Nte Afo Amanam Akpanikọ Edi Okwo?

“Ẹyak mbufo ẹkpụhọde oto ke edinam emi ẹnamde esịt mbufo ẹdi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.”—ROME 12:2.

1, 2. Ntak emi mîdịghe mmemmem n̄kpọ owo ndidi ata Christian mfịn?

 NDIDI ata Christian ke ukperedem ini—“ndiọk eyo” emi—idịghe mmemmem n̄kpọ. (2 Timothy 3:1) Akpanikọ edi nte ke ana owo akan ererimbot man etiene uwụtn̄kpọ Christ. (1 John 5:4) Ti se Jesus eketịn̄de aban̄a usụn̄ Christian: “Ẹbe ke mfafaha inua-otop ẹdụk: koro inua-otop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inua-otop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.” Enye ama ọdọhọ n̄ko ete: “Edieke owo ekededi oyomde nditiene Mi, yak enye otụk idem esie, onyụn̄ emen [eto ndutụhọ, NW] esie ke usen ke usen etiene Mi.”—Matthew 7:13, 14; Luke 9:23.

² Ke ama okokụt mfafaha usụn̄ adade esịm uwem, n̄kpọ-ata efen emi Christian asakde iso ese edi ndisọn̄ọ ndu ke enye. Ntak oro edide n̄kpọ-ata? Edi koro uyakidem nnọ ye baptism nnyịn ẹnam nnyịn idi iso en̄wan inọ mme n̄kari n̄kari edinam, m̀mê n̄kukan Satan. (Ephesus 6:11) Enye ọfiọk mme mmeme nnyịn onyụn̄ oyom ndida mmọ nnam n̄kpọ man abiat idaha eke spirit nnyịn. Kamse, enye ama odomo ndinam Jesus ọduọ, ntre ntak emi enye akpasanade nnyịn ayak?—Matthew 4:1-11.

Mme N̄kari N̄kari Edinam Satan

3. Didie ke Satan ọkọtọ eyịghe ke esịt Eve?

³ N̄kari kiet emi Satan adade anam n̄kpọ edi nditọ eyịghe ke esịt nnyịn. Enye esiyom mme mmeme ke n̄kpọekọn̄ eke spirit nnyịn. Ke ata ntọn̄ọ, enye ama ada n̄kari oro anam n̄kpọ ye Eve, obụpde ete: “Nte Abasi ọkọdọhọ ete, Mbufo ẹkûdia baba eto in̄wan̄ emi kiet?” (Genesis 3:1) Ke ikọ efen, Satan ọkọdọhọ ete, ‘Nte Abasi enen̄ede ekeme ndidori mbufo utọ ukpan oro? Nte enye ekpesịn ndinọ mbufo ata eti n̄kpọ ntre? Kamse, Abasi ọmọfiọk ete ke usen eke mbufo ẹdiade eto oro enyịn mbufo ẹyetara ndien mbufo ẹyetie nte Abasi, ẹfiọkde eti ye idiọk!’ Satan ama ọtọ n̄kpasịp eyịghe onyụn̄ etie ebet enye asiaha.—Genesis 3:5.

4. Mme eyịghe ewe ẹkeme ndinọ ndusụk owo unan mfịn?

⁴ Didie ke Satan ada n̄kari emi anam n̄kpọ mfịn? Edieke nnyịn ifụmide edikot Bible nnyịn, ọkpọkpọ ukpepn̄kpọ, akam, ye utom ukwọrọikọ Christian ye mme mbono esop nnyịn, mme eyịghe emi mbon efen ẹdemerede ẹkeme nditụk nnyịn. Ke uwụtn̄kpọ: “Nnyịn isan̄a didie ifiọk ke emi edi akpanikọ, nte Jesus ekekpepde?” “Nte mmọ emi ẹnen̄ede ẹdi ukperedem ini? Idem n̄kpọ, nnyịn imododụk ọyọhọ isua ikie 21.” “Nte Armageddon enen̄ede ekpere, mîdịghe nte enye odu oyom usụn̄?” Edieke mme utọ eyịghe emi ẹdemerede, nso ke nnyịn ikpanam man ibịn mmọ ifep?

5, 6. Nso ke ana nnyịn inam edieke eyịghe ekpedemerede?

⁵ James ama ọnọ eti item ke ini enye ekewetde ete: “Edieke owo mbufo ekededi ananade eti ibuot, yak enye eben̄e Abasi, emi ọnọde kpukpru owo ke ntatubọk, mînyụn̄ itọhọke owo; ndien Abasi ọyọnọ enye. Edi yak enye eben̄e ke mbuọtidem, okûyok; koro owo eke oyokde ebiet mbufụt mmọn̄, eke ofụm eberide, emen, otop, ọduọk ko. Owo oro okûse ete, imọ iyọbọ baba  n̄kpọ kiet ke ubọk Ọbọn̄; enye edi owo esịt iba, eke mînyeneke nsọn̄ọ-nda ke kpukpru usụn̄ esie.”—James 1:5-8.

⁶ Nso, ndien, ke ana nnyịn inam? Nnyịn ikpenyene ‘ndiben̄e Abasi’ mbuọtidem ye eti ibuot ke akam inyụn̄ inen̄ede isịn ukeme ndinam ọkpọkpọ ukpepn̄kpọ kaban̄a mme mbụme m̀mê eyịghe ekededi. Nnyịn n̄ko imekeme ndiyom un̄wam nto mbon oro ẹkopde idem ke mbuọtidem, idehede iyịk nte ke Jehovah ọyọnọ nnyịn un̄wam oro iyomde. James ama ọdọhọ n̄ko ete: “Ẹsụk idem ndien ẹnọ Abasi; ẹn̄wana ye Satan, ndien enye eyefehe ọkpọn̄ mbufo; ẹsan̄a ẹkpere Abasi, ndien enye ayasan̄a ekpere mbufo.” Ih, nnyịn idinyeneke aba eyịghe nte nnyịn isan̄ade ikpere Abasi ebe ke ukpepn̄kpọ ye akam.—James 4:7, 8.

7, 8. Nso idi ndusụk akpan n̄kpọ ndida mfiọk orụk utuakibuot oro Jesus ekekpepde, ndien mmanie ẹsịm mme n̄kpọ emi?

⁷ Da mbụme emi ke uwụtn̄kpọ: Nnyịn isan̄a didie ifiọk ke nnyịn inam orụk utuakibuot oro Jesus ekekpepde? Man ẹbọrọ emi, nso n̄kpọ ke ana ẹkere ẹban̄a? Bible owụt nte ke ana mme ata Christian ẹnyene ata ima ke otu idemmọ. (John 13:34, 35) Ana mmọ ẹnam enyịn̄ Abasi, Jehovah, asana. (Isaiah 12:4, 5; Matthew 6:9) Ndien ana mmọ ẹnam ẹfiọk enyịn̄ oro.—Exodus 3:15; John 17:26.

⁸ N̄kpọ efen oro ẹdade ẹfiọk utuakibuot akpanikọ edi ukpono ẹnyenede ẹnọ Ikọ Abasi, kpa Bible. Enye edi n̄wọrọnda n̄wed emi ayararede edu ye mme uduak Abasi. (John 17:17; 2 Timothy 3:16, 17) Adianade do, mme ata Christian ẹtan̄a Obio Ubọn̄ Abasi nte n̄kukụre idotenyịn ubonowo kaban̄a nsinsi uwem ke paradise isọn̄. (Mark 13:10; Ediyarade 21:1-4) Mmọ ẹda san̄asan̄a ẹkpọn̄ mme mbiara mbre ukara ererimbot emi ye usụn̄ uwem esie emi asabarede owo. (John 15:19; James 1:27; 4:4) Mmanie mfịn ẹnen̄ede ẹsịm mme n̄kpọ emi? Mme akpanikọ ẹsọn̄ọ nte ke ibọrọ kiet kpọt odu—Mme Ntiense Jehovah.

Nso Edieke Eyịghe Akade Iso?

9, 10. Nso ke nnyịn ikeme ndinam man ikan n̄kaiso eyịghe?

⁹ Nso edieke nnyịn inyenede eyịghe? Nso ke nnyịn ikpanam adan̄aoro? Enyene-ọniọn̄ Edidem Solomon ọnọ ibọrọ ete: “Eyen mi, afo ama ọbọ ikọ mi, onyụn̄ enịm mbet mi ke idem fo; onyụn̄ akpan̄ utọn̄ fo ke eti ibuot, onyụn̄ esịn esịt fo ke mbufiọk; ama ofiori okot asian, emenede uyo fo ọnọ mbufiọk; ama oyom enye nte silver, onyụn̄ odụn̄ọde enye nte n̄kpọ-uto eke edịbede; ndien afo eyetịm ọfiọk uten̄e Jehovah, onyụn̄ esịme ifiọk Abasi.”—Mme N̄ke 2:1-5, sịghisịghi ubọkn̄wed edi eke nnyịn.

¹⁰ Nte oro idịghe ekikere oro akpade owo idem? Edieke nnyịn inyịmede nditịm n̄kpan̄ utọn̄ ke eti ibuot otode Abasi, nnyịn ‘iyesịme  ifiọk Abasi.’ Ih, nnyịn imekeme ndisịme ifiọk Ọbọn̄ Andikara ekondo edieke nnyịn inyịmede ndibọ nnyụn̄ nnịm mme mbet esie. Oro ọwọrọ ndika mbịne Jehovah ke akam ye ọkpọkpọ ukpepn̄kpọ. Mme n̄kpọuto oro ẹdịbede ke Ikọ esie ẹkeme ndibịn eyịghe ekededi mfep nnyụn̄ n̄n̄wam nnyịn ikụt un̄wana akpanikọ.

11. Didie ke asan̄autom Elisha ekenyene eyịghe?

¹¹ Ẹkụt in̄wan̄ in̄wan̄ uwụtn̄kpọ ke nte akam akan̄wamde asan̄autom Abasi oro okokopde ndịk okonyụn̄ enyenede eyịghe ke 2 Ndidem 6:11-18. Asan̄autom Elisha ikenyeneke enyịn eke spirit. Enye ikekemeke ndikụt nte ke ata ediwak udịm enyọn̄ ẹma ẹdu do ndinọ prọfet Abasi, emi udịmekọn̄ Syria ẹkekande ẹkụk, ibetedem. Ke okopde ndịk, asan̄autom oro ama ofiori ete: “Ahah, ete mi, nnyịn idinam didie?” Didie ke Elisha ọkọbọrọ? “Kûfehe ndịk: koro mmọ emi ẹdude ye nnyịn, ẹwakde ẹkan mmọ eke ẹdude ye mmọ.” Edi ẹdisan̄a didie ẹnam asan̄autom emi enịm? Enye ikekemeke ndikụt udịm enyọn̄ oro.

12. (a) Didie ke ẹkebịn eyịghe asan̄autom oro ẹfep? (b) Didie ke nnyịn ikeme ndibịn eyịghe ekededi emi nnyịn ikemede ndinyene mfep?

¹² “Elisha ọbọn̄ akam, ete, Mbọk, Jehovah, tat enye enyịn, man enye okụt. Ndien Jehovah atat eyen oro enyịn; ndien enye okụt: ndien, sese, horse, ye chariot ikan̄ ke ẹyọhọ ke obot ẹkan Elisha ẹkụk.” Ke idaha oro Jehovah ama anam asan̄autom oro okụt udịmekọn̄ eke heaven oro ẹkekpemede Elisha. Nte ededi, nnyịn ikpodorike enyịn ndinyene ukem orụk un̄wam Abasi oro mfịn. Ti ete, asan̄autom prọfet oro ikenyeneke ofụri Bible ndida nsọn̄ọ mbuọtidem esie. Nnyịn imenyene Bible. Edieke nnyịn idade enye inam n̄kpọ nte ọfọnde, ẹkeme ndisọn̄ọ mbuọtidem nnyịn ukem ntre. Ke uwụtn̄kpọ, nnyịn imekeme nditie n̄kere ediwak mbụk oro ẹtịn̄de ẹban̄a Jehovah ke ebietidụn̄ esie eke heaven. Emi iyakke nnyịn inyene eyịghe nte ke Jehovah enyene esop eke heaven ọnọde mme asan̄autom esie ibetedem mfịn ke utom unọ ukpep ofụri ererimbot.—Isaiah 6:1-4; Ezekiel 1:4-28; Daniel 7:9, 10; Ediyarade 4:1-11; 14:6, 7.

Ẹkpeme Idem ke Mme N̄kari Satan!

13. Ke nso usụn̄ ke Satan odomo ndinam edisọn̄ọ nnyịn nyịre ke akpanikọ emem?

¹³ Nso idi ndusụk usụn̄ efen emi Satan adade ndinam idaha eke spirit ye edisọn̄ọ nnyịn nyịre ke akpanikọ ẹmem? Kiet ke otu mmọ edi oburobụt ido, ke nsio nsio usụn̄ oro enye owụtde idem. Ke idat idat usụn̄ unam idan̄ ererimbot mfịn, se ẹkotde efịbe (enyịn̄ efen ẹkotde unana edinam akpanikọ ke ndọ), m̀mê idan̄ okoneyo  kiet (edinam use ke ibio ibio ini) amakabade edi edinam ofụri usen ọnọ oyom-inemesịt emana emi ebierede ndikop inem uwem mi ọkpọkọm ọsọn̄ didie. Ndise senima, TV, ye vidio ẹsịn udọn̄ ẹnọ usụn̄ uwem emi. Mme ndise idan̄ ẹyọyọhọ ndutịm usuanetop, akpan akpan Intanet. Mbon oro ẹnyenede ọkpọsọn̄ udọn̄ ndise mme ndise emi ẹyedụk idomo.—1 Thessalonica 4:3-5; James 1:13-15.

14. Ntak emi ndusụk Christian ẹyakde idem ẹnọ mme n̄kari Satan?

¹⁴ Ndusụk Christian ẹmeyak idem ẹnọ ọkpọsọn̄ udọn̄ ẹnyụn̄ ẹsabade ekikere ye esịt mmọ ebe ke ndise mme mfefere ndise ẹban̄ade idan̄ m̀mê idem ẹsede mme ndise emi ẹnamde idan̄. Mmọ ẹduọ ẹdụk etabi etabi afia Satan. Ndinam ntre esiwak ndisụn̄ọ ke n̄wụre ke n̄kan̄ eke spirit. Mme utọ owo oro ẹkpu ndika iso ‘ntie nte nsek nditọ ke edinam ibak.’ Mmọ ikabakede itie nte ‘ikpọ owo ke ekikere.’ (1 Corinth 14:20) Ke isua kiet kiet, ediwak tọsịn owo ẹsikpe utịp unana edidu uwem ekekem ye mme edumbet ye idaha Ikọ Abasi. Mmọ ẹfụmi ndika iso nsịne “ofụri n̄kpọ-ekọn̄ Abasi.”—Ephesus 6:10-13; Colossae 3:5-10; 1 Timothy 1:18, 19.

Ẹda Se Nnyịn Inyenede ke N̄kpọuto

15. Ntak emi ndusụk owo ẹkemede ndikụt nte ọsọn̄de ndiwụt esịtekọm mban̄a n̄kpọ-akpa eke spirit mmọ?

¹⁵ Jesus ọkọdọhọ ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:32) Ata ediwak Ntiense ẹkenyene ndikpọn̄ n̄kani usụn̄ uwem ye mme n̄ka ido ukpono mmọ. Ke ntre, mmọ ẹkeme ndinen̄ede n̄wụt esịtekọm mban̄a ubọhọ-ufụn oro akpanikọ adade edi. Ke n̄kan̄ eken, ndusụk uyen oro mme ete ye eka emi ẹdude ke akpanikọ ẹbọkde ẹkeme ndikụt nte ọsọn̄de ndiwụt esịtekọm mban̄a n̄kpọ-akpa eke spirit mmọ. Akananam mmọ ibuanake ke nsunsu ido ukpono m̀mê ndidi ubak ererimbot emi ye nsọn̄uyo emi enye odoride ke ediyom inemesịt, mbumehe uda n̄kpọsọn̄ ibọk esie, ye oburobụt ido esie. Nte utịp, mmọ ẹkeme ndikpu ndikụt akamba ukpụhọde oro odude ke ufọt paradise eke spirit nnyịn ye mbiara ererimbot Satan. Ndusụk mmọ ẹkeme ndikam nyak idem nnọ idomo nditabi ibọk n̄kpa eke ererimbot emi nse man ẹfiọk se mmimọ itabade!—1 John 2:15-17; Ediyarade 18:1-5.

16. (a) Mme mbụme ewe ke nnyịn ikpobụp idem nnyịn? (b) Nso ke ẹkpep ẹnyụn̄ ẹsịn udọn̄ ẹnọ nnyịn ndinam?

¹⁶ Nte enen̄ede oyom nnyịn ifọp nnuenubọk nnyịn ke ikan̄ man ifiọk se ubiak ye ndutụhọ ẹdide? Nte nnyịn ikemeke ndikpep n̄kpọ nto ndiọi ifiọk n̄kpọntịbe mbon en̄wen? Nte oyom nnyịn iwere ke “mbat” ererimbot emi man ise m̀mê nnyịn imataba n̄kpọ? (2 Peter 2:20-22) Peter ama eti mme Christian akpa isua ikie emi ẹkedide ubak ererimbot Satan ke mbemiso, ete: “Ini emi ama ebe ekem mbufo ndida nnam se idọn̄de mme Gentile itọn̄, kpa ini emi mbufo ẹsan̄ade ẹdu uwem ke use, ye idiọk itọn̄, ye ediyụhọ mmịn, ye etịme-etịme ido, ye edin̄wọn̄ mmịn, ye obukpo edikpono ndem.” Ke akpanikọ, nnyịn iyomke nditabi “ọkpọsọn̄ etịme uwem” ererimbot nse man ikụt nte uwem ọdiọkde eketre. (1 Peter 4:3, 4) Ke edide isio, ẹkpep nnyịn mme n̄kokon̄ idaha ido uwem Jehovah ke mme Ufọkmbono Obio Ubọn̄ nnyịn  emi ẹdide mme iwụk ebiet unọ ukpep Bible. Ndien, ẹsịn udọn̄ ẹnọ nnyịn ndida ukeme ukere n̄kpọ nnyịn nnam n̄kpọ ndisọn̄ọ nnọ idem nnyịn nte ke imenyene akpanikọ ndien ke ntem inamde akpanikọ edi eke nnyịn.—Joshua 1:8; Rome 12:1, 2; 2 Timothy 3:14-17.

Enyịn̄ Nnyịn Idịghe Idiọn̄ọ Kpọt

17. Didie ke nnyịn ikeme ndidi Mme Ntiense Jehovah oro inyenede uforo?

¹⁷ Edieke nnyịn inamde akpanikọ edi eke nnyịn, nnyịn iyoyom ndibuana enye ye mbon efen ke kpukpru idaha oro ẹdotde. Emi iwọrọke ite ke nnyịn ididodomo ndinyịk mme owo oro mîwụtke udọn̄. (Matthew 7:6) Utu ke oro, nnyịn idikopke bụt ndinam ẹdiọn̄ọ nnyịn nte Mme Ntiense Jehovah. Edieke owo owụtde esisịt udọn̄ ebe ke ndibụp mbụme esịt akpanikọ m̀mê ke ndibọ n̄wed Bible, nnyịn iyenyịme inyụn̄ idu ke mben̄eidem ndibuana idotenyịn nnyịn. Nte ededi, emi ọwọrọ nte ke nnyịn kpukpru ini ikpenyene ndikama ndusụk orụk n̄wed inamke n̄kpọ m̀mê m̀mọ̀n̄ ke nnyịn idu—ke ufọk, ke itieutom, ke ufọkn̄wed, ke ufọkurua, m̀mê ke mme itie unọ idem inemesịt.—1 Peter 3:15.

18. Didie ke ndinam ẹdiọn̄ọ nnyịn in̄wan̄ in̄wan̄ nte mme Christian ekeme ndinyene eti odudu ke uwem nnyịn?

¹⁸ Ke ini nnyịn inamde ẹdiọn̄ọ nnyịn in̄wan̄ in̄wan̄ nte mme Christian, nnyịn isọn̄ọ ubiere nnyịn ndibiọn̄ọ mme etabi etabi en̄wan Satan. Edieke ẹnamde usọrọ usen emana m̀mê usọrọ Christmas m̀mê ẹbrede mbre mfọniso ke itieutom, mme ekemmọ mbonutom ẹsiwak ndidọhọ, “Ẹsana enye ẹyak. Enye edi kiet ke otu Mme Ntiense Jehovah.” Ke utọ ntak oro, mme owo ẹkeme nditre ndinam ndiọi mbubru ke itie emi nnyịn idude. Ntem, nnyịn ndinam ẹfiọk idaha Christian nnyịn enyene eti odudu ke uwem nnyịn, idem kpa nte apostle Peter okowụtde ete: “Ndien anie edinam mbufo ibak, edieke mbufo ẹnyenede ọkpọsọn̄ udọn̄ ndinam eti ido? Edi edieke mbufo ẹkụtde ndutụhọ n̄ko ke ntak edinen ido, osụk ọfọfọn ọnọ mbufo.”—1 Peter 3:13, 14.

19. Nnyịn isan̄a didie ifiọk ke nnyịn inen̄ede idu uwem ke ukperedem ini?

¹⁹ Ufọn efen ke ndinam akpanikọ edi eke nnyịn edi nte ke enye ayanam nnyịn itịm ifiọk ite ke mmọ emi ẹnen̄ede ẹdi ukperedem ini eke editịm n̄kpọ emi. Nnyịn iyọfiọk ite ke ediwak ke otu mme ntịn̄nnịm ikọ Bible ke ẹsu ke eyo nnyịn. * Mme enyene-ndịk n̄kpọntịbe eke isua ikie emi ẹkebede ẹma ẹnen̄ede ẹsọn̄ọ ntọt Paul oro nte ke “ndiọk eyo ẹyedu ke ukperedem ini.” (2 Timothy 3:1-5; Mark 13:3-37) Ibuotikọ kiet aban̄ade ọyọhọ isua ikie 20 ke n̄wedmbụk n̄kpọntịbe eke ndondo emi ekedi, “Ẹyeti Enye nte Emana Ibak.” Ibuotikọ oro ama ọdọhọ ete: “1999 ekedi isua emi ẹkewotde owo ẹkan ke udiana ubak isua ikie emi ẹkewotde owo ẹkan.”

20. Emi edi ini ndinam nso?

²⁰ Idahaemi idịghe ini nditek ke ifịk. Ẹkụt edidiọn̄ Jehovah in̄wan̄ in̄wan̄ ke n̄kponn̄kan utom unọ ukpep Bible oro akanam ẹnamde ke ofụri ererimbot nte ntiense ẹnọ mme idụt. (Matthew 24:14) Nam akpanikọ edi okwo nyụn̄ buana enye ye mbon efen. Nsinsi ini iso fo ọkọn̄ọ ke se afo anamde idahaemi. Nditek ubọk ididaha edidiọn̄ Jehovah idi. (Luke 9:62) Utu ke oro, emi edi ini ‘ndisọn̄ọ nda, ntre ndiyak n̄kpọ esehede nnyịn, iyọhọde kpukpru ini ke utom Ọbọn̄, sia imọfiọk ite utom eke nnyịn inamde idiwọrọke idi ikpîkpu ke Ọbọn̄.’—1 Corinth 15:58.

[Ikọ idakisọn̄]

Nte Afo Emeti?

• Didie ke nnyịn ikeme ndibịn eyịghe mfep?

• Nso ke nnyịn ikeme ndikpep nto uwụtn̄kpọ asan̄autom Elisha?

• Nso idomo ido uwem ke nnyịn ikpekpeme ibiọn̄ọ kpukpru ini?

• Ntak emi nnyịn ikpanamde ẹdiọn̄ọ nnyịn in̄wan̄ in̄wan̄ nte Mme Ntiense Jehovah?

[Mme Mbụme Ukpepn̄kpọ]

[Mme ndise ke page 10]

Ukpepn̄kpọ Bible ofụri ini ye akam ẹkeme ndin̄wam nnyịn ndibịn eyịghe mfep

[Ndise ke page 11]

Ẹma ẹda n̄kukụt ẹbịn eyịghe asan̄autom Elisha ẹfep

[Ndise ke page 12]

Ẹkpep nnyịn mme n̄kokon̄ idaha ido uwem Jehovah ke mme Ufọkmbono Obio Ubọn̄ utọ nte enye emi ke Benin