Odom Akrasi Enyịn Ọtọ N̄kpasịp

Nso ke ukeme odom akrasi enyịn ke Lviv, Ukraine, enyene ndinam ye editọn̄ọ esop Russian eke Mme Ntiense Jehovah ke Haifa, Israel, emi oyomde usụn̄ ke n̄kpọ nte kilomita 2,000 ẹnyụn̄ ẹbede ediwak idụt? Emi edi mbụk oro owụtde nte ikọ Bible oro ke Ecclesiastes 11:6 enende: “Suan n̄kpasịp fo ke usenubọk; kûnyụn̄ ufara ubọk fo ke mbubịteyo: koro afo mûfiọkke ubak eke ẹdiwọrọde usụn̄, m̀mê emi, m̀mê oro; unyụn̄ ufiọkke m̀mê mbiba ẹdifọn ukem ukem.”

MBỤK nnyịn ọtọn̄ọ ke 1990 ke ini Ella, n̄kaiferi Jew, okodụn̄de ke Lviv. Ella ye ubon esie ke ẹkenam ndutịm ndiwọrọ idụn̄ n̄ka Israel. Esisịt ini mbemiso mmọ ẹwọrọde idụn̄, Ella ama odiomi ndisobo ye odom akrasi enyịn emi ekedide kiet ke otu Mme Ntiense Jehovah. Ke ini oro, ẹma ẹkpan utom Mme Ntiense Jehovah ke Ukraine. Kpa ye oro, odom akrasi enyịn oro ama anam usio-ukot ndibuana mme edinịm ke akpanikọ esie oro ẹkọn̄ọde ke  Bible ye Ella. Enye ama anam idem akpa Ella ke ndidọhọ ke Abasi enyene ọkpọkpọ enyịn̄. Oro ama edemede udọn̄ Ella, ndien eti nneme Bible ama etiene.

Nneme oro ama enen̄ede enem Ella tutu enye oyom efen ke urua oro eketienede ye efen efen ke oro ebede. Udọn̄ esie ke ọkọkọri, edi mfịna ama odu. Ini ama enen̄ede ekpere ọnọ ubon esie ndiwọrọ n̄ka Israel. Ella ke okosụk enyenyene ekese ndikpep! Man ada ini oro osụhọde anam n̄kpọ nte ọfọnde, enye ama oyom ukpepn̄kpọ Bible kpukpru usen tutu esịm ini edidaha esie. Okposụkedi Ella mîkafiakke itọn̄ọ ukpepn̄kpọ esie ke akpa ini oro enye ekedide edisịm Israel, n̄kpasịp akpanikọ ama ọdọn̄ n̄kam ke esịt esie. Etisịm utịt isua oro, enye ama afiak ọtọn̄ọ ndikpep Bible ifịk ifịk inikiet efen.

Ekọn̄ ama asiaha ke Itụn̄ Inyan̄ibom Persia, ndien Iraq ama ada ekọn̄ etiene Israel. Emi ekesidi ibuotikọ nneme ofụri ini. Usen kiet ke akwa ufọkurua, Ella ama ada okop ubon oro ẹkesemde Russian oro ẹkedide mbufa mme ọwọrọidụn̄ nte ẹnemede nneme. Okposụkedi enye ke idemesie okosụk ekpepde-kpep Bible, Ella ama aka ebịne ubon oro akabuana un̄wọn̄ọ Bible aban̄ade emem emem ererimbot ye mmọ. Nte utịp, Galina, eka-eka; Natasha, eka; Sasha, eyeneren (Ariel); ye Ilana, eyenan̄wan kpukpru ẹma ẹtiene ẹkpep Bible ye Ella.

Sasha ekedi akpa andibuana ke ubon oro ndikọri nsịm idaha edina baptism—kpa ye ediwak idomo. Okposụkedi ekedide eyen ufọkn̄wed oro ẹkekponode, ẹma ẹbịn enye ẹfep ke ufọkn̄wed koro ubieresịt Christian esie mîyakke enye abuana ke edibọ ukpep ekọn̄, kpa ukpep oro ẹkeyomde nte ubak ukpepn̄kpọ ufọkn̄wed oro. (Isaiah 2:2-4) Ẹma ẹmen ikpe Sasha ẹka Esop Enyọn̄ Israel ke Jerusalem, emi nte odotde itoro ọkọnọde uyo ete ẹfiak ẹda Sasha man enye ekeme ndikụre ufọkn̄wed esie. Ẹma ẹkop ẹban̄a ikpe oro ke ofụri idụt oro. Nte utịp, ediwak mbon Israel ẹma edifiọk mme edinịm ke akpanikọ Mme Ntiense Jehovah. *

Ke ama okokụre ukpep ke ufọkn̄wed sekọndri, Sasha ama odụk utom ukwọrọikọ uyọhọ ini eke Mme Ntiense Jehovah. Mfịn enye anam utom nte akpan asiakusụn̄ onyụn̄ edi ebiowo esop. Ilana, eyeneka esie an̄wan adiana ye enye ke utom ukwọrọikọ uyọhọ ini. Eka ye eka-eka mmọ ẹdi Mme Ntiense oro ẹma ẹkena baptism. N̄kpasịp oro odom akrasi enyịn oro ọkọtọde ke okosụk on̄won̄wụm mfri!

Kan̄a ke emi, Ella ama aka iso ndinam n̄kọri ke n̄kan̄ eke spirit ndien ikebịghike ama ọtọn̄ọ ndikwọrọ ikọ to ke ufọk sịm ufọk. Ke ata akpa enyịnusụn̄, Ella ama osobo ye Faina, emi okotode Ukraine edibehe ke ndondo emi. Faina ama okop mfụhọ. Ke ukperedem Ella ama edifiọk nte ke esisịt ini mbemiso enye ọkọkọn̄de usụn̄ufọk Faina, n̄wan emi okokopde mfụhọ mi ama ọbọn̄ akam ọnọ Abasi ete: “Mfiọkke owo emi afo edide, edi edieke afo okopde se ntịn̄de, n̄wam mi.” N̄wan emi ye Ella ẹma ẹnyene ufiop ufiop nneme. Faina ama obụp ediwak mbụme onyụn̄ etịm ekere aban̄a mme ibọrọ oro ẹkenọde enye. Nte ini akakade, enye ama edinịm nte ke Mme Ntiense Jehovah ẹkpep akpanikọ otode Bible. Enye ama anam ukpụhọde ke ndutịm ukpepn̄kpọ esie ke ufọkn̄wed ntaifiọk man ekeme ndibiat ini efen efen ye esop ye ke utom ukwọrọikọ. Ke May 1994, Faina ama ana baptism. Enye n̄ko ama odụk utom usiakusụn̄, adade utom kọmputa eke ibio ini an̄wam idemesie.

 Ke November 1994, ke adan̄aemi akabuanade ke utom ukwọrọikọ, Ella ke mbuari ama enen̄ede okop mmemidem. Enye ama aka ufọkibọk, emi edinam useidem akayarade nte enye ama enyene unan ke nsia ndien ke ọkọwọrọ iyịp. Etisịm mbubịteyo udomo iyịp Ella ama osụhọde esịm 7.2. Ebiowo ke esop oro Ella odude, kpa etieibuot okpokoro Kọmiti Unyene Nneme ye Mbon Ufọkibọk (HLC) n̄kann̄kụk, ama ọnọ mbiaibọk ntọt aban̄a ediwak ndutịm usọbọidem oro mîyomke edisịn iyịp. * Ẹma ẹnam usiakidem uforo uforo ye unana edisịn iyịp, ndien Ella ama afiak enyene ọyọhọ nsọn̄idem.—Utom 15:28, 29.

Karl emi edide owo Jew oro akamanade ke Germany onyụn̄ edide abiausọbọ udọn̄ọ iban oro ekesede aban̄a Ella, ama enen̄ede okop inemesịt. Ndien enye ama eti nte ke ete ye eka imọ, emi ẹkedide mme andibọhọ Nsobo eke Orụk oro, ẹma ẹdiọn̄ọ Mme Ntiense Jehovah ke mme itienna ekikere. Karl ama obụp ediwak mbụme. Okposụkedi ekenen̄erede anana ini ke ntak utom unọ usọbọ esie, Karl ama edep ifet ọnọ ukpepn̄kpọ Bible ofụri ini. Ke isua oro eketienede, enye ke okodụk mme mbono esop Christian eke urua ke urua.

Nso isụn̄ọ ito n̄kpasịp oro odom akrasi enyịn ọkọtọde? Nnyịn imokokụt se iketịbede inọ Sasha ye ubon esie. Amaedi Ella, enye edi asan̄autom edide akpan asiakusụn̄. Eina, eyen esie an̄wan, emi osụk okụrede ufọkn̄wed sekọndri, ọmọtọn̄ọ ubọkọkọ esiemmọ nte asiakusụn̄. Faina n̄ko anam utom nte akpan asiakusụn̄. Amaedi Karl, abiausọbọ udọn̄ọ iban emi ekesede aban̄a Ella, enye idahaemi edi Ntiense oro ama akana baptism onyụn̄ edi asan̄autom unamutom, abuanade odudu ukọkudọn̄ọ oro akpanikọ Bible enyenede ye mbon udọn̄ọ esie ye mbon en̄wen.

Ekpri otu mme ọwọrọidụn̄ oro esemde Russian oro ọkọtọn̄ọde nte ubak Esop Haifa oro esemde Hebrew amakabade edi ifịk ifịk esop Russian ye se iwakde ibe asuanetop Obio Ubọn̄ 120. N̄kọri emi, ke ubak ubak, oto akpanikọ oro nte ke odom akrasi enyịn oro odụn̄de ke Lviv ama ada ifet oro ekebererede nditọ n̄kpasịp!

[Mme Ikọ idakisọn̄]

[Ndise obio ke page 29]

(Ama oyom ndikụt nte enye enen̄erede etie, se n̄wed)

UKRAINE

ISRAEL

[Ebiet Ẹdade N̄kpọ Ẹto]

Mountain High Maps® Copyright © 1997 Digital Wisdom, Inc.

[Mme ndise ke page 30]

Ella ye Eina eyen esie an̄wan

[Ndise ke page 31]

Idara idara otu Mme Ntiense ke Haifa oro ẹsemde usem Russia. Ọtọn̄ọde ke ufien aka nnasia: Sasha, Ilana, Natasha, Galina, Faina, Ella, Eina, ye Karl