Edi “Usọbọ ọnọ Ekop Fo”

ẸNỊM ke akpanikọ ẹte ke mme utọ mfịghe eke ntụk nte ndịk, mfụhọ, isịnenyịn, utọk, usua, ye ekikere ubiomikpe, ẹsidi ntak ata ediwak udọn̄ọ oro ubonowo ọdọn̄ọde. Ke ikerede iban̄a emi, ikọ Bible oro nte ke ‘uten̄e Jehovah’ edi “usọbọ ọnọ ekop fo onyụn̄ ọnọ ọkpọ fo nduọkodudu” ọnọ ndọn̄esịt didie ntem!—Mme N̄ke 3:7, 8, NW.

Ọkpọ omụm idemowo akama. Ntem, Bible ada ikọ oro “ọkpọ” ke ndamban̄a usụn̄ nditịn̄ mban̄a owo—akpan akpan nte se ntotụn̄ọ ekikere ye ntụk ẹkemede nditụk. Edi didie ke uten̄e Jehovah edi “usọbọ ọnọ ekop fo”?

Nditọ ukpepn̄kpọ Bible ẹnyene nsio nsio ekikere ẹban̄a edisiak “ekop” ke ubak udịmikọ emi. Andinam n̄kpọ an̄wan̄a kiet ọdọhọ ete ke “ekop” ekeme ndida mban̄a kpukpru akpan ndido idemowo koro enye odude ke “ufọt ufọt idemowo.” Eyen ukpepn̄kpọ efen ọnọ ekikere ete ke ikọ oro “ekop” ekeme ndiwọrọ urụk eyen nte ẹdade ẹtịn̄ ikọ ke Ezekiel 16:4. Edieke emi edide ntre, ekeme ndidi Mme N̄ke 3:8 odori nsọn̄uyo ke ufọn ediberi edem ofụri ofụri ke Abasi—ukem nte anana-un̄wam ọbọn̄eyen esiberide edem ofụri ofụri ke eka esie kaban̄a udia. Ekikere en̄wen n̄ko edi nte ke “ekop” mi ekeme ndida mban̄a esịp ye usan̄aiyịp idemowo. Ke udọn̄ikọ ufan̄ikọ emi, ekeme ndidi ẹmen ndido emi ẹdomo ye “ọkpọ”—ndido idemowo emi enen̄erede ọsọn̄ idem.

Se ededi emi enye enen̄erede ọwọrọ, n̄kpọ kiet edi akpanikọ: Ndinyene uten̄e Jehovah edi edinam owụtde eti ibuot. Ndidu uwem ekekem ye mme idaha Abasi ekeme nditịp nsịn ke nnyịn ndinyene nsọn̄idem ikpọkidem idahaemi. Akande oro, enye ekeme ndinam nnyịn inyene mfọn Jehovah, emi edisụn̄ọde ke anana-utịt uwem ke mfọnmma nsọn̄idem—ke n̄kan̄ eke ikpọkidem ye eke ntụk—ke obufa ererimbot esie oro edide.—Isaiah 33:24; Ediyarade 21:4; 22:2.

[Ebiet Ẹdade Ndise Ẹto ke page 32]

Dr. G. Moscoso/SPL/Photo Researchers