Ndikọk Mme Unan Ekọn̄

ABRAHAM ama odu ke n̄ka en̄wan ukpụhọ ukara ke isua 20. * Edi enye emetre ndin̄wana ekọn̄ idinyụn̄ ikaha ekọn̄ aba tutu amama. Ke akpanikọ, ndusụk n̄kani asua esie ẹdi mme ata n̄kpet n̄kpet ufan esie idahaemi. Nso ikanam enye okpụhọde? Bible akanam. Enye ama ọnọ Abraham idotenyịn ye ikike, an̄wamde enye ndise mme mbubehe owo ke idaha ekikere Abasi. Bible ama abiat udọn̄ esie ndin̄wana ekọn̄ efep, ndien Abraham ama ọtọn̄ọ ndikọk mfụhọ, usua, ye iyatesịt esie. Enye ama okụt ete ke Bible esịne okopodudu ibọk esịt.

Didie ke Bible an̄wam owo ndikọk mme unan eke ntụk? Enye ikekemeke ndikpụhọde se iketịbede inọ Abraham. Edi, ndikot nnyụn̄ ntie n̄kere Ikọ Abasi ama anam ekikere esie asan̄a kiet ye eke Andibot. Idahaemi enye enyene idotenyịn kaban̄a ini iso, enye onyụn̄ enyene mbufa ebeiso n̄kpọ. Mme n̄kpọ oro ẹdide akpan n̄kpọ ẹnọ Abasi ẹmekabade ẹdi akpan n̄kpọ ẹnọ enye. Ke ndondo oro emi ọkọtọn̄ọde nditịbe, mme unan oro ẹkedude ke esịt esie ẹma ẹtọn̄ọ ndikpan̄a. Oro edi nte ẹken̄wamde Abraham ndikpụhọde.

Odụk Ekọn̄ Mbio Obio

Abraham akamana ke iduọk isua 1930 ke Africa. Ke ọyọhọ ekọn̄ ererimbot iba ama okokụre, okopodudu idụt mbọhọ ama akara idụt esie, edi ediwak ke otu mbio obio Abraham ẹma ẹyom ukaraidem. Ke 1961, Abraham ama odụk ekọn̄ n̄ka ubọhọ-ufụn oro akan̄wanade ekọn̄ ye okopodudu idụt mbọhọ oro.

Abraham anam an̄wan̄a ete: “Mmọ ẹkedi mme asua nnyịn. Mmọ ẹkeduak ndiwowot nnyịn, ntre nnyịn ima itọn̄ọ en̄wan ndiwot mmọ.”

Uwem Abraham ama odu ke itiendịk ediwak ini, ntre ke 1982, ke ama akan̄wana ekọn̄ ke isua 20, enye ama efehe aka Europe. Idahaemi enye okodu ke iduọk isua 40, ke okụtde ke isua uwem esie iwakke aba, enye ama etie odụn̄ọde uwem esie. Nso iketịbe inọ mme uduak esie? Nso ke ini iso akakama? Abraham ama osobo ye ndusụk ke otu Mme Ntiense Jehovah onyụn̄ ọtọn̄ọ ndidụk mme mbono esop mmọ. Enye ama eti ete ke Africa ke ndusụk isua oro ẹkebede, imọ ima ikot tract kiet oro Ntiense kiet ọkọnọde imọ. Tract oro eketịn̄ aban̄a paradise oro edidide ke isọn̄ ye ukara  eke heaven oro edikarade ubonowo. Nte oro ekeme ndinen̄ede ndi akpanikọ?

Abraham ọdọhọ ete: “Mma n̄kpep nto Bible nte ke kpukpru isua oro n̄kabiatde n̄n̄wana ekọn̄ ẹketatak. N̄kukụre ukara oro edinamde n̄kpọ ye kpukpru owo nte enende edi Obio Ubọn̄ Abasi.”

Esisịt ini ke Abraham ama akana baptism nte Ntiense Jehovah, eren kiet oro ekerede Robert ama oto Africa efehe aka obio Europe oro Abraham okodụn̄de. Robert ye Abraham ẹken̄wana ukem ekọn̄ edi kiet ke n̄kan̄ emi enye eken ke n̄kan oko. Robert ama esiwak ndiyịk se idide ata uduak ke uwem. Enye ekedi owo emi amade ido ukpono, ndien sia ama okokot ndusụk ikpehe ke Bible, enye ama ọfiọk ete ke enyịn̄ Abasi edi Jehovah. Ke ini Mme Ntiense ẹtode esop mme Abraham ẹkedọhọde ke imọn̄ in̄wam Robert man etịm ọfiọk Bible, enye ama ọsọsọp enyịme.

Robert anam an̄wan̄a ete: “Toto ke ata ntọn̄ọ, mma mma usụn̄ oro Mme Ntiense ẹkedade enyịn̄ Jehovah ye Jesus, ẹnyịmede ẹte ke mmọ ẹdi nsio nsio owo. Oro ama odu ke n̄kemuyo ye se ami mma n̄kọfọfiọk nto Bible. Mme Ntiense n̄ko ẹsisịne n̄kpọ nte eyede ẹnyụn̄ ẹfọn ido ye mbon en̄wen, inamke n̄kpọ m̀mê ẹto ewe idụt. Mme utọ n̄kpọ oro ẹma ẹtụk mi ntotụn̄ọ ntotụn̄ọ.”

Mme Asua Ẹkabade Mme Ufan

Robert ye Abraham, emi ẹkedide mme asua ke mbemiso, ẹdi n̄kpet n̄kpet ufan idahaemi. Mmọ ẹnam utom nte mme ọkwọrọ eti mbụk uyọhọ ini ke ukem esop eke Mme Ntiense Jehovah. Abraham anam an̄wan̄a ete: “Ke ini ekọn̄ oro, mma nsiwak ndikere ntak emi mme owo ẹtode mme idụt n̄kann̄kụk—emi ediwak ẹkedude ke ukem ido ukpono—ẹkemede ndisua kiet eken. Ami ye Robert ikesika ukem ufọkabasi, edi nnyịn ima in̄wana ekọn̄ ye kiet eken. Idahaemi nnyịn mbiba idi Mme Ntiense Jehovah, ndien mbuọtidem nnyịn adian nnyịn ọtọkiet.”

Robert adian do ete: “Ukpụhọde edi oro. Idahaemi nnyịn idu ke ido ukpono oro anamde nnyịn idi ubak eti itie nditọete. Nnyịn idikaha ekọn̄ aba tutu amama.” Bible enyene ọkpọsọn̄ odudu ke esịt n̄kani asua emi. Usua ye iyatesịt ẹyak ufan̄ sụn̄sụn̄ ẹnọ mbuọtidem ye itie ufan.

Ke ukem ini oro Abraham ye Robert ẹken̄wanade ekọn̄, n̄kparawa iba ẹma ẹdu ke idụt iba ẹdide mbọhọidụn̄, oro ẹken̄wanade ye kiet eken. Ikebịghike Bible ama anam n̄kpọ nte ọkpọsọn̄ ibọk ndikọk unan okodude ke esịt mmọ n̄ko. Didie?

Wot Owo—Ekem Kpa N̄kpa Usụn̄ Abasi

Ẹkekpep Gabriel, emi ẹkebọkde ke ubon emi ẹmade ido ukpono, nte ke idụt emana esie akan̄wana akama-n̄kpa edisana ekọn̄. Ntem, ke edide isua 19 ke emana, enye ama ọnọ idem unyịme unyịme ke utom ekọn̄ onyụn̄ eben̄e ete ẹnọ imọ ika iso ekọn̄. Enye okodu ke ata ọkpọsọn̄ ekọn̄ ke ọfiọn̄ 13, ndusụk ini adianarede ọkpọn̄ mme asua esie ke kilomita kiet ye ubak kpọt. Enye ọdọhọ ete: “Mmenen̄ede nti ini kiet. Akwa etubom nnyịn ama asian nnyịn ete ke mme asua ẹmọn̄ ẹdi ekọn̄ okoneyo oro. Nnyịn ima ikop ndịk tutu nnyịn itop mme  ọtọmbe nnyịn ofụri okoneyo oro.” Enye akada mme owo ẹtode idụt mbọhọ oro nte mme asua esie, oro ẹkedotde ndikpa. “Ekikere mi ekedi ndiwot adan̄a ediwak owo nte n̄kekeme. Ndien, ukem nte ediwak ke otu mme ufan mi, ami n̄koyom ndikpa n̄kpa usụn̄ Abasi.”

Nte ededi, nte ini akakade Gabriel ikenyeneke inemesịt. Enye ama efehe aka ikpọ obot, edịbe ebe adan̄a obio odụk idụt oro ekọn̄ mîkodụhe, onyụn̄ anam isan̄ aka Europe. Enye ama aka iso ndibụp Abasi ntak emi uwem ọkọsọn̄de ntre, m̀mê mme mfịna ẹkedi ufen Abasi. Enye ama osobo ye Mme Ntiense Jehovah, emi ẹkedade Bible ẹwụt enye ntak emi uwem ọyọhọde ntem ye mme mfịna mfịn.—Matthew 24:3-14; 2 Timothy 3:1-5.

Adan̄a nte Gabriel ekekpepde Bible, ntre ke enye ọkọfiọk ete ke enye esịne akpanikọ. “Mma n̄kpep nte ke nnyịn imekeme ndidu uwem ke nsinsi ke paradise ke isọn̄. Ke esen esen usụn̄, oro edi n̄kpọ emi n̄koyomde nte eyenọwọn̄.” Bible ama ọnọ Gabriel ndọn̄esịt onyụn̄ osụk editịmede esịt oro enye ekenyenede tutu esịm ini oro. Ikpọ unan esie eke ntụk ẹma ẹtọn̄ọ ndikpan̄a. Etisịm ini oro enye okosobode ye Daniel, kpa akani asua, Gabriel ikenyeneke aba usua ke esịt. Edi nso ikanam Daniel edi Europe?

“Edieke Afo Enen̄erede Odu, Mbọk N̄wam Mi!”

Daniel ọkọkọri okpon nte owo Catholic ndien ke edide isua 18 ke emana ẹma ẹda enye ẹsịn ke ekọn̄. Kpa ekọn̄ oro Gabriel akan̄wanade ke ẹkenọ enye aka, edi enye okodu ke n̄kan̄ asua. Ke ini Daniel akawatde ke ubomisọn̄ ekọn̄ ekpere iso ekọn̄, ọtọmbe ama ọtọ ubomisọn̄ oro nnennen nnennen. Mme ufan esie ẹma ẹkpan̄a, ndien enye ama ada unan idiọk idiọk ẹnyụn̄ ẹmụm enye nte mbuotekọn̄. Enye ama odu ke ufọkibọk ye ke itienna ke ediwak ọfiọn̄ mbemiso ẹkebịnde enye ọnyọn̄ idụt oro ekọn̄ mîkodụhe. Ke ntak ndobo ye unana, enye ama ekere ndiwot idem. Daniel ama ọbọn̄ akam ọnọ Abasi ete: “Edieke afo enen̄erede odu, mbọk n̄wam mi!” Ke ndan̄nsiere, Mme Ntiense Jehovah ẹma ẹwaha ẹkese enye, ndien ẹma ẹkeme ndibọrọ ediwak ke otu mbụme esie. Ke akpatre, enye ama anam isan̄ aka Europe nte owo itọkekọn̄. Ini kiet efen, Daniel ama abuana ye Mme Ntiense onyụn̄ ekpep Bible. Se enye ekekpepde ama anam editịmede esịt ye iyatesịt esie ẹsụhọde.

Gabriel ye Daniel ẹdi nti ufan idahaemi, ẹdianade kiet ke itie nditọete eke spirit nte Mme Ntiense Jehovah oro ẹma ẹkena baptism. Gabriel ọdọhọ ete: “Ima nnyenede nnọ Jehovah ye ifiọk Bible ẹn̄wam mi ndise mme n̄kpọ nte enye esede. Daniel idịghe aba asua mi. Ke ediwak isua emi ẹkebede ami n̄kpekenyịme ndiwot enye. Bible ekpep mi se idide ata isio—ndinyịme ndikpa nnọ enye.”

“Mma n̄kụt mme owo ẹdude ke nsio nsio ido ukpono ye idụt ẹwotde kiet eken,” ntre ke Daniel ọdọhọ. “Ndien mme owo ẹdude  ke ukem ido ukpono ẹma ẹdu ke n̄kan̄ mbiba ke ekọn̄ oro ẹwotde kiet eken. Ke ini n̄kokụtde emi, ami n̄kekere ke ẹkpeduọhọ Abasi. Idahaemi mmọfiọk nte ke Satan edi ntak kpukpru ekọn̄. Ami ye Gabriel idi nsan̄a mme andinịm ke akpanikọ idahaemi. Nnyịn idin̄wanake aba tutu amama!”

“Ikọ Abasi Enyene Uwem, Onyụn̄ Ananam N̄kpọ”

Ntak emi Abraham, Robert, Gabriel, ye Daniel ẹkenamde utọ n̄wọrọnda ukpụhọde oro? Didie ke mmọ ẹkekeme ndisọhi usua ye mfụhọ oro ẹkedọn̄de n̄kam ke esịt mmọ mfep?

Iren emi kiet kiet ẹma ẹkot, ẹtie ẹkere, ẹnyụn̄ ẹkpep akpanikọ otode Bible, emi ‘enyenede uwem, onyụn̄ anamde n̄kpọ.’ (Mme Hebrew 4:12) Andiwet Bible edi Andibot ubonowo, emi ọfiọkde nditịm n̄kara esịt owo oro enyịmede ndikpan̄ utọn̄ nnyụn̄ n̄kpep n̄kpọ. “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido.” Ke ndondo oro owo ayakde Bible ada enye usụn̄, enye enyene mbufa idaha ye edumbet ke uwem. Enye ọtọn̄ọ ndikpep nte Jehovah esede mme n̄kpọ. Edinam emi ada ediwak ufọn edi, esịnede edikọk mme unan ekọn̄.—2 Timothy 3:16.

Ikọ Abasi anam an̄wan̄a nte ke idụhe idụt, orụk, m̀mê ekpụk oro ọfọnde m̀mê ọdiọkde akan kiet eken. “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” Ẹn̄wam andikot Bible oro enyịmede emi ndikan usua eke orụk m̀mê eke idụt sụn̄sụn̄.—Utom 10:34, 35.

Mme ntịn̄nnịm ikọ Bible ẹwụt nte ke ibịghike Abasi ayada Obio Ubọn̄ Messiah esie okpụhọ ndutịm ukara owo eke idahaemi. Ebede ke ukara emi, Abasi “[ayanam] ekọn̄ etre tutu esịm ke utịt ekondo.” Ẹyesio mme esop oro ẹsịnde udọn̄ ẹnọ ẹnyụn̄ ẹkpakde mme owo ndin̄wana ekọn̄ ẹfep. Ẹyenam mbon unọmọ ekọn̄ ẹset ẹnyụn̄ ẹnọ ifet ndidu uwem ke paradise ke isọn̄. Idiyomke owo ndomokiet efehe aba man ọbọhọ owo nyomikọ m̀mê owo ufịk.—Psalm 46:9; Daniel 2:44; Utom 24:15.

Kaban̄a mme owo oro ẹdidude uwem ke ini oro, Bible ọdọhọ ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹto in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄ . . . Mmọ idinamke utom ke ikpîkpu, idinyụn̄ imanke nditọ inọ n̄kpọ ndịk.” Idụhe unan oro owo mîdikọkke. Ndikọn̄ mbuọtidem ke utọ idotenyịn oro osio mfụhọ sụn̄sụn̄ efep ke esịt owo.—Isaiah 65:21-23.

Bible enen̄ede edi okopodudu ibọk esịt. Mme ukpepn̄kpọ esie ẹkọkọk mme unan ekọn̄. N̄kani asua ke ẹdiana kiet ke itie nditọete ofụri ererimbot. Edinam edikọk emi ayaka iso ke obufa editịm n̄kpọ Abasi tutu usua, iyatesịt, ye mfụhọ idụhe aba ke esịt ubonowo. Andibot ọn̄wọn̄ọ ete ke “owo iditịghi aba akpa oro, idinyụn̄ idụkke owo ke esịt.”—Isaiah 65:17.

[Mme Ikọ idakisọn̄]

[Se Ẹwetde ke Ikpọ Abisi ke page 4]

“Mma n̄kpep nto Bible nte ke kpukpru isua oro n̄kabiatde n̄n̄wana ekọn̄ ẹketatak”

[Se Ẹwetde ke Ikpọ Abisi ke page 5]

Bible ekeme ndinyene ọkpọsọn̄ odudu ke esịt n̄kani asua

[Se Ẹwetde ke Ikpọ Abisi ke page 6]

Usua ye iyatesịt ẹma ẹyak ufan̄ sụn̄sụn̄ ẹnọ mbuọtidem ye itie ufan

[Se Ẹwetde ke Ikpọ Abisi ke page 6]

Ke ndondo oro andikot ayakde Bible ada enye usụn̄, enye enyene mbufa idaha ye edumbet ke uwem

[Ndise ke page 7]

N̄kani asua ke ẹdiana kiet ke itie nditọete ofụri ererimbot

[Ebiet Ẹdade Ndise Ẹto ke page 4]

Itienna mbon itọkekọn̄: UN PHOTO 186811/J. Isaac