Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Nso idi akpa usio-ukot ke nnyịn ndibiere utọk ye owo?

Nnyịn ikpenyene ndibem iso nnyịme nte ke kpukpru nnyịn imesinyene mme ukwan̄ ekikere ye edu. Ekem nnyịn ikpenyene ndinen̄ede n̄kere m̀mê nnyịn idi ntak mfịna oro utu ke owo enye eken.—8/15, page 23.

• Ini ewe ididi “ini edifiak n̄wụk kpukpru n̄kpọ,” oro ẹtịn̄de ẹban̄a ke Utom 3:21, NW?

Edifiak n̄wụk oro edi ke ikpehe iba. Akpa, edifiak n̄wụk paradise eke spirit odu emi akade iso toto ke 1919. Edifiak n̄wụk efen efen edidi ke ini ẹdinamde isọn̄ nnyịn afiak edi ata paradise.—9/1, page 17, 18.

• Nte ẹwụtde ke Mme N̄ke 6:6-8, didie ke iyọn̄ mînyeneke etubom, ndien kpa ye oro ẹnọ nnyịn eti uwụtn̄kpọ?

Ọbọn̄ odu ke otu iyọn̄, edi enye edi ọbọn̄ n̄kukụre ke usụn̄ifiọk nte ke enye esisịn nsen onyụn̄ edi eka ke otu iyọn̄. Iyọn̄ ẹsinam utom ifịk ifịk, ndien ukem oro ke nnyịn ikpanam, idomode ndifori utom nnyịn, idem ọkpọkọm owo isehe nnyịn.—9/15, page 26.

• Sia akakpade ke ekọn̄, ndi ntịn̄nnịm ikọ Huldah nte ke Josiah edikpa ke “ifụre,” nte ẹwetde ke 2 Ndidem 22:20, ama enen?

Ih, enye akakpa ke ifụre ke usụn̄ifiọk nte ke enye ama akpa mbemiso nsobo eke 609-607 M.E.N., ke ini mbon Babylon ẹkekande Jerusalem ẹkụk ẹnyụn̄ ẹsobode enye.—9/15, page 30.

• Didie ke Solomon ndiketịn̄ mban̄a n̄wan nte “edima okoyo, ediye ebot ikọt” ekedi itoro? (Mme N̄ke 5:18, 19, NW)

Uman ebot ikọt esitie sụn̄sụn̄ onyụn̄ enyene uku uku edu. Kpa ye oro, enye ekeme ndidu uwem nnyụn̄ mman eyen ke itiat itiat ndedịbe ebiet oro udia ananade.—10/1, page 30, 31.

• Henry Grew ye George Storrs ẹkedi mmanie?

Iren iba emi ẹkedu uwem ke iduọkisua 1800 ẹkenyụn̄ ẹdi ifịk ifịk nditọ ukpepn̄kpọ Bible. Grew ama ekpep nte ke ukpepn̄kpọ Abasi-Ita-ke-Kiet ikemke ye N̄wed Abasi, kpa nte ukpepn̄kpọ ukpọn̄ ikpaha ke nsinsi ye hell ikan̄ mîkemke. Storrs ama edifiọk ete ke ndusụk owo ẹyedu nsinsi uwem ke isọn̄. Mmọ mbiba ẹkedi mme andikebem Charles Taze Russell iso, oro ọkọtọn̄ọde ndimịn̄ magazine emi ke 1879.—10/15, page 26-30.

• Didie ke Mme Ntiense Jehovah ẹsise mme usụn̄ usọbọidem oro ẹdade iyịp enyene-idem ẹnam?

Ke ẹkọn̄de mme edinịm ke akpanikọ mmọ ke Bible, mmọ isisioho iyịp mmọ inịm ndien ke ukperedem ẹnyịme ẹda enye ẹkịm ẹsịn mmimọ ke idem. Christian kiet kiet enyene ndibiere nnọ idemesie nte ẹdidade iyịp esie ẹnam n̄kpọ ke ini usiakidem, ndomonse ibọkusọbọ, m̀mê usọbọ idahaemi. Enye ekpenyene ndikere mban̄a se Bible etịn̄de aban̄a iyịp onyụn̄ eti ete ke imọ ima iyak idem imọ ofụri ofụri inọ Abasi.—10/15, page 30, 31.

• Ndụn̄ọde ẹkenamde ke ntọn̄ọ ntọn̄ọ isua emi akayarade ewe n̄wọrọnda udọn̄ ke otu Mme Ntiense Jehovah ke ofụri ererimbot?

Ẹyom se iwakde ibe Ufọkmbono Obio Ubọn̄ 11,000 ke mme idụt oro ẹtọn̄ọde-tọn̄ọ uforo, emi okụk ananade. Ẹsida mme etịbe oro mme Christian ke ediwak idụt ẹnọde ẹse ẹban̄a edibọp mme itie usopidem oro ẹdotde.—11/1, page 30.

• Nso idi ndusụk ikọ akpasarade usem ẹdade ẹtịn̄ ikọ ke Bible oro ẹnyenede n̄kpọ ndinam ye utuakibuot?

Kiet edi lei·tour·giʹa, emi ẹkabarede nte “utom ufọn.” Efen edi la·treiʹa, emi ẹkabarede nte “edisana utom.” (Mme Hebrew 10:11, NW; Luke 2:36, 37, NW)—11/15, page 11-12.

• Nso idi akpan ukpepn̄kpọ oro nnyịn ikemede ndikpep nto mbụk Bible aban̄ade Adam ye Eve?

Edinam ekededi ndida ke idem n̄kpọn̄ Jehovah Abasi edi ata ndisịme.—11/15, page 24-27.

• Nso uyarade N̄wed Abasi idu nte ke Abasi esinọ mme asan̄autom esie odudu?

David, Habakkuk, ye apostle Paul ẹma ẹnọ ọkpọkpọ uyarade ndiwụt nte ke Jehovah Abasi ama ọnọ mmimọ odudu. (Psalm 60:12; Habakkuk 3:19; Philippi 4:13) Ntem, nnyịn imekeme ndinyene mbuọtidem nte ke Abasi enyịme onyụn̄ ekeme ndinọ nnyịn odudu.—12/1, page 10, 11.