Yak Ima Anam Fi Ọkọri
Yak Ima Anam Fi Ọkọri
“Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.”—MATTHEW 22:37.
1. (a) Nso idi ndusụk edu oro Christian esikọride? (b) Ewe edi ata akpan edu Christian, ndien ntak-a?
CHRISTIAN esikọri ediwak edu man edi asan̄autom emi enyenede uforo. N̄wed Mme N̄ke owụt ufọn emi ifiọk, mbufiọk, ye eti ibuot ẹnyenede. (Mme N̄ke 2:1-10) Apostle Paul ama etịn̄ aban̄a ufọn edinyene ọkpọsọn̄ mbuọtidem ye idotenyịn. (Rome 1:16, 17; Colossae 1:5; Mme Hebrew 10:39) Ime ye mfara ke idem ẹdi akpan n̄kpọ n̄ko. (Utom 24:25; Mme Hebrew 10:36) Nte ededi, odu n̄kpọ kiet emi edide ke mîdụhe osụhọde kpukpru edu eken ndien akam ekeme ndinam mmọ ẹkûnyene ufọn. Enye edi ima.—1 Corinth 13:1-3, 13.
2. Didie ke Jesus okowụt nte ima edide akpan n̄kpọ, ndien mme mbụme ewe ke emi edemede?
2 Jesus ama owụt nte ima edide akpan n̄kpọ ke ini enye ọkọdọhọde ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Sia ima edide se ẹdade ẹfiọk ata Christian, oyom nnyịn ibụp mme utọ mbụme nte, Nso idi ima? Ntak emi enye enen̄erede edi akpan n̄kpọ ntre tutu Jesus ọdọhọ ete ke akande kpukpru n̄kpọ efen, ke ẹda emi ẹfiọk mme mbet imọ? Didie ke nnyịn ikeme ndikọri ima? Mmanie ke nnyịn ikpama? Ẹyak nnyịn ikere iban̄a mme mbụme emi.
Nso Idi Ima?
3. Didie ke ẹkeme ndinam se ima edide an̄wan̄a, ndien ntak emi enye abuanade ekikere ye esịt?
3 Ẹtịn̄ ẹban̄a ima ke usụn̄ kiet nte ‘edinyene ọkpọkpọ ufiop ufiop itie ebuana m̀mê ntotụn̄ọ ima, kpa ufiop ufiop ima nnọ owo en̄wen.’ Enye edi edu emi esinụkde mme owo ẹnam n̄kpọ ẹyom ufọn mbon efen, ndusụk ini ẹnamde emi ye ọkpọsọn̄ n̄waidem. Nte ẹtịn̄de ke Bible, ima abuana ekikere ye esịt. Ekikere, m̀mê ikike, enyene akamba udeme koro owo emi amade ima anam emi ye ifiọk, ọfiọkde ete ke imọ ye mbon efen oro imọ imade imenyene mme mmeme ọkọrọ ye nti edu. Ikike abuana n̄ko sia odu mbon oro Christian amade—ndusụk ini, eyedi atuahade ye ndammana ntụhọ esie—ke ntak emi enye ọfiọkde oto edikot Bible nte ke Abasi oyom imọ ima mmọ. (Matthew 5:44; 1 Corinth 16:14) Edi, ima esito esịt akpan akpan. Nte ẹwụtde ke Bible, ata ima ikọn̄ọke ke ifiọk kpọt. Enye abuana ofụri esịt ye ntụk.—1 Peter 1:22.
4. Ke nso usụn̄ ke ima edi okopodudu mbọbọ?
4 Mbon oro ẹdide ibụk isikemeke ndinyene ata ima ima itie ebuana koro owo oro amade ima eben̄e idem ndinam mme udọn̄ owo efen ẹbem eke esie iso. (Philippi 2:2-4) Mme ikọ Jesus oro, “ekese inemesịt odu ke ndinọnọ akan nte odude ke ndibọbọ” ẹnen̄ede ẹdi ntre ke ini edinọ oro edide edinam ima. (Utom 20:35, NW) Ima edi okopodudu mbọbọ. (Colossae 3:14) Enye esiwak ndisịne itie ufan, edi mbọbọ ima esikop odudu akan mbọbọ itie ufan. Ndusụk ini ẹsikot ufiop ufiop itie ebuana oro odude ke ufọt ebe ye n̄wan, ima; nte ededi, ima oro Bible esịnde udọn̄ ọnọ nnyịn ndikọri esibịghi akan ima emi ẹmade ke ntak uyai ikpọkidem. Ke ini ebe ye n̄wan ẹnen̄erede ẹma kiet eken, mmọ ẹsika iso ẹdu ọtọkiet idem ọkpọkọm mmọ ikemeke ndinyene ebuana ikpọkidem aba ke ntak mme mmeme oro ẹsisan̄ade ye isua usọn̄ m̀mê ke ntak emi kiet ke otu mmọ obiomode ndo.
Ima—Akpan Edu
5. Ntak emi ima edide akpan edu ọnọ Christian?
5 Ntak emi ima edide akpan edu ọnọ Christian? Akpa, koro Jesus ama owụk mme anditiene enye ete ẹma kiet eken. Enye ọkọdọhọ ete: “Mbufo ẹdi mme ufan Mi edieke mbufo ẹnamde n̄kpọ eke ntemede mbufo. Mmowụk mbufo ntem nte, mbufo ẹma kiet eken.” (John 15:14, 17) Ọyọhọ iba, koro Jehovah edide uwụtn̄kpọ ima, ndien nte mme andituak ibuot nnọ enye nnyịn ikpenyene ndikpebe enye. (Ephesus 5:1; 1 John 4:16) Bible ọdọhọ ete ke ndifiọk Jehovah ye Jesus edi nsinsi uwem. Didie ke nnyịn ikeme ndidọhọ ke imọfiọk Abasi edieke nnyịn mîdomoke nditie nte enye? Apostle John ama ọkọk ibuot ete: “Owo eke [mîmaha ima] ifiọkke Abasi, koro Abasi edi ima.”—1 John 4:8.
6. Didie ke ima ekeme ndinam nnyịn ida ukem ukem ke nsio nsio ikpehe uwem nnyịn?
6 Ima edi akpan edu ke ọyọhọ ntak ita emi: Enye an̄wam nnyịn ndinam nsio nsio ikpehe uwem nnyịn ẹda ukem ukem onyụn̄ anam nnyịn inyene eti uduakesịt ke se nnyịn inamde. Ke uwụtn̄kpọ, edi akpan n̄kpọ ndikọ ifiọk Ikọ Abasi kpukpru ini. Utọ ifiọk oro etie nte udia ọnọ Christian. Emi an̄wam enye ndikọri nsịm ọyọhọ idaha nnyụn̄ nnam n̄kpọ ke n̄kemuyo ye uduak Abasi. (Psalm 119:105; Matthew 4:4; 2 Timothy 3:15, 16) Nte ededi, Paul ama odụri owo utọn̄ ete: “Ifiọk anam owo okohode idem, edi ima ọbọp owo ọkọri ke nti ido.” (1 Corinth 8:1) Baba, n̄kpọ ndomokiet ikwan̄ake ye nnennen ifiọk. Nnyịn idi mfịna—nnyịn imenyene mme ntụhọ unam idiọkn̄kpọ. (Genesis 8:21) Edieke odudu ima oro esinamde owo ada ukem ukem mîdụhe, ifiọk ekeme ndinam owo okohode idem, ekerede ke imọ imọfọn ikan mbon en̄wen. Oro iditịbeke edieke edide ima enen̄ede onụk enye. “Ima inamke inua, ikohokede idem.” (1 Corinth 13:5) Christian oro ima onụkde isikohokede idem, ọkpọkọm enye enyenyene ntotụn̄ọ ifiọk. Ima anam enye osụhọde idem inyụn̄ iyakke enye oyom ndinam enyịn̄ nnọ idemesie.—Psalm 138:6; James 4:6.
7, 8. Didie ke ima an̄wam nnyịn ndiwụk ntịn̄enyịn ke se ifọnde ikan?
7 Paul ekewet ọnọ mbon Philippi ete: “Mmeben̄e ntem nte, ima mbufo akpakam ọdọdiọn̄ awak ke ifiọk ye kpukpru ikike; man mbufo ẹkeme ndidomo mfiọk se ifọnde ikan.” (Philippi 1:9, 10) Ima Christian ayan̄wam nnyịn nditiene nsịnudọn̄ ẹnọde mi ẹte idomo ifiọk se ifọnde ikan. Ke uwụtn̄kpọ, kere ban̄a mme ikọ oro Paul ekewetde ọnọ Timothy: “Edieke owo ekededi anyanarede ebịne itieutom esenyịn, enye oyom eti utom.” (1 Timothy 3:1, NW) Ke isua utom 2000, ibat esop ke ofụri ererimbot ama ada 1,502 awak akan nte ekedide, anamde obufa ofụri ibat edi 91,487. Ntem, ẹnen̄ede ẹyom mbiowo efen efen, ndien ẹnyene nditoro mbon oro ẹnyanarede ẹbịne ifetutom oro.
8 Nte ededi, mbon oro ẹnyanarede ẹbịne mme ifet edise enyịn ẹyeka iso ẹda ukem ukem edieke mmọ ẹnyenede uduak utọ ifetutom oro ke ekikere. Ikpîkpu edinyene odudu m̀mê uwọrọiso idịghe se ifọnde ikan. Ima ẹnyenede ẹnọ Jehovah ye mme ekemmọ nditọete ẹsinụk mbiowo oro ẹnemde Jehovah esịt. Mmọ isiyomke uwọrọiso m̀mê odudu. Ke ama ọkọnọ mbiowo esop item ete ẹka iso ndinyene eti edu, Apostle Peter ama ọsọn̄ọ etịn̄ ufọn “nsụkidem.” Enye ama ọnọ kpukpru owo ke esop item ete: “Ẹsụhọde idem . . . ke idak ọkpọsọn̄ ubọk Abasi.” (1 Peter 5:1-6) Owo ekededi emi anyanarede ebịne ifetutom ayanam ọfọn ndikere mban̄a uwụtn̄kpọ anana-ibat mbiowo ke ofụri ererimbot oro ẹnamde utom ọkpọsọn̄, ẹsụhọrede idem, ndien ke ntre ẹdide edidiọn̄ ẹnọ esop mmọ.—Mme Hebrew 13:7.
Eti Uduakesịt An̄wam Nnyịn Ndiyọ
9. Ntak emi mme Christian ẹnyenede nditi mme edidiọn̄ oro Jehovah ọn̄wọn̄ọde?
9 Ẹkụt ufọn edidi se ima onụkde ke usụn̄ efen. Bible ọn̄wọn̄ọ uwak edidiọn̄ idahaemi ye mme utịbe utịbe edidiọn̄ ini iso oro inua mîkemeke nditịn̄ ọnọ mbon oro ẹnyenede uten̄e Abasi ke ntak ima. (1 Timothy 4:8) Ẹn̄wam Christian emi ọsọn̄ọde enịm mme un̄wọn̄ọ emi ke akpanikọ onyụn̄ enịmde ete ke Jehovah “edi Andinọ mmọ emi ẹyomde Enye utịp” ndika iso nsọn̄ọ nda ke mbuọtidem. (Mme Hebrew 11:6) Ọdọn̄ ata ediwak nnyịn ndikụt nte mme un̄wọn̄ọ Abasi ẹsude imesinyụn̄ itịn̄ mme ikọ apostle John emi: “Amen. Di, Ọbọn̄ Jesus.” (Ediyarade 22:20) Ih, nditie n̄kere mme edidiọn̄ oro ẹnade ẹbet nnyịn edieke nnyịn inamde akpanikọ esisọn̄ọ nnyịn idem ndiyọ, ukem nte nditi “idatesịt eke anade Enye ke iso” akan̄wamde Jesus ndiyọ.—Mme Hebrew 12:1, 2.
10, 11. Didie ke ndidi se ima onụkde an̄wam nnyịn ndiyọ?
10 Nte ededi, nso edieke akpan uduakesịt nnyịn ke ndinam n̄kpọ Jehovah edide udọn̄ nnyịn ndidu uwem ke obufa ererimbot? Do nnyịn imekeme ndinana ime mmemmem mmemmem m̀mê itre ndikop uyụhọ ke ini mme n̄kpọ ẹsọn̄de m̀mê mme n̄kpọ mîtịbeke nte nnyịn ikodoride enyịn m̀mê ke ini nnyịn ikodoride enyịn. Nnyịn imekeme ndinen̄ede ndu ke itiendịk edifiọrọ n̄kpọn̄ usụn̄. (Mme Hebrew 2:1; 3:12) Paul ama etịn̄ aban̄a akani nsan̄a esie emi ekekerede Demas, emi ọkọkpọn̄de enye. Ntak-a? Koro “enye amade eyo emi odude ke emi.” (2 Timothy 4:10) Owo ekededi emi anamde n̄kpọ Abasi ke ntak ibụk odu ke itiendịk edinam ukem oro. Mme ifet oro ẹnọde idahaemi ke ererimbot ẹkeme ndidụri mmọ nda onyụn̄ anam mmọ ẹsịn ndinam n̄waidem idahaemi kaban̄a idotenyịn edibọ mme edidiọn̄ oro ẹdide.
11 Ke adan̄aemi ọfọnde onyụn̄ edide ndammana n̄kpọ ndinyene udọn̄ ndibọ mme edidiọn̄ ini iso ye ubọhọ oro ẹdoride enyịn ẹban̄a ke mme idomo, ima anam nnyịn ifiọk se ikpedide ebeiso n̄kpọ ke uwem nnyịn. Uduak Jehovah edi akpan n̄kpọ, idịghe eke nnyịn. (Luke 22:41, 42) Ih, ima ananam nnyịn ikọri. Enye anam nnyịn inyịme ndibet Abasi ke ime, iyụhọde ye edidiọn̄ ekededi oro enye ọnọde inyụn̄ inyenede mbuọtidem nte ke edikem ini esie nnyịn iyọbọ kpukpru se enye ọkọn̄wọn̄ọde ndinọ—ye ediwak n̄kpọ efen efen. (Psalm 145:16; 2 Corinth 12:8, 9) Kan̄a ke emi, ima an̄wam nnyịn ndika iso nnam utom ye unana ibụk koro “ima . . . iyomke ufọn esiemmọ.”—1 Corinth 13:4, 5.
Mmanie ke Mme Christian Ẹkpema?
12. Nte Jesus ọkọdọhọde, mmanie ke nnyịn ikpama?
12 Jesus ama ọnọ akpan edumbet kaban̄a mbon emi nnyịn ikpamade ke ini enye okokotde udịmikọ iba oto Ibet Moses. Enye ọkọdọhọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo,” ye, “Ma mbọhọidụn̄ fo nte idem fo.”—Matthew 22:37-39.
13. Didie ke nnyịn ikeme ndikpep ndima Jehovah, idem okposụkedi nnyịn mîkemeke ndikụt enye?
13 Ana in̄wan̄ in̄wan̄ oto ikọ Jesus nte ke akande kpukpru, nnyịn ikpenyene ndima Jehovah. Nte ededi, nnyịn idahada ọyọhọ ima ẹnyenede ẹnọ Jehovah imana. Oro edi n̄kpọ oro anade nnyịn ikọkọri. Ke akpa ini emi nnyịn ikokopde iban̄a enye, se nnyịn ikokopde ama anam nnyịn ima enye. Sụn̄sụn̄, nnyịn ima ikpep nte enye eketịmde isọn̄ ọnọ ubonowo. (Genesis 2:5-23) Nnyịn ima ikpep nte enye akanamde n̄kpọ ye ubonowo, mîtopke nnyịn iduọk ke akpa ini oro idiọkn̄kpọ okodụkde ekpụk ubonowo, edi anam mme usio-ukot ndifak nnyịn. (Genesis 3:1-5, 15) Enye ama ọfọn ido ye mbon oro ẹkenamde akpanikọ, ndien ke akpatre enye ama ọnọ ikpọn̄-ikpọn̄ edibon Eyen esie man ẹfen mme idiọkn̄kpọ nnyịn. (John 3:16, 36) Ifiọk nnyịn ndikọri ntem ama anam esịtekọm oro inyenede inọ Jehovah ọkọri. (Isaiah 25:1) Edidem David ọkọdọhọ ete ke imọ ima Jehovah ke ntak ima ima edikere mban̄a Esie. (Psalm 116:1-9) Mfịn, Jehovah ekere aban̄a nnyịn, ada nnyịn usụn̄, ọsọn̄ọ nnyịn idem, onyụn̄ esịn udọn̄ ọnọ nnyịn. Adan̄a nte nnyịn ikpepde iban̄a enye, ntre ke ima nnyịn otụn̄ọ akan.—Psalm 31:23; Zephaniah 3:17; Rome 8:28.
Didie ke Nnyịn Ikeme Ndiwụt Ima Nnyịn?
14. Ke nso usụn̄ ke nnyịn ikeme ndiwụt ke ima oro nnyịn imade Abasi edi ata ima?
14 Edi akpanikọ, ediwak owo ke ofụri ererimbot ẹdọhọ ke mmimọ imama Abasi, edi nte mmọ ẹnamde n̄kpọ okpụhọde ye se mmọ ẹdọhọde. Didie ke nnyịn ikeme ndifiọk m̀mê nnyịn imenen̄ede ima Jehovah? Nnyịn imekeme nditịn̄ ikọ nnọ enye ke akam inyụn̄ isian enye nte etiede nnyịn ke idem. Ndien nnyịn imekeme ndinam n̄kpọ ke usụn̄ oro owụtde ima nnyịn. Apostle John ọkọdọhọ ete: “Owo ekededi eke enịmde ikọ [Abasi], ke akpanikọ ke ẹmenam ima Abasi ọfọn ama ke esịt esie. Nnyịn ida emi ifiọk ite idodu ke Enye.” (1 John 2:5, 6; 5:3) Ke adianade ye mme n̄kpọ eken, Ikọ Abasi asian nnyịn ete isop idem ọtọkiet inyụn̄ idu edisana uwem. Nnyịn imefep mbubịk ido, itịn̄ akpanikọ, inyụn̄ inam ekikere nnyịn asana. (2 Corinth 7:1; Ephesus 4:15; 1 Timothy 1:5; Mme Hebrew 10:23-25) Nnyịn iwụt ima ebe ke ndinọ mbon oro ẹdude ke unana un̄wam n̄kpọ obụkidem. (1 John 3:17, 18) Nnyịn inyụn̄ itreke nditịn̄ nnọ mbon efen mban̄a Jehovah. Oro esịne ndibuana ke edikwọrọ eti mbụk Obio Ubọn̄ ke ofụri ererimbot. (Matthew 24:14; Rome 10:10) Ndikop item Ikọ Abasi ke mme utọ n̄kpọ ntre edi uyarade nte ke ima oro nnyịn imade Jehovah edi ata ima.
15, 16. Didie ke ima ẹnyenede ẹnọ Jehovah okotụk ediwak owo isua oko?
15 Ndima Jehovah an̄wam mme owo ndinam nti ubiere. Isua oko, utọ ima oro ama onụk owo 288,907 ndiyak uwem mmọ nnọ enye nnyụn̄ nyarade uyakidem oro ke baptism mmọn̄. (Matthew 28:19, 20) Uyakidem mmọ ama enyene se ọwọrọde. Enye ekedi idiọn̄ọ nte ke mmọ ẹma ẹkpụhọde uwem mmọ. Ke uwụtn̄kpọ, Gazmend ekedi kiet ke otu mme ọwọrọiso nta bọl ubọk ke Albania. Ke ndusụk isua, enye ye n̄wan esie ẹma ẹkpep Bible ndien ke akpatre ẹma ẹdot ndidi mme asuanetop Obio Ubọn̄ kpa ye mme n̄kpọ ubiọn̄ọ. Isua oko, Gazmend ama ana baptism, kiet ke otu owo 366 oro ẹkenade baptism ke Albania ke isua utom 2000. N̄wedmbụk n̄kpọntịbe kiet ama emịn̄ ibuotikọ oro akaban̄ade enye ete: “Uwem esie enyene uduak, ndien ke ntak emi, enye ye ubon esie ẹdu ke ini emi mmọ ẹkopde inemesịt ẹkan ke uwem. Se enye ekemede ndinyene ke uwem idịghe aba akpan n̄kpọ inọ enye edi, utu ke oro, se idide akpa edi se enye ekemede ndinam man an̄wam mbon efen.”
16 Ukem ntre, ẹma ẹnọ eyenete an̄wan emi anade baptism obufa oro anamde utom ke usiakifia aranuwat ke Guam utom oro etiede etabi etabi. Ke ama ekenyene akamba itie ke itieutom ke ediwak isua, ẹma ẹdinọ enye ifet ndidi akpa n̄wan ndidi udiana esenyịn utom ke mbụk usiakifia oro. Nte ededi, idahaemi enye ama ayak uwem esie ọnọ Jehovah. Ntre ke ama ekeneme n̄kpọ oro ye ebe esie, obufa eyenete an̄wan oro ama esịn utom oro ndien utu ke oro enye ama anam ndutịm ndinam utom ibio ini man ekpekeme ndinam n̄kọri mbịne ndidi asan̄autom uyọhọ ini, kpa asiakusụn̄. Ima enyenede ọnọ Jehovah ama onụk enye ndiyom ndinam utom esie nte asiakusụn̄ utu ke ndibịne inyene obụkidem eke ererimbot emi. Ke akpanikọ, utọ ima oro ama onụk owo 805,205 ke ofụri ererimbot ndibuana ke nsio nsio ikpehe utom usiakusụn̄ ke isua utom 2000. Nso ima ye mbuọtidem ke mme asiakusụn̄ oro ẹkenyene ntem!
Onụk Ẹma Jesus
17. Nso eti uwụtn̄kpọ ima ke nnyịn ikụt ke Jesus?
17 Jesus edi n̄wọrọnda uwụtn̄kpọ owo oro ima okonụkde anam n̄kpọ. Ke ini edidu esie mbemiso edide owo, enye ama ama Ete esie onyụn̄ ama ubonowo. Nte ata uwụtn̄kpọ ọniọn̄, enye ama ọdọhọ ete: “Ndu [Jehovah] ke n̄kan̄, eyen emi enye ọkọde: n̄konyụn̄ ndi se idatde enye esịt ofụri usen; ndara ke iso esie kpukpru ini: Ndara mban̄a edem isọn̄ esie emi owo odụn̄de: ndien idatesịt mi odu ke otu nditọ owo.” (Mme N̄ke 8:30, 31) Ima Jesus okonụk enye ndikpọn̄ ebiet idụn̄ esie ke heaven nnyụn̄ ndimana nte anana-un̄wam nsekeyen. Enye ama enyene ime onyụn̄ ọfọn ido ye mbon nsụkidem ye mme ubuene onyụn̄ ọbọ ufen ke ubọk mme asua Jehovah. Ke akpatre, enye ama akpa ke eto ndutụhọ ọnọ ofụri ubonowo. (John 3:35; 14:30, 31; 15:12, 13; Philippi 2:5-11) Nso eti uwụtn̄kpọ edinyene eti uduak ke enye edi ntem!
18. (a) Didie ke nnyịn ikeme ndikọri ima nnọ Jesus? (b) Ke nso usụn̄ ke nnyịn iwụt nte ke nnyịn imama Jesus?
18 Ke ini mbon oro ẹnyenede eti esịt ẹkotde mbụk uwem Jesus ke mme Gospel ẹnyụn̄ ẹtiede ẹkere ẹban̄a adan̄a ediwak edidiọn̄ oro usụn̄ uwem edinam akpanikọ esie adade ọsọk mmọ, emi esinam mmọ ẹkọri ntotụn̄ọ ima ẹnọ enye. Nnyịn mfịn itie nte mbon oro Peter eketịn̄de ikọ ọnọ ke ini enye ọkọdọhọde ete: “Akanam mbufo ikwe [Jesus], edi ẹmema Enye.” (1 Peter 1:8) Nnyịn iwụt ima nnyịn ke ini nnyịn inyenede mbuọtidem ke enye inyụn̄ ikpebede usụn̄ uwem n̄waidem esie. (1 Corinth 11:1; 1 Thessalonica 1:6; 1 Peter 2:21-25) Ke April 19, 2000, ẹma ẹti ofụri ibat owo 14,872,086 ẹban̄a mme ntak oro nnyịn imade Jesus ke ini mmọ ẹkedụkde Editi n̄kpa esie eke isua ke isua. Ibat oro akawak didie ntem! Ndien ọsọn̄ọ nnyịn idem didie ntem ndifiọk nte ke ọdọn̄ ediwak owo ntre ndinyene edinyan̄a ebe ke uwa Jesus! Ke akpanikọ, ima oro Jehovah ye Jesus ẹmade nnyịn ye ima oro nnyịn imade mmọ ẹnam nnyịn ikọri.
19. Mme mbụme ewe ẹban̄ade ima ke ẹdineme ke ibuotikọ oro etienede?
19 Jesus ọkọdọhọ ke nnyịn ikpenyene ndima Jehovah ke ofụri esịt, ukpọn̄, ekikere, ye odudu nnyịn. Edi enye ama ọdọhọ n̄ko ete ke nnyịn ikpenyene ndima mbọhọidụn̄ nnyịn nte idem nnyịn. (Mark 12:29-31) Oro esịne mmanie? Ndien didie ke ima mbọhọidụn̄ an̄wam nnyịn ndika iso nda ukem ukem nnyụn̄ nnyene nnennen uduakesịt? Ẹyeneme mme mbụme emi ke ibuotikọ oro etienede.
Nte Afo Emeti?
• Ntak emi ima edide akpan edu?
• Didie ke nnyịn ikeme ndikpep ndima Jehovah?
• Didie ke edu uwem nnyịn owụt ke nnyịn imama Jehovah?
• Didie ke nnyịn ikeme ndiwụt ima emi nnyịn imade Jesus?
[Mme Mbụme Ukpepn̄kpọ]
[Mme ndise ke page 10, 11]
Ima an̄wam nnyịn itie ke ime ibet ndibọ un̄wam
[Ndise ke page 12]
Akwa uwa Jesus onụk nnyịn ndima enye