Idatesịt Enyenede Mbon Oro Ẹsan̄ade ke Un̄wana
Idatesịt Enyenede Mbon Oro Ẹsan̄ade ke Un̄wana
“Mbufo ẹdi, nnyịn isan̄a ke un̄wana Jehovah.”—ISAIAH 2:5.
1, 2. (a) Un̄wana edi akpan n̄kpọ adan̄a didie? (b) Ntak emi ntọt oro nte ke ekịm oyofụk isọn̄ edide akpan n̄kpọ ntre?
JEHOVAH edi Ebiet emi un̄wana otode. Bible okot enye, ‘enye emi enịmde utịn ke un̄wana ke uwemeyo, onyụn̄ owụkde ọfiọn̄ ye ntantafiọn̄ ke un̄wana ke okoneyo.’ (Jeremiah 31:35; Psalm 8:3) Enye edi Enye emi okobotde utịn nnyịn, emi, ke nditịm ntịn̄, edide okopodudu atọm nuclear emi osion̄ode ọkpọsọn̄ odudu ọdọn̄ ke ofụm, ndusụk nte un̄wana ye ufiop. Ata ekpri odudu oro esịmde nnyịn nte un̄wana utịn omụm uwem akama ke isọn̄ emi. Ke un̄wana utịn mîkpodụhe, nnyịn ikpodụhe. Uwem ikpodụhe ke ekondo isọn̄.
2 Ye oro ke ekikere, nnyịn imekeme ndifiọk nte idaha oro prọfet Isaiah eketịn̄de aban̄a edide akpan n̄kpọ. Enye ọkọdọhọ ete: “Sese, ekịm oyofụk ererimbot, ọkpọsọn̄ ekịm oyonyụn̄ ofụk mme idụt.” (Isaiah 60:2) Edi akpanikọ, emi itịn̄ke iban̄a ata ata ekịm. Isaiah ikọdọhọke ite ke usen kiet utịn, ọfiọn̄, ye ntantaọfiọn̄ ẹyenịme. (Psalm 89:36, 37; 136:7-9) Utu ke oro, enye eketịn̄ aban̄a ekịm eke spirit. Ekịm eke spirit edi n̄kpọ emi akamade n̄kpa. Ke akpatre, nnyịn ikemeke ndidu uwem ke un̄wana eke spirit mîdụhe kpa nte nnyịn mîkemeke ndidu uwem ke ata un̄wana mîdụhe.—Luke 1:79.
3. Ke ikerede iban̄a mme ikọ Isaiah, nso ke mme Christian ẹkpenam?
3 Ke ikerede iban̄a emi, enen̄ede edi akpan n̄kpọ nditịm mfiọk nte ke okposụkedi mme ikọ Isaiah ẹkesude Judah eset ke idem, mmọ ke ẹnyene n̄kponn̄kan edisu mfịn. Ih, ke eyo nnyịn ekịm eke spirit omofụk ererimbot. Ke utọ enyene-ndịk idaha oro, un̄wana eke spirit edi ata akpan n̄kpọ. Ntak edi oro mme Christian ẹkpenyenede ndinam item Jesus oro: “Yak un̄wana mbufo ayama ke iso owo.” (Matthew 5:16) Mme anam-akpanikọ Christian ẹkeme ndinam un̄wana ayama ọnọ mbon nsụkidem, ke ntem ẹnọde mmọ ifet ndinyene uwem.—John 8:12.
Mme Ini Ekịm ke Israel
4. Ini ewe ke ntịn̄nnịm ikọ Isaiah ekebem iso osu, edi nso idaha ikodu ke eyo esie?
4 Mme ikọ Isaiah ẹban̄ade ekịm ndifụk isọn̄ ẹkenyene akpa edisu ke ini Judah akanade ndon, ikọt esie ẹkenyụn̄ ẹdude ke ntan̄mfep ke Babylon. Nte ededi, idem mbemiso ini oro, ke eyo Isaiah, akamba ubak idụt oro okodu ke ekịm eke spirit, n̄kpọ oro akanamde enye akpak mbio obio esie ete: “O ufọk Jacob, mbufo ẹdi, nnyịn isan̄a ke un̄wana Jehovah”!—Isaiah 2:5; 5:20.
5, 6. Mme n̄kpọ ewe ẹkenam ekịm ofụk eyo Isaiah?
5 Isaiah eketịn̄ ntịn̄nnịm ikọ ke Judah “ke eyo Uzziah, ye Jotham, ye Ahaz, ye Hezekiah, ndidem Judah.” (Isaiah 1:1) Enye ekedi ini ndutịme ukaraidem, mbubịk ido ukpono, ukwan̄ikpe, ye edifịk nditọ ubuene. Idem ke ini ukara ndidem oro ẹkenamde akpanikọ, utọ nte Jotham, ẹma ẹkeme ndikụt mme itieuwa nsunsu abasi ke enyọn̄ ediwak obot. Idaha oro ama enen̄ede ọdiọk ke idak ukara ndidem oro mîkanamke akpanikọ. Ke uwụtn̄kpọ, idiọk Edidem Ahaz ama aka anyan ekesịm ediwa nditọ esie nnọ abasi Molech. Oro ekedi ata ini ekịm!—2 Ndidem 15:32-34; 16:2-4.
6 Idaha eke mme idụt ama ekịm n̄ko. Moab, Edom, ye Philistia ẹkedu ke mme adan̄a Judah nte n̄kpọndịk. Idahaemi, obio ubọn̄ edem edere, okposụkedi ekedide iman, ekedi ata asua Israel. Ke n̄kan̄ ata edem edere, Syria ama esịn emem Judah ke itiendịk. Se ikakam idide n̄kpọndịk ikan ekedi ibak ibak Assyria, emi okoyomde ifet kpukpru ini nditat odudu ukara esie. Ke ikpehe ini oro Isaiah eketịn̄de ntịn̄nnịm ikọ, Assyria ama ọsọhi idụt Israel efep ofụri ofụri onyụn̄ ekpere ndisobo Judah. Ini kiet, kpukpru obio ke Judah ẹkesịne ke idak Assyria ke ẹsiode Jerusalem ẹfep.—Isaiah 1:7, 8; 36:1.
7. Nso usụn̄ ke Israel ye Judah ẹkemek, ndien didie ke Jehovah akanam n̄kpọ?
7 Ikọt ediomi Abasi ẹkesobo mme utọ afanikọn̄ oro ke ntak Israel ye Judah mîkanamke akpanikọ inọ enye. Nte mbon oro ẹtịn̄de ẹban̄a ke n̄wed Mme N̄ke, mmọ ẹma ‘ẹkpọn̄ usụn̄ emi enende, ẹkesan̄a ke usụn̄ ekịm.’ (Mme N̄ke 2:13) Edi, okposụkedi Jehovah akayatde esịt ye ikọt esie, enye ikọkpọn̄ke mmọ ofụri ofụri. Utu ke oro, enye ama osio Isaiah ye mme prọfet eken ọdọn̄ man ẹnọ owo ekededi oro okosụk oyomde ndinam n̄kpọ Jehovah ke edinam akpanikọ ke idụt oro un̄wana eke spirit. Un̄wana oro ẹkenọde ẹbe ke mme prọfet emi ama enen̄ede ọsọn̄ urua. Enye ekedi se inọde uwem.
Mme Ini Ekịm Mfịn
8, 9. Mme n̄kpọ ewe ẹnam ekịm ofụk ererimbot mfịn?
8 Idaha oro okodude ke eyo Isaiah ekedi ata ukem ye mme idaha oro ẹdude mfịn. Ke eyo nnyịn, mme adausụn̄ ẹkpa edem ẹwụt Jehovah ye Edidem esie oro ẹdoride ke ebekpo, kpa Jesus Christ. (Psalm 2:2, 3) Mme adaiso ido ukpono Christendom ẹmebian̄a otuerọn̄ mmọ. Mme utọ adausụn̄ oro ẹdọhọ ke inam n̄kpọ Abasi, edi ke akpanikọ ata ediwak mmọ ẹmenede mme abasi ererimbot emi—ufreidụt, ekọn̄, inyene, ye mme ọwọrọiso owo—itie, owo itịn̄ke-tịn̄ iban̄a edikpep mme ukpepn̄kpọ ukpono ndem.
9 Ke nsio nsio itie, mme ido ukpono Christendom ẹn̄wana ekọn̄ ye en̄wan mbio obio oro ẹsịnede unam ekpụk asana ye mme n̄kpọndịk eken. N̄ko-n̄ko, utu ke ndisọn̄ọ nda nnọ eti ido uwem oro ọkọn̄ọde ke Bible, ediwak ufọkabasi ẹfụmi mîdịghe ẹnen̄ede ẹsịn udọn̄ ẹnọ mme oburobụt edinam nte use ye idan̄ ukemuduot. Nte utịp utọ edifụmi mme idaha Bible oro, otuerọn̄ Christendom ẹbiet mbon oro andiwet psalm eke eset eketịn̄de aban̄a ete: “Mmọ ifiọkke, inyụn̄ idịghe mme asian; mmọ ẹsesan̄a ke ekịm.” (Psalm 82:5) Ke akpanikọ, ọkpọsọn̄ ekịm ofụk Christendom, ukem nte okofụkde Judah eset.—Ediyarade 8:12.
10. Didie ke un̄wana ayama ke ekịm mfịn, ndien didie ke mbon nsụkidem ẹbọ ufọn?
10 Ke ufọt utọ ekịm emi, Jehovah ke anam un̄wana ayama ke ntak mbon nsụkidem. Enye ada mme asan̄autom esie oro ẹyetde aran ke isọn̄, “asan̄autom emi anamde akpanikọ, onyụn̄ enyenede ọniọn̄” ndinam emi, ndien mmọ emi ke ‘ẹyama nte ntantaọfiọn̄ ke ererimbot.’ (Matthew 24:45; Philippi 2:16) Otu asan̄autom oro, emi ediwak miliọn nsan̄a mmọ ẹdide “mme erọn̄ en̄wen” ẹnọde ibetedem, ọnọ un̄wana eke spirit emi ọkọn̄ọde ke Ikọ Abasi, kpa Bible. (John 10:16) Ke ekịm ererimbot emi, utọ un̄wana oro ọnọ mbon nsụkidem idotenyịn, an̄wam mmọ ndinyene itie ebuana ye Abasi, onyụn̄ an̄wam mmọ ndifep mme n̄kpọ iduọ eke spirit. Enye edi ọsọn̄urua, se inọde uwem.
“Nyotoro Enyịn̄ Fo”
11. Nso ntọt ke Jehovah ọkọnọ ke eyo Isaiah?
11 Ke eyo ekịm oro Isaiah okodude uwem ye idem ke eyo ọkpọsọn̄ ekịm oro eketienede ke ini mbon Babylon ẹketan̄de idụt Jehovah ẹka ntan̄mfep, nso orụk ndausụn̄ ke Jehovah ọkọnọ? Ke ẹsiode edinọ ndausụn̄ ke n̄kan̄ ido uwem ẹfep, enye ama ebem iso etịn̄ in̄wan̄-in̄wan̄ nte imọ idisude mme uduak imọ ke ebuana ye ikọt imọ. Ke uwụtn̄kpọ, kere ban̄a mme utịbe utịbe ntịn̄nnịm ikọ oro ẹdude ke Isaiah ibuot 25 esịm 27. Mme ikọ ẹdude ke mme ibuotn̄wed emi ẹwụt nte Jehovah akanamde n̄kpọ ke ini oro ye nte enye anamde ntre mfịn.
12. Nso ikọ ke Isaiah etịn̄ ke ofụri esịt?
12 Akpa, Isaiah atan̄a ete: “Jehovah afo edi Abasi mi, nyokpono fi, nyotoro enyịn̄ fo.” Nso ikọ itoro ofụri esịt ke emi edi ntem! Edi nso ikonụk prọfet oro ndibọn̄ utọ akam oro? Ẹyarade akpan ntak ke udiana ikpehe ke ufan̄ikọ oro, emi nnyịn ikotde ite: “Koro afo [Jehovah] anamde mme utịbe n̄kpọ; kpa uduak eyo oko, ata akpan akpanikọ.”—Isaiah 25:1.
13. (a) Nso ifiọk ikọsọn̄ọ esịtekọm oro Isaiah ekenyenede ọnọ Jehovah? (b) Didie ke nnyịn ikeme ndikpep n̄kpọ nto uwụtn̄kpọ Isaiah?
13 Ke eyo Isaiah, Jehovah ama anam ediwak utịben̄kpọ ọnọ Israel, ndien ẹma ẹwet mmọ ẹnịm. Nte an̄wan̄ade, Isaiah ama emehe ye mme uwetn̄kpọ emi. Ke uwụtn̄kpọ, enye ama ọfiọk nte ke Jehovah ama osion̄o ikọt esie ke ufụn ke Egypt onyụn̄ anyan̄a mmọ osion̄o ke iyatesịt udịmekọn̄ Pharaoh ke Ididuot Inyan̄. Enye ama ọfiọk nte ke Jehovah ama ada ikọt esie usụn̄ ebe wilderness onyụn̄ ada mmọ edisịm Isọn̄ Un̄wọn̄ọ. (Psalm 136:1, 10-26) Mme utọ n̄wetnnịm mbụk oro ẹma ẹwụt nte ke Jehovah edi Abasi akpanikọ ye se ẹkemede ndibuọt idem. “Uduak” esie—kpukpru n̄kpọ oro enye oyomde ndinam—ẹsiwọrọ ẹsu. Nnennen ifiọk oro Abasi ọnọde ama ọsọn̄ọ Isaiah idem ndika iso nsan̄a ke un̄wana. Ntem, enye ekedi eti uwụtn̄kpọ ọnọ nnyịn. Edieke nnyịn itịn̄de enyịn ikpep Ikọ Abasi oro ẹwetde-wet inyụn̄ idade enye isịn ke edinam, nnyịn n̄ko iyaka iso idu ke un̄wana.—Psalm 119:105; 2 Corinth 4:6.
Ẹsobo Obio
14. Nso ntịn̄nnịm ikọ ke ẹtịn̄ ẹban̄a obio, ndien eyedi ewe obio ke enye edi?
14 Ẹkụt uwụtn̄kpọ uduak Abasi ke Isaiah 25:2, emi nnyịn ikotde ite: “Afo amakabade obio enịm ke ibombom; enịm obio ibibene ke n̄wụre: enịm akwa ufọk isen owo, ete okûdi aba obio; ididiọn̄ke enye ke nsinsi.” Obio emi edi nso? Eyedi Isaiah eketịn̄ ntịn̄nnịm ikọ aban̄a Babylon. Ke akpanikọ, ini ama edi emi Babylon akakabarede edi ikpîkpu eboho itiat.
15. Ewe “akwa obio” idu mfịn, ndien nso iditịbe inọ enye?
15 Nte obio oro Isaiah eketịn̄de aban̄a enyene mbiet mfịn? Ih. N̄wed Ediyarade etịn̄ aban̄a “akwa obio eke akarade ndidem isọn̄.” (Ediyarade 17:18) Akwa obio oro edi “Akwa Babylon,” kpa ukara ofụri ererimbot eke nsunsu ido ukpono. (Ediyarade 17:5) Mfịn, akpan ikpehe Akwa Babylon edi Christendom, emi mme ọkwọrọ ederi esie ẹdade iso ke ndibiọn̄ọ utom ukwọrọikọ Obio Ubọn̄ ikọt Jehovah. (Matthew 24:14) Nte ededi, ukem nte Babylon eset, ẹyesọp ndisobo Akwa Babylon mfep, enye idifiakke idaha ida tutu amama.
16, 17. Didie ke mme asua Jehovah ẹkekpono enye ke eset ye ke eyomfịn?
16 Nso efen ke Isaiah etịn̄ ke ntịn̄nnịm ikọ aban̄a “obio ibibene”? Ke etịn̄de ikọ ọnọ Jehovah, Isaiah ọdọhọ ete: “Ọkpọsọn̄ obio oyokpono fi, obio mbon afai ayabak fi.” (Isaiah 25:3) Didie ke obio asua emi, “obio mbon afai,” edikpono Jehovah? Ọfọn, ti se iketịbede inọ okopodudu-n̄kan edidem Babylon oro, Nebuchadnezzar. Ke ama ekenyene enyene-ndịk ifiọk n̄kpọntịbe oro akayararede mmeme esie, ẹma ẹnyịk enye nditịn̄ mban̄a ubom Jehovah ye ata ọkpọsọn̄ odudu Esie. (Daniel 4:34, 35) Ke ini Jehovah owụtde odudu esie, ẹsinyịk idem mme asua esie ndinyịme mme utom odudu esie, okposụkedi ẹnyịmede mmen̄e mmen̄e.
17 Nte akananam ẹma ẹnyịk Akwa Babylon ndinyịme mme utom odudu Jehovah? Ih. Ke ini akpa ekọn̄ ererimbot, mme asan̄autom Jehovah oro ẹyetde aran ẹkekwọrọ ikọ ke idak ukụt. Ke 1918 mmọ ẹma ẹka ntan̄mfep eke spirit ke ini ẹkesịnde mme akama utom Watch Tower Society ke ufọk-n̄kpọkọbi. Utom ukwọrọikọ oro ẹtịmde-tịm ama ekpere nditre. Ekem, ke 1919, Jehovah ama ada spirit esie osion̄o mmọ onyụn̄ ada spirit esie afiak ọnọ mmọ odudu, ke oro ebede mmọ ẹma ẹtọn̄ọ ndinam utom oro ẹkedọn̄de mmọ ndikwọrọ eti mbụk ke ofụri isọn̄. (Mark 13:10) Ẹma ẹtịn̄ ntịn̄nnịm ikọ ẹban̄a kpukpru emi ke n̄wed Ediyarade, ye utịp oro enye edinyenede ke idem mme andibiọn̄ọ mmọ. Mmọ ẹma “ẹdịghe eti-eti, ẹnyụn̄ ẹyak ubọn̄ ẹnọ Abasi heaven.” (Ediyarade 11:3, 7, 11-13) Idịghe nte ke kpukpru mmọ ẹma ẹkabade esịt, edi ẹma ẹnyịk mmọ ndinyịme utom odudu Jehovah ke n̄kpọntibe emi, kpa nte Isaiah ekebemde iso etịn̄.
“Ọkpọsọn̄ Ebiet Owo Unana”
18, 19. (a) Ntak emi mme andibiọn̄ọ mîkemeke ndibiat nsọn̄ọnda ikọt Jehovah? (b) Didie ke “ikwọ mbon afai” edisụhọde?
18 Idahaemi ke ọwọn̄ọrede ntịn̄enyịn ọnọ mme edinam mfọnido Jehovah ye mbon oro ẹsan̄ade ke un̄wana, Isaiah ọdọhọ Jehovah ete: “Afo [edi] ọkpọsọn̄ ebiet owo unana, ọkpọsọn̄ ebiet eyen ubuene ke nnanenyịn esie, ubọhọ edịm, ufụk eyo, koro oyobio mbon afai ebietde edịm eke ọbọn̄de ibibene. Afo oyosụk iwok isen owo, nte eyo ke edisat ebiet; ikwọ mbon afai oyosụhọde nte eyo ke ini obubịt enyọn̄ ofụhọde.”—Isaiah 25:4, 5.
19 Toto ke 1919, mbon afai ẹdomo kpukpru n̄kpọ man ẹbiat nsọn̄ọnda mme ata andituak ibuot, edi mmọ ẹkpu. Ntak-a? Koro Jehovah edide ọkpọsọn̄ ebiet ye ebiet ubọhọ ikọt esie. Enye ọnọ mfụt oro ofụkde ikan̄ ikan̄ ukọbọ onyụn̄ ada nte ọkpọsọn̄ ibibene oro ọbiọn̄ọde oyobio ubiọn̄ọ. Nnyịn emi isan̄ade ke un̄wana Abasi imodori enyịn ye mbuọtidem iban̄a ini emi ‘ikwọ mbon afai edisụhọrede.’ Ih, nnyịn ke ọkpọsọn̄ udọn̄ imebet usen emi ẹdisobode mme asua Jehovah.
20, 21. Nso akwa usọrọ ke Jehovah anam, ndien nso ke akwa usọrọ oro edisịne ke obufa ererimbot?
20 Jehovah anam se ikande edikpeme mme asan̄autom esie. Enye ọnọ mmọ n̄kpọ nte ima ima Ete mmọ. Ke ama akafak ikọt esie osion̄o ke Akwa Babylon ke 1919, enye ama enịm akwa usọrọ edikan ọnọ mmọ, ọnọde akpakịp udia eke spirit. Ẹma ẹbem iso ẹtịn̄ ẹban̄a emi ke Isaiah 25:6, emi nnyịn ikotde ite: “Ke obot emi ke Jehovah mme udịm edinam akamba udia ọnọ kpukpru mme idụt, n̄kpọ eke ẹnyenede isek, ndia ke wine eke anade ke ntak, ke n̄kpọ eke ẹnyenede isek, ẹnyụn̄ ẹwakde ndia, wine ke ntak eke ẹtịmde ẹdụk.” Nso edidiọn̄ ke nnyịn inyene ntem ndibuana ke usọrọ oro! (Matthew 4:4) Ke akpanikọ, ẹdori akpakịp nti udia ke ‘okpokoro Jehovah.’ (1 Corinth 10:21) Ebede ke “asan̄autom emi anamde akpanikọ, onyụn̄ enyenede ọniọn̄,” ẹnọ nnyịn kpukpru se nnyịn ikpoyomde-yom ke usụn̄ifiọk eke spirit.
21 Ndien ekese n̄kpọ ẹdu ke akwa usọrọ emi Abasi anamde mi. Usọrọ eke spirit oro nnyịn idiade idahaemi eti nnyịn aban̄a akpakịp udia eke obụk oro ẹdidude ke obufa ererimbot oro Abasi ọn̄wọn̄ọde. Adan̄aoro, “n̄kpọ eke ẹnyenede isek” eyesịne akpakịp udia eke obụk. Owo ndomokiet idikopke biọn̄ ke n̄kan̄ eke obụk m̀mê ke n̄kan̄ eke spirit. Nso ubọhọ ke oro edidi ntem ọnọ ndima anam-akpanikọ oro ẹbọde ufen idahaemi ke ntak “akan̄” oro ẹkebemde iso ẹtịn̄ nte edidide ubak “idiọn̄ọ” edidu Jesus! (Matthew 24:3, 7) Ye mmọ, mme ikọ andiwet psalm ẹnen̄ede ẹnọ ndọn̄esịt. Enye ọkọdọhọ ete: “Uwak ibokpot ẹyedu ke isọn̄ ke nsom ikpọ obot.”—Psalm 72:16.
22, 23. (a) Nso “ọfọn̄ ufụk-iso,” m̀mê “ufụhọ-n̄kpọ,” ke ẹdisio ẹfep, ndien didie? (b) Didie ke ẹdisio ‘esuene ikọt Jehovah’ ẹfep?
22 Idahaemi kpan̄ utọn̄ nọ un̄wọn̄ọ oro akam enen̄erede edi utịbe. Ke emende idiọkn̄kpọ ye n̄kpa odomo ye “ọfọn̄ ufụk-iso,” m̀mê “ufụhọ-n̄kpọ,” Isaiah ọdọhọ ete: “Ke obot emi [Jehovah] eyemen iso ufụhọ-n̄kpọ emi ofụkde ofụri ekondo, ye ọfọn̄ ufụk-iso emi ofụkde kpukpru mme idụt.” (Isaiah 25:7) Kam kere! Idiọkn̄kpọ ye n̄kpa, emi ẹfụkde ubonowo nte ndodobi abran̄kịn oro ababade owo ibifịk, ididụhe aba. Ọdọn̄ nnyịn didie ntem ndikụt usen oro ẹdidade ufọn uwa ufak Jesus ẹnam n̄kpọ ọyọhọ ọyọhọ ẹnọ okopitem ye anam-akpanikọ ubonowo!—Ediyarade 21:3, 4.
23 Ke anyande ubọk owụt ubọn̄ ubọn̄ ini oro, prọfet oro ẹnọde odudu spirit mi ọsọn̄ọ ọnọ nnyịn ete: “[Abasi] eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep; oyonyụn̄ osio esuene ikọt esiemmọ ke ofụri ererimbot efep: koro edi Jehovah ọdọhọ.” (Isaiah 25:8) Owo ndomokiet idikpaha ndammana n̄kpa m̀mê nditua ke ntak atabade owo ima ke n̄kpa. Nso ukpụhọde oro akamade edidiọn̄ ke emi edidi ntem! N̄ko-n̄ko, owo idikopke aba esuene ye nsunsu ekikere oro ẹsuande oro Abasi ye mme asan̄autom esie ẹyọde ke ata anyan ini ke ebiet ndomokiet ke isọn̄. Ntak-a? Koro Jehovah oyosio anditọn̄ọ mmọ—ete nsu, Satan kpa Devil, ọkọrọ ye kpukpru mfri Satan—efep.—John 8:44.
24. Didie ke mbon oro ẹsan̄ade ke un̄wana ẹnam n̄kpọ ẹban̄a mme utom odudu oro Jehovah anamde ke ufọn mmọ?
24 Ke ẹkerede ẹban̄a mme utọ uyarade odudu Jehovah oro, onụk mbon oro ẹsan̄ade ke un̄wana nditan̄a nte: “Sese, Abasi nnyịn edi emi; nnyịn imebet enye, ndien enye anyan̄a nnyịn: Jehovah edi emi; nnyịn imebet enye: iyadara inyụn̄ ibre mbre iban̄a edinyan̄a esie.” (Isaiah 25:9) Ke mîbịghike, edinen ubonowo eyenyene kpukpru ntak ndikop idatesịt. Ekịm oro eyebe efep ofụri ofụri, ndien mme anam-akpanikọ ẹdidu ke un̄wana Jehovah ke nsinsi. Nte idotenyịn ekededi ekeme ndinyene ubọn̄ n̄kan emi? Baba, ikemeke!
Nte Afo Emekeme Ndinam An̄wan̄a?
• Ntak emi edide akpan n̄kpọ ndisan̄a ke un̄wana mfịn?
• Ntak emi Isaiah okotorode enyịn̄ Jehovah?
• Ntak emi mme asua mîdibiatke nsọn̄ọnda ikọt Abasi tutu amama?
• Nso akpakịp edidiọn̄ ina ibet mbon oro ẹsan̄ade ke un̄wana?
[Mme Mbụme Ukpepn̄kpọ]
[Ndise ke page 12, 13]
Mme andidụn̄ Judah ẹma ẹsiwa nditọwọn̄ ẹnọ Molech
[Mme ndise ke page 15]
Ifiọk aban̄ade mme utom odudu Jehovah ama onụk Isaiah nditoro enyịn̄ Jehovah
[Ndise ke page 16]
Ndinen owo ẹdidu ke un̄wana Jehovah ke nsinsi