Ntọt Mme Anditan̄a Obio Ubọn̄

Latvia Enyịme Eti Mbụk

BIBLE owụt in̄wan̄ in̄wan̄ nte ke edi uduak Abasi nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:4) Mbon oro ke ediwak isua mîkenyeneke ifet ndikop eti mbụk ke ẹkop idahaemi! Ke Latvia, nte edide ke mme ikpehe eken ke ererimbot, mme owo ẹdude ke kpukpru isua emana ye nsio nsio idaha ke uwem ke ẹnyịme etop oro, nte mme ifiọkutom ẹtienede mi ẹwụtde.

• Ke Rēzekne, obio emi odude ke n̄kan̄ edem usiahautịn Latvia, eka kiet ye ekpri eyenan̄wan esie ẹma ẹben̄e n̄wan kiet ke efak ẹte eteme mmimọ usụn̄. Ke ama okowụt mmọ, n̄wan oro, emi ekedide kiet ke otu Mme Ntiense Jehovah, ama ọnọ mmọ ikot ndidụk mme mbono esop Mme Ntiense.

Sia eka ye eyen ẹkenyenede udọn̄ ke ido ukpono, mmọ ẹma ẹbiere ndika mbono esop oro. Ke usụn̄, mmọ ẹma ẹdọhọ ẹte edieke mmimọ idikụtde n̄kpọ ekededi oro mîdotke do, mmimọ iyọnyọn̄ usọp usọp. Nte ededi, mbono esop oro ama enen̄ede enem tutu mmọ ikedehede ikere ndinyọn̄. Mmọ ẹma enyịme ukpepn̄kpọ Bible ẹnyụn̄ ẹtọn̄ọ ndidụk mme mbono esop kpukpru ini. Ke n̄kpasịp ọfiọn̄ ita, mmọ ẹma ẹtịn̄ udọn̄ mmọ ndibuana ke utom ukwọrọikọ ndien mmọ ẹdori enyịn ndina baptism.

• Ke obio kiet ke n̄kan̄ edem usoputịn Latvia, Ntiense kiet ama osobo ye Anna emi edide isua 85 ke emana, emi okowụtde ata udọn̄ okonyụn̄ enyịmede ukpepn̄kpọ Bible. Eyen esie an̄wan ye mbonubon eken ẹma ẹnen̄ede ẹbiọn̄ọ enye. Edi Anna ikayakke ubiọn̄ọ m̀mê usọn̄ ye unana nsọn̄idem esie ẹkpan enye ndika iso ke ukpepn̄kpọ Bible esie.

Usen kiet, Anna ama asian eyen esie an̄wan ete ke imọ imọn̄ ina baptism. Eyen esie ama ọbọrọ ete: “Edieke anade baptism, ami nyọnọ fi okodụn̄ ke ufọk ukpeme. Nte ededi, ndịghe emi ikanamke Anna okop mmemidem. Ke ntak unana nsọn̄idem esie, ẹkenịm enye baptism ke ufọk esie.

Didie ke eyen Anna akanam n̄kpọ aban̄a emi? Enye ama okpụhọde edu esie, ndien enye ama etem san̄asan̄a udia ọnọ eka esie ke ama akana baptism. Ekem enye ama obụp eka esie ete, “Etie fi didie ke idem ke emi afo ama akana baptism mi?” Nso ikedi ibọrọ Anna? “Etie mi nte ndi obufa nsekeyen!”

• Ke December 1998, Ntiense iba ẹma ẹsobo ye akwa owoekọn̄ akani Soviet Union emi ama ọkọkpọn̄ utom. Sia enye ekenịmde ete ke Andibot odu, enye ama enyịme ukpepn̄kpọ Bible, ndien n̄wan esie ama adiana ke ukperedem. Mmọ ẹma ẹnam usọp usọp n̄kọri ndien ikebịghike ẹma ẹkabade ẹdi mme asuanetop oro mînaha baptism. Etisịm ndaeyo oro eketienede, akani akwaowo oro ama ana baptism. Akwa ima oro ebe ye n̄wan emi ẹnyenede ẹnọ mme n̄kpọ eke spirit edi n̄kpọ nsịnudọn̄ ọnọ kpukpru owo ke esop. Ke adianade do, mmọ ẹma ẹdụk utom edidiọn̄ ufọkidụn̄ kiet ke n̄kann̄kụk akabade edi ediye Ufọkmbono Obio Ubọn̄.