Nte Afo Emekeme Ndinen̄ede N̄kop Inemesịt?

GEORGE ekesikọm kpukpru owo ye inua imam. Ye enye, uwem ekedi ọsọn̄urua enọ oro anade ẹdara. Ẹkesida edu idatesịt ye idotenyịn mfọnọn̄kpọ ẹdiọn̄ọ enye—idem ke ini enye akakam ọtọn̄ọde ndikop ubiak usọn̄. Tutu esịm usen emi enye akakpade, ẹkediọn̄ọ George nte owo inemesịt. Nte afo emesikop inemesịt nte George? Nte afo emese obufa usen kiet kiet nte enọ oro anade ẹdara? Mîdịghe nte ekikere obufa usen esinam fi anana udọn̄ m̀mê idem okop ndịk? Nte odu n̄kpọ oro anamde fi okûkop inemesịt?

Ẹkabade inemesịt nte idaha mfọnọn̄kpọ oro mîsinen̄ekede ibịghi. Mme n̄kpọ oro ẹsidade ẹdiọn̄ọ enye ẹto ke mme ntụk uyụhọ ẹsịm ntotụn̄ọ ye ọkpọsọn̄ idatesịt ye ndammana udọn̄ ndiyom idaha mfọnọn̄kpọ oro aka iso. Nte utọ inemesịt oro enen̄ede odu?

Mfịn, n̄kaowo esịn udọn̄ ọnọ ekikere nte ke mme owo ẹkpekop inemesịt n̄kukụre edieke mmọ ẹkpenyenede inyene ekem. Ediwak miliọn owo ẹdu uwem etiede itọk itọk ke ọkpọsọn̄ ukeme oro mmọ ẹsịnde ndinyene inyene. Ke ndinam ntre, ediwak owo ẹtaba ọkpọkpọ itie ebuana ye mme akpan n̄kpọ eken ke uwem. Nte iyọn̄ ke ediene, mmọ ẹtie itọk itọk kpukpru ini, ndien mmọ inyeneke ini nditie n̄kere n̄kpọ inyụn̄ inyeneke ini inọ kiet eken. Nte an̄wan̄ade, ntọt kiet ke Los Angeles Times ọdọhọ ete ke “ibat mme owo oro ẹdụn̄ọrede ẹfiọk ke ẹnyene udọn̄ọ mfụhọ ke ọkọri, ndien isua emana oro [mfụhọ] ọtọn̄ọde ke aka iso ndisụhọde. . . . Mme ibọk usụhọde mfụhọ ẹdi nnyama-n̄kan ibọk ẹnọ usiakifia unam n̄kpọsọn̄ ibọk.” Ediwak miliọn owo ẹsida ndiọi n̄kpọsọn̄ ibọk mîdịghe ẹdomo ndin̄wọn̄ ọkpọsọn̄ mmịn man ẹfre uwa. Ndusụk owo ẹsisịn  idem ke ebeubọk edinam ke ini mmọ ẹkopde mfụhọ. Ke ndụn̄ọde kiet, n̄wedmbụk n̄kpọntịbe Britain oro The Guardian ọdọhọ ke “iban ẹwak ẹkan ke otu mbon oro ẹsinen̄erede ẹsịn idem ke udep n̄kpọ nte usọbọ. Mmọ ẹmedep n̄kpọ awak akan irenowo utịm ikata ke ini ẹkopde mfụhọ.”

Nte ededi, owo ikwe ata inemesịt ke ufọkurua, ke ọkpọsọn̄ mmịn, ke n̄kpasịp ibọk, ke n̄kpọ ukịmibọk, m̀mê ke okụk ẹnyenede ke ban̄k. Owo inyamke-nyam inemesịt; enye edi ke mfọn. M̀mọ̀n̄ ke nnyịn ikeme ndikụt utọ ọsọn̄urua enọ oro? Nnyịn iyeneme oro ke ibuotikọ oro etienede.