Nte Afo Emenen̄ede Ama Mme N̄kpọ Editi Jehovah?
Nte Afo Emenen̄ede Ama Mme N̄kpọ Editi Jehovah?
“Ukpọn̄ mi ekpeme mme n̄kpọ editi fo, mmonyụn̄ nnen̄ede mma mmọ.”—PSALM 119:167, NW.
1. M̀mọ̀n̄ akpan akpan ke nnyịn ikụt nte ẹtịn̄de ẹban̄a mme n̄kpọ editi Jehovah ndien ndien?
JEHOVAH oyom ikọt esie ẹkop inemesịt. Nte ededi, man ikop ata inemesịt, ana nnyịn isan̄a ke mbet Abasi inyụn̄ inịm mme ewụhọ esie. Ke ntak oro, enye ọnọ nnyịn mme n̄kpọ editi. Ẹtịn̄ ẹban̄a emi ndien ndien ke N̄wed Abasi, akpan akpan ke Psalm 119, emi ekemede ndidi ekpri edidem Judah oro Hezekiah ekewet. Edinem ikwọ emi ọtọn̄ọ ye mme ikọ emi: “Ọfọfọn ọnọ mmọ eke usụn̄ mmọ ọfọnde ama, eke ẹsan̄ade ke n̄wed ido Jehovah. Ọfọfọn ọnọ mmọ eke [ẹkpemede mme n̄kpọ editi, NW] esie, eke ẹyomde enye ke ofụri esịt.”—Psalm 119:1, 2.
2. Didie ke mme n̄kpọ editi Abasi ẹnyene ebuana ye inemesịt?
2 Nnyịn ‘isan̄a ke n̄wed ido Jehovah’ ebe ke ndinyene nnennen ifiọk Ikọ esie ye ke ndida enye nsịn ke edinam ke uwem nnyịn. Nte ededi, sia nnyịn idide mme anana-mfọnmma owo, nnyịn imoyom mme n̄kpọ editi. Ikọ Hebrew oro ẹkabarede “mme n̄kpọ editi” owụt nte ke Abasi esiti nnyịn ibet, mme ewụhọ, ye mme edumbet esie. (Matthew 10:18-20) Nnyịn idika iso ikop inemesịt n̄kukụre edieke ikade iso ndikpeme mme utọ n̄kpọ editi oro, koro mmọ ẹn̄wamde nnyịn ndifep mme n̄kpọ iduọ eke spirit oro ẹsidade ẹsịm afanikọn̄ ye mfụhọ.
Sọn̄ọ Yịre ke Mme N̄kpọ Editi Jehovah
3. Ọkọn̄ọde ke Psalm 119:60, 61, nso mbuọtidem ke nnyịn inyene?
3 Mme n̄kpọ editi Abasi ẹkedi ọsọn̄urua n̄kpọ ẹnọ andiwet psalm oro ọkọkwọde ete: “Nsọp ubọk, nnamke ubịghi, ke edinịm mbet fo. Mme [urụk, NW] mme oburobụt owo ẹkan mi ẹkụk: edi mfreke mme ido fo.” (Psalm 119:60, 61) Mme n̄kpọ editi Jehovah ẹn̄wam nnyịn ndiyọ ukọbọ koro nnyịn imenyene mbuọtidem nte ke Ete nnyịn eke heaven ekeme ndisịbe mme urụk ukpan oro mme asua ẹbọpde ẹkanade nnyịn. Ke edikem ini, enye esisio nnyịn ke mme utọ n̄kpọ ubiọn̄ọ oro man nnyịn ikeme ndinam utom ukwọrọikọ Obio Ubọn̄.—Mark 13:10.
4. Didie ke nnyịn ikpanam n̄kpọ iban̄a mme n̄kpọ editi Abasi?
4 Ke ndusụk idaha, mme n̄kpọ editi Jehovah ẹsinen̄ede nnyịn. Nnyịn ikpakam iwụt esịtekọm kpukpru ini iban̄a utọ edinen̄ede oro, kpa nte andiwet psalm okowụtde. Enye ama ọbọn̄ akam ọnọ Abasi ete: “Mme n̄kpọ editi fo ẹdat mi esịt . . . mmama mme n̄kpọ editi fo.” (Psalm 119:24, 119, NW) Nnyịn imenyene mme n̄kpọ editi Abasi ẹwak ẹkan se andiwet psalm ekenyenede. Edikot oro N̄wed Abasi Usem Greek okotde oto N̄wed Abasi Usem Hebrew ke ediwak itie ikie itịghi nnyịn iban̄a mme item oro Jehovah ọkọnọde ikọt esie ke idak Ibet kpọt edi eti nnyịn n̄ko aban̄a mme uduak esie kaban̄a esop Christian. Ke ini Abasi okụtde ke odot nditi nnyịn mme n̄kpọ oro ẹnyenede n̄kpọ ndinam ye mme ibet esie, nnyịn imesiwụt esịtekọm iban̄a utọ ndausụn̄ oro. Ndien ke ‘ndisọn̄ọ nyịre ke mme n̄kpọ editi Jehovah,’ nnyịn ifep mme n̄kpọ etabi edinam idiọkn̄kpọ oro mînemke Andibot nnyịn esịt ẹnyụn̄ ẹbiatde inemesịt nnyịn.—Psalm 119:31, NW.
5. Didie ke nnyịn ikeme ndinen̄ede mma mme n̄kpọ editi Jehovah?
5 Nnyịn ikpama mme n̄kpọ editi Jehovah adan̄a didie? Andiwet psalm ama ọkwọ ete: “Ukpọn̄ mi ekpeme mme n̄kpọ editi fo, nnyụn̄ nnen̄ede mma mmọ.” (Psalm 119:167, NW) Nnyịn iyenen̄ede ima mme n̄kpọ editi Jehovah edieke nnyịn isede inyụn̄ inyịmede mmọ nte item Ete oro enen̄erede ekere aban̄a nnyịn. (1 Peter 5:6, 7) Nnyịn imoyom mme n̄kpọ editi esie, ndien ima oro imade mmọ ọyọkọri nte nnyịn ikụtde nte mmọ ẹnọde nnyịn ufọn.
Ntak Nnyịn Iyomde Mme N̄kpọ Editi Abasi
6. Nso idi ntak kiet oro nnyịn iyomde mme n̄kpọ editi Jehovah, ndien nso idin̄wam nnyịn nditi mmọ?
6 Ntak kiet oro nnyịn iyomde mme n̄kpọ editi Jehovah edi nte ke nnyịn imesifre n̄kpọ. The World Book Encyclopedia ọdọhọ ete: “Ke ofụri ofụri, mme owo ẹsifre ediwak n̄kpọ nte ini ebede. . . . Eyedi afo emenyene ifiọk aban̄a nte afo ekefrede enyịn̄ m̀mê ekpri ntọt efen oro afo ekekperede nditi. . . . Ẹkot utọ editaba ukeme uti n̄kpọ ibio ini oro, emi esitịbede ndien ndien, efre. Ntaifiọk ẹmen enye ẹdomo ye ndiyom n̄kpọ oro osopde ke ubet oro etiede nsuahade nsuahade. . . . Eti usụn̄ nditi n̄kpọ edi ndika iso n̄kpep enye ediwak ini ke ama ọkọfiọk n̄kpọ oro.” Ifịk ifịk edikpep n̄kpọ ye edifiak n̄kpep ayan̄wam nnyịn nditi mme n̄kpọ editi Abasi nnyụn̄ ndu uwem ekekem ye mmọ man ọfọn ye nnyịn.
7. Ntak emi ẹyomde mme n̄kpọ editi Abasi mfịn ẹkan nte akanam ẹyomde?
7 Nnyịn imoyom mme n̄kpọ editi Jehovah mfịn ikan nte akanam iyomde koro idiọkido ọdọk esịm n̄kon̄n̄kan udomo ke mbụk owo. Edieke nnyịn ikpan̄de utọn̄ ke mme n̄kpọ editi Abasi, nnyịn iyenyene ikike oro ẹyomde man ifep ndidi se ẹtapde ẹsịn ke ndiọi usụn̄ ererimbot. Andiwet psalm ama ọdọhọ ete: “Ndi ọniọn̄ n̄kan kpukpru mmọ emi ẹtemede mi; koro [mme n̄kpọ editi] fo ẹdide se ntiede n̄kere. Ndi asian n̄kan mbiowo, koro nnịmde item fo. Mmakpan ukot mi kpukpru mme idiọk usụn̄, man n̄kpeme item fo.” (Psalm 119:99-101) Ebede ke ndikpeme mme n̄kpọ editi Abasi, nnyịn iyọwọn̄ọde ikpọn̄ “kpukpru mme idiọk usụn̄” iyonyụn̄ ifep nditie nte akwa udịm owo, emi ‘enyịn esịt ekịmde mmọ; emi ẹnyụn̄ ẹdade nsannsan ye uwem Abasi.’—Ephesus 4:17-19.
8. Didie ke nnyịn ikeme nditịm idem ọfọn ndiyọ mme idomo mbuọtidem uforo uforo?
8 Ẹyom mme n̄kpọ editi Abasi n̄ko koro mmọ ẹsọn̄ọ nnyịn idem ndiyọ ediwak idomo nnyịn ke “utịt ini” emi. (Daniel 12:4) Ke mme utọ n̄kpọ editi oro mîdụhe nnyịn iyakabade idi ‘mme andikokop emi ẹfrede.’ (James 1:25) Edi ndikpep N̄wed Abasi ifịk ifịk ke idem nnyịn ye ke esop ye un̄wam mme n̄wed ẹtode “asan̄autom emi anamde akpanikọ, onyụn̄ enyenede ọniọn̄” ayan̄wam nnyịn ndiyọ mme idomo mbuọtidem uforo uforo. (Matthew 24:45-47) Mme utọ ndutịm eke spirit oro ẹn̄wam nnyịn ndifiọk se anade nnyịn inam man inem Jehovah esịt ke ini isobode n̄kpọsọn̄ idaha.
Akpan Udeme Emi Mme Mbono Esop Nnyịn Ẹnyenede
9. Mmanie ẹdi “mme enọ ke owo,” ndien didie ke mmọ ẹn̄wam mme ekemmọ andinịm ke akpanikọ?
9 Ẹyụhọ udọn̄ nnyịn kaban̄a mme n̄kpọ editi Abasi ke ndusụk udomo ke mme mbono esop Christian, emi nditọete oro ẹmekde ẹsinọde ukpep. Apostle Paul ama ewet ete ke ini Jesus “ọdọkde ke enyọn̄, Enye ada mbuotekọn̄ ọnyọn̄, ndien ọnọ [mme enọ ke owo, NW].” Paul ama adian do ete: “[Christ] ọkọnọ ndusụk owo nte mme apostle; onyụn̄ ọnọ ndusụk owo nte mme asiak-uduak Abasi, onyụn̄ ọnọ ndusụk owo nte mme ọkwọrọ-gospel, onyụn̄ ọnọ ndusụk owo nte mme andikpeme ye mme anditeme; man oto do ẹnam ikọt Abasi ẹfọn ẹma, ẹnyụn̄ ẹnam utom Abasi okụt unen, ẹnyụn̄ ẹnam Idem Christ ọkọri.” (Ephesus 4:8, 11, 12) Nnyịn ikeme ndiwụt esịtekọm didie ntem nte ke “mme enọ ke owo” emi—mbiowo oro ẹmekde—ẹsidụri ntịn̄enyịn nnyịn ẹwụt mme n̄kpọ editi Jehovah ke ini nnyịn isopde idem ọtọkiet kaban̄a utuakibuot!
10. Nso idi ọkpọ ikọ ke Mme Hebrew 10:24, 25?
10 Esịtekọm oro inyenede inọ mme ndutịm Abasi oyonụk nnyịn ndidụk mbono esop nnyịn mbition ke urua kiet kiet. Paul ama ọsọn̄ọ etịn̄ ete ke oyom ẹsop idem ọtọkiet kpukpru ini. Enye ekewet ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.”—Mme Hebrew 10:24, 25.
11. Didie ke kiet kiet ke otu mme mbono esop nnyịn eke urua ke urua ọnọ nnyịn ufọn?
11 Nte afo omowụt esịtekọm aban̄a se mme mbono esop nnyịn ẹsinamde ẹnọ nnyịn? Ukpepn̄kpọ Enyọn̄-Ukpeme eke urua ke urua esisọn̄ọ mbuọtidem nnyịn, an̄wam nnyịn idu uwem ekekem ye mme n̄kpọ editi Jehovah, onyụn̄ ekpeme nnyịn ọbiọn̄ọ “spirit ererimbot.” (1 Corinth 2:12; Utom 15:31) Ke An̄wan̄wa Mbono Esop, mme etịn̄ikọ ẹsinọ item otode Ikọ Abasi, esịnede mme n̄kpọ editi Jehovah ye mme utịbe utịbe “ikọ uwem nsinsi” Jesus. (John 6:68; 7:46; Matthew 5:1-7:29) Ufọkn̄wed Utom Ukara Abasi esifori mme usọ unọ ukpep nnyịn. Esoputom enen̄ede enyene ufọn ke ndin̄wam nnyịn ifori usụn̄ ukwọrọ eti mbụk nnyịn ke ufọk ke ufọk, ke mme mfiakn̄ka, ke mme ukpepn̄kpọ Bible, ye ke mme ikpehe utom ukwọrọikọ nnyịn eken. Ekpri otu Ukpepn̄kpọ N̄wed Esop esinọ nnyịn akamba ifet ndinọ mme ibọrọ oro ẹsịnede mme n̄kpọ editi Abasi.
12, 13. Didie ke ikọt Abasi ke idụt Asia kiet ẹwụt esịtekọm ẹban̄a mme mbono esop Christian?
12 Ndidụk mme mbono esop kpukpru ini esin̄wam nditi nnyịn mme ewụhọ Abasi onyụn̄ an̄wam ndinam nnyịn isọn̄ idem ke n̄kan̄ eke spirit kpa ye ekọn̄, nsọn̄ọn̄kpọ ndutịm uforo, ye mme idomo mbuọtidem nnyịn efen. Christian 70 oro ẹkebịnde ẹsion̄o ke ufọk mmọ ẹnyụn̄ ẹnyịkde ẹkedụn̄ ke akai ke idụt Asia kiet ẹma ẹnen̄ede ẹkụt ufọn mme mbono esop. Ke ẹbierede ndika iso nsop idem ọtọkiet kpukpru ini, mmọ ẹma ẹfiak ẹka obio mmọ oro ẹkọn̄ akabiatde, ẹkpọk se ikabiarade isụhọ ke Ufọkmbono Obio Ubọn̄, ẹnyụn̄ ẹfiak ẹbọp enye ke akai.
13 Ke ẹma ẹkeyọ ekọn̄ ediwak isua ke ikpehe efen ke idụt oro, ikọt Jehovah ke ẹsụk ẹnanam utom ifịk ifịk. Ẹma ẹbụp kiet ke otu mbiowo ke obio oro ẹte: “Nso inen̄ede in̄wam nditọete ndidiana kiet?” Nso ikedi ibọrọ esie? “Ke isua 19, nnyịn idehede itre ndinịm mbono esop ndomokiet. Ndusụk ini ke ntak ẹduọkde bọmb m̀mê mme mfịna efen, ndusụk nditọete isikemeke ndidi ufọkmbono Obio Ubọn̄, edi akananam nnyịn itreke ndinịm mbono esop.” Ndima nditọete iren ye iban emi ẹnen̄ede ẹfiọk ufọn ‘edisop idem ọtọkiet.’
14. Nso ke nnyịn ikeme ndikpep nto ido akanian̄wan oro Anna?
14 Anna, ebeakpa oro ekedide isua 84 ke emana, akananam ‘ikọkpọn̄ke temple.’ Nte utịp, enye ama odu ke ini ẹkedade nsekeyen oro Jesus ẹdi do esisịt ini ke enye ama akamana. (Luke 2:36-38) Nte afo emebiere nditre nditaba mme mbono esop? Nte afo emesidomo ofụri ukeme fo ndidụk kpukpru ikpehe n̄kpri ye ikpọ mbono nnyịn? Item oro ọnọde ufọn ke n̄kan̄ eke spirit oro isibọde ke mme mbono emi ọnọ nnyịn in̄wan̄ in̄wan̄ uyarade nte ke Ete nnyịn eke heaven ekere aban̄a ikọt esie. (Isaiah 40:11) Mme utọ mbono oro n̄ko ẹsinam owo okop idatesịt, ndien nnyịn ndidu do owụt esịtekọm oro inyenede iban̄a mme n̄kpọ editi Jehovah.—Nehemiah 8:5-8, 12.
Mme N̄kpọ Editi Jehovah Ẹdian̄ade Nnyịn Ẹnịm San̄asan̄a
15, 16. Didie ke ndikpeme mme n̄kpọ editi Jehovah otụk edu uwem nnyịn?
15 Ndikpeme mme n̄kpọ editi Abasi an̄wam ndidian̄ade nnyịn n̄kpọn̄ idiọk ererimbot emi. Ke uwụtn̄kpọ, ndikpeme mme n̄kpọ editi Abasi ọbiọn̄ọ nnyịn ndibuana ke oburobụt ido idan̄. (Deuteronomy 5:18; Mme N̄ke 6:29-35; Mme Hebrew 13:4) Ẹkeme ndikan idomo ndisu nsu, ndibian̄a abian̄a, m̀mê ndiyịp inọ ebe ke ndidu uwem ekekem ye mme n̄kpọ editi Abasi. (Exodus 20:15, 16; Leviticus 19:11; Mme N̄ke 30:7-9; Ephesus 4:25, 28; Mme Hebrew 13:18) Ndikpeme mme n̄kpọ editi Jehovah ọbiọn̄ọ nnyịn n̄ko ndisio usiene, ndisịn ikọ ke esịt, m̀mê ndidọk owo ekededi edidọk.—Leviticus 19:16, 18; Psalm 15:1, 3.
16 Ebede ke ndikpeme mme n̄kpọ editi Abasi, nnyịn iyaka iso idi mbon oro ẹnamde ẹsana, m̀mê ẹdian̄arede ẹnịm, ẹnọ utom esie. Ndien ndidianade n̄kpọn̄ ererimbot emi edi akpan n̄kpọ didie ntem! Ke akam ọkọbọn̄de ọnọ Jehovah ke akpatre okoneyo uwem esie ke isọn̄, Jesus ama anam n̄kpeubọk aban̄a mme anditiene enye ete: “Ami n̄kayak ikọ Fo nnọ mmọ; ndien ererimbot asasua mmọ, koro mmọ mîdịghe eke ererimbot, kpa nte Ami mmendịghe eke ererimbot. Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke idiọk esie. Mmọ idịghe eke ererimbot, kpa nte Ami mmendịghe eke ererimbot. Da akpanikọ Fo dianade mmọ nịm nọ Idem Fo: ikọ Fo edi akpanikọ.” (John 17:14-17) Ẹyak nnyịn ika iso ima Ikọ Abasi, emi adianarede nnyịn enịm kaban̄a edisana utom esie.
17. Nso ikeme nditịbe edieke nnyịn ifụmide mme n̄kpọ editi Abasi, ntre nso ke nnyịn ikpanam?
17 Nte mme asan̄autom Jehovah, nnyịn iyom ndika iso nnyene unyịme ke utom esie. Nte ededi, edieke nnyịn ifụmide mme n̄kpọ editi Abasi, edu ererimbot, emi ẹsịnde udọn̄ ẹnọ ke ekese utịn̄ikọ, n̄wed, unọ idem inemesịt, ye edinam esie, ekeme ndikan nnyịn ubọk. Ndien ke akpanikọ nnyịn iyomke ndikabade ndi mme ama inyene, mme obụre idiọk mbụre, mbon iseri, mme anana esịtekọm, mme anana uten̄e Abasi, mbon obom, mbon idiọk iwụk, mbon n̄kohodeidem, mme ama mbre n̄kan Abasi—ke ndisiak ibat ibat ke otu mme edu oro mbon oro ẹdian̄arede ẹkpọn̄ Abasi ẹnyenede. (2 Timothy 3:1-5) Sia nnyịn inen̄erede idu uwem ke ukperedem ini eke idiọk editịm n̄kpọ emi, ẹyak nnyịn ikọbọ ke ndibọn̄ akam nyom un̄wam Abasi man ikeme ndika iso n̄kpeme mme n̄kpọ editi Jehovah ndien ke ntem ‘ikpemede nte ikọ esie asan̄ade.’—Psalm 119:9.
18. Ndikpeme mme n̄kpọ editi Abasi edin̄wam nnyịn inam mme in̄wan̄ in̄wan̄ usio-ukot ewe?
18 Mme n̄kpọ editi Jehovah ẹnam se ikande nditi nnyịn se mîkpanaha nnyịn inam. Ndikpeme mme n̄kpọ editi esie ayanam nnyịn inam in̄wan̄ in̄wan̄ usio-ukot, onụkde nnyịn ndibuọt idem ọyọhọ ọyọhọ ye Jehovah nnyụn̄ mma enye ke ofụri esịt, ukpọn̄, ekikere, ye odudu nnyịn. (Deuteronomy 6:5; Psalm 4:5; Mme N̄ke 3:5, 6; Matthew 22:37; Mark 12:30) Mme n̄kpọ editi Abasi ẹnụk nnyịn n̄ko ndima mbọhọidụn̄ nnyịn. (Leviticus 19:18; Matthew 22:39) Nnyịn iwụt ima oro imade Abasi ye mbọhọidụn̄ akpan akpan ebe ke ndinam uduak Abasi nnyụn̄ mbuana ọnọ-uwem “ifiọk Abasi” ye mbon en̄wen.—Mme N̄ke 2:1-5.
Ndikpeme Mme N̄kpọ Editi Jehovah Ọwọrọ Uwem!
19. Didie ke nnyịn ikeme ndiwụt mbon efen nte ke odot onyụn̄ ọfọn ndikpeme mme n̄kpọ editi Jehovah?
19 Edieke nnyịn ikpemede mme n̄kpọ editi Jehovah inyụn̄ in̄wamde mbon efen ndinam ntre, nnyịn iyanyan̄a idem nnyịn ye mmọ emi ẹkopde uyo nnyịn. (1 Timothy 4:16) Didie ke nnyịn ikeme ndiwụt mbon efen nte ke enen̄ede ọfọn onyụn̄ odot ndikpeme mme n̄kpọ editi Jehovah? Ebe ke ndida mme edumbet Bible nsịn ke edinam ke uwem nnyịn. Mbon oro ‘ẹnyịmede nsinsi uwem’ ke ntem ẹyenyene uyarade nte ke usụn̄ oro ẹwụtde ke Ikọ Abasi edi mfọnn̄kan usụn̄ nditiene. (Utom 13:48, NW) Mmọ n̄ko ẹyekụt nte ke ‘Abasi odu ke otu nnyịn ke akpanikọ’ ndien oyonụk mmọ ndidiana ye nnyịn ke utuakibuot Jehovah Ọbọn̄ Andikara.—1 Corinth 14:24, 25.
20, 21. Mme n̄kpọ editi Abasi ye spirit esie ẹdin̄wam nnyịn ndinam nso?
20 Ebede ke ndika iso n̄kpep N̄wed Abasi, ndida se nnyịn ikpepde nsịn ke edinam, ye ndibọ ufọn ọyọhọ ọyọhọ nto mme ndutịm eke spirit oro Jehovah anamde, nnyịn iyenen̄ede ima mme n̄kpọ editi esie. Edieke ẹkpemede, mme n̄kpọ editi emi ẹyen̄wam nnyịn ndimen ‘obufa owo nsịne, emi ẹbotde ebiet Abasi ke edinen ido ye edisana ido akpanikọ.’ (Ephesus 4:20-24) Mme n̄kpọ editi Jehovah ye edisana spirit esie ẹyen̄wam nnyịn ndiwụt ima, idatesịt, emem, ime, mfọn-ido, eti ido, edinam akpanikọ, ifụre ifụre ido, mfara ke idem—mme edu emi mîbietke mme edu ererimbot oro esịnede ke ubọk Satan! (Galatia 5:22, 23; 1 John 5:19) Ke ntre, nnyịn imekeme ndiwụt esịtekọm ke ini ẹtide nnyịn mme n̄kpọ oro Jehovah oyomde ke ọkpọkpọ ukpepn̄kpọ Bible, ebe ke mbiowo oro ẹmekde, ye ke mme mbono esop, n̄kpri mbono, ye ikpọ mbono nnyịn.
21 Koro nnyịn ikpemede mme n̄kpọ editi Jehovah, nnyịn imekeme ndidat esịt idem ke ini ikụtde ndutụhọ ke ntak edinen ido. (Luke 6:22, 23) Nnyịn imodori enyịn Abasi ndinyan̄a nnyịn nsio ke ekese ndiọi idaha. Oro enen̄ede edi akpan n̄kpọ mfịn emi ẹtan̄de kpukpru idụt ẹbok ọtọkiet kaban̄a “ekọn̄ akwa usen Abasi, Andikara kpukpru n̄kpọ” ke Har–Magedon.—Ediyarade 16:14-16.
22. Nso ikpedi ubiere nnyịn kaban̄a mme n̄kpọ editi Jehovah?
22 Edieke nnyịn iyomde ndibọ enọ nsinsi uwem oro owo mîdotke, ana nnyịn inen̄ede ima mme n̄kpọ editi Jehovah inyụn̄ ikpeme mmọ ke ofụri esịt. Nnyịn ke ntre ikpakam inyene edu andiwet psalm oro ọkọkwọde ete: “[Mme n̄kpọ editi, NW] fo ẹdi edinen ke nsinsi: tịm sian mi ndien itọn̄ uwem ọyọsọn̄ mi.” (Psalm 119:144) Nnyịn n̄ko ikpakam iwụt ukem ubiere oro ẹkụtde ke mme ikọ andiwet psalm emi: “Nseme n̄kot fi [Jehovah]; nyan̄a mi, ndien nyenịm [mme n̄kpọ editi, NW] fo.” (Psalm 119:146) Ih, ke ikọ ye ke edinam, ẹyak nnyịn iwụt ite ke nnyịn imenen̄ede ima mme n̄kpọ editi Jehovah.
Didie ke Afo Ọkpọbọrọ?
• Didie ke andiwet psalm ekese mme n̄kpọ editi Jehovah?
• Ntak emi nnyịn iyomde mme n̄kpọ editi Abasi?
• Nso udeme ke mme mbono esop nnyịn ẹnyene ke ebuana ye mme n̄kpọ editi Abasi?
• Didie ke mme n̄kpọ editi Jehovah ẹdian̄ade nnyịn ẹkpọn̄ ererimbot emi?
[Mme Mbụme Ukpepn̄kpọ]
[Ndise ke page 15]
Andiwet psalm ama enen̄ede ama mme n̄kpọ editi Jehovah
[Mme ndise ke page 16, 17]
Ke nditiene uwụtn̄kpọ Anna, nte afo emebiere nditre nditaba mme mbono esop?
[Ndise ke page 18]
Ndikpeme mme n̄kpọ editi Jehovah adianade nnyịn enịm nte mbon oro ẹsanade ẹnyụn̄ ẹnyịmede kaban̄a utom esie