Nso Idi Paradise eke Spirit?

ẸKEBỌK Gustavo ke ekpri obio kiet ke Brazil. * Ẹma ẹkpep enye toto ke uyen nte ke nti owo ẹsika heaven ke ẹma ẹkekpan̄a. Enye ikọfiọkke n̄kpọ ndomokiet iban̄a uduak Abasi oro nte ke usen kiet, anam-akpanikọ ubonowo eyenyene mfọnmma uwem ke paradise isọn̄. (Ediyarade 21:3, 4) Ndien n̄kpọ efen ama odu emi enye mîkọfiọkke. Enye ikọfiọkke nte ke idem idahaemi, imọ imekeme ndidu ke paradise eke spirit.

Nte akanam afo omokop aban̄a paradise eke spirit oro? Nte afo ọmọfiọk se enye edide ye se ẹyomde man owo edi andibuana ke enye? Oyom owo ekededi oro oyomde ndikop ata inemesịt ọdiọn̄ọ aban̄a paradise oro.

Ndikụt Paradise eke Spirit

Ndidọhọ nte ke mfịn owo akam ekeme ndidụn̄ ke paradise ekeme nditie nte idịghe ata idem n̄kpọ. Ererimbot emi idịghe paradise. Ata ediwak owo ẹdu oro ẹsobode se edidem Hebrew eset eketịn̄de aban̄a ete: “Se mmọn̄eyet mmọ emi owo ẹfịkde: ndien baba owo kiet eke ọdọn̄de mmọ esịt idụhe; mme andifịk mmọ ẹnyụn̄ ẹkan mmọ ubọk; ndien baba owo kiet eke ọdọn̄de mmọ esịt idụhe.” (Ecclesiastes 4:1) Ediwak miliọn owo ke mme itie ikie ẹbọ ufen ke idak mbiara ndutịm ukaraidem, ido ukpono, ye ndutịm uforo, ndien mmọ inyeneke ubọhọ, baba owo kiet eke “ọdọn̄de mmọ esịt” idụhe. Ediwak mbon efen ẹsịn ukeme ndikpe isọn mmọ, ndibọk nditọ mmọ, ndinyụn̄ nnam ediwak n̄kpọ en̄wen oro ẹyomde man mmọ ẹka iso ẹdu uwem. Eyedi mmọ emi n̄ko ẹkpema ndinyene owo kiet eke ọdọn̄de mmọ esịt, owo eke anamde mbiomo mmọ efere esisịt. Ye kpukpru mmọ, uwem inemke.

M̀mọ̀n̄, ndien, ke paradise eke spirit odu? Ọfọn, Ikọmbakara oro “paradise” enyene ebuana ye mme ikọ Greek, Persian, ye Hebrew oro kpukpru ẹnọde ekikere ẹban̄a itie inemesịt m̀mê in̄wan̄, emem emem itie nduọkodudu. Bible ọn̄wọn̄ọ ete ke usen kiet isọn̄ ayakabade ata ata paradise, ebietidụn̄ oro ebietde in̄wan̄, ọnọ anana-idiọkn̄kpọ ekpụk ubonowo. (Psalm 37:10, 11) Ye emi ke ekikere, nnyịn imokụt nte ke paradise eke spirit edi n̄kann̄kụk oro enemde ndise onyụn̄ etiede ifụre ifụre, ayakde owo enyene emem ye ekemmọ owo ye Abasi. Mfịn, nte Gustavo ekedide edifiọk, utọ paradise oro odu, ndien ibat owo oro ọkọride-kọri ẹdu ke enye.

Ke esịmde isua 12 ke emana, Gustavo ama ebiere ete ke imọ iyom ndidi oku Roman Catholic. Ye unyịme ete esie, enye ama odụk ufọkn̄wed ukpep utom oku. Do enye ama abuana ke ubre ikwọ, mbre, ye mbre ukara, emi ufọkabasi ekesịnde udọn̄ ọnọ ndida ndụri mme uyen. Enye ama ọfiọk ete ke oku ekenyene ndiyak idem nsịn ke ndin̄wam mme owo ye nte ke enye ikenyeneke ndidọ ndọ. Edi, ndusụk oku ye nditọ ufọkn̄wed ukpep utom oku oro Gustavo ọkọfiọkde ẹma ẹsibuana ke mme oburobụt edinam. Ke utọ idaha oro, ikebịghike Gustavo ama ọtọn̄ọ ndin̄wọn̄ mmịn ọkpọsọn̄ ọkpọsọn̄. Nte an̄wan̄ade, enye ikekwe paradise eke spirit kan̄a.

Usen kiet, Gustavo ama okot tract Bible oro eketịn̄de aban̄a paradise isọn̄. Emi ama anam enye ekere aban̄a uduak uwem. Enye ọdọhọ ete:  “Mma ntọn̄ọ ndikot Bible ndien ndien, edi Bible ikan̄wan̄ake mi. N̄kakam n̄kwe nte ke Abasi enyene enyịn̄.” Enye ama ọwọrọ ọkpọn̄ ufọkn̄wed ukpep utom oku onyụn̄ aka ebịne Mme Ntiense Jehovah, oyomde un̄wam ndifiọk Bible. Ke oro ebede, enye ama anam n̄kọri usọp usọp ndien ikebịghike enye ama ayak uwem esie ọnọ Abasi. Gustavo ama ekpep aban̄a paradise eke spirit.

Ikọt Enyịn̄ Abasi

Gustavo ama ekpep nte ke enyịn̄ Abasi, Jehovah, idịghe sụk akpan n̄kpọ udọn̄ inọ eyen ukpepn̄kpọ Bible. (Exodus 6:3) Enye edi akpan ubak utuakibuot akpanikọ. Jesus ama ekpep mme anditiene enye ndibọn̄ akam nte: “Ete nnyịn emi odude heaven: yak ikpono enyịn̄ Fo.” (Matthew 6:9) Ke etịn̄de aban̄a mme Gentile oro ẹkekabarede ẹdi mme Christian, mbet oro James ọkọdọhọ ete: ‘Abasi ama edise mme Gentile, ndisio ikọt ke otu mmọ nnọ enyịn̄ Esie.’ (Utom 15:14) Ke akpa isua ikie, esop Christian ekedi ‘ikọt enyịn̄ Esie.’ Nte ikọt enyịn̄ Abasi odu mfịn? Ih, ndien Gustavo ama edi edifiọk nte ke Mme Ntiense Jehovah ẹdi ikọt oro.

Mme Ntiense Jehovah ẹnam utom ifịk ifịk ke n̄kpọ nte idụt ye efakutom 235. Mmọ ẹwak ẹbe mme asan̄autom miliọn itiokiet, ndien owo miliọn itiaita efen oro ẹnyenede udọn̄ ẹsidụk mme mbono esop mmọ. Sia ẹdiọn̄ọde mmọ ntatara ntatara ke ntak an̄wa an̄wa utom ukwọrọikọ mmọ, mmọ ẹsu mme ikọ Jesus emi: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.” (Matthew 24:14) Nte ededi, ntak emi Gustavo ekenịmde ete ke imọ ima ikụt paradise eke spirit ke ebuana ye Mme Ntiense Jehovah? Enye ọdọhọ ete: “Mma mmen se n̄kokụtde ke ererimbot ye ke ufọkn̄wed ukpep utom oku akpan akpan ndomo ye se n̄kokụtde ke otu Mme Ntiense Jehovah. Akamba ukpụhọde edi ima emi odude ke otu Mme Ntiense.”

Mbon efen ẹtịn̄ ukem oro ẹban̄a Mme Ntiense Jehovah. Miriam, n̄kaiferi Brazil, ama ọdọhọ ete: “N̄kọfiọkke nte n̄kpokopde inemesịt, idem ke ubon mi. Akpa ini oro n̄kokụtde nte ẹnamde-nam ima ẹwụt ekedi ke otu Mme Ntiense Jehovah.” Eren oro ekerede Christian ama ọdọhọ ete: “Mma nsisịn idem ke ubụpekpo ke ini ke ini, edi ido ukpono ikedịghe akpan n̄kpọ inọ mi. Mma nnen̄ede mma idaha mi ke n̄kaowo ye utom mi nte ọdiọn̄-ukwakutom. Kpa ye oro, ke ini n̄wan mi ama ọkọtọn̄ọ ndikpep Bible ye Mme Ntiense Jehovah, mma n̄kụt ukpụhọde ke uwem esie. Idatesịt ye ifịk Christian iban oro ẹkesidide ẹdise enye ẹma ẹtụk mi n̄ko.” Ntak emi mme owo ẹtịn̄de mme utọ ikọ oro ẹban̄a Mme Ntiense Jehovah?

Nso Idi Paradise eke Spirit?

N̄kpọ kiet oro anamde Mme Ntiense Jehovah ẹdi san̄asan̄a edi esịtekọm oro mmọ ẹnyenede ẹban̄a ifiọk Bible. Mmọ ẹnịm ẹte ke Bible edi akpanikọ ye nte ke enye edi Ikọ Abasi. Ntem, mmọ iyụhọke n̄kukụre ke ndifiọk mme akpan ukpepn̄kpọ ido ukpono mmọ. Mmọ ẹnyene ndutịm ọkpọkpọ ukpepn̄kpọ ye edikot Bible oro akade-ka iso. Adan̄a nte owo abuanade ye Mme Ntiense Jehovah, ntre ke enye ekpep aban̄a Abasi ye uduak Esie oro ẹyararede ke Bible akan.

Utọ ifiọk oro anam Mme Ntiense Jehovah ẹbọhọ mme n̄kpọ oro ẹbọde mme owo inemesịt, utọ nte nsunsu ekikere ye mme ekikere oro ẹnọde unan. Jesus ọkọdọhọ ete: ‘Akpanikọ ayanam mbufo ẹwọrọ ufụn,’ ndien Mme Ntiense Jehovah ẹkụt ke emi edi ntre. (John 8:32) Fernando, emi ini kiet ko ekesisịnde idem ke ubụpekpo, ọdọhọ ete: “Ndikpep mban̄a nsinsi uwem ekedi ata akwa ubọhọ. Mma nsikop ndịk nte ke ete mi ayakpa mîdịghe nte ke ami nyakpa.” Akpanikọ ama anam Fernando ọbọhọ ndịk oro enye ekenyenede aban̄a ererimbot mme spirit ye inua-okot uwem ke n̄kpa ebede.

 Ke Bible, ifiọk Abasi enyene n̄kpet n̄kpet ebuana ye paradise. Prọfet Isaiah ọkọdọhọ ete: “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ke ererimbot, kpa nte mmọn̄ ofụkde inyan̄.”—Isaiah 11:9.

Nte ededi, ifiọk ke idemesie ikemke ndida emem oro Isaiah ekebemde iso etịn̄ aban̄a ndi. Owo enyene ndida se enye ekpepde nsịn ke edinam. Fernando ọkọdọhọ ete: “Ke ini owo ọkọride mbun̄wụm spirit, enye etịp esịn ke paradise eke spirit.” Fernando eketịn̄ aban̄a mme ikọ apostle Paul, emi okokotde nti edu oro Christian ekpenyenede ndikọri, “mbun̄wụm spirit.” Enye ọkọdọhọ ke mmọ ẹdi “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.

Nte afo emekeme ndikụt ntak emi edibuana ye otuowo oro ẹnyenede mme utọ edu oro ekpenen̄erede ebiet edidu ke paradise? Paradise eke spirit oro prọfet Zephaniah ekebemde iso etịn̄ odu ke otu mme utọ owo oro. Enye ọkọdọhọ ete: “[Mmọ] idinamke ukwan̄-n̄kpọ, idinyụn̄ isụhu nsu: owo idinyụn̄ ikwe edeme abian̄a ke inua mmọ: koro mmọ ẹyedia n̄kpọ ẹnyụn̄ ẹsụhọde ẹna, ndien baba owo kiet eke anamde mmọ ndịk ididụhe.”—Zephaniah 3:13.

Akpan Udeme Oro Ima Enyenede

Ekeme ndidi afo omokụt nte ke ima edi akpa ke otu mbun̄wụm spirit oro Paul akasiakde. Emi edi edu oro Bible etịn̄de ekese aban̄a. Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Edi akpanikọ, Mme Ntiense Jehovah idịghe mfọnmma. Ndusụk ini mmọ ẹsinyene mme ọkpọkpọ mfịna ke otu idemmọ kpa nte mme apostle Jesus ẹkenyenede. Edi mmọ ẹnen̄ede ẹma kiet eken, ndien mmọ ẹsibọn̄ akam ẹben̄e un̄wam edisana spirit nte mmọ ẹkọride edu emi.

Nte utịp, itie ebuana mmọ edi n̄wọrọnda. Usua eke ekpụk m̀mê ufreidụt idụhe ke otu mmọ. Ke akpanikọ, ediwak Ntiense oro ẹkesobode edinam unam ekpụk asana ye nsobo ofụri orụk ke mme utịt utịt isua eke ọyọhọ isua ikie 20 ẹma ẹkam ẹsịn uwem mmọ ke itiendịk man ẹkpeme kiet eken. Okposụkedi “ẹtode ke kpukpru obio ye esien ye idụt ye usem,” mmọ ẹnyene edidianakiet oro edide ọkpọsọn̄ n̄kpọ afo ndifiọk ibọhọke afo enyene enye.—Ediyarade 7:9.

Paradise ke Otu Mbon Oro Ẹnamde Uduak Abasi

Idiọkitọn̄, oburobụt ido, ye ibụk idụhe ke paradise eke spirit. Ẹsian mme Christian ẹte: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde, oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:2) Ke ini nnyịn idude edisana uwem inyụn̄ inamde uduak Abasi ke mme usụn̄ efen, nnyịn in̄wam ke ndibọp paradise eke spirit inyụn̄ itịp isịn ke inemesịt nnyịn. Carla ama okụt nte emi edide akpanikọ. Enye ọdọhọ ete: “Ete mi ama ekpep mi ndinam utom ọkpọsọn̄ man nnyene okụk idemmi. Edi okposụkedi ukpepn̄kpọ mi ke ufọkn̄wed ntaifiọk ọkọnọde mi ifụre, mma ntaba edidianakiet ye ifụre  eke ubon oro ifiọk otode Ikọ Abasi kpọt ekemede ndinọ nnyịn.”

Nte ededi, ndidu ke paradise eke spirit inamke owo ọbọhọ mme mfịna uwem. Mme Christian ẹsụk ẹdọdọn̄ọ. Idụt oro mmọ ẹdụn̄de ekeme ndin̄wana en̄wan mbio obio. Ediwak mmọ ẹdu ke unana. Kpa ye oro, ndinyene n̄kpet n̄kpet itie ebuana ye Jehovah Abasi—emi edide akpan ubak paradise eke spirit—ọwọrọ ke nnyịn imekeme ndiberi edem ke enye kaban̄a un̄wam. Ke akpanikọ, enye ọdọhọ nnyịn ete ‘itop mbiomo nnyịn inọ imọ,’ ndien ediwak owo ẹkeme ndisọn̄ọ utịbe utịbe usụn̄ oro enye an̄wamde mmọ ke ata n̄kpọsọn̄ idaha. (Psalm 55:22; 86:16, 17) Abasi ọn̄wọn̄ọ ndidu ye mme andituak ibuot nnọ enye idem ke “itịghede mfụt n̄kpa.” (Psalm 23:4) Mbuọtidem ke unyịme Abasi ndinọ nnyịn ibetedem an̄wam nnyịn ndika iso nnyene “emem Abasi, emi ayan̄ade ifiọk owo,” emi edide ukpọhọde ọnọ paradise eke spirit.—Philippi 4:7.

Nditịp Nsịn ke Paradise eke Spirit

Ata ediwak owo ẹsima ndika n̄kese itie inemesịt m̀mê in̄wan̄. Mmọ ẹsima ndisan̄a n̄kanade enye, ndusụk ẹtiede ke anyan n̄kpọitie ẹkop inem n̄kann̄kụk oro. Ke ukem usụn̄ oro, ediwak owo ẹsikop inem ndidụk nsan̄a ye Mme Ntiense Jehovah. Mmọ ẹsikụt nte itie ebuana oro etiede inem inem, emem emem, onyụn̄ ọnọde odudu. Nte ededi, oyom ẹse ẹban̄a ediye in̄wan̄ edieke anade enye aka iso edi paradise. Ukem ntre, paradise eke spirit odu ke ererimbot oro mîbietke paradise mi n̄kukụre koro Mme Ntiense Jehovah ẹkpemede enye, ndien Abasi ọdiọn̄ mme ukeme mmọ. Didie, ndien, ke owo ekeme nditịp nsịn ke paradise oro?

Akpa, oyom afo abuana ye esop Mme Ntiense Jehovah, ekpep Bible ye mmọ, onyụn̄ enyene ifiọk Bible oro edide isọn̄ ọnọ paradise eke spirit. Carla ọkọdọhọ ete: “Paradise eke spirit idụhe ke udia eke spirit mîdụhe.” Emi esịne edikot Ikọ Abasi kpukpru ini nnyụn̄ n̄kere mban̄a se afo okotde. Ifiọk oro afo enyenede ayanam fi enen̄ede asan̄a ekpere Jehovah Abasi, ndien afo eyedi edima enye. Afo n̄ko eyekpep nditịn̄ ikọ nnọ enye ke akam nnyụn̄ mben̄e ndausụn̄ ye spirit esie ndin̄wam fi nte afo anamde uduak esie. Jesus ọkọdọhọ nnyịn ete ikọbọ ke edibọn̄ akam. (Luke 11:9-13) Apostle Paul ọkọdọhọ ete: “Ẹkûdop akam.” (1 Thessalonica 5:17) Ifet editịn̄ ikọ nnọ Abasi ke akam ye ọyọhọ mbuọtidem nte ke enye ke akpan̄ utọn̄ edi akpan ikpehe paradise eke spirit.

Nte ini akade, se afo ekpepde ayanam uwem fo ọfọn akan, ndien ke akpatre afo oyoyom ndisian mbon efen se afo ekpepde. Do afo eyekeme ndinam item Jesus emi: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:16) Ndibuana ifiọk Jehovah Abasi ye Jesus Christ ye mbon efen nnyụn̄ ntịn̄ mban̄a akwa ima emi mmọ ẹnyenede ẹnọ ubonowo ada ekese inemesịt edi.

Ini ke edi emi ofụri isọn̄ edidide ata ata paradise—itie emi ebietde in̄wan̄ emi owo mîsabakede ye eti ebietidụn̄ anam-akpanikọ ubonowo. Paradise eke spirit ndidu ke “ndiọk eyo” emi edi uyarade odudu Abasi ye ntabinse n̄kpọ emi enye ekemede ndinam edinyụn̄ anamde ke ini iso.—2 Timothy 3:1.

Idem idahaemi, mbon oro ẹdude ke paradise eke spirit ẹkụt edisu Isaiah 49:10 ke usụn̄ eke spirit: “Biọn̄ ididọn̄ke mmọ, itọn̄ idinyụn̄ isatke mmọ; eyo ye utịn idibọn̄ke mmọ: koro anditua mmọ mbọm ayada mmọ usụn̄, ayada mmọ aka ke ọtọ eke mmọn̄ otopde ọwọrọ.” José ọyọsọn̄ọ nte ke oro edi akpanikọ. Enye ekenyene udọn̄ ndidi ọwọrọetop ebre ikwọ, edi enye ekenen̄ede okop uyụhọ ke ndinam n̄kpọ Abasi ye esop Christian. Enye ọdọhọ ete: “Idahaemi ndu uwem oro enyenede se ọwọrọde. Mmenyene ifụre ke itie nditọete Christian, ndien mmọfiọk Jehovah nte ima ima Ete emi nnyịn ikemede ndibuọt idem.” Ntem ẹtịn̄ nte odotde ẹban̄a inemesịt José—ye eke ediwak miliọn mbon efen oro ẹtiede nte enye—ke Psalm 64:10: “Edinen owo ayadara Jehovah, onyụn̄ ọbuọt idem ye enye: kpukpru mbon esịt kiet [ẹyenyụn̄] ẹbụre mbụre.” Nso ediye usụn̄ nditịn̄ mban̄a paradise eke spirit ke emi edi ntem!

[Ikọ idakisọn̄]

[Ndise ke page 10]

Ke adan̄aemi okopde inem paradise eke spirit, n̄wam nditat enye!