“Ọbọn̄ Emeset ke Akpanikọ”!

Kere nte mme mbet Jesus ẹkefụhọde ke ini ẹkewotde Ọbọn̄ mmọ. Eketie nte idotenyịn mmọ ama akpa ukem nte okpo oro Joseph owo Arimathea okobụkde ke udi. Idotenyịn ekededi nte ke Jesus oyosio mme Jew ke ọkpọnọ mbon Rome ama akpa mfụhọ n̄ko.

EDIEKE oro ekedide utịt n̄kpọ oro, ekeme ndidi mme mbet Jesus ikpodụhe aba ukem nte mme anditiene ediwak mbon oro ẹdọhọde nte idide Messiah mîdụhe aba. Edi Jesus ke okodu ke uwem! Nte N̄wed Abasi ọdọhọde, enye ama owụt mme anditiene enye idem ke ediwak idaha esisịt ini ke enye ama akakpa. Ke ntre, ama onụk ndusụk mmọ ndifiori nte: “Ọbọn̄ emeset ke akpanikọ”!—Luke 24:34.

Mme mbet ẹkenyene ndin̄wana mban̄a mbuọtidem mmọ ke Jesus nte Messiah. Ke ndinam ntre, mmọ ẹkenen̄ede ẹnyan ubọk ẹwụt ediset ke n̄kpa esie nte ọkpọsọn̄ uyarade itie esie nte Messiah. Ke akpanikọ, “mme apostle ẹnyụn̄ ẹnọ ikọ-ntiense ye akwa odudu ẹban̄a ediset Ọbọn̄ Jesus.”—Utom 4:33.

Edieke akanam owo ekededi okowụtde nte ke ediset ke n̄kpa emi ekedi abian̄a—ndusụk ebe ke ndinam owo kiet ke otu mbet enyịme nte ke enye ekedi abian̄a m̀mê ke ndiwụt nte ke okpo Jesus okosụk ododu ke udi—Ido Ukpono Christ okpokokpu toto ke ntọn̄ọ. Edi enye ikokpụhu. Ke ẹfiọkde ẹte ke Christ odu uwem, mme anditiene Jesus ẹma ẹtan̄a ediset ke n̄kpa esie ke kpukpru  ebiet, ndien akwa udịmowo ẹma ẹkabade ẹdi mme andinịm Christ oro ẹkenamde eset ke n̄kpa ke akpanikọ.

Ntak emi afo n̄ko ekpenịmde ediset ke n̄kpa Jesus ke akpanikọ? Nso uyarade idu nte ke emi ekedi ata ata n̄kpọntịbe?

Ntak Ekpekerede Aban̄a Uyarade Odude?

Mbụk Gospel mbinan̄ ẹtọt ediset ke n̄kpa Jesus. (Matthew 28:1-10; Mark 16:1-8; Luke 24:1-12; John 20:1-29) * Mme ikpehe eken ke N̄wed Abasi Christian Usem Greek ẹsọn̄ọ ẹtịn̄ ẹban̄a ediset Christ ke n̄kpa.

Eyịghe idụhe mme anditiene Jesus ẹtan̄ade ediset ke n̄kpa esie! Ke akpanikọ, edieke edide Abasi ama anam enye eset edidu uwem, oro edi ata enyene-ndyọ mbụk oro akanam ererimbot okopde. Oro ọwọrọ ete ke Abasi odu. Akan oro, enye ọwọrọ nte ke Jesus odu ke uwem idem idahaemi.

Didie ke oro otụk nnyịn? Ọfọn, Jesus ama ọbọn̄ akam ete: “Nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Ih, nnyịn imekeme ndinyene ọnọ-uwem ifiọk aban̄ade Jesus ye Ete esie. Ebede ke ndida utọ ifiọk oro nsịn ke edinam, idem ọkpọkọm nnyịn ikpakpa, ẹkeme ndinam nnyịn iset, sia ẹma ẹkenam Jesus eset. (John 5:28, 29) Nnyịn imekeme ndinyene idotenyịn nsinsi uwem ke paradise isọn̄ ke idak Obio Ubọn̄ Abasi eke heaven ke ubọk Eyen esie emi ẹnọde ubọn̄, Jesus Christ, kpa Edidem ndidem.—Isaiah 9:6, 7; Luke 23:43; Ediyarade 17:14.

Ntre, ndien, mbụme aban̄ade m̀mê Jesus ama enen̄ede eset ke n̄kpa edi akpan n̄kpọ. Enye otụk uwem nnyịn idahaemi ye idotenyịn nnyịn kaban̄a ini iso. Ntak edi oro nnyịn inọde fi ikot ndidụn̄ọde uyarade inan̄ nte ke Jesus ama akpa onyụn̄ eset.

Jesus Ama Enen̄ede Akpa ke Eto

Ndusụk mbon eyịghe ẹdọhọ ẹte ke okposụkedi ẹkekọn̄de ke eto, Jesus ikenen̄ekede ikpa ke eto. Mmọ ẹdọhọ ẹte ke enye n̄kukụre okososụhọ ye nte ke mfụt udi ama anam enye eset. Edi, kpukpru n̄wed ẹdude ẹwụt nte ke ekedi okpo Jesus ke ẹkebụk ke udi.

Sia ẹkewotde Jesus ke eferife, mme ntiense ẹma ẹkụt nte ke enye ama enen̄ede akpa ke eto. Etubom ekọn̄ emi ekesede aban̄a uwotowo oro ama ọsọn̄ọ n̄kpa esie. Etubom ekọn̄ oro ekedi ataifiọk emi utom esie ekesịnede ndidụn̄ọde mfiọk m̀mê Jesus ama enen̄ede akpa. Akan oro, ekedi n̄kukụre ke ama ọkọsọn̄ọ nte ke Jesus ama akpa ke Andikara Rome oro Pontius Pilate akayak Joseph owo Arimathea emen okpo Jesus okobụk.—Mark 15:39-46.

Ẹma Ẹkụt Nte Udi Anade Ukpọk

Ukpọk udi ọkọnọ mme mbet akpa uyarade nte ke Jesus ama eset ke n̄kpa, ndien uyarade emi osụk edi se owo mîkemeke ndifan̄a. Ẹkebụk Jesus ke obufa udi, enye oro akananam owo mîbụkke owo ke esịt. Udi oro okodu ekpere itie emi ẹkekọn̄de enye ke eto ndien ẹma ẹkeme ndikụt enye ata mmemmem mmemmem ini oro. (John 19:41, 42) Kpukpru mbụk Gospel ẹnyịme nte ke ini mme ufan Jesus ẹkekade ẹkesịm udi ke ọyọhọ usenubọk iba ke enye ama akakpa, okpo esie ikodụhe.—Matthew 28:1-7; Mark 16:1-7; Luke 24:1-3; John 20:1-10.

Ukpọk udi oro ama akpa mme asua Jesus idem, ukem nte akakpade mme ufan esie. Mme asua esie ke ẹkenam n̄kpọ ke anyan ini ndikụt nte ke enye akpa, ke ẹnyụn̄ ẹbụk enye. Ke ẹma ẹkenam uduak mmọ, mmọ ẹma ẹnịm mbon ukpeme ẹnyụn̄ ẹfụk udi. Nte  ededi, ke usenubọk akpa usen urua, udi akana ukpọk.

Nte mme ufan Jesus ẹkesio okpo esie ke udi? Ikpedịghe mmọ, sia mme Gospel ẹwụtde nte ke mmọ ẹma ẹnen̄ede ẹfụhọ ke ẹma ẹkewot enye. N̄ko-n̄ko, ọkpọsọsọn̄ mme mbet esie ndika iso nyọ ukọbọ ye n̄kpa ke n̄kpọ emi mmọ ẹkefiọkde ke edi abian̄a.

Mmanie ẹkesio okpo ke udi? Mme asua Jesus ikposioho okpo oro. Idem edieke edide mmọ ẹkesio, mmọ ke akpanikọ ẹkpekemen enye ẹdi ke ukperedem man otodo ẹwụt ke se mme mbet ẹkedọhọde nte ke ẹma ẹnam Jesus eset ye nte ke enye ke okodu uwem, ekedi nsu. Edi akananam n̄kpọ ntre iketịbeke, koro edi Abasi okosio enye ke udi.

Ediwak urua ke ukperedem, mme asua Jesus ikenyeneke mfan̄a oro ekemde ke ini Peter ọkọsọn̄ọde ete: “Mbufo nditọ Israel, ẹkop ikọ emi: Jesus eyen Nazareth, owo emi Abasi enyịmede ke otu mbufo ke n̄kpọsọn̄ utom ye mme utịbe n̄kpọ ye mme idiọn̄ọ eke Abasi adade ubọk Esie anam ke otu mbufo, nte mbufo ke idem mbufo ẹfiọkde; ke ọkpọsọn̄ uduak ye mbe-iso ifiọk Abasi ke ẹkeda kpa Jesus ẹyak ke ubọk mme anana-ibet, ẹkọn̄ ke [eto] ẹwot. Edi Abasi amatat ubiak n̄kpa anam enye eset: koro n̄kpa mîkemeke ndimụm Enye n̄kama. Koro David ọdọhọ aban̄a Enye ete, Mmokụt Jehovah ke iso Mi kpukpru ini . . . obụkidem mi oyonyụn̄ etie ke idotenyịn: koro Afo udukpọn̄ke ukpọn̄ mi ke obio ekpo, udunyụn̄ uyakke Edisana owo fo okụt mbiara.”—Utom 2:22-27.

Ediwak Owo Ẹma Ẹkụt Jesus Oro Ẹkenamde Eset

Ke n̄wed Utom, Luke andiwet Gospel ọkọdọhọ ete: “[Jesus] onyụn̄ ada ediwak idiọn̄ọ owụt [mme apostle] Idem Esie nte odu-uwem, ke n̄kpa Esie ama ekebe, owụt mmọ Idem usen aba, onyụn̄ etịn̄ n̄kpọ aban̄a Obio Ubọn̄ Abasi.” (Utom 1:2, 3) Ediwak ke otu mbet ẹma ẹkụt Jesus oro ẹnamde eset ke n̄kpa ke nsio nsio idaha—ke in̄wan̄, ke usụn̄, ke ini udia, ke mben Inyan̄ Tiberias.—Matthew 28:8-10; Luke 24:13-43; John 21:1-23.

Mme okụt ndudue ẹfan̄a nte ke mme ediwụt idem emi idịghe akpanikọ. Mmọ ẹdọhọ ẹte ke mme andiwet ẹketetịbi mme mbụk oro, mîdịghe mmọ ẹnyan ubọk ẹwụt mme n̄kpọ oro ẹbietde ntuaha ke mmọ. Ke akpanikọ, n̄kpri ukpụhọde oro ẹdude ke mme mbụk Gospel ẹwụt nte ke ediomi ndomokiet ikodụhe. Ẹnam ifiọk oro nnyịn inyenede iban̄a Jesus atara ke ini andiwet kiet ọnọde ntọt oro anamde mbụk efen aban̄ade ndusụk n̄kpọntịbe ke uwem Christ eke isọn̄, ọyọhọ.

Nte Jesus ndiwụt mme owo idem ke ama ekeset ke n̄kpa ekedi mme ndap ndap ekikere? Eneni ekededi ke afan̄ emi isịneke ifiọk, sia ata ediwak owo ẹma ẹkekụt enye. Mmọ ẹma ẹsịne mme ọkọiyak, iban, anamutom ukara, idem ye apostle Thomas oro ekenyenede eyịghe, oro ekenịmde n̄kukụre ke enye ama okokụt uyarade oro owo mîkemeke ndifan̄a nte ke ẹma ẹnam Jesus eset ke n̄kpa. (John 20:24-29) Ke ediwak idaha, mme mbet Jesus ke akpa ini ikọfiọkke Ọbọn̄ mmọ oro ẹnamde eset ke n̄kpa. Ini kiet, se ibede owo 500 ẹma ẹkụt enye, emi ata ediwak ke otu mmọ ẹkesụk ẹdude ke uwem ke ini apostle Paul akadade n̄kpọntịbe oro nte uyarade ke enye ndin̄wana nnọ ediset ke n̄kpa.—1 Corinth 15:6.

 Jesus Emi Odude Uwem Otụk Uwem Mme Owo

Ediset ke n̄kpa Jesus idịghe sụk n̄kpọ ndinyene udọn̄ mban̄a m̀mê n̄kpọ ndineni mban̄a. Akpanikọ oro nte enye odu ke uwem otụk mme owo ke kpukpru ebiet ke eti usụn̄. Toto ke akpa isua ikie, anana-ibat owo ẹmekpụhọde ẹto unana udọn̄ m̀mê ọyọhọ ọyọhọ edibiọn̄ọ Ido Ukpono Christ ẹsịm ọyọhọ edinịm ke akpanikọ nte ke enye edi ido ukpono akpanikọ. Nso ikokpụhọde mmọ? Edidụn̄ọde N̄wed Abasi ọsọn̄ọ ọnọ mmọ nte ke Abasi ama anam Jesus eset okodu uwem nte ubọn̄ ubọn̄ edibotn̄kpọ eke spirit ke heaven. (Philippi 2:8-11) Mmọ ẹnyene mbuọtidem ke Jesus ye ke ndutịm Jehovah Abasi kaban̄a edinyan̄a ebe ke uwa ufak Christ. (Rome 5:8) Mme utọ owo oro ẹnyene ata inemesịt ebe ke ndinam uduak Abasi ndinyụn̄ ndu uwem ekekem ye mme ukpepn̄kpọ Jesus.

Kere se owo ndidi Christian ke akpa isua ikie ọkọwọrọde. Mmọ ikenyeneke uku, odudu, m̀mê inyene. Ke edide ata isio, ediwak akpa Christian ẹma ‘ẹnyịme ke idatesịt ẹte ẹbụme inyene mmimọ’ ke ntak mbuọtidem mmọ. (Mme Hebrew 10:34) Ido Ukpono Christ ama oyom uwem n̄waidem ye ukọbọ oro ke ediwak idaha ekesisụn̄ọde ke n̄kpa usụn̄ Abasi.

Mbemiso ẹkekabarede ẹdi mme anditiene Christ, ndusụk owo ẹma ẹnyene idotenyịn kaban̄a uku ye inyene. Saul eke Tarsus ọkọbọ ukpep ke idak ọwọrọetop andikpep Ibet oro Gamaliel ama onyụn̄ ọtọn̄ọ ndinyene uku ke enyịn mme Jew. (Utom 9:1, 2; 22:3; Galatia 1:14) Edi, Saul ama akabade edi apostle Paul. Enye ye ediwak mbon eken ẹma ẹsịn uku ye odudu oro ererimbot emi ọkọnọde. Ntak-a? Man ẹsuan etop ata idotenyịn oro ọkọn̄ọde ke mme un̄wọn̄ọ Abasi ye ke akpanikọ oro nte ke ẹma ẹnam Jesus Christ eset ke n̄kpa. (Colossae 1:28) Mmọ ẹma ẹnyịme ndibọ ufen ke se mmọ ẹkefiọkde ke edi akpanikọ.

Ukem oro ke edi ye ediwak miliọn owo mfịn. Afo emekeme ndikụt mmọ ke mme esop Mme Ntiense Jehovah ke ofụri ererimbot. Mme Ntiense ẹnọ fi ufiop ufiop ikot ẹte edidụk edinam n̄kpa Christ eke isua ke isua, emi edidade itie ke utịn ama okosụhọde ke Sunday, April 8, 2001. Mmọ ẹyedara edidu fo ke edinam oro ye ke kpukpru mbono esop mmọ kaban̄a ukpepn̄kpọ Bible oro ẹsinịmde ke mme Ufọkmbono Obio Ubọn̄ mmọ.

Ntak mûkpepke mme n̄kpọ efen efen, idịghe kaban̄a n̄kpa ye ediset ke n̄kpa Jesus kpọt edi n̄ko kaban̄a uwem ye mme ukpepn̄kpọ esie? Enye ọnọ fi ikot ete etiene imọ. (Matthew 11:28-30) Nam n̄kpọ idahaemi ndinyene nnennen ifiọk Jehovah Abasi ye Jesus Christ. Ndinam ntre ekeme ndiwọrọ nsinsi uwem ke idak Obio Ubọn̄ Abasi ke ubọk edima Eyen esie.

[Ikọ idakisọn̄]

[Mme ndise ke page 7]

Ediwak miliọn owo ẹkop ata inemesịt nte mme anditiene Jesus Christ

[Ebiet Ẹdade Ndise Ẹto ke page 6]

Oto Self-Pronouncing Edition of the Holy Bible, esịnede King James ye mme edikabade oro Ẹfiakde Ẹtịm