Mme Mbụme Ẹtode Mme Andikot

Adan̄a didie ke anam-akpanikọ n̄wanndọ Christian ekpenyene ndibiọn̄ọ usio-ukot oro nsan̄a ndọ esie anamde ndisio enye ndọ?

Ke ini ndọ ọkọtọn̄ọde, Abasi ọkọdọhọ ete ke ebe ye n̄wan ẹkpenyene ‘ndidiana’ kiet. (Genesis 2:18-24) Mme owo ẹma ẹkabade ẹdi mme anana mfọnmma, osụn̄ọde ke mfịna ndidu ke ediwak ndọ, edi Abasi oyom mme nsan̄a ndọ ẹsụk ẹdiana kiet. Apostle Paul ekewet ete: “Edi mmọnọ mmọ eke ẹkedọde ndọ uyo (inyụn̄ idịghe ami, edi Ọbọn̄ ọnọ uyo), nte, n̄wan okûdianade ọkpọn̄ ebe esie; (edi edieke enye ama adianade, yak enye etie nte anana ebe; mîdịghe, enye anam emem ye ebe esie); ebe okûnyụn̄ adianade ọkpọn̄ n̄wan esie.”—1 Corinth 7:10, 11.

Ikọ oro owụt nte ke otu mme anana-mfọnmma owo ndusụk ini nsan̄a ndọ kiet esibiere ndidian̄ade. Ke uwụtn̄kpọ, Paul ọkọdọhọ ete edieke nsan̄a ndọ ẹdian̄arede, yak mmọ mbiba ẹtie nte ‘anana ebe m̀mê anana n̄wan.’ Ntak-a? Ọfọn, nsan̄a ndọ oro ẹdian̄ade, edi ke enyịn Abasi mmọ mbiba ẹsụk ẹdi kiet. Paul ekekeme nditịn̄ emi koro Jesus ama anam idaha ndọ Christian an̄wan̄a ete: “Owo ekededi eke edisiode n̄wan esie ndọ, ke mîtoho ke edidue ye erenowo [Greek, por·neiʹa], onyụn̄ ọdọde efen, esịn efịbe.” (Matthew 19:9) Ih, n̄kukụre isọn̄ kaban̄a usiondọ oro ekemede nditre ndọ nte ekemde ye N̄wed Abasi edi “edidue ye erenowo,” oro edi, oburobụt idan̄. Nte an̄wan̄ade, ke idaha oro Paul eketịn̄de aban̄a, ebe m̀mê n̄wan oro ikanamke oburobụt ido, ntre ke ini ebe m̀mê n̄wan akadianarede, ndọ oro iketreke ke enyịn Abasi.

Ekem Paul ama etịn̄ aban̄a idaha oro ata Christian enyenede nsan̄a ndọ oro mînịmke ke akpanikọ. Kere ban̄a ndausụn̄ oro Paul ọkọnọde: “Edieke owo eke mînịmke ke akpanikọ adianarede, yak enye aka. Ibọpke [eyen-ete] eren m̀mê eyen-ete an̄wan isịn ke ufịn ndọ ke utọ n̄kpọ eke etiede ntem. Abasi okokot mbufo ete ẹditie ke emem.” (1 Corinth 7:12-16) Nso ke anam-akpanikọ n̄wan akpanam edieke ebe esie oro mînịmke ke akpanikọ adianarede ọkpọn̄ enye, idem oyomde ndisio enye ndọ nte ekemde ye ibet?

N̄wan oro ekeme ndima enye aka iso odu ye imọ. Enye ekeme ndisụk mma ebe, ekere aban̄a mme udọn̄ eke ntụk ye eke idan̄ mmọ, onyụn̄ ọfiọk ete ke imọ ye nditọ mmimọ imoyom un̄wam n̄kpọ obụkidem. Ekeme ndidi enye odori enyịn n̄ko nte ke, nte ini akade, ebe imọ ayakabade edi andinịm ke akpanikọ onyụn̄ enyene edinyan̄a. Edi, edieke ebe esie anamde mme usio-ukot nditre ndọ oro (ke ndusụk ntak oro mîkemke ye N̄wed Abasi), n̄wan oro ekeme ‘ndiyak enye aka,’ nte Paul ekewetde. Ukem oro ke edi edieke ebe oro enịmde ke akpanikọ ofụmide ekikere Abasi kaban̄a ndọ onyụn̄ ọsọn̄ọde oyom ndidianade.

Nte ededi, ke utọ idaha oro, ekeme ndidi oyoyom n̄wan ọnọ idemesie ye nditọ esie ukpeme nte ekemde ye ibet. Didie ke edi ntre? Enye oyoyom ndisụk n̄ka iso nse mban̄a ndima nditọ esie man enye ekeme ndika iso n̄wụt mmọ ima ekaeyen, n̄kpep mmọ nti edu, nnyụn̄ nnam mmọ ẹnyene mbuọtidem oro ọkọn̄ọde ke nti ukpepn̄kpọ Bible. (2 Timothy 3:15) Usiondọ oro ekeme ndisịn mme unen esie ke itiendịk. Ntem, n̄wan oro ekeme ndinam mme usio-ukot ndinam ẹwụt idaha esie nte ọfọnde ke iso ukara man ẹkpeme unen oro enye enyenede ndise mban̄a nditọ esie ndinyụn̄ n̄kụt nte ke ebe esie enyene mbiomo ndin̄wam ubon oro enye ọkpọn̄de. Ke ndusụk itie, n̄wan oro ọbiọn̄ọde usiondọ ekeme ndisịn ubọk ke mme n̄wed oro ẹwụtde ndutịm ẹnamde man ẹse ẹban̄a nditọ ẹnyụn̄ ẹnọ un̄wam okụk, ye unana enye ndinyịme usiondọ oro ebe esie oyomde. Ke mme itie en̄wen, mme ikọ ẹwetde ke mme n̄wed oro ẹsiwụt nte ke n̄wan enyịme usiondọ oro; ntem, edieke ebe esie ekesịnde efịbe, n̄wan ndisịn ubọk ke mme n̄wed emi ọkpọwọrọ ke enye esịn ebe oro.

Ata ediwak owo ke obio ye ke esop idifiọkke ofụri se ibuanade, utọ nte m̀mê usiondọ oro ama enyene isọn̄ N̄wed Abasi. Ntre mbemiso n̄kpọ akade anyan ntre, okpowụt ifiọk n̄wan nditịn̄ kpukpru n̄kpọ nnọ esenyịn oro etiede ibuot ye ebiowo efen ke esop (ẹkpetịm ẹma ẹwewet). Ke usụn̄ oro, ẹyekeme ndifiọk se idide akpanikọ edieke mbụme ekededi edemerede—ini oro m̀mê ke ukperedem.

Ẹyak nnyịn ifiak ibịne ikọ Jesus: “Owo ekededi eke edisiode n̄wan esie ndọ, ke mîtoho ke edidue ye erenowo, onyụn̄ ọdọde efen, esịn efịbe.” Edieke ebe ekenen̄erede enyene ubiomikpe oburobụt ido idan̄ edi oyomde ndika iso ndọ n̄wan esie,  ana n̄wan (oro mîduehe ke uwụtn̄kpọ Jesus) emek m̀mê akpana imọ ifen inọ enye inyụn̄ ika iso ibuana bed ndọ ye enye m̀mê akpana imọ isịn enye. Edieke enye enyịmede ndifen nnọ nnyụn̄ n̄ka iso ye ebe esie, enye ideheke ke n̄kan̄ eke ido uwem ke ndinam ntre.—Hosea 1:1-3; 3:1-3.

Ke idaha emi ebe oro eduede oyomde usiondọ, n̄wan oro osụk ekekeme ndinyịme ndifen nnọ, odoride enyịn ndifiak nda enye nnyene. Edi mbubehe esie ndibiere, ọkọn̄ọde ke ubieresịt ye idaha esie, m̀mê imọ ikpenyene ndibiọn̄ọ usio-ukot oro enye anamde ndisio imọ ndọ. Ke ndusụk itie n̄wan oro ọbiọn̄ọde usiondọ ekeme ndisịn ubọk ke mme n̄wed oro ẹwụtde nte edisede ẹban̄a nditọ ẹdinyụn̄ ẹnọde un̄wam okụk ye unana ndiwụt nte ke imọ imenyịme usiondọ oro; enye ndisịn ubọk ke mme utọ n̄wed oro idiwụtke nte ke enye ekesịn ebe esie. Nte ededi, ke mme ebiet en̄wen ẹkeme ndidọhọ n̄wan oro ọbiọn̄ọde usiondọ ẹte esịn ubọk ke mme n̄wed oro ẹwụtde ke enye enyịme usiondọ oro; ndisịn ubọk ke mme utọ n̄wed oro oyowụt in̄wan̄ in̄wan̄ nte ke enye esịn ebe esie oro eduede.

Ke idaha enye emi n̄ko, man utọk okûdu, okpowụt ifiọk n̄wan oro ndinọ mme andida ke ibuot esop leta oro owụtde mme usio-ukot oro ẹnamde ye nte ẹkenamde mmọ. Enye ekeme ndiwet nte ke imọ ima idọhọ ebe imọ ke imenyịme ndifen nnọ enye nnyụn̄ n̄ka iso ndi n̄wan esie. Oro okpowụt nte ke enye ikenyịmeke usiondọ oro; utu ke ndisịn ebe esie, enye okosụk enyenyịme ndifen nnọ. Ke ama akanam an̄wan̄a ke usụn̄ emi nte ke imọ ima inyịme ndifen nnọ nnyụn̄ n̄ka iso ndi n̄wan esie, n̄wan oro ndisịn ubọk ke mme n̄wed oro n̄kukụre ẹwụtde nte ẹdinọde un̄wam okụk ẹdinyụn̄ ẹsede ẹban̄a nditọ idiwụtke nte ke enye ekesesịn ebe esie. *

Ke ama okowụt unyịme esie ndifen nnọ idem ke ẹma ẹkesio ndọ, enye m̀mê ebe esie idinyeneke ifụre ndidọ owo efen. Edieke n̄wan oro mîduehe, emi ebe esie mînyịmeke enye efen ọnọ imọ, ke ukperedem ebierede ndisịn enye ke ntak oburobụt ido esie, mmọ mbiba ndien ẹyenyene unen ndidọ owo efen. Jesus ama owụt nte ke nsan̄a ndọ oro mîduehe enyene unen ndinam utọ ubiere oro.—Matthew 5:32; 19:9; Luke 16:18.

[Mme Ikọ idakisọn̄]