Mme Ntiense Jehovah—Ẹsan̄a Ẹka Iso Iso ye Ọkpọsọn̄ Mbuọtidem!

Ntọt Mbono Ofụri Isua

KE EYO eyịghe emi, Mme Ntiense Jehovah ẹwọrọ ẹda nte mme Christian oro ẹnyenede ọkpọsọn̄ mbuọtidem. Ẹma ẹnam emi an̄wan̄a ke mbono ofụri isua eke Watch Tower Bible and Tract Society of Pennsylvania, emi ẹkenịmde ke Ufọk Mbono Mme Ntiense Jehovah ke Jersey City, New Jersey, ke Saturday, October 7, 2000. *

Ke ntọn̄ọikọ esie, etieibuot okpokoro mbono oro, John E. Barr, owo Otu Ukara eke Mme Ntiense Jehovah, ama ọdọhọ ete: “Ke otu ediwak biliọn owo oro ẹdude ke isọn̄, nnyịn imọfiọk inyụn̄ inịm ke akpanikọ ite ke ẹdori edima Eyen Jehovah, Christ Jesus, ke ebekpo ke heaven idahaemi, akarade ke ufọt mme asua esie.” Ẹma ẹwụt uyarade utọ ọkpọsọn̄ mbuọtidem oro ke aduai-owo-idem mbụkutom itiokiet ẹtode ofụri ererimbot.

Ndida Akpanikọ Bible N̄kan Ubụpekpo ke Haiti

Ubụpekpo enen̄ede edi ọsọ edinam ke Haiti. John Norman, anam-ndutịm Kọmiti N̄kọk Itieutom ama ọdọhọ ete: “Nte ido edide, ediwak owo ẹsinam uwa ẹnọ mme ete ete man ẹkpeme idemmọ.” Abiaifọt kiet ama enyene eyịghe ke ini enye akatabade ukot kiet ke mbabuat n̄kpọntịbe. Enye ama eyịk ete: ‘Didie ke emi ekeme nditịbe nnọ mi edieke edide mme spirit ke ẹkpeme mi?’ Mme Ntiense Jehovah ẹma ẹkpep eren emi akpanikọ ẹnyụn̄ ẹn̄wam enye ekịbe ọbọhọ ubụpekpo, ukem nte ẹkekpepde ediwak mbon en̄wen. Akpanikọ oro nte ke mme owo ẹwakde utịm ikanan̄ ẹkan ibat mme asuanetop Obio Ubọn̄ ke Haiti ẹma ẹdụk Editi N̄kpa Christ ke April 19, 2000, owụt idotenyịn kaban̄a n̄kọri ke idụt oro.

Ifịk Ẹwụtde ke Akamba Efakutom Korea

Ke Korea, mbahade 40 eke ikie ke otu Mme Ntiense Jehovah ẹdu ke utom uyọhọ ini. Milton Hamilton, anam-ndutịm Kọmiti N̄kọk Itieutom ama ọdọhọ ete: “Ye akwa udịmowo emi, ẹsikụre efakutom nnyịn oro se iwakde ibe miliọn owo 47 ẹdụn̄de n̄kpọ nte ini kiet ke ọfiọn̄.” Ẹnen̄ede ẹnam n̄wọrọnda n̄kọri ke mme esop usem idiọn̄ọ. Ke circuit usem idiọn̄ọ kiet, ẹnịm ukpepn̄kpọ Bible 800. Ke ẹbaharede ukem ukem, asuanetop kiet enyene ukpepn̄kpọ kiet. Ke mfụhọ, ke ẹsụk ẹsesịn nditọete ẹdide n̄kparawa ke ufọk-n̄kpọkọbi ke ntak edida san̄asan̄a mmọ. Nte ededi, ẹsinam n̄kpọ ye mme anam-akpanikọ Christian emi nte ọfọnde, ndien ẹsiwak ndinọ mmọ utom oro oyomde owo edi se ẹbuọtde idem.

 Ndinam N̄kpọ Ekekem ye N̄kọri ke Mexico

N̄wakn̄kan ibat mme anditan̄a Obio Ubọn̄ 533,665 ẹketọt ibatutom an̄wautom ke Mexico ke August 2000. Mme owo ẹwakde utịm ikata ẹkan ibat emi ẹma ẹdụk Editi. Robert Tracy, anam-ndutịm Kọmiti N̄kọk Itieutom ama ọdọhọ ete: “Utịtmbuba nnyịn isua emi edi ndibọp Ufọkmbono Obio Ubọn̄ 240 efen efen. Enye ama adian do ete: “Kpa ye oro, nnyịn imoyom ediwak efen.”

Mme uyen ke otu Mme Ntiense Jehovah ke Mexico ẹnịm eti uwụtn̄kpọ. Oku Catholic ama etịn̄ aban̄a uyen kiet ete: “N̄kpama ndinyene owo kiet kpọt oro ebietde enye ke otu mme anditiene mi. Mmama n̄kparawa emi ke ntak ọkpọsọn̄ ubiere mmọ ye nte mmọ ẹsidade Bible ẹnam n̄kpọ ọniọn̄ ọniọn̄. Mmọ ẹda ẹnọ Abasi, idem ẹsịnde uwem mmọ ke itiendịk.”

Nsọn̄ọnda ke Ufọt Ndutịme ke Sierra Leone

Toto ke April 1991, ke ini ekọn̄ mbio obio akasiahade ke Sierra Leone, ẹmewot, ẹnọ unan, m̀mê ẹbiomo ediwak tọsịn owo ndo. Bill Cowan, anam-ndutịm Kọmiti N̄kọk Itieutom ama ọtọt ete: “Ekọn̄ ye nsọn̄ọn̄kpọ ẹmenyene akamba utịp ke idem mme owo. Ediwak mbon oro mîkenyeneke udọn̄ iban̄a etop nnyịn ẹkpan̄ utọn̄ idahaemi ye ọkpọsọn̄ udọn̄. Idịghe esen n̄kpọ mme owo oro ẹsan̄ade ke ẹfak ndiwaha ndi mme Ufọkmbono Obio Ubọn̄ nnyịn ndidụk mbono esop ke akpa ini. Ẹsiwak ndikot nditọete ke efak ẹnyụn̄ ẹben̄e ukpepn̄kpọ Bible.” Kpa ye ndutịme oro akade iso ke idụt emi, utom ukwọrọikọ Obio Ubọn̄ ke on̄wụm mfri ke Sierra Leone.

Akamba Ndutịm Ubọpn̄kpọ ke South Africa

Idahaemi, ẹyom ediwak tọsịn Ufọkmbono Obio Ubọn̄ ke efakutom oro ọfis n̄kọk itieutom ke South Africa esede aban̄a. Ẹmebọp ediwak ufọkmbono ke mme itie ikie. John Kikot, andibuana ke Kọmiti N̄kọk Itieutom ama ọdọhọ ete: “Utu ke ndisop idem ke ataya m̀mê ke idak eto, nte ẹkesinamde ke mbemiso, nditọete nnyịn ẹkeme ndisop idem ke eti itie oro nti n̄kpọitie ẹdude. Okposụkedi ata ediwak ke otu Ufọkmbono Obio Ubọn̄ emi ẹdide ukeuke, mmọ ẹsiwak ndiwọrọ nda nte mme nye-n̄kan ufọk ke n̄kann̄kụk mmọ. Ke ndusụk ebiet, ẹkụt nte ke ẹma ẹkebọp Ufọkmbono Obio Ubọn̄, esop esikọri utịm ikaba ke isua oro etienede.”

Obufa Emana Mme Ntiense ke Ukraine

Ke isua utom 2000, idụt emi ama enyene n̄wakn̄kan ibat mme asuanetop 112,720. Se iwakde ibe owo 50,000 ke otu emi ẹkekpep akpanikọ Bible ke isua ition emi ẹkebede. John Didur, anam-ndutịm Kọmiti N̄kọk Itieutom ama ọdọhọ ete: “Ke akpanikọ, Jehovah, emedemede obufa emana Mme Ntiense ẹdide mme uyen nditan̄a enyịn̄ esie!” Enye ama adian do ete: “Ke isua iba emi ẹbede, nnyịn imenịm magazine ẹwakde ẹbe miliọn 50, emi edide ukem ye ibat mme owo oro ẹdụn̄de ke idụt emi. Ọfiọn̄ kiet kiet, ke ẹbaharede ukem ukem, nnyịn imesibọ leta tọsịn kiet ito mbon oro ẹnyenede udọn̄ oro ẹyomde n̄kaiso ntọt.”

Mme Edemede-Owo-Udọn̄ Ikpehe Efen ke Edinam Oro

Daniel Sydlik, owo Otu Ukara, ama ọnọ omụm-owo-udọn̄ utịn̄ikọ. Ibuotikọ oro, “Nte Otu Ukara Okpụhọrede ye N̄ka Oro Ibet Enyịmede,” oro odude ke magazine emi, ọkọn̄ọ ke akama-ntọt utịn̄ikọ oro.

Theodore Jaracz, owo Otu Ukara ama ọnọ utịn̄ikọ emi anamde owo ekere n̄kpọ ke ibuotikọ oro edide “Ẹmek Mme Esenyịn ye Mme Asan̄autom Unamutom ke Ido Ukara Abasi.” Kiet ke otu mme ibuotikọ oro ẹdude ke magazine emi, ọkọn̄ọ ke ibuotikọ oro.

Mbono ofụri isua oro ama esịne n̄ko edemede-owo-udọn̄ utịn̄ikọ oro David Splane, owo Otu Ukara ọkọnọde kaban̄a ibuotikọ isua 2001. Ọkọn̄ọde ke mme ikọ apostle Paul, enye edi: “Ẹfọn ẹma, ẹnyụn̄ ẹtịm ẹfiọk ofụri uduak Abasi.” (Colossae 4:12) Mme Ntiense Jehovah ke ofụri ererimbot ẹbiere ndinam oro nte mmọ ke edinam akpanikọ ẹkwọrọde eti mbụk Obio Ubọn̄ Abasi ke ofụri isọn̄.—Matthew 24:14.

[Ikọ idakisọn̄]