San̄asan̄a Ntọt

KE UTỊT mbono ofụri isua eke Watch Tower Bible and Tract Society of Pennsylvania ke October 7, 2000, etieibuot okpokoro mbono oro, John E. Barr eke Otu Ukara, ama ọnọ san̄asan̄a ntọt. Ntọt emi ọkọkọn̄ọ ke mme utịn̄ikọ oro Theodore Jaracz ye Daniel Sydlik ẹkenọde mbemiso ke usen oro.—Se page 12-16 ye 28-31 ke magazine emi.

Ke anamde akpan n̄kpọ ọwọrọ ada, Brọda Barr ama ọdọhọ ete: “Ẹyak utom emi okponde akan onyụn̄ enen̄erede esịne n̄kpọ akan enye oro ẹnọde mme n̄ka oro ibet enyịmede ẹnọ ‘asan̄autom emi anamde akpanikọ, onyụn̄ enyenede ọniọn̄’ ye Otu Ukara esie. Mme n̄kpọ oro ẹwetde ke n̄wed ediomi utọ n̄ka oro kiet kiet ẹdi mme n̄kpọ emi ẹnyenede-nyene adan̄a. Nte ededi, Eteufọk nnyịn, Jesus Christ, enịm otu asan̄autom emi anamde akpanikọ ndikara kpukpru ‘inyene,’ m̀mê mme ufọn n̄kpọ Obio Ubọn̄ esie mi ke isọn̄.”—Matthew 24:45-47.

Ke etịn̄de aban̄a n̄ka Pennsylvania, Brọda Barr ama adian do ete: “Tọn̄ọ nte ẹketọn̄ọ enye ke 1884, Watch Tower Bible and Tract Society of Pennsylvania enyene akpan udeme ke mbụk nnyịn eyomfịn. Kpa ye oro, enye n̄kukụre edi n̄kpọ utom oro ibet enyịmede oro odude ọnọ ‘asan̄autom emi anamde akpanikọ, onyụn̄ enyenede ọniọn̄’ ndida nnam n̄kpọ ke ini oro edide se ẹyomde.”

Ke utịn̄ikọ mmọ, Brọda Sydlik ye Jaracz ẹma ẹnam an̄wan̄a nte ke akpanikọ oro nte ke ẹyak kpukpru inyene Ọbọn̄ ẹnọ “asan̄autom emi anamde akpanikọ, onyụn̄ enyenede ọniọn̄” ikpanke otu asan̄autom oro ndiyak irenowo oro ẹdotde ke otu “mme erọn̄ en̄wen” ndise mban̄a ndusụk ndutịm utịm utom ofụri ini. (John 10:16) M̀mê ntak N̄wed Abasi ekededi ndidu nte ke ana kpukpru owo m̀mê owo ekededi ke otu mme eseutom n̄ka oro ibet enyịmede emi Mme Ntiense Jehovah ẹdade ẹnam n̄kpọ ẹdi mme Christian oro ẹyetde aran.

Brọda Barr ama asian otuowo nte ke ndondo emi, ndusụk mbon Otu Ukara eke Mme Ntiense Jehovah emi ẹkenamde utom nte mme eseutom ye mme akamautom ẹwọn̄ọ unyịme unyịme ẹkpọn̄ otu mme eseutom ke kpukpru n̄ka oro “asan̄autom emi anamde akpanikọ, onyụn̄ enyenede ọniọn̄” adade anam n̄kpọ ke United States. Ẹma ẹmek nditọete iren emi ẹnyenede ukeme oro ẹdide eke mme erọn̄ en̄wen ẹsịn ke itie mmọ.

Ubiere emi enen̄ede enyene ufọn. Enye ayak mbon Otu Ukara ẹyak ekese ini ẹsịn ke nditịm udia eke spirit ndien ke n̄kan̄ eken, ẹse ẹban̄a udọn̄ n̄kpọ eke spirit nditọete ofụri ererimbot.

Ke akpatre, etieibuot okpokoro oro ama ọdọhọ otuowo oro ekenen̄erede okop idatesịt ete: “Ke adan̄aemi ẹyakde nsio nsio utom ibet ye ndutịm utịm utom ẹnọ mme esenyịn emi ẹnyenede mbufiọk, . . . kpukpru mmọ ẹnam utom ke idak ndausụn̄ eke spirit oro Otu Ukara ọnọde. . . . Kpukpru nnyịn ibọn̄ akam iben̄e Jehovah ite ọdiọn̄ ukeme nnyịn ndidiana kiet nnam uduak esie, man ada ukpono ye ubọn̄ ọsọk akwa enyịn̄ esie.”