Emem ke Obufa Tọsịn Isua?

ẸMA ẹtọn̄ọ Isua Unọ Ukpep Kaban̄a Emem Ofụri Ererimbot ke Paris ye New York City ke September 14, 1999. Akwa Mbono Edidiana Mme Idụt akatan̄a emi aban̄a isua 2000. Federico Mayor, akani akwa adausụn̄ UNESCO, ama anam akpan eben̄e “nditọn̄ọ ndutịm unọ ukpep kaban̄a emem ye ifụre ofụri ererimbot.”

UNESCO enyene akpan edumbet nte ke “sia mme ekọn̄ ẹsitọn̄ọde ke ekikere mme owo, ẹnyene ndibọp mme ọkọ emem ke ekikere mme owo.” Ke n̄kemuyo ye emi, esop oro aduak ndisịn udọn̄ nnọ emem ebe ke “unọ ukpep, nneme, ye edidianakiet.” Ete Mayor ama etịn̄ ete ke ikemke “nditie emem emem, ikam ikemke ndidi mbon oro ẹbiọn̄ọde ẹkọn̄, edi oyom ẹdi mme anam-emem.”

Ke mfụhọ, isua 2000 iketiehe emem emem. Mbụk eyomfịn—esịnede mme n̄kpọ oro ẹtịbede ke isua 2000—owụt unana ukeme owo ndibiọn̄ọ ekọn̄ ye afai kpa ye ukeme ofụri esịt oro ẹsịnde ndinam oro.

Nte ededi, odot ẹtịm ẹfiọk nte ke ẹnen̄ede ẹbuan unọ ukpep ye emem. N̄kpọ nte isua 2,700 emi ẹkebede, prọfet Isaiah ama ebem iso etịn̄ ete: “Jehovah oyonyụn̄ eteme kpukpru nditọ fo; ndien emem nditọ fo okpon.” (Isaiah 54:13, sịghisịghi ubọkn̄wed edi eke nnyịn.) Kpa prọfet oro ekebem iso okụt ini oro mme owo ẹtode kpukpru idụt ẹdibụn̄ọde ẹdụk edisana utuakibuot Jehovah Abasi ndikpep mban̄a mme usụn̄ Esie. Ye nso utịp? “Mmọ ẹyeda ofụt mmọ ẹdom n̄kpọ ufụn̄ isọn̄, ẹda ẹduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.” (Isaiah 2:2-4, sịghisịghi ubọkn̄wed edi eke nnyịn.) Ke n̄kemuyo ye ntịn̄nnịm ikọ oro, Mme Ntiense Jehovah ẹbuana ke utom unọ ukpep ofụri ererimbot oro ama akan̄wan̄wam ediwak miliọn owo ndikan usua eke idụt ye eke ekpụk oro ẹdide ntak ekese ekọn̄.

Ke akpatre, ekọn̄ ididụhe aba ke idak Obio Ubọn̄ Abasi, emi edidade nsinsi emem ye ifụre ọsọk isọn̄. (Psalm 72:7; Daniel 2:44) Ekem, mme ikọ andiwet psalm emi ẹyesu: “Ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu esịm ke utịt ekondo.”—Psalm 46:8, 9.