Nte Mmọ Ẹbiọn̄ọde Mfịghe Ubọkn̄ka

UDỌN̄ ndidi se ẹnyịmede esinụk ediwak owo ndidu uwem ekekem ye ekikere ye mme edinam ubọkn̄ka mmọ. N̄kparawa owo akpan akpan ẹyom ukeme ndisịn mme edinam oro ẹnọde unan, utọ nte edida ibọk ke idiọk usụn̄ ye oburobụt ido idan̄. Didie ke mmọ ẹkeme ndisọn̄ọ mbiọn̄ọ mfịghe ubọkn̄ka?

N̄kaiferi iba ke Poland ẹma ẹwet ke ndondo emi ẹte: “Edu ererimbot emi enen̄ede odu ke otu ediwak ubọkn̄ka nnyịn. Mmọ ẹsiyịp udomo, ẹtịn̄ ndek ndek ikọ, ẹnyụn̄ ẹma n̄kon̄ine edisịnen̄kpọ ye uyom uyom, oburobụt ikwọ. Nnyịn ikop inemesịt didie ntem ndinyene mme ibuotikọ emi ẹsitịn̄de ẹban̄a nnyịn mme uyen ẹnyụn̄ ẹkpemede nnyịn ẹsio ke odudu mme uyen nsọn̄ibuot emi mîkopke uyụhọ mi!

“Inua ikemeke nditịn̄ esịtekọm oro nnyịn inyenede iban̄a mme ibuotikọ Enyọn̄-Ukpeme emi ẹnamde nnyịn ifiọk ke ẹyom ẹnyụn̄ ẹma nnyịn nte mme uyen. Item Bible oro nnyịn ibọde an̄wam nnyịn ndisan̄a nte enende man ika iso inem Jehovah Abasi esịt. Nnyịn imenịm ite ke ndinam n̄kpọ Jehovah ke edinam akpanikọ edi mfọnn̄kan usụn̄ uwem.”

Ih, n̄kparawa owo ẹkeme ndibiọn̄ọ mfịghe ubọkn̄ka. Ebede ke ndinọ “ukeme ikike” mmọ ukpep, mme uyen Christian ẹkpep ndinam nti ubiere oro mîwụtke “spirit ererimbot emi” edi, utu ke oro, owụtde “spirit emi otode Abasi.”—Mme Hebrew 5:14, NW; 1 Corinth 2:12.