?

• Didie ke nnyịn ikeme ndiwụt nte ke nnyịn iberi edem ke Abasi kaban̄a odudu?

[Mme Mbụme Ukpepn̄kpọ]

[Ndise ke page 12]

Nnyịn ndida Bible n̄kpep mbon en̄wen anam itie ebuana nnyịn ye Jehovah ọsọn̄