Ima Mbufo Atara Adan̄a Didie?

“Ma mbọhọidụn̄ fo nte idem fo.”—MATTHEW 22:39.

1. Edieke nnyịn imade Jehovah, ntak anade nnyịn ima mbọhọidụn̄ nnyịn n̄ko?

 KE INI ẹkebụpde Jesus m̀mê ewe edi n̄kponn̄kan ibet, enye ọkọbọrọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” Ekem enye ama okot udiana ibet oro ebietde akpa oro ete: “Ma mbọhọidụn̄ fo nte idem fo.” (Matthew 22:37, 39) Ih, ẹda ima mbọhọidụn̄ ẹdiọn̄ọ Christian. Ke akpanikọ, edieke nnyịn imade Jehovah, ana nnyịn ima mbọhọidụn̄ nnyịn. Ntak-a? Koro nnyịn iwụt ke imama Abasi ebe ke ndinam Ikọ esie, ndien Ikọ esie owụk nnyịn ete ima mbọhọidụn̄ nnyịn. Ntem, edieke nnyịn mîmaha nditọete nnyịn iren ye iban, ima emi nnyịn imade Abasi ikemeke ndidi ata ima.—Rome 13:8; 1 John 2:5; 4:20, 21.

2. Nso orụk ima ke nnyịn ikpenyene inọ mbọhọidụn̄ nnyịn?

² Ke ini Jesus ọkọdọhọde ete ke nnyịn ikpenyene ndima mbọhọidụn̄ nnyịn, enye eketịn̄ aban̄a se ikande itie ufan. Ndien enye eketịn̄ aban̄a ima emi edide isio ye ndammana ima emi esidude ke otu mbonubon m̀mê ke ufọt eren ye n̄wan. Enye eketịn̄ aban̄a orụk ima emi Jehovah amade mme asan̄autom esie emi ẹyakde idem ẹnọ ye orụk ima emi mmọ ẹmade enye. (John 17:26; 1 John 4:11, 19) Owo Jew emi edide scribe—emi, nte Jesus okokụtde, eketịn̄de ikọ ọniọn̄ ọniọn̄—ama enyịme ye Jesus nte ke ẹkpenyene ndima Abasi “ke ofụri esịt, ye ke ofụri asian ye ke ofụri odudu.” (Mark 12:28-34) Enye ama enen. Ima oro Christian amade Abasi ye mbọhọidụn̄ abuana ntụk ye ikike nnyịn. Enye ọtọn̄ọ ke esịt ndien ekikere ọnọ enye ndausụn̄.

3. (a) Didie ke Jesus ekekpep “ọfiọk-ibet” kiet nte ke enye ekpenyene ndinam ekikere esie kaban̄a owo emi mbọhọidụn̄ esie edide atara? (b) Didie ke n̄ke Jesus abuana mme Christian mfịn?

 ³ Nte Luke ọtọtde, ke ini Jesus ọkọdọhọde ete ke nnyịn ikpenyene ndima mbọhọidụn̄ nnyịn, “ọfiọk-ibet kiet” ama obụp ete: “Anie edi mbọhọidụn̄ mi nan̄a?” Jesus ama ọbọrọ ke nditop n̄ke. Ẹma ẹmia owo kiet, ẹwo, ẹnyụn̄ ẹdaha ẹkpọn̄ enye ke mbenusụn̄ ke ekperede ndikpa. Akpa, oku kiet ama asan̄a ebe, ekem Levite kiet asan̄a ebe. Mmọ mbiba ẹma ẹfụmi enye. Ke akpatre, eyen Samaria kiet ama edisịm ọtọ oro, okụt eren oro ẹkenọde unan, onyụn̄ owụt enye akwa mfọnido. Anie ke otu mbita emi ekedi mbọhọidụn̄ owo emi ẹkenọde unan mi? Ibọrọ ekedi in̄wan̄ in̄wan̄. (Luke 10:25-37) Ekeme ndidi ọfiọkibet oro ama okop n̄kpaidem ndikop nte Jesus ọdọhọde ete ke eyen Samaria ekeme ndidi mbọhọidụn̄ oro ọfọnde akan oku ye Levite. Nte an̄wan̄ade, Jesus akan̄wam eren oro ndima mbọhọidụn̄ esie ke usụn̄ enen̄erede atara. Mme Christian n̄ko ẹsinyene orụk ima oro. Kere ban̄a kpukpru mbon oro mmọ ẹmade.

Ima ke Esịt Ubon

4. M̀mọ̀n̄ ke Christian esibem iso owụt ima?

⁴ Mme Christian ẹsima mbonubon mmọ—iban ẹma mme ebe mmọ, mme ebe ẹma iban mmọ, mme ete ye eka ẹma nditọ mmọ. (Ecclesiastes 9:9; Ephesus 5:33; Titus 2:4) Ke akpanikọ, mbọbọ ndammana ima odu ke ekese ubon. Nte ededi, mme ntọt ẹban̄ade mme ndọ emi ẹwụrede, edifiomo nsan̄a ndọ, ye nditọ oro ẹfụmide m̀mê ẹfiomode ẹwụt nte ke ubon odu ke mfịghe mfịn, ndien ekeme ndidi ẹyom se ikande ndammana ima ubon man ubon adiana kiet. (2 Timothy 3:1-3) Man ẹkụt ata unen ke uwem ubon mmọ, oyom mme Christian ẹnyene orụk ima emi Jehovah ye Jesus ẹnyenede.—Ephesus 5:21-27.

5. Mme ete ye eka ẹsiberi edem ke anie kaban̄a un̄wam ke ndibọk nditọ mmọ, ndien nso isidi utịp inọ ediwak mmọ?

⁵ Mme ete ye eka ẹdide Christian ẹda nditọ mmọ nte ọsọn̄urua enọ otode Jehovah, ndien mmọ ẹsiberi edem ke enye kaban̄a un̄wam ke ndibọk mmọ. (Psalm 127:3-5; Mme N̄ke 22:6) Ke usụn̄ emi mmọ ẹsikọri ima Christian, emi esin̄wamde mmọ ndikpeme nditọ mmọ nsio ke mme mbiara odudu oro ẹkemede ndibiat mme uyen. Nte utịp, ediwak ete ye eka ẹdide Christian ẹnyene idatesịt oro ebietde eke eka kiet ke Netherlands. Ke ama ekese nte ẹnịmde eyeneren esie baptism—kiet ke otu owo 575 oro ẹkenade baptism ke Netherlands isua oko—enye ama ewet se itienede emi: “Idahaemi, ukeme mi ke isua 20 emi ẹkebede enyene utịp. Idahaemi mmefre ofụri ini ye odudu—ọkọrọ ye ubiak, ukeme, ye mfụhọ.” Enye okop inemesịt didie ntem nte ke eyen imọ ama emek, ke idemesie, ndinam n̄kpọ Jehovah. N̄wakn̄kan ibat mme asuanetop ẹdide 31,089 oro ẹkenọde ibatutom ke Netherlands isua oko esịne ediwak mbon oro mme ete ye eka mmọ ẹkekpepde mmọ ndima Jehovah.

6. Didie ke ima Christian ekeme ndin̄wam ndisọn̄ọ ebuana ndọ?

⁶ Paul okokot ima “se ibọpde uwem adiana inam ọfọn ama,” ndien enye ekeme ndimụm ebuana ndọ n̄kama idem ke mme ini afanikọn̄. (Colossae 3:14, 18, 19; 1 Peter 3:1-7) Ke ini eren kiet ke Rurutu, ekpri isuo emi oyomde usụn̄ ke n̄kpọ nte kilomita 700 ọkpọn̄ Tahiti, ọkọtọn̄ọde ndikpep Bible ye Mme Ntiense Jehovah, n̄wan esie ama enen̄ede ọbiọn̄ọ. Nte ini akakade, n̄wan ama atan̄ nditọ mmọ ọwọrọ ọkpọn̄ enye, onyụn̄ aka okodụn̄ ke Tahiti. Kpa ye oro, ebe ama owụt ima emi enye akamade n̄wan esie ebe ke ndisinọ okụk ẹsọk enye kpukpru ini esinyụn̄ ọnọ enye ikot ke urụk ukopikọ man obụp m̀mê ama odu n̄kpọ oro enye m̀mê nditọ oro ẹkeyomde. Ntem enye ama anam ofụri ukeme esie ndibiom mme mbiomo Christian esie. (1 Timothy 5:8) Enye ama esibọn̄ akam kpukpru ini ete ubon imọ ẹfiak ẹdiana kiet, ndien ke akpatre n̄wan esie ama afiak edi. Ke ini enye ama akafiak edi, ebe esie akanam n̄kpọ ye enye ke “ima, ye ime, ye nsụhọde-esịt.” (1 Timothy 6:11) Ke 1998, enye ama ana baptism ndien ama enen̄ede okop inemesịt ke ukperedem ke ini n̄wan esie ekenyịmede ndikpep Bible. Ukpepn̄kpọ oro ekedi kiet ke otu ukpepn̄kpọ 1,351 oro ẹkenịmde isua oko ke efakutom n̄kọk itieutom Tahiti.

7. Nte eren kiet ke Germany ọdọhọde, nso ikọsọn̄ọ ndọ esie?

⁷ Ke Germany eren kiet ama ọbiọn̄ọ udọn̄ oro  n̄wan esie ekenyenede ke akpanikọ Bible ama onyụn̄ enịm ke akpanikọ ete ke Mme Ntiense Jehovah ẹkeyom ndibabian̄a n̄wan imọ. Nte ededi, ke ukperedem enye ama ewet n̄wed ọnọ ẹsọk akpa Ntiense oro okosobode ye n̄wan esie ete: “Sọsọn̄ọ ke ndikada n̄wan mi n̄wụt Mme Ntiense Jehovah. Ke akpa, ama afịna mi koro mma nsikop ata ediwak ndiọi mbụk mban̄a mmọ. Edi idahaemi, ke mma n̄kodụk mme mbono esop ye n̄wan mi, mmọfiọk nte ke n̄kanam ndudue. Mmọfiọk nte ke se ami n̄kopde edi akpanikọ, ndien enye enen̄ede ọsọn̄ọ ndọ nnyịn.” Mme Ntiense Jehovah 162,932 ke Germany—ye 1,773 ke mme isuo oro ẹdude ke idak n̄kọk itieutom Tahiti—ẹsịne ediwak ubon oro ẹdianade kiet ke ima Abasi.

Ndima Nditọete Christian Nnyịn

8, 9. (a) Anie ekpep nnyịn ndima nditọete nnyịn, ndien nso ke ima esinụk nnyịn ndinam? (b) Nọ uwụtn̄kpọ ke nte ima ekemede ndin̄wam nditọete ndinọ kiet eken un̄wam.

⁸ Paul ama ọdọhọ mme Christian ke Thessalonica ete: “Abasi ke Idem Esie ke ekpep mbufo ndima kiet eken.” (1 Thessalonica 4:9) Ih, mbon oro ‘Jehovah etemede’ ẹsima kiet eken. (Isaiah 54:13) Mmọ ẹnanam ima mmọ ẹwụt, nte Paul okowụtde ke ini enye ọkọdọhọde ete: “Ẹsan̄a utom ẹnọ kiet eken ke ima.” (Galatia 5:13; 1 John 3:18) Ke uwụtn̄kpọ, mmọ ẹsinam emi ke ini mmọ ẹkade ẹkese nditọete iren ye iban oro ẹdọn̄ọde, ẹsịnde udọn̄ ẹnọ mbon oro ẹkopde mfụhọ, ẹnyụn̄ ẹn̄wamde mbon mmemidem. (1 Thessalonica 5:14) Ata ima Christian nnyịn etịp esịn ke ndinam paradise eke spirit nnyịn ọkọri.

⁹ Ke Esop Ancón—kiet ke otu esop 544 oro ẹdude ke Ecuador—nditọete ẹsiwụt ima mmọ ke ata ata usụn̄. Unana okụk ama anam mmọ inyeneke utom m̀mê okụk, ntre mme asuanetop ẹma ẹbiere ndin̄wana okụk ebe ke ndinyam udia nnọ mme ọkọiyak n̄kann̄kụk ke ini mmọ ẹnyọn̄ọde ukọiyak okoneyo ẹdi. Kpukpru owo, esịnede nditọwọn̄, ẹma ẹnyịme. Mmọ ẹkenyene nditọn̄ọ ke n̄kanika kiet n̄kpọusen man ẹtem udia ẹkụre ke n̄kanika inan̄ usenubọk ke ini mme ọkọiyak ẹnyọn̄ọde ẹdi. Nditọete oro ẹma ẹdeme okụk oro mmọ ẹkekọde ke otu idemmọ nte ekemde ye unana mmọ. Utọ un̄wam edem mbiba oro ama owụt ata ima Christian.

10, 11. Didie ke nnyịn ikeme ndinyene ima nnọ nditọete oro nnyịn mîfiọkke?

¹⁰ Nte ededi, nnyịn inyeneke ima inọ mme Christian oro nnyịn ifiọkde kpọt. Apostle Peter ọkọdọhọ ete: “Ẹnyene ima ẹnọ ofụri otu  nditọete.” (1 Peter 2:17, NW) Nnyịn imama kpukpru nditọete nnyịn iren ye iban koro kpukpru mmọ ẹdide ekemmọ andituak ibuot nnọ Jehovah Abasi. Mme ini afanikọn̄ ẹkeme ndiberede ifet ndiwụt ima emi. Ke uwụtn̄kpọ, ke isua utom 2000, n̄kpọsọn̄ ukwọ ẹma ẹtọ ẹmen Mozambique, ndien ekọn̄ mbio obio oro akade-ka iso ke Angola ama esịn ediwak owo ke unana. Mme n̄kpọntịbe emi ẹma ẹtụk ediwak ke otu nditọete 31,725 oro ẹdude ke Mozambique ye 41,222 oro ẹdude ke Angola. Ntem, Mme Ntiense ke South Africa oro odude ekpere ẹma ẹnọ ediwak n̄kpọ ẹka man ẹsụhọde mfịna nditọete mmọ ke mme idụt oro. Unyịme mmọ nditịp “nyọhọ-nsụhọ” mmọ nnọ nditọete mmọ emi ẹdude ke unana ama owụt ima mmọ.—2 Corinth 8:8, 13-15, 24.

¹¹ Ẹkụt ima n̄ko ke ini nditọete ke ediwak idụt ẹtịpde n̄kpọ ẹsịn ke edibọp mme Ufọkmbono Obio Ubọn̄ ye mme Ufọk Mbono ke mme idụt oro mînen̄ekede iforo. Uwụtn̄kpọ kiet edi ke Solomon Islands. Kpa ye ekese ndutịme, ibat mme asuanetop ke Solomon Islands ama ọkọri ke mbahade 6 eke ikie isua oko, ye n̄wakn̄kan ibat ẹdide 1,697. Mmọ ẹma ẹdiomi ndibọp Ufọk Mbono. Okposụkedi ediwak mbon isuo oro ẹkefen̄ede ẹwọn̄ọ ke idụt oro, mme anamutom unyịmesịt ẹma ẹto Australia ẹdin̄wam ke utom ubọpn̄kpọ oro. Nte ini akakade, mme anamutom unyịmesịt oro ẹkenyene ndinyọn̄ọ, edi mbemiso ẹkekpọn̄de mmọ ẹma ẹnọ nditọete n̄kann̄kụk ukpep ndisịn itiat idakisọn̄ n̄kụre. Ẹkeda ibibene ukwak ufọk mbono oro ẹma ẹkebọbọp ke isọn̄ ẹto Australia ẹdi, ndien ndibọp ediye ufọk utuakibuot emi n̄kụre—ke ini emi ẹma ẹketre utom ke ediwak itie ubọpufọk—ọyọnọ eti ikọ ntiense aban̄a enyịn̄ Jehovah ye ima nditọete oro.

Nnyịn Imama Ererimbot Ukem Nte Abasi Amade

12. Didie ke nnyịn ikpebe Jehovah ke nte nnyịn isede mbon oro mîdịghe mme andibuana ke ido ukpono nnyịn?

¹² Nte ima nnyịn etre ke ubon nnyịn ye itie nditọete nnyịn? Baba, itreke, edieke nnyịn idide “mme andikpebe Abasi.” Jesus ọkọdọhọ ete: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (Ephesus 5:1; John 3:16, sịghisịghi ubọkn̄wed edi eke nnyịn.) Ukem nte Jehovah Abasi, nnyịn imama kpukpru owo—esịnede mbon oro mîdịghe mme andibuana ke ido ukpono nnyịn. (Luke 6:35, 36; Galatia 6:10) Ke afan̄ emi akpan akpan, nnyịn imesikwọrọ eti mbụk Obio Ubọn̄ inyụn̄ itịn̄ inọ mbon efen iban̄a ikpọ edinam ima oro Abasi anamde ke ufọn mmọ. Emi ekeme ndisụn̄ọ ke edinyan̄a nnọ owo ekededi emi okopde.—Mark 13:10; 1 Timothy 4:16.

13, 14. Nso idi ndusụk ifiọkutom nditọete oro ẹkewụtde ima ẹnọ mbon oro mîdịghe Mme Ntiense, okposụkedi mîdịghe mmemmem n̄kpọ inọ mmọ?

¹³ Kere ban̄a akpan asiakusụn̄ inan̄ ke Nepal. Ẹkenọ mmọ ẹkenam utom ke obio emi odude ke ufọt edem usụk ye edem usoputịn idụt oro, ndien ke isua ition emi ẹkebede, mmọ ẹmewụt ima mmọ ebe ke ndinọ ikọ ntiense ye ime ke obio oro ye ke mme obio-in̄wan̄ oro ẹdude nsannsan. Man ẹkụre efakutom mmọ, mmọ ẹsiwak ndiwat ke enan̄ukwak ke ediwak hour ke idaha eyo oro ofiopde ebe Celsius 40. Ima mmọ ye mmọ ‘ndiyịre ke ndinam eti ido’ ẹma ẹn̄wụm nti mfri ke ini ẹketọn̄ọde otu ukpepn̄kpọ n̄wed ke kiet ke otu mme obio-in̄wan̄ oro. (Rome 2:7) Ke March 2000, owo 32 ẹma ẹdi ẹdikpan̄ utọn̄ ẹnọ utịn̄ikọ an̄wa oro esenyịn circuit ọkọnọde. Nepal ama enyene n̄wakn̄kan ibat mme asuanetop 430 isua oko—kpa n̄kọri edide mbahade 9 eke ikie. Nte an̄wan̄ade, Jehovah ke ọdiọn̄ ima ye ifịk nditọete ke idụt oro.

¹⁴ Ke Colombia mme akpan asiakusụn̄ ibio ini ẹma ẹka ndikwọrọ ikọ nnọ mbon Wayuu India. Man ẹnam emi, mmọ ẹkenyene ndikpep obufa usem, edi ẹma ẹnọ ima ima udọn̄ mmọ utịp ke ini owo 27 ẹkedụkde utịn̄ikọ an̄wa, kpa ye ọkpọsọn̄ edịm. Utọ ima ima ifịk oro mme asiakusụn̄ emi ẹkewụtde ama etịp esịn ke n̄kọri edide mbahade 5 eke ikie ke Colombia ye n̄wakn̄kan ibat mme asuanetop ẹdide 107,613. Ke Denmark eyenete an̄wan oro ama ọkọsọn̄ ama oyom ndibuana eti mbụk ye mbon efen, edi enye ama obiomo ndo. Ye unana edikop mmemidem, enye ama enyene nneme ye mbon oro ẹkenyenede udọn̄ ebe ke ndiwet mme leta. Idahaemi, enye esinyene nneme ye owo 42 onyụn̄ enịm ukpepn̄kpọ Bible  11. Enye edi kiet ke otu n̄wakn̄kan ibat mme asuanetop 14,885 oro ẹketọtde ibatutom ke Denmark isua oko.

Ẹma Mme Asua Mbufo

15, 16. (a) Jesus ọkọdọhọ ke ima nnyịn akpatara adan̄a didie? (b) Didie ke nditọete oro ẹkamade utom ẹkenam n̄kpọ ke ima ima usụn̄ ye owo emi ekewetde mme nsunsu edori ikọ aban̄a Mme Ntiense Jehovah?

¹⁵ Jesus ọkọdọhọ ọfiọkibet ete ke ẹkeme ndida owo Samaria nte mbọhọidụn̄. Ke Ukwọrọikọ esie oro ke Obot, Jesus ama akam aka anyan akan oro ke ini enye ọkọdọhọde ete: “Mbufo ẹmekop ẹte ẹkenọ owo uyo, ẹte, Ma mbọhọidụn̄ fo, nyụn̄ sua owo usua fo. Edi Ami ndọhọ mbufo nte, Ẹma mme asua mbufo, ẹnyụn̄ ẹbọn̄ akam ẹyom ufọn mmọ eke ẹnamde mbufo isịn-enyịn: man mbufo ẹdi nditọ Ete mbufo emi odude ke heaven.” (Matthew 5:43-45) Idem ke ini owo ọbiọn̄ọde nnyịn, nnyịn imesidomo ‘ndida nti edinam n̄kan idiọk ubọk.’ (Rome 12:19-21) Edieke ikemede, nnyịn imesibuana ata ọsọn̄urua inyene nnyịn, kpa akpanikọ, ye enye.

¹⁶ Ke Ukraine ibuotikọ kiet ke n̄wedmbụk n̄kpọntịbe oro Kremenchuk Herald ama etịn̄ aban̄a Mme Ntiense Jehovah nte idiọk n̄ka. Emi ikedịghe mfefere n̄kpọ koro ke Europe ndusụk owo ẹsitịn̄ ntem ẹban̄a Mme Ntiense Jehovah man ẹkpek mme owo ndinịm nte ke ẹkpenyene ndikpan mme edinam Mme Ntiense. Ntem, ẹma ẹka ẹbịne ewetn̄wed oro ẹkedọhọ yak enye ewet ntọt man enen̄ede ukwan̄ ekikere otode ibuotikọ emi. Enye ama enyịme, edi ke ntọt oro, enye ama ewet ete ke akpa ibuotikọ ọkọkọn̄ọ ke akpanikọ. Ntre nditọete emi ẹkamade utom ẹma ẹfiak ẹka ẹbịne enye ye ntọt efen efen. Ke akpatre, ewetn̄wed oro ama ọfiọk ete ke akpa ibuotikọ oro ikenenke, ndien enye ama ewet ntọt edinen̄ede. Ndinam n̄kpọ ye enye in̄wan̄ in̄wan̄ ye ke mfọnido ekedi ima ima usụn̄ ndise mban̄a idaha emi, ndien emi ama osụn̄ọ ke eti utịp.

Didie ke Nnyịn Ikeme Ndikọri Ima?

17. Nso iwụt nte ke ididịghe mmemmem n̄kpọ kpukpru ini ndinam n̄kpọ ima ima ye mbon en̄wen?

¹⁷ Ke ini nsekeyen amanade, ete ye eka esie ẹsisọsọp ẹma enye. Ndinam n̄kpọ ima ima ye ikpọ owo isidịghe ndammana n̄kpọ ntre. Ekeme ndidi oro edi ntak emi Bible asiande nnyịn ndien ndien ete ima kiet eken—enye edi n̄kpọ emi nnyịn inyenede ndikọkọri. (1 Peter 1:22; 4:8; 1 John 3:11) Jesus ama ọfiọk ete ke ẹyesịn ima nnyịn ke udomo ke ini enye ọkọdọhọde ete ke nnyịn ikpenyene ndifen nnọ nditọete nnyịn “tutu esịm ikatiaba ke  itie ata ye duop.” (Matthew 18:21, 22) Paul n̄ko ama esịn udọn̄ ọnọ nnyịn ete ‘ime ime ye kiet eken.’ (Colossae 3:12, 13) Eyịghe idụhe ẹdọhọde nnyịn ẹte: “Ẹbịne ima”! (1 Corinth 14:1) Didie ke nnyịn ikeme ndinam emi?

18. Nso idin̄wam nnyịn ndikọri ima nnọ mbon efen?

¹⁸ Akpa, nnyịn imekeme ndinyene ima emi nnyịn inyenede inọ Jehovah Abasi ke ekikere kpukpru ini. Ima emi edi okopodudu ntak ọnọ nnyịn ndima mbọhọidụn̄ nnyịn. Ntak-a? Koro ke ini nnyịn inamde ntre, esitịn̄ eti ikọ aban̄a Ete nnyịn eke heaven onyụn̄ ada ubọn̄ ye itoro ọsọk enye. (John 15:8-10; Philippi 1:9-11) Ọyọhọ iba, nnyịn imekeme ndidomo ndise mme n̄kpọ nte Jehovah esede. Kpukpru ini oro nnyịn inamde idiọkn̄kpọ, nnyịn inam idiọk idian Jehovah; edi, enye esifen ọnọ nnyịn ediwak ini onyụn̄ aka iso ndima nnyịn. (Psalm 86:5; 103:2, 3; 1 John 1:9; 4:18) Edieke nnyịn inyenede ekikere Jehovah, nnyịn iyenyene udọn̄ ndima mbon en̄wen nnyụn̄ mfen mme ndudue emi mmọ ẹduede nnyịn. (Matthew 6:12) Ọyọhọ ita, nnyịn imekeme ndinam n̄kpọ ye mbon en̄wen nte nnyịn iyomde mmọ ẹnam n̄kpọ ye nnyịn. (Matthew 7:12) Sia nnyịn idide mme anana-mfọnmma owo, ediwak ini nnyịn imesiyom ẹfen ẹnọ nnyịn. Ke uwụtn̄kpọ, ke ini nnyịn itịn̄de ikọ emi ọnọde mbon efen unan, nnyịn imesidori enyịn mmọ nditi nte ke kpukpru owo ẹsidue ke ikọ inua ke ini ke ini. (James 3:2) Edieke nnyịn iyomde mbon efen ẹnam n̄kpọ ye nnyịn ke ima, nnyịn ikpenyene ndinam n̄kpọ ye mmọ ke ima.

19. Didie ke nnyịn ikeme ndiyom un̄wam edisana spirit ke ndikọri ima?

¹⁹ Ọyọhọ inan̄, nnyịn imekeme ndiyom un̄wam edisana spirit koro ima edide ubak mbun̄wụm spirit. (Galatia 5:22, 23) Ima itie ufan, ima ke ubon, ye ima ke ufọt eren ye n̄wan ẹsiwak ndidi ndammana. Edi nnyịn imoyom un̄wam spirit Jehovah man ikọri ima oro Jehovah enyenede, kpa ima emi edide se ibọpde uwem adiana, inam ọfọn ama. Nnyịn ikeme ndiyom un̄wam edisana spirit ebe ke ndikot Bible. Ke uwụtn̄kpọ, edieke nnyịn ikpepde iban̄a uwem Jesus, nnyịn iyokụt nte enye akanamde n̄kpọ ye mme owo, ndien nnyịn imekeme ndikpep ndikpebe enye. (John 13:34, 35; 15:12) Ke adianade do, nnyịn imekeme ndiben̄e Jehovah edisana spirit, akpan akpan ke mme idaha oro ẹdide ọkpọsọn̄ n̄kpọ ẹnọ nnyịn ndinam n̄kpọ ke ima ima usụn̄. (Luke 11:13) Ke akpatre, nnyịn imekeme ndibịne ima ebe ke ndisịk n̄kpere esop Christian. Ndidu ye ima ima nditọete iren ye iban ayan̄wam nnyịn ikọri ima.—Mme N̄ke 13:20.

20, 21. Nso n̄wọrọnda ediwụt ima ke Mme Ntiense Jehovah ẹkewụt ke isua utom 2000?

²⁰ Isua oko, n̄wakn̄kan ibat mme asuanetop eti mbụk 6,035,564 ẹkedu ke ofụri ererimbot. Mme Ntiense Jehovah ẹma ẹbiat ofụri ibat hour 1,171,270,425 ndiyom mme owo man ẹbụk eti mbụk oro ẹnọ mmọ. Ima akanam mmọ ẹyọ ufiop eyo, edịm, ye tuep nte mmọ ẹkenamde utom emi. Ima okonụk mmọ nditịn̄ ikọ nnọ mme nsan̄a ufọkn̄wed ye mme nsan̄autom ye ata isenowo ke efak ye ke mme itie en̄wen. Ediwak mbon oro Mme Ntiense ẹkekade ẹbịne ikenyeneke udọn̄, ediwak ẹma ẹbiọn̄ọ mmọ. Nte ededi, ndusụk owo ẹma ẹwụt udọn̄, anam ẹma ẹnam mfiakn̄ka 433,454,049, ẹnyụn̄ ẹnịm ukpepn̄kpọ Bible 4,766,631. *

²¹ Nso ediwụt ima emi Mme Ntiense Jehovah ẹmade Abasi ye mbọhọidụn̄ mmọ ke kpukpru emi ẹkedi ntem! Ima oro idibịtke tutu amama. Nnyịn imodori enyịn nte ke ẹyenọ ubonowo ikọ ntiense oro akam okponde akan ke isua utom 2001. Edidiọn̄ Jehovah akpakam aka iso ndidu ye mme andituak ibuot nnọ enye emi ẹnamde akpanikọ ẹnyụn̄ ẹsịnde ifịk nte mmọ ‘ẹnamde kpukpru se mmọ ẹnamde ke ima’!—1 Corinth 16:14.

[Ikọ idakisọn̄]

Nte Afo Emekeme Ndinam An̄wan̄a?

• Mmanie ke nnyịn ikpebe ke ini imade mbọhọidụn̄ nnyịn?

• Ima nnyịn akpatara adan̄a didie?

• Nso idi ndusụk ifiọkutom emi ẹwụtde ima Christian?

• Didie ke nnyịn ikeme ndikọri ima Christian?

[Mme Mbụme Ukpepn̄kpọ]

 [Chart ke page 18-21]

IBATUTOM ISUA UTOM 2000 EKE MME NTIENSE JEHOVAH KE OFỤRI ERERIMBOT

 (Se magazine)

[Mme ndise ke page 15]

Ima Christian ekeme ndinam ubon adiana kiet

[Mme ndise ke page 17]

Ima esinụk nnyịn ndibuana idotenyịn nnyịn ye mbon efen