Ẹfọn Ẹma, Ẹnyụn̄ Ẹtịm Ẹfiọk
Ẹfọn Ẹma, Ẹnyụn̄ Ẹtịm Ẹfiọk
“Enye edi owo emi an̄wanade kpukpru ini ke akam esie oyom ufọn mbufo: man mbufo [ẹka iso, NW] ẹfọn ẹma, ẹnyụn̄ ẹtịm ẹfiọk ofụri uduak Abasi.”—COLOSSAE 4:12.
1, 2. (a) Nso ke mbonan̄wa ẹketịn̄ ẹban̄a mme akpa Christian? (b) Didie ke n̄wed mbon Colossae owụt ima ima udọn̄?
MME anditiene Jesus ẹma ẹnen̄ede ẹnyene udọn̄ ke idem mme ekemmọ andituak ibuot. Tertullian (ewetn̄wed ọyọhọ isua ikie iba ye ikie ita E.N.) ama etịn̄ aban̄a mfọnido oro mmọ ẹkewụtde nditọakpa, mme ubuene, ye mbonusọn̄. Mme uyarade ima oro ẹkenamde-nam ẹwụt mi ẹma ẹnen̄ede ẹtụk mbon oro mîkenịmke ke akpanikọ tutu ndusụk mmọ ẹtịn̄ ẹban̄a mme Christian ẹte, ‘Sese nte mmọ ẹmade kiet eken.’
2 N̄wed mbon Colossae owụt nte ke apostle Paul ye nsan̄a esie Epaphras ẹma ẹnyene utọ ima ima udọn̄ oro ẹban̄a nditọete iren ye iban ke Colossae. Paul ama ewet ọnọ mmọ ete: Epaphras “edi owo emi an̄wanade kpukpru ini ke akam esie oyom ufọn mbufo: man mbufo ẹfọn ẹma, ẹnyụn̄ ẹtịm ẹfiọk ofụri uduak Abasi.” Ke 2001, Mme Ntiense Jehovah ẹdinyene mme ikọ Colossae 4:12 emi nte ibuotikọ isua mmọ: “Ẹfọn ẹma, ẹnyụn̄ ẹtịm ẹfiọk ofụri uduak Abasi.”
3. N̄kpọ iba ewe ke Epaphras ọkọbọn̄ akam eben̄e?
3 Afo emekeme ndikụt nte ke akam oro Epaphras ọkọbọn̄de aban̄a mbonima esie ẹkedi ikpehe iba: (1) man mmọ “ẹfọn ẹma” ẹnyụn̄ (2) “ẹtịm ẹfiọk ofụri uduak Abasi.” Ẹkesịn ntọt emi ke N̄wed Abasi ke ufọn nnyịn. Ntre bụp idemfo, ‘Nso ke oyom ami nnam man mfọn mma nnyụn̄ ntịm mfiọk ofụri uduak Abasi? Ndien nso ididi utịp ke nnamde oro?’ Ẹyak nnyịn ise.
Domo ‘Ndifọn Mma’
4. Ke nso usụn̄ifiọk ke okoyom mbon Colossae “ẹfọn ẹma”?
4 Epaphras ama enen̄ede oyom ete nditọete imọ iren ye iban eke spirit ke Colossae “ẹfọn ẹma.” Ikọ oro Paul akadade, emi ẹkabarede mi nte “ẹfọn ẹma,” ekeme ndinọ ekikere mban̄a edifọn mma, edikọri n̄wọrọ owo, m̀mê edikọri nsịm ọyọhọ idaha. (Matthew 19:21; Mme Hebrew 5:14; James 1:4, 25) Eyedi afo ọmọfiọk ete ke owo ndidi Ntiense Jehovah oro ama akana baptism iwọrọke ite ke enye edi Christian oro ọkọride ọwọrọ owo. Paul ama ewet ọnọ mbon Ephesus, emi ẹkedụn̄de ke n̄kan̄ edem usoputịn Colossae, ete yak mme andikpeme, ye mme anditeme ẹdomo ndin̄wam ‘kpukpru owo ẹkabade ẹdi kiet ke mbuọtidem ye ke ifiọk Eyen Abasi, ẹkọri ẹkpon ẹwọrọ owo, ẹsịm ofụri idaha uyọhọ Christ.’ Ke itie en̄wen Paul ama esịn udọn̄ ọnọ mme Christian ete ‘ẹtie nte ikpọ owo ke ekikere.’—Ephesus 4:8-13; 1 Corinth 14:20.
5. Didie ke nnyịn ikeme ndinam edifọn mma edi akpan utịtmbuba nnyịn?
5 Edieke ndusụk owo ke Colossae mîkọkọrike iwọrọ owo, m̀mê mîkọkọrike isịm ọyọhọ idaha ke n̄kan̄ eke spirit kan̄a, ama oyom oro edi utịtmbuba mmọ. Nte nnyịn ikpanamke ukem oro mfịn? Edide nnyịn ikana baptism ediwak isua emi ẹkebede m̀mê ke ndondo emi, nte nnyịn imekeme ndikụt nte ke nnyịn imenen̄ede inam n̄kọri ke ukeme ukere n̄kpọ nnyịn? Ndi nnyịn imesikere iban̄a mme edumbet Bible mbemiso inamde mme ubiere? Nte mme n̄kpọ ẹban̄ade Abasi ye mme udọn̄ esop ẹnyene akamba udeme ke uwem nnyịn, utu ke ndidi mbabuat? Nnyịn ikemeke ndinam kpukpru usụn̄ emi nnyịn ikemede ndiwụt utọ edikọri mbịne edidi mfọnmma oro an̄wan̄a mi, edi kere ban̄a uwụtn̄kpọ iba.
6. Nso idi ikpehe kiet oro owo ekemede ndinam n̄kọri mbịne ndidi mfọnmma, nte Jehovah edide?
6 Akpa uwụtn̄kpọ: Yak idọhọ ke nnyịn ikọri iwọrọ owo ke n̄kann̄kụk oro ẹsisaride asari m̀mê ẹsisuade mbon orụk, idụt, m̀mê ikpehe efen. Idahaemi nnyịn imọfiọk ite ke Abasi isarike asari ye nte ke nnyịn ikpenyeneke ndisari asari. (Utom 10:14, 15, 34, 35) Ke esop m̀mê circuit nnyịn, mme owo ẹtode mme obio oro ẹdu, ntre nnyịn imodu ikpere mmọ. Edi, adan̄a didie ke nnyịn isika iso ndinyene ndusụk etikwo etikwo ekikere m̀mê eyịghe mban̄a mme owo ẹtode mme obio emi? Ndi nnyịn ‘isitie utọk utọk,’ isọpde ndikere idiọk edieke owo otode obio oro eduede nnyịn ke ata ekpri n̄kpọ? Bụp idemfo, ‘Ndi oyom nnam n̄kọri efen efen mbịne edinyene ekikere Abasi edide unana asari?’
7. Ndifọn mma nte Christian ekeme ndibuana ndinyene nso ekikere mban̄a mbon en̄wen?
7 Ọyọhọ uwụtn̄kpọ iba: Nte Philippi 2:3 ọdọhọde, nnyịn inyeneke ndinam “baba n̄kpọ kiet ke ndomoidem m̀mê ke ntan̄-idem, edi yak owo kiet kiet ada nsụhọde-esịt abat ete, owo en̄wen ọfọn akan imọ.” Didie ke nnyịn inam n̄kọri ke afan̄ emi? Owo kiet kiet enyene mme mmeme ye mme ukeme. Edieke nnyịn ikesisọpde ndikụt mme mmeme mbon en̄wen ke ini edem, nte nnyịn imanam n̄kọri, itrede ndidori enyịn mmọ ndidi ‘mfọnmma’? (James 3:2) Idahaemi, nte nnyịn imekeme ndikụt n̄kan nte akanam ikụtde—idem ndiyom—mme usụn̄ emi mbon en̄wen ẹfọnde ẹkan nnyịn? ‘Ana nnyịme nte ke eyenete an̄wan emi eme ime akan mi.’ ‘Enye owụt ọkpọsọn̄ mbuọtidem.’ ‘Ke akpanikọ, enye ọfiọk ndikpep n̄kpọ akan mi.’ ‘Eyenete an̄wan emi ọfọn akan mi ke ndikara iyatesịt.’ Eyedi ama oyom ndusụk mbon Colossae ẹnam n̄kọri ke afan̄ emi. Nte nnyịn imanam oro?
8, 9. (a) Ke nso usụn̄ifiọk ke Epaphras ọkọbọn̄ akam aban̄a mbon Colossae ete mmọ ẹka iso “ẹfọn ẹma”? (b) ‘Ndika iso mfọn mma’ owụt nso aban̄a ini iso?
8 Epaphras ama ọbọn̄ akam ete mbon Colossae “ẹka iso ẹfọn ẹma.” Nte an̄wan̄ade, Epaphras ọkọbọn̄ akam ọnọ Abasi ete adan̄a nte mbon Colossae ẹdide mme Christian oro ẹfọnde ẹma, ẹkọride ẹsịm ọyọhọ idaha, ẹnyụn̄ ẹkọride ẹwọrọ owo, mmọ ẹkpenyene ‘ndika iso’ ndidi oro.
9 Nnyịn ikemeke ndidọhọ ke owo kiet kiet oro akabarede edi Christian, idem enye oro ọkọride esịm ọyọhọ idaha, ayaka iso ndidi Christian. Jesus ama ọdọhọ ete ke eyen Abasi kiet oro ekedide angel ‘ikọsọn̄ọke ida ke akpanikọ.’ (John 8:44) Ndien Paul ama eti mbon Corinth aban̄a ndusụk owo oro ke akpa ẹkenamde n̄kpọ Jehovah ke ndusụk ini edi ekem ẹtre ndinam. Enye ama odụri nditọete oro ẹyetde aran ke spirit utọn̄ ete: “Yak owo eke esede ete imọ imọsọn̄ọ ida ekpeme mbak enye ediduọ.” (1 Corinth 10:12) Emi adian odudu ke akam oro ẹkebọn̄de ẹte mbon Colossae “ẹka iso ẹfọn ẹma.” Ke mmọ ẹma ẹkefọn ẹma, ẹkọri ẹwọrọ owo, ama oyom mmọ ẹka iso, ẹkûfiak edem, ẹkûkop mmemidem, m̀mê ndifiọrọ n̄kpọn̄ usụn̄. (Mme Hebrew 2:1; 3:12; 6:6; 10:39; 12:25) Ntem mmọ ‘ẹyefọn ẹma’ ke usen emi ẹdidide ndidomo mmọ nse ẹdinyụn̄ ẹnọde mmọ akpatre utịp.—2 Corinth 5:10; 1 Peter 2:12.
10, 11. (a) Nso uwụtn̄kpọ ke Epaphras ekenịm ọnọ nnyịn ke se iban̄ade akam? (b) Ke n̄kemuyo ye se Epaphras akanamde, nso ubiere ke afo akpama ndinam?
10 Nnyịn ima ineneme iban̄a nte ndibọn̄ akam nsiak enyịn̄ mbon efen, ndibọn̄ akam nnennen nte Jehovah an̄wam mmọ, ọdọn̄ mmọ esịt, ọdiọn̄ mmọ, onyụn̄ ọnọ mmọ edisana spirit, edide akpan n̄kpọ. Utọ akam oro ke Epaphras ọkọbọn̄ aban̄a mbon Colossae. Ndien nnyịn imekeme—ke akpanikọ nnyịn ikpenyene—ndikụt nti ekikere ẹnọde ke mme ikọ akam oro kaban̄a se ikpetịn̄de inọ Jehovah ke akam oro ibọn̄de iban̄a idem nnyịn. Nte eyịghe mîdụhe, nnyịn ikpenyene ndibọn̄ akam mben̄e un̄wam Jehovah man nnyịn owo kiet kiet ikpekeme ‘ndifọn mma.’ Nte afo emesinam oro?
11 Ntak mûtịn̄ke idaha fo ke akam? Tịn̄ nọ Abasi ban̄a udomo nte afo anamde n̄kọri ebịne ‘ndifọn mma,’ ndikọri n̄wọrọ owo, ndinyụn̄ n̄kọri nsịm ọyọhọ idaha. Ben̄e enye ete an̄wam fi okụt mme ebiet emi oyomde afo anam n̄kọri ke n̄kan̄ eke spirit. (Psalm 17:3; 139:23, 24) Ke akpanikọ, afo emenyene ndusụk ebiet oro oyomde anam n̄kọri. Do, utu ke ndikop mmemidem mban̄a emi, ben̄e Abasi in̄wan̄ in̄wan̄, nnennen nnennen ete an̄wam fi anam n̄kọri. Nam emi ediwak ini. Ke akpanikọ, ntak mûbiereke ute ke urua emi osụk edide mi ke imọ iyọbọn̄ akam ke ndusụk udomo ite imọ ‘ifọn ima’? Ndien nam ndutịm ndinam oro ediwak ini nte afo ekerede aban̄a ibuotikọ isua emi. Ke akam fo, nọ ntịn̄enyịn ke mme ntụhọ oro ẹkemede ndinam fi afiak edem, okop mmemidem, m̀mê ọfiọnọde ọkpọn̄ utom Abasi ye ke nte ekemede ndifep ndinam oro.—Ephesus 6:11, 13, 14, 18.
Bọn̄ Akam Ben̄e Editịm Mfiọk
12. Ntak ekenen̄erede oyom mbon Colossae “ẹtịm ẹfiọk”?
12 Epaphras ama ọbọn̄ akam eben̄e n̄kpọ efen oro ekedide akpan n̄kpọ n̄ko edieke akanade mbon Colossae ẹnyene unyịme Abasi. Oro edi akpan n̄kpọ n̄ko ọnọ nnyịn. Nso ikedi oro? Enye ama ọbọn̄ akam ete mmọ “ẹtịm ẹfiọk ofụri uduak Abasi.” Isio ukpepn̄kpọ ye mbiara ukpepn̄kpọ akwaifiọk, emi ndusụk ẹkebietde eke utuakibuot akpanikọ, ẹma ẹkan mmọ ẹkụk. Ke uwụtn̄kpọ, ẹma ẹnyịk mmọ ndinịm mme akpan usen oro ẹkesan̄ade ye utreudia ye usọrọ, nte ẹkeyomde ẹnịm inikiet ko ke utuakibuot mme Jew. Mme nsunsu anditeme ẹma ẹsọn̄ọ ẹkpep ẹban̄a mme angel, mme okopodudu spirit oro ẹkedade ẹnọ Moses Ibet. Kere ban̄a ndidi se ẹnyịkde ẹsịn ke mme utọ edinam oro! Ediwak ntịme ntịme ekikere oro ẹnyenede ntuaha ẹma ẹdu.—Galatia 3:19; Colossae 2:8, 16-18.
13. Ndifiọk nso n̄kpọ ikekeme ndin̄wam mbon Colossae, ndien didie ke oro ekeme ndin̄wam nnyịn?
13 Paul ama ọbiọn̄ọ emi ke ndisọn̄ọ ntịn̄ akpan udeme oro Jesus Christ enyenede. “Nte mbufo ẹma ẹkebọ Christ Jesus Ọbọn̄ ndien, ẹsasan̄a ke Enye; yak mbufo ẹmụm n̄kam, ẹnyụn̄ ẹkọri ẹdaha ẹda ke Enye, ẹnyụn̄ ẹdọdiọn̄ ẹsọn̄ọ ẹda ke mbuọtidem, kpa nte ẹkekpepde mbufo.” Ih, ama oyom (mbon Colossae ye nnyịn) ẹtịm ẹfiọk ẹban̄a udeme oro Christ enyenede ke uduak Abasi ye ke uwem nnyịn. Paul ama anam an̄wan̄a ete: “Ofụri Uyọhọ Abasi ke ododụn̄ Enye ke idem; mbufo ẹnyụn̄ ẹnyene uyọhọ mbufo ke Enye; Enye onyụn̄ edi Ibuot ọnọ kpukpru mme andikara ye mme enyene-odudu.”—Colossae 2:6-10.
14. Ntak emi idotenyịn ekedide ata idem n̄kpọ ọnọ mbon oro ẹkedude ke Colossae?
14 Mbon Colossae ẹkedi mme Christian oro ẹyetde aran ke spirit. Mmọ ẹma ẹnyene n̄wọrọnda idotenyịn uwem ke heaven, ndien mmọ ẹma ẹnyene kpukpru ntak ndinam idotenyịn oro ayama. (Colossae 1:5) Ekedi “uduak Abasi” nte mmọ ẹtịm ẹfiọk nte idotenyịn mmimọ ekedide akpanikọ. Nte owo mmọ ekededi ekpekenyene eyịghe aban̄a idotenyịn oro? N̄wan̄ansa-o! Nte oro ekpedi isio ye kpukpru mbon oro ẹnyenede idotenyịn uwem oro Abasi ọnọde ke paradise isọn̄? Ke akpanikọ, ikpedịghe! Eti idotenyịn oro enen̄ede edi ubak “uduak Abasi.” Idahaemi kere ban̄a mme mbụme emi: Edieke afo odomode ndidi kiet ke otu “akwa otuowo” oro ẹdibọhọde “akwa ukụt,” idotenyịn fo edi ata idem n̄kpọ adan̄a didie? (Ediyarade 7:9, 14) Nte enye edi ubak edifiọk oro afo ‘etịmde ọfiọk ofụri uduak Abasi’?
15. Udịm udịm n̄kpọ ewe oro esịnede idotenyịn ke Paul okosio owụt?
15 Ke nditịn̄ mban̄a “idotenyịn” nnyịn idọhọke n̄kịmn̄kịm udọn̄, m̀mê ndap ndap idotenyịn. Nnyịn imekeme ndikụt emi nto udịm udịm akpan n̄kpọ oro Paul okosiode owụt mbon Rome ke mbemiso. Ke otu akpan n̄kpọ oro, n̄kpọ kiet kiet oro ẹsiakde enyene ebuana ye n̄kpọ efen oro etienede. Nọ ntịn̄enyịn ke ebiet oro Paul esịnde “idotenyịn” ke n̄kọkibuot esie: “Nnyịn imobụre mbụre ke ukụt nnyịn n̄ko, sia ifiọkde ite ukụt ọwọrọ ime, ime onyụn̄ ọwọrọ [idaha emi ẹnyịmede, idaha emi ẹnyịmede, NW] onyụn̄ ọwọrọ idotenyịn: ndien idotenyịn emi iyakke nnyịn ikụt bụt, koro Abasi aman̄wan̄a ima Esie esịn ke esịt nnyịn oto ke Edisana Spirit emi Enye ọkọnọde nnyịn.”—Rome 5:3-5.
16. Nte afo ekekpepde akpanikọ Bible, nso idotenyịn ke afo ekenyene?
16 Ke akpa ini oro Mme Ntiense Jehovah ẹkebuanade etop Bible ye afo, ekeme ndidi akpanikọ kiet ama omụm fi udọn̄, utọ nte idaha mme akpan̄kpa m̀mê ediset ke n̄kpa. Ye ediwak owo, ata akpa n̄kpọ oro mmọ ẹkedide ẹdifiọk ekedi se Bible etịn̄de nte ke mme owo ẹkeme ndidu uwem ke paradise isọn̄. Ti akpa ini oro afo okokopde ukpepn̄kpọ oro. Nso utịbe utịbe idotenyịn—udọn̄ọ ye usọn̄ ididụhe aba, afo emekeme ndika iso ndu uwem ndara utịp utom fo, ndien emem oyodu ke otu mme unam! (Ecclesiastes 9:5, 10; Isaiah 65:17-25; John 5:28, 29; Ediyarade 21:3, 4) Afo ama enyene utịbe utịbe idotenyịn!
17, 18. (a) Didie ke udịm udịm n̄kpọ oro Paul okosiode owụt mbon Rome ada esịm idotenyịn? (b) Nso orụk idotenyịn ke ẹtịn̄ ẹban̄a ke Rome 5:4, 5, ndien nte afo emenyene orụk idotenyịn oro?
17 Nte ini akakade, eyedi afo ama osobo ndusụk ubiọn̄ọ m̀mê ukọbọ. (Matthew 10:34-39; 24:9) Idem ke mme ini ndondo emi, ẹma ẹbụme ufọk Mme Ntiense ke nsio nsio idụt m̀mê ẹnyịk mmọ ndikabade ndi mbon itọkekọn̄. Ẹma ẹsuene ndusụk mmọ, ẹbọ mmọ mme n̄wed Bible, m̀mê ẹsu nsu ẹdori mmọ ke ndutịm usuanetop. Se ededi ukọbọ oro ekemede ndidi afo ama osobo, nte Rome 5:3 ọdọhọde, afo ama ekeme ndibụre mbụre ke ukụt, ndien oro ama ada eti utịp edi. Kpa nte apostle Paul ekewetde, ukụt oro ama anam fi enyene ime. Ndien ime ama ada esịm idaha emi ẹnyịmede. Afo ama ọfiọk nte ke imọ inam se inende, inamde uduak Abasi, ntre afo ama etịm enịm ke imọ imenyene unyịme esie. Ke mme ikọ Paul, afo ama ọfiọk ke imọ idu ke “idaha emi ẹnyịmede.” Ke akade iso, Paul ama ewet ete ke “idaha emi enyịmede, onyụn̄ ọwọrọ idotenyịn.” Oro ekeme nditie esen esen. Ntak emi Paul akasiakde “idotenyịn” ke utịt udịmikọ emi? Nte afo ukenyeneke idotenyịn anyan ini mbemiso, ke akpa ini oro afo okokopde eti mbụk?
18 Nte an̄wan̄ade, Paul mi itịn̄ke iban̄a idotenyịn mfọnmma uwem oro nnyịn ikenyenede ke akpa ini. Se enye etịn̄de aban̄a mi aka anyan akan oro; enye enen̄ede otụn̄ọ, enen̄ede edemede udọn̄. Ke ini nnyịn iyọde ke edinam akpanikọ ndien ke ntem ifiọkde ite ke imenyene unyịme Abasi, emi esinyene akamba utịp ke ndika iso nsọn̄ọ idotenyịn oro nnyịn ikenyenede ke akpa ini. Idahaemi idotenyịn oro ikenyenede etetịm edi ata idem n̄kpọ, enen̄ede enyene nsọn̄ọ, enen̄ede edi ọkpọkpọ. Idotenyịn emi ẹsọn̄ọde mi enen̄ede ayama. Enye akara ofụri uwem nnyịn. “Ndien idotenyịn emi iyakke nnyịn ikụt bụt, koro Abasi aman̄wan̄a ima Esie esịn ke esịt nnyịn oto ke Edisana Spirit.”
19. Didie ke idotenyịn fo ekpedi ubak akam fo kpukpru ini?
19 Ifịk ifịk akam Epaphras ekedi nte yak nditọete imọ iren ye iban ke Colossae ẹka iso ẹti ẹnyụn̄ ẹnịm se ikanade mmọ ke iso, “ẹtịm ẹfiọk ofụri uduak Abasi.” Ẹyak nnyịn owo kiet kiet ibọn̄ akam kpasụk ntre inọ Abasi kpukpru ini iban̄a idotenyịn nnyịn. Ke ọkpọkpọ akam fo, tịn̄ ban̄a idotenyịn fo kaban̄a obufa ererimbot. Tịn̄ nọ Jehovah nte afo enen̄erede oyom enye, etịmde enịm ke akpanikọ nte ke enye eyedi. Ben̄e enye un̄wam man anam ifiọk fo otụn̄ọ onyụn̄ atara. Nte Epaphras ọkọbọn̄de akam ete mbon Colossae “ẹtịm ẹfiọk ofụri uduak Abasi,” nam ukem oro. Nam ntre ediwak ini.
20. Edieke ibat ibat owo ẹwahade ẹkpọn̄ usụn̄ Christian, ntak emi mîkpanamke nnyịn ikop mmemidem?
20 Kûyak akpanikọ oro nte ke idịghe kpukpru owo ẹka iso ẹfọn ẹma ẹnyụn̄ ẹtịm ẹfiọk n̄kpọ ọwọn̄ọde ntịn̄enyịn fo m̀mê anam idem emem fi. Ndusụk owo ẹkeme ndikpu, ẹwaha ẹkpọn̄ usụn̄, m̀mê ẹkop mmemidem. Oro ama etịbe ke otu mbon ẹkekperede Jesus ẹkan, mme apostle esie. Edi ke ini Judas akakabarede edi andida nnọ, ndi mme apostle eken ẹma ẹtek ke ifịk? Ke akpanikọ, mmọ iketekke! Peter ama abuan Psalm 109:8 ndiwụt nte ke owo efen ayada itie Judas. Ẹma ẹmek owo efen ndida itie esie, ndien mme anam-akpanikọ ikọt Abasi ẹma ẹka iso ifịk ifịk ke utom edikwọrọ ikọ mmọ. (Utom 1:15-26) Mmọ ẹma ẹbiere ndika iso mfọn mma nnyụn̄ ntịm mfiọk n̄kpọ.
21, 22. Ke nso usụn̄ifiọk ke ẹdikụt nte afo ọfọnde ama onyụn̄ etịmde ọfiọk n̄kpọ?
21 Afo emekeme nditịm nnịm nte ke afo ndifọn mma nnyụn̄ ntịm mfiọk ofụri uduak Abasi ididịbeke. Ẹyekụt ẹnyụn̄ ẹnen̄ede ẹma. Mmanie ẹdikụt ẹnyụn̄ ẹma?
22 Ọfọn, nditọete fo iren ye iban, oro ẹdiọn̄ọde ẹnyụn̄ ẹmade fi, ẹyekụt. Idem ọkpọkọm ata ediwak mmọ isioho itịn̄, utịp edidi ukem ye se ikotde ke 1 Thessalonica 1:2-6: “Nnyịn ikọkọm Abasi kpukpru ini iban̄a kpukpru mbufo, inyụn̄ isiak enyịn̄ mbufo ke akam nnyịn; sia nnyịn mîtreke nditi utom mbuọtidem mbufo, ye ọkpọsọn̄ utom ima mbufo, ye ime idotenyịn eke mbufo ẹnyenede ke Ọbọn̄ nnyịn Jesus Christ, ke iso Abasi ye Ete nnyịn. . . . Gospel nnyịn ikedịghe ke ọtọ mbufo nte ikọ ikpọn̄, edi ekedi ke odudu, ye ke Edisana Spirit, ye ke mbụre edikan. . . . Mbufo ẹma ẹnyụn̄ ẹkabade ẹdi mme andikpebe nnyịn ye mme andikpebe Ọbọn̄.” Mme anam-akpanikọ Christian oro ẹdude ẹkpere fi ẹyekere ukem oro ẹban̄a fi nte mmọ ẹkụtde nte afo ‘ọfọnde ama onyụn̄ etịmde ọfiọk ofụri uduak Abasi.’—Colossae 1:23.
23. Nso ikpedi ubiere fo ke isua emi edide?
23 Kpasụk ntre, Ete fo eke heaven oyokụt onyụn̄ enem esịt. Nịm oro ke akpanikọ. Ntak-a? Koro afo ọmọfọn ama onyụn̄ etịm ọfiọk “ofụri uduak Abasi.” Paul ama ewet esịn udọn̄ ọnọ mbon Colossae ete mmọ ẹsan̄a “ke ido nte odotde Ọbọn̄, ẹnem Enye esịt ke kpukpru usụn̄.” (Colossae 1:10) Ih, mme anana-mfọnmma owo ẹkeme ndinem enye esịt ke kpukpru usụn̄. Nditọete fo iren ye iban ke Colossae ẹma ẹnam ntre. Mme Christian oro ẹdude ẹkpere fi ke ẹnam ntre idem idahaemi. Afo n̄ko emekeme ndinam ntre! Ntem, ke isua emi edide, yak akam fo eke usen ke usen ye edinam fo ofụri ini ẹwụt nte ke afo emebiere ‘ndifọn mma, nnyụn̄ ntịm mfiọk ofụri uduak Abasi.’
Nte Afo Emekeme Nditi?
• Nso ibuana ke afo ‘ndifọn mma?
• Mme n̄kpọ ewe ẹban̄ade idemfo ke afo akpabuan ke akam?
• Nte ẹnọde ekikere ke Rome 5:4, 5, nso orụk idotenyịn ke afo oyom ndinyene?
• Ukpepn̄kpọ nnyịn edemede fi ndinyene utịtmbuba ewe ke isua emi?
[Mme Mbụme Ukpepn̄kpọ]
[Ndise ke page 20]
Epaphras ama ọbọn̄ akam ete nditọete imọ ẹfọn ẹma, ẹtịm ẹfiọk Christ ye idotenyịn mmọ
[Mme ndise ke page 23]
Ediwak miliọn owo ẹnyene ukem eti idotenyịn ye edinịm ke akpanikọ fo