San̄a Ikpat Kiet ye Esop Jehovah
San̄a Ikpat Kiet ye Esop Jehovah
“Abasi emem . . . akpakam ọnọ mbufo kpukpru nti n̄kpọ ẹda ẹnam se Enye amade.”—MME HEBREW 13:20, 21.
1. Nso idi ibat mme andidụn̄ ererimbot, ndien owo ifan̄ ẹdi mme andibuana ke ndusụk ido ukpono?
KE ISUA 1999, ibat mme andidụn̄ isọn̄ ama esịm biliọn owo itiokiet! The World Almanac owụt nte ke n̄kpọ nte owo 1,165,000,000 ke otu ibat emi ẹdi mbon Muslim; 1,030,000,000 ẹdi mbon Roman Catholic; 762,000,000 ẹdi mbon Hindu; 354,000,000 ẹdi mbon Buddha; 316,000,000 ẹdi mbon Protestant; 214,000,000 ẹnyụn̄ ẹdi mbon Orthodox.
2. Nso ke ẹkeme nditịn̄ mban̄a idaha ido ukpono oro odude mfịn?
2 Ke ikerede iban̄a ubahade ye ndutịme ido ukpono oro ẹdude mfịn, nte kpukpru miliọn owo emi ẹkeme ndinam n̄kpọ ke n̄kemuyo ye uduak Abasi? Baba, “koro Abasi idịghe Abasi ndutịme, edi edi Abasi emem.” (1 Corinth 14:33) Ke n̄kan̄ eken, nso kaban̄a otu nditọete ofụri ererimbot eke mme asan̄autom Jehovah? (1 Peter 2:17) Ndụn̄ọde ntịn̄enyịn owụt nte ke ‘Abasi emem ọnọ mmọ kpukpru nti n̄kpọ ẹda ẹnam se Enye amade.’—Mme Hebrew 13:20, 21.
3. Nso iketịbe ke Jerusalem ke Pentecost 33 E.N., ndien ntak-a?
3 Ke akpanikọ, ibat mbon oro ẹbuanade ye Mme Ntiense Jehovah idịghe n̄kpọ ndida mbiere m̀mê mmọ ẹnyene mfọn Abasi; m̀mê uwak ibat owo ndinam Abasi enem esịt. Enye ikemekke nditọ Israel koro mmọ “ẹkewakde ẹkan” kpukpru mme idụt. Ke akpanikọ, mmọ ẹma ‘ẹkpri ẹkan’ kpukpru mme idụt. (Deuteronomy 7:7) Edi ke ntak oro Israel mîkanamke akpanikọ, ke Pentecost 33 E.N., Jehovah ama ọwọn̄ọde mfọn esie ọnọ obufa esop oro mme anditiene Jesus Christ ẹkenamde. Ẹma ẹyet mmọ aran ke edisana spirit Jehovah ndien mmọ ẹma ẹwọrọ ẹka nditan̄a akpanikọ aban̄ade Abasi ye Christ nnọ mbon efen ifịk ifịk.—Utom 2:41, 42.
Ndisan̄a N̄ka Iso Iso Kpukpru Ini
4. Ntak emi afo ọkpọdọhọde nte ke akpa esop Christian akasasan̄a aka iso iso kpukpru ini?
4 Ke akpa isua ikie, esop Christian akasasan̄a aka iso kpukpru ini, ebererede mbufa efakutom, anamde mme mbet, onyụn̄ etịmde ọfiọk uduak Abasi. Mme akpa Christian ẹkesan̄a ikpat kiet ye un̄wana eke spirit oro ẹkenọde ẹbe ke mme leta eke odudu spirit Abasi. Ke ẹbọde nsịnudọn̄ ẹto mme apostle ye mbon efen oro ẹkesikade ẹkese mmọ, mmọ ẹma ẹnam utom mmọ ẹma. Ẹtịm ẹwet emi ke N̄wed Abasi Christian Usem Greek.—Utom 10:21, 22; 13:46, 47; 2 Timothy 1:13; 4:5; Mme Hebrew 6:1-3; 2 Peter 3:17, 18.
5. Ntak emi esop Abasi asan̄ade-san̄a aka iso iso mfịn, ndien ntak emi nnyịn ikpasan̄ade ikpat kiet ye enye?
5 Ukem nte mme akpa Christian, Mme Ntiense Jehovah eke eyomfịn ẹmekọri ẹto ke ekpri ntọn̄ọ. (Zechariah 4:8-10) Ọtọn̄ọde ke utịt utịt ọyọhọ isua ikie 19, in̄wan̄ in̄wan̄ uyarade odu nte ke spirit Abasi odu ye esop esie. Sia nnyịn mîberike edem ke odudu owo, edi iberide ke ndausụn̄ edisana spirit, nnyịn imaka iso ndikọri ke ifiọk N̄wed Abasi ye ke edinam uduak Abasi. (Zechariah 4:6) Idahaemi nnyịn idude ke “ukperedem ini” mi, edi akpan n̄kpọ nte nnyịn isan̄a ikpat kiet ye esop Jehovah oro asan̄ade-san̄a aka iso iso. (2 Timothy 3:1-5) Ndinam ntre an̄wam nnyịn ika iso inyene idotenyịn inyụn̄ ibuana ke ndinọ ikọ ntiense mban̄a Obio Ubọn̄ Abasi oro ẹma ẹkewowụk mbemiso editịm n̄kpọ emi esịmde ata-utịt.—Matthew 24:3-14.
6, 7. Ewe ikpehe ita oro esop Jehovah asan̄ade aka iso iso ke nnyịn idikere iban̄a?
6 Mbon oro ẹketọn̄ọde ndibuana ye esop Jehovah ke mme iduọk isua 1920, 1930, ye 1940 ẹdu ke otu nnyịn. Ke mme ntọn̄ọ ntọn̄ọ isua oro, anie ke otu nnyịn ekpekekeme ndikere mban̄a n̄wọrọnda n̄kọri ye n̄kaiso edinen̄ede ke esop tutu esịm mfịn? Kere ban̄a mme akpan n̄kpọntịbe oro ẹdade itie ke mbụk nnyịn eyomfịn! Ke akpanikọ, ọnọ uyụhọ ke n̄kan̄ eke spirit nditie n̄kere se Jehovah adade ikọt esie oro ẹtịmde ke ido ukara Abasi anam.
7 Ama enen̄ede otụk David eke eset ke idem ke ini enye ekekerede aban̄a mme utịbe utom Jehovah. Enye ama ọdọhọ ete: “Mmoyom ndisiak nnyụn̄ mbụk mmọ, edi mmọ ẹkan nte ẹbatde.” (Psalm 40:5) Nnyịn imanana ukeme ntre, sia nnyịn mîkemeke ndibụk ediwak ikpọ edinam Jehovah oro ẹdotde itoro ke eyo nnyịn. Nte ededi, ẹyak nnyịn ikere iban̄a ikpehe ita oro esop Jehovah asan̄ade-san̄a aka iso: (1) n̄kaiso un̄wana eke spirit, (2) utom ukwọrọikọ oro ẹforide ẹnyụn̄ ẹtatde, ye (3) ekemini edinen̄ede ke mme usụn̄ unam n̄kpọ ke esop.
Ndiwụt Esịtekọm Mban̄a Un̄wana eke Spirit
8. Nte ekemde ye Mme N̄ke 4:18, nso ke un̄wana eke spirit an̄wam nnyịn ndifiọk mban̄a Obio Ubọn̄?
8 Kaban̄a n̄kaiso un̄wana eke spirit, Mme N̄ke 4:18 edi akpanikọ. Enye ọdọhọ ete: “Usụn̄ nti owo ebiet un̄wana eke asiahade, aka iso ayama, tutu esịm ufọt uwemeyo.” Nnyịn iwụt esịtekọm didie ntem iban̄a n̄kaiso un̄wana eke spirit oro nnyịn inyenede! Ke mbono Cedar Point, Ohio, ke 1919, ẹma ẹnam Obio Ubọn̄ Abasi an̄wan̄a. Jehovah ada Obio Ubọn̄ oro anam enyịn̄ esie asana onyụn̄ owụt unen itie edikara esie. Ke akpanikọ, un̄wana eke spirit an̄wam nnyịn ndifiọk nte ke ọtọn̄ọde ke Genesis tutu esịm Ediyarade, Bible ọsọn̄ọ etịn̄ aban̄a uduak Jehovah ndinam enyịn̄ esie asana ebe ke Obio Ubọn̄ emi Eyen esie akarade. Edi do ke utịbe utịbe idotenyịn kpukpru mme andima edinen ido ọkọn̄ọ.—Matthew 12:18, 21.
9, 10. Ke mme iduọk isua 1920, nso ke ẹkefiọk ẹban̄a Obio Ubọn̄ ye esop iba oro ẹdude ke ntuaha, ndien didie ke emi edi n̄kpọ un̄wam?
9 Ke mbono Cedar Point ke 1922, akpan etịn̄ikọ, J. F. Rutherford, ama esịn udọn̄ ọnọ ikọt Abasi ete “ẹtan̄a, ẹtan̄a, ẹtan̄a, Edidem ye obio ubọn̄ esie.” Ke ibuotikọ oro “Birth of the Nation,” (Emana Idụt) oro ẹkemịn̄de ke Enyọn̄-Ukpeme (Ikọmbakara) eke March 1, 1925, ẹma ẹdụri ntịn̄enyịn ẹwụt ikike eke spirit kaban̄a mme ntịn̄nnịm ikọ oro ẹkenyande ubọk ẹwụt ediwụk Obio Ubọn̄ Abasi ke 1914. Ẹma ẹfiọk n̄ko ke mme iduọk isua 1920 nte ke esop iba ẹdu oro ẹdude ke ntuaha—esop Jehovah ye esop Satan. En̄wan ke aka iso ke ufọt mmọ, ndien nnyịn ididu ke n̄kan̄ oro akande edieke ikade iso ndisan̄a ikpat kiet ye esop Jehovah.
10 Didie ke utọ un̄wana eke spirit oro an̄wam nnyịn? Sia Obio Ubọn̄ Abasi ye Edidem Jesus Christ mîdịghe eke ererimbot, nnyịn inyụn̄ ikemeke ndidi eke ererimbot. Ke ndida san̄asan̄a n̄kpọn̄ ererimbot, nnyịn iwụt nte ke nnyịn ida inọ akpanikọ. (John 17:16; 18:37) Ke ini nnyịn ikụtde ikpọ mfịna oro ẹnọmọde idiọk editịm n̄kpọ emi, nnyịn iwụt esịtekọm didie ntem nte ke nnyịn idịghe ubak esop Satan! Ndien nnyịn inyene mfọniso didie ntem ndinyene ukpeme eke spirit ke esop Jehovah!
11. Nso enyịn̄ N̄wed Abasi ke ikọt Abasi ẹkenyịme ke 1931?
11 Ke mbono Columbus, Ohio, ke 1931, ẹma ẹnam Isaiah 43:10-12 an̄wan̄a ke usụn̄ oro odotde. Nditọ Ukpepn̄kpọ Bible ẹma ẹnyịme san̄asan̄a enyịn̄ oro Mme Ntiense Jehovah. Nso akwa ifet ke edi ntem ndinam ẹdiọn̄ọ enyịn̄ Abasi man mbon efen ẹkeme ndikot enye man ẹnyene edinyan̄a!—Psalm 83:18; Rome 10:13.
12. Nso un̄wana eke spirit aban̄ade akwa otuowo ke ẹkenọ ke 1935?
12 Mbemiso mme iduọk isua 1930, ediwak ke otu ikọt Abasi ẹma ẹnyene ndusụk eyịghe ẹban̄a idotenyịn uwem ini iso mmọ. Ndusụk mmọ ẹma ẹkere ẹban̄a uwem eke heaven, edi mme ukpepn̄kpọ Bible ẹban̄ade paradise isọn̄ ẹma ẹdemede mmọ udọn̄. Ke mbono Washington, D.C., ke 1935, ekedi n̄kpọ nduaidem ndifiọk nte ke akwa udịmowo, m̀mê akwa otuowo, eke Ediyarade ibuot 7 edi otu oro enyenede idotenyịn eke isọn̄. Ọtọn̄ọde ke ini oro, editan̄ akwa otuowo mbok ke aka iso usọp usọp akan nte akanam edide. Nte nnyịn iwụtke esịtekọm nte ke akwa otuowo idịghe ndịben̄kpọ inọ nnyịn? Akpanikọ oro nte ke ẹtan̄ akwa ibat owo ke kpukpru idụt, esien, ye usem ẹbok onụk nnyịn ndinam utom ifịk ifịk nte nnyịn isan̄ade ikpat kiet ye esop Jehovah.
13. Nso akpan eneni ke ẹkenam an̄wan̄a ke akamba mbono St. Louis ke 1941?
13 Ẹma ẹwụt akpan eneni oro ekpebehede n̄ka owo ke akamba mbono St. Louis, Missouri, ke 1941. Enye edi eneni aban̄ade ukara, m̀mê itie edikara ofụri ekondo. Emi edi eneni oro anade ẹbiere usọp usọp, ndien akwa ye enyene-ndịk usen oro ẹdibierede enye enen̄ede asan̄a ekpere! Se ẹkenamde an̄wan̄a n̄ko ke 1941 ekedi eneni aban̄ade nsọn̄ọnda oro enyenede ebuana ye eneni itie edikara Abasi, emi ayakde nnyịn iwụt n̄kan̄ emi nnyịn owo kiet kiet idade ke ebuana ye itie edikara Abasi.
14. Ke akamba mbono ofụri ererimbot ke 1950, nso ke ẹkefiọk ẹban̄a mbọn̄ oro ẹtịn̄de ẹban̄a ke Isaiah 32:1, 2?
14 Ke akamba mbono ofụri ererimbot eke 1950 ke New York City, ẹma ẹnam ẹdiọn̄ọ mbon emi mbọn̄ eke Isaiah 32:1, 2 ẹdide nnennen nnennen. Ama akama nduaidem ke ini Brọda Frederick Franz eketịn̄de ikọ ke ibuot nneme emi onyụn̄ anamde an̄wan̄a nte ke mbọn̄ obufa isọn̄ ẹdu ke otu nnyịn. Ke mbono oro ye mme mbono oro ẹketienede, ẹma ẹnyene akpakịp un̄wana eke spirit. (Psalm 97:11) Nnyịn iwụt esịtekọm didie ntem nte ke usụn̄ nnyịn “ebiet un̄wana eke asiahade, aka iso ayama”!
Ndisan̄a N̄ka Iso Iso ke Utom Ukwọrọikọ Nnyịn
15, 16. (a) Didie ke nnyịn ikasan̄a ika iso iso ke utom ukwọrọikọ nnyịn ke iduọk isua 1920 ye 1930? (b) Mme n̄wed ewe ẹsịn odudu ke utom ukwọrọikọ Christian ke iduọk isua eke ndondo emi?
15 Ọyọhọ usụn̄ iba oro esop Jehovah asan̄ade aka iso iso enyene n̄kpọ ndinam ye akpan utom nnyịn—edikwọrọ Obio Ubọn̄ ye edinam mbet. (Matthew 28:19, 20; Mark 13:10) Man inam utom emi ima, esop ọsọn̄ọ etịn̄ aban̄a ufọn editat utom ukwọrọikọ nnyịn. Ke 1922, ẹma ẹsịn udọn̄ ẹnọ kpukpru Christian ndibuana ke utom ukwọrọikọ. Ekedi mbiomo owo kiet kiet ndinam un̄wana esie ayama ndien ke ntem enyenede ọkpọkpọ ebuana ke nditie ntiense nnọ akpanikọ. (Matthew 5:14-16) Ke 1927, ẹma ẹnam mme usio-ukot ndisio Sunday nnịm san̄asan̄a nnọ utom an̄wautom. Ọtọn̄ọde ke February 1940, ama akabade edi ọsọ n̄kpọ ndikụt Mme Ntiense ke mme efak mbubehe ẹnọde Enyọn̄-Ukpeme ye Consolation (idahaemi Awake!).
16 Ẹma ẹsio ekpri n̄wed Model Study ke 1937, ọsọn̄ọde etịn̄ ufọn edinam mme mfiakn̄ka man ẹkpep mbon efen akpanikọ Bible. Ke mme isua oro ẹketienede, ẹma ẹsọn̄ọ ẹtịn̄ ẹban̄a utom ukpepn̄kpọ Bible. Ẹma ẹsịn odudu ke ikpehe utom emi ebe ke ndisio n̄wed “Yak Abasi Edi Akpanikö” ke 1962 ye Akpanikö oro Adade osim Nsinsi Uwem ke 1969. Idahaemi, nnyịn ikama n̄wed Ifiọk Oro Adade Osịm Nsinsi Uwem. Edikpep mme utọ n̄wed oro n̄kụre esịn eti itiat idakisọn̄ oro ọkọn̄ọde ke N̄wed Abasi ọnọ edinam mme mbet.
Ndisan̄a N̄ka Iso Iso ye Edinen̄ede Mme Usụn̄ Unam N̄kpọ ke Esop
17. Nte ekemde ye Isaiah 60:17, didie ke esop Jehovah asan̄a aka iso iso?
17 Ọyọhọ usụn̄ ita emi esop Jehovah asan̄ade aka iso iso enyene n̄kpọ ndinam ye edinen̄ede mme usụn̄ unam n̄kpọ ke esop. Nte ekemde ye Isaiah 60:17, Jehovah ama ọn̄wọn̄ọ ete: “Nyada gold ndinịm ke itie okpoho, nyada silver ndinịm ke itie ukwak, ye okpoho ke itie eto, ye ukwak ke itie itiat: ndien nyanam mbọn̄ fo ẹdi emem, nyonyụn̄ nnam mme andikara fi ẹdi edinen ido.” Nte ekemde ye ntịn̄nnịm ikọ emi, ẹnam mme usio-ukot ndifori edise enyịn ke utom ukwọrọikọ Obio Ubọn̄ ye edibọk otuerọn̄.
18, 19. Mme edinen̄ede ewe ke ẹnam ke usụn̄ unam n̄kpọ ke esop ke ediwak isua emi ẹbede?
18 Ke 1919 ẹma ẹmek eseutom ke esop kiet kiet oro ẹkeyomde ẹtịm mmimọ kaban̄a utom an̄wautom. Emi ama esịn odudu ke utom an̄wautom nnyịn. Ẹma ẹtre ndimek mbiowo ye mme deacon ebe ke edimenede ubọk ke 1932, anamde ẹdiọn̄ọ ke nnyịn imọwọrọ ikpọn̄ ido ukara mbio obio. Akpan n̄kpọntịbe efen ama ada itie ke 1938 ke ini ẹketọn̄ọde ndimek kpukpru asan̄autom ke esop nte ekemde ye ndutịm edimek eke ukara Abasi ke esop Christian eke akpa isua ikie. (Utom 14:23; 1 Timothy 4:14) Ke 1972 ẹma ẹmek mme esenyịn ye mme asan̄autom unamutom ndinam utom, nte utọ iren oro ẹkesinamde utom ke otu mme akpa Christian. Utu ke ndiyak owo kiet anam utom nte esenyịn ke esop, Philippi 1:1 ye mme itien̄wed Abasi eken ẹwụt nte ke mbon oro ẹsịmde mme n̄kpọ N̄wed Abasi oro ẹyomde man ẹdi mme esenyịn ẹnam otu mbiowo.—Utom 20:28; Ephesus 4:11, 12.
19 Ke 1975 ẹma ẹtọn̄ọ ndutịm ndinam mme kọmiti Otu Ukara eke Mme Ntiense Jehovah ẹse enyịn ke utom esop Abasi ke ofụri ererimbot. Ẹma ẹmek mme Kọmiti N̄kọk Itieutom ndise enyịn ke utom ke nsio nsio efakutom mmọ. Ọtọn̄ọde ke ini oro, ẹnọ ntịn̄enyịn ke ndinam utom efere ke ibuot itieutom ye ke mme n̄kọk itieutom Watch Tower Society man ‘ẹdomo ẹfiọk se ifọnde ikan.’ (Philippi 1:9, 10) Mme mbiomo oro ẹdorode mme udiana ekpemerọn̄ ke afara ẹbuana edida usụn̄ ke utom ukwọrọikọ, edinọ ukpep ke esop, ye editịm mbọk otuerọn̄ Abasi.—1 Timothy 4:16; Mme Hebrew 13:7, 17; 1 Peter 5:2, 3.
Ifịk Ifịk Ndausụn̄ Jesus
20. Ndisan̄a ikpat kiet ye esop Jehovah oyom nnyịn ifiọk nso iban̄a ifetutom Jesus?
20 Ndisan̄a ikpat kiet ye esop Jehovah oro asan̄ade aka iso iso oyom nnyịn ifiọk ifetutom oro Abasi ọnọde Jesus Christ nte ‘Ibuot ufọk Abasi.’ (Ephesus 5:22, 23) Odot ẹtịm ẹfiọk n̄ko Isaiah 55:4, emi ẹsiande nnyịn ẹte: “Sese, [ami Jehovah] mmenịm enye ke ntiense mme idụt, ọbọn̄ ye etubom mme idụt.” Jesus enen̄ede ọfiọk ndida usụn̄. Enye n̄ko ọfiọk mme erọn̄ esie ye utom mmọ. Ke akpanikọ, ke ini enye akakade ekese esop itiaba ke Asia Minor, enye ama ọdọhọ utịm ikotion ete: “Mmọfiọk mme utom fo.” (Ediyarade 2:2, 19; 3:1, 7, 15) Jesus n̄ko ọfiọk se inanade nnyịn, kpa nte Ete esie, Jehovah, ọfiọkde. Mbemiso ọkọnọde Akam Uwụtn̄kpọ, Jesus ama ọdọhọ ete: “Ete mbufo ọmọfiọk n̄kpọ eke ẹnanade mbufo, ndien mbufo ẹdiben̄e Enye.”—Matthew 6:8-13.
21. Didie ke ẹkụt ndausụn̄ Jesus mfịn ke esop Christian?
21 Didie ke Jesus ada usụn̄? Usụn̄ kiet ebe ke mme esenyịn Christian, kpa “mme enọ ke owo.” (Ephesus 4:8, NW) Ediyarade 1:16 owụt mme esenyịn oro ẹyetde aran nte ẹsịnede ke ubọk nnasia Christ, ke idak ndausụn̄ esie. Mfịn, Jesus ọnọ mbiowo ndausụn̄, edide utọ iren oro ẹnyene idotenyịn eke heaven m̀mê eke isọn̄. Nte ẹkenamde an̄wan̄a ke ibuotikọ oro ekebemde iso, edisana spirit emek mmọ ke n̄kemuyo ye mme n̄kpọ N̄wed Abasi oro ẹyomde. (1 Timothy 3:1-7; Titus 1:5-9) Ke akpa isua ikie, otu mbiowo ke Jerusalem ẹkenam otu ukara oro ekesede enyịn aban̄a mme esop ye utom ukwọrọikọ Obio Ubọn̄ ke ofụri ofụri. Ẹtiene ukem uwụtn̄kpọ oro ke esop Jehovah mfịn.
San̄a Ikpat Kiet!
22. Nso un̄wam ke Otu Ukara esinọ?
22 Ẹyak mme ufọn n̄kpọ Obio Ubọn̄ ke isọn̄ ẹnọ “asan̄autom emi anamde akpanikọ, onyụn̄ enyenede ọniọn̄,” emi Otu Ukara eke Mme Ntiense Jehovah adade ke ibuot esie. (Matthew 24:45-47) Otu Ukara enyene udọn̄ akpan akpan ke ndinọ esop Christian item ye ndausụn̄ eke spirit. (Utom 6:1-6) Nte ededi, ke ini mme oto-obot afanikọn̄ ẹnọmọde mme ekemmọ andituak ibuot, Otu Ukara esidọhọ n̄ka m̀mê mme n̄ka oro ibet enyịmede ẹnọ un̄wam ẹnyụn̄ ẹdiọn̄ m̀mê ẹbọp mme ufọk ye mme Ufọkmbono Obio Ubọn̄ oro ẹbiarade. Edieke ẹnamde n̄kpọ nsọn̄ido nsọn̄ido ye ndusụk Christian m̀mê ẹkọbọde mmọ, ẹsinam mme usio-ukot ndisọn̄ọ mmọ idem ke n̄kan̄ eke spirit. Ndien “ke ini afanikọn̄,” ẹsisịn ofụri ukeme ndinam utom ukwọrọikọ aka iso.—2 Timothy 4:1, 2, NW.
23, 24. Inamke n̄kpọ m̀mê nso ke ikọt esie ẹsobo, nso ke Jehovah esinọ kpukpru ini, ndien nso ikpedi ubiere nnyịn?
23 Inamke n̄kpọ m̀mê nso ke ikọt esie ẹsobo, Jehovah esinọ udia eke spirit ye ndausụn̄ oro ẹyomde kpukpru ini. Abasi n̄ko esinọ nditọete emi ẹkamade utom ọniọn̄ ye ikike nditịm idem nnọ n̄kaiso n̄kọri ye mme edinen̄ede ke ndutịm ukara Abasi. (Deuteronomy 34:9; Ephesus 1:16, 17) Ye unana edikpu, Jehovah esinọ se nnyịn iyomde man inam utom ukwọrọikọ nnyịn ke ofụri ererimbot.—2 Timothy 4:5.
24 Nnyịn imenyene ọyọhọ mbuọtidem nte ke Jehovah idikpọn̄ke mme anam-akpanikọ ikọt esie tutu amama; enye ayanyan̄a mmọ ke “akwa ukụt” emi edide. (Ediyarade 7:9-14; Psalm 94:14; 2 Peter 2:9) Nnyịn imenyene kpukpru ntak ndisọn̄ọ mmụm mbuọtidem oro nnyịn ikenyenede ke editọn̄ọ n̄kama tutu esịm akpatre. (Mme Hebrew 3:14) Ke ntre, ẹyak nnyịn ibiere ndisan̄a ikpat kiet ye esop Jehovah.
Didie ke Afo Ọkpọbọrọ?
• Ntak emi nnyịn ikemede ndidọhọ nte ke esop Jehovah asasan̄a aka iso iso?
• Nso uyarade idu nte ke ikọt Abasi ẹnyene n̄kaiso un̄wana eke spirit?
• Didie ke ẹfori utom ukwọrọikọ Christian?
• Mme ekemini edinen̄ede ewe ke ẹnam ke usụn̄ unam n̄kpọ ke esop ke otu mme asan̄autom Jehovah?
[Mme Mbụme Ukpepn̄kpọ]
[Ndise ke page 17]
Ukem nte David, nnyịn ikemeke ndibụk kpukpru utịbe utom Jehovah
[Ndise ke page 18]
Otuerọn̄ Abasi ẹbọ ufọn ẹto mme ekemini edinen̄ede ke usụn̄ unam n̄kpọ ke esop