En̄wan Nditre Unana—Nte Edi En̄wan Emi Mîkwe Unen?

MME akaisan̄ oro ẹkade ẹkese Edidiana Mme Idụt ke New York City ẹkụt Ikpehe Esop Ndutịm Uforo ye Ndutịm N̄kaowo, ye mme esan̄ ikan̄ ilektrik esie oro owo mîfụkke ke dek ọkọm barakọn̄. Andida mme owo nsan̄a n̄kanade anam an̄wan̄a ete: “Ẹwak ndida dek ọkọm oro owo ‘mîfụkke’ nte ndamban̄a n̄kpọ editi nte ke utom ndutịm uforo ye n̄kaowo eke Edidiana Mme Idụt ikụreke tutu amama; kpukpru ini n̄kpọ efen efen ẹyedu oro ẹkemede ndinam man ẹmenede idaha udu uwem mme owo ke ererimbot.”

Okposụkedi Esop oro anamde eti utom ndimenede idaha udu uwem kpukpru owo, etie nte utom oro inyeneke utịt. Nte enemde, ke ini utom ukwọrọikọ Jesus Christ ke isọn̄ ke akpa isua ikie E.N., enye ama ọdọhọ ete: “Spirit Jehovah odoro Mi ke idem, koro Enye emeyet Mi aran enịm, ete, n̄kwọrọ eti mbụk nnọ nditọ-ubuene.” (Luke 4:18) Nso ikedi “eti mbụk” oro enye ọkọkwọrọde? Ekedi etop aban̄ade Obio Ubọn̄ oro Jehovah Abasi, emi edide “ọkpọsọn̄ ebiet eyen ubuene ke nnanenyịn,” ediwụkde ye Jesus Christ nte Edidem. Nso ke Obio Ubọn̄ oro edinam? Isaiah ama etịn̄ ntịn̄nnịm ikọ ete: “Jehovah mme udịm [ayanam] akamba udia ọnọ kpukpru mme idụt, n̄kpọ eke enyenede isek, ndia ke wine eke anade ke ntak, ke n̄kpọ eke enyenede isek, ẹnyụn̄ ẹwakde ndia, wine ke ntak eke ẹtịmde ẹdụk. Enye eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep.”—Isaiah 25:4-6, 8.

Nte afo akpama ndifiọk n̄kpọ efen efen mban̄a nte Obio Ubọn̄ Abasi ‘edimenerede idaha udu uwem mme owo ke ererimbot,’ man unana okûdu aba? Se idak emi man ọfiọk nte afo ekemede ndinam andikpep oro odotde edi edikpep fi n̄kpọ efen efen kaban̄a se Bible etịn̄de ke mme utọ n̄kpọ oro.