Usiakidem Oro Owo Mîsịnke Iyịp—“Akpan Usụn̄ Usọbọidem”

KE IDAK ibuotikọ oro “Usiakidem Oro Owo ‘Mîsịnke Iyịp,’” magazine Maclean’s ama ọtọt ete ke mbiaibọk ke ofụri Canada “ẹsion̄o mbufa usụn̄ usọbọidem ẹdi, oro ẹnamde inua-okot usiakidem oro owo mîsịnke iyịp akabade edi akpan usụn̄ usọbọidem ke isua ition emi ẹbede.” Owo kiet ke otu mmọ edi Brian Muirhead, ọnọ-ibọk usụhọde ubiak eke Itie Ukpepn̄kpọ Mban̄a Nsọn̄idem ke Winnipeg. Nso ikonụk enye ndidụn̄ọde nyom ukpụhọ ibọkusọbọ oro owo mîsịnke iyịp?

Ke 1986, Dr. Muirhead ama enyịme n̄kpọ-ata edide ndisiak idem owo isua 70 ke emana emi ekenyenede ndọk oro ọwọrọde iyịp, oro okoyomde ẹnọ imọ usọbọ oro mîyomke edikịm iyịp nsịn ke idem ke ntak mme edinịm ke akpanikọ esie oro ẹkọn̄ọde ke Bible, nte kiet ke otu Mme Ntiense Jehovah. (Utom 15:28, 29) Maclean’s ọtọt ete ke Dr. Muirhead “akada usụn̄ usọbọidem eke edikịm inụn̄ inụn̄ mmọn̄ibọk nsịn owo udọn̄ọ ke idem oro owo mîsiwakke ndida nnam n̄kpọ, man anam iyịp esie ọdọk. Usụn̄ usọbọidem emi ama okụt unen, ndien emi ama ọsọn̄ọ edinịm ke akpanikọ Muirhead oro ọkọkọride-kọri nte ke ‘nnyịn ima inam edikịm iyịp nsịn ke idem awak akaha. Mma n̄kere ke ekem ini ndidụn̄ọde nyom mme ukpụhọde.’”

“Ndịk kaban̄a ebiet ẹdidade iyịp ke ini iso—ye ndịk oro ediwak mbon udọn̄ọ ẹnyenede ẹban̄a edibọ ifọt udọn̄ọ nto edikịm iyịp nsịn ke idem ẹkedemede” ndụn̄ọde aban̄ade usiakidem oro owo mîsịnke iyịp. Idịghe Mme Ntiense Jehovah kpọt ẹbọ ufọn ẹto mme ndụn̄ọde oro mbiaibọk ẹnamde, edi ediwak mbon en̄wen ẹbọ ufọn. Maclean’s ọdọhọ ete: “Ke akande editre edikịm iyịp nsịn ke idem ke ediwak idaha, usiakidem oro owo mîsịnke iyịp ọsụhọde n̄kpọndịk edimen udọn̄ọ nto idiọk iyịp—inamke n̄kpọ m̀mê ekpri didie.” Edi idem iyịp oro “mîbiarake” ekeme ndinam owo odu ke itiendịk edidi se udọn̄ọ ọnọmọde ebe ke ndifịk editịbe ọdọn̄ọ udọn̄ọ nnịm ke ibio ini.

Nso idi ntak oro Mme Ntiense Jehovah ẹsọn̄ọde ẹyịre ye ukpụhọ ibọkusọbọ oro owo mîsịnke iyịp? Ekeme ndidi afo ayama ndikot ediye uduot ekpri n̄wed oro How Can Blood Save Your Life? Mme Ntiense Jehovah ẹyedara ndibuana enye ye afo.