Kere N̄kpọ Spirit Ndien Du Uwem!
Kere N̄kpọ Spirit Ndien Du Uwem!
“Edikere n̄kpọ spirit edi uwem.”—ROME 8:6.
1, 2. Bible owụt nso ukpụhọde ke ufọt “obụkidem” ye “spirit”?
IDỊGHE mmemmem n̄kpọ ndika iso nnyene edisana idaha ido uwem ke iso Abasi ke oburobụt n̄kaowo oro otorode ediyụhọ mme udọn̄ obụkidem mi. Nte ededi, N̄wed Abasi owụt ukpụhọde oro odude ke ufọt “obụkidem” ye “spirit,” owụtde in̄wan̄-in̄wan̄ ukpụhọde oro odude ke ufọt ndiọi utịp edidi se ikpọkidem idiọkn̄kpọ akarade ye nti utịp edisụk idem nnọ odudu edisana spirit Abasi.
2 Ke uwụtn̄kpọ, Jesus Christ ọkọdọhọ ete: “Edi spirit anam owo odu uwem: obụkidem inọhọ owo baba udori kiet: mme ikọ oro n̄ketịn̄de nnọ mbufo ẹdi spirit ẹnyụn̄ ẹdi uwem.” (John 6:63) Apostle Paul ekewet ọnọ ẹsọk mme Christian ke Galatia ete: “Obụkidem ada udọn̄ esie an̄wana ye Spirit, Spirit onyụn̄ ada udọn̄ Esie an̄wana ye obụkidem; mmọ mbiba ẹbiọn̄ọ kiet eken.” (Galatia 5:17) Paul ama ọdọhọ n̄ko ete: “Owo eke ọtọde ọnọ obụkidem ọyọdọk mbiara oto obụkidem; edi owo eke ọtọde ọnọ Spirit, oto ke Spirit ke enye ọyọdọk nsinsi uwem.”—Galatia 6:8.
3. Nso ke oyom man ikịbe ibọhọ ndiọi udọn̄ ye ntụhọ?
3 Edisana spirit Jehovah—anamutom odudu esie—ekeme ndisio ndek ndek “udọn̄ obụkidem” ye akama-nsobo odudu ikpọkidem idiọkn̄kpọ nnyịn mfep uforo uforo. (1 Peter 2:11) Man ikịbe ibọhọ ufụn ndiọi ntụhọ, edi akpan n̄kpọ ete nnyịn inyene un̄wam spirit Abasi, koro Paul ekewet ete: “Edikere n̄kpọ obụkidem ọwọrọ n̄kpa; edi edikere n̄kpọ spirit edi uwem ye emem.” (Rome 8:6) Nso ke ndikere n̄kpọ spirit ọwọrọ?
“Edikere N̄kpọ Spirit”
4. Nso ke “edikere n̄kpọ spirit” ọwọrọ?
4 Ke ini Paul ekewetde aban̄a “edikere n̄kpọ spirit,” enye akada ikọ Greek oro owụtde “usụn̄ ukere n̄kpọ, ediwụk ekikere, . . . uduak, se owo enyenede udọn̄ aban̄a, se owo awade idem ọnọ.” Ikọedinam oro enyenede ebuana ye emi ọwọrọ “kere, wụk ekikere ke akpan usụn̄ kiet.” Ntem, ndikere n̄kpọ spirit ọwọrọ ndidi se anamutom odudu Jehovah akarade onyụn̄ onụkde. Enye ọwọrọ nte ke nnyịn imenyịme ndiyak edisana spirit Abasi enen̄ede akara ekikere, mme ntụhọ, ye mme udọn̄ nnyịn.
5. Ke nso udomo ke nnyịn ikposụk idem inọ odudu edisana spirit?
5 Paul ama ọsọn̄ọ etịn̄ udomo oro nnyịn ikposụkde idem inọ odudu edisana spirit ke ini enye eketịn̄de aban̄a ndidi ‘ifịn ke spirit.’ (Rome 7:6, NW) Ke isọn̄ mbuọtidem mmọ ke uwa ufak Jesus, ẹmenam mme Christian ẹbọhọ odudu idiọkn̄kpọ ndien ke ntem mmọ ‘ẹkpan̄a’ ẹwọn̄ọ ẹkpọn̄ akani idaha mmọ nte ifịn idiọkn̄kpọ. (Rome 6:2, 11) Mbon oro ke ndammana usụn̄ ẹkpan̄ade ke utọ usụn̄ oro ẹsụk ẹdodu uwem ke ata ata usụn̄ ndien idahaemi ẹnyene ifụre nditiene Christ nte “ifịn edinen ido.”—Rome 6:18-20.
N̄wọrọnda Ukpụhọde
6. Nso ukpụhọde ke mbon oro ẹkabarede ẹdi “ifịn edinen ido” ẹnam?
6 Edikpụhọde nto edidi “ifịn idiọk-n̄kpọ” nsịm edinam n̄kpọ Abasi nte “ifịn edinen ido” enen̄ede edi n̄wọrọnda ukpụhọde. Kaban̄a ndusụk owo oro ẹkenamde utọ ukpụhọde oro, Paul ekewet ete: “Ẹma ẹyet mbufo, ẹma ẹnam mbufo ẹsana, ẹma ẹtebe mbufo ikpe ke enyịn̄ Ọbọn̄ Jesus Christ, ye ke Spirit Abasi nnyịn.”—Rome 6:17, 18; 1 Corinth 6:11.
7. Ntak edide akpan n̄kpọ ndinyene ekikere Jehovah ke mme n̄kpọ?
7 Man inam utọ n̄wọrọnda ukpụhọde oro, oyom nnyịn ibem iso ifiọk se idide ekikere Jehovah ke mme n̄kpọ. Ke ediwak isua ikie emi ẹkebede, David andiwet psalm ama eben̄e Abasi ifịk ifịk ete: “Wụt mi usụn̄ fo, O Jehovah . . . Nam mi nsan̄a ke akpanikọ fo, nyụn̄ teme mi.” (Psalm 25:4, 5) Jehovah ama akpan̄ utọn̄ ọnọ David, ndien Enye ekeme ndibọrọ utọ akam oro, emi mme asan̄autom esie eke eyomfịn ẹsibọn̄de n̄ko. Sia mme usụn̄ ye akpanikọ Abasi ẹdide edisana, nditie n̄kere mmọ edidi n̄kpọ un̄wam edieke ẹdomode nnyịn ndiyụhọ mme ndek ndek udọn̄ obụkidem nnyịn.
Akpan Udeme Oro Ikọ Abasi Enyenede
8. Ntak oyomde nnyịn ikpep Bible?
8 Ẹkeda spirit Abasi ẹwet Ikọ Esie, kpa Bible. Ntem, akpan usụn̄ kiet ndiyak spirit oro anam utom ke idem nnyịn edi ke ndikot nnyụn̄ n̄kpep Bible—ke usen ke usen edieke ikemede. (1 Corinth 2:10, 11; Ephesus 5:18) Ndidọn̄ akpanikọ ye mme edumbet Bible ọyọhọ esịt nnyịn ayan̄wam nnyịn ndisọn̄ọ nda mbiọn̄ọ en̄wan oro ẹdade ẹtiene idaha eke spirit nnyịn. Ih, ke ini isobode mme idomo edinam oburobụt ido, spirit Abasi ekeme ndinam nnyịn iti mme item N̄wed Abasi ye mme edumbet oro ẹnọde ndausụn̄ oro ẹkemede ndifiak nsọn̄ọ ubiere nnyịn ndinam n̄kpọ ke n̄kemuyo ye uduak Abasi. (Psalm 119:1, 2, 99; John 14:26) Ke ntre, owo ibian̄ake nnyịn nditiene idiọk usụn̄ uwem.—2 Corinth 11:3.
9. Didie ke Bible esisọn̄ọ ubiere nnyịn ndimụm itie ebuana nnyịn ye Jehovah n̄kama?
9 Nte nnyịn ikade iso ndikpep N̄wed Abasi ifịk ifịk ye un̄wam mme n̄wed oro ẹkọn̄ọde ke Bible, spirit Abasi esikara ekikere ye esịt nnyịn, anamde nnyịn inyene ntotụn̄ọ ukpono inọ mme idaha Jehovah. Itie ebuana nnyịn ye Abasi esikabade edi ata akpan n̄kpọ ke uwem nnyịn. Ke ini isobode idomo, nnyịn isikereke iban̄a nte edinam idiọkn̄kpọ ekemede ndinem. Utu ke oro, akpa n̄kpọ oro esibehede nnyịn esidi ndimụm nsọn̄ọnda nnyịn ke Jehovah n̄kama. Ntotụn̄ọ esịtekọm oro inyenede iban̄a itie ebuana nnyịn ye enye esidemede nnyịn ndin̄wana ye ntụhọ ekededi oro ekemede ndibiat itie ebuana oro.
“Mmama Ido Fo Didie!”
10. Ntak emi edinịm ibet Jehovah edide se ẹyomde man ikere n̄kpọ spirit?
10 Edieke anade ikere n̄kpọ spirit, ndinyene ifiọk Ikọ Abasi ikemke. Edidem Solomon ama enen̄ede ọfiọk mme idaha Jehovah, edi enye ama okpu ndidu uwem ekekem ye mmọ ke utịt utịt ini uwem esie. (1 Ndidem 4:29, 30; 11:1-6) Edieke ikerede n̄kpọ spirit, nnyịn idikwe ufọn edifiọk se Bible etịn̄de kpọt edi iyokụt n̄ko ufọn edinịm ibet Abasi ke ofụri esịt. Oro ọwọrọ ndinam ndụn̄ọde ofụri esịt mban̄a mme idaha Jehovah nnyụn̄ ntịn̄ enyịn ndomo nditiene mmọ. Andiwet psalm ama enyene utọ edu emi. Enye ọkọkwọ ete: “Mmama ido fo didie! enye ke ntie n̄kere ofụri usen.” (Psalm 119:97) Ke ini nnyịn inen̄erede inyene udọn̄ nditiene ibet Abasi, onụk nnyịn ndiwụt mme edu Abasi. (Ephesus 5:1, 2) Utu ke ndidi se idiọk edinam atapde ke usụn̄ oro inanade un̄wam, nnyịn iyosion̄o mbun̄wụm spirit, ndien udọn̄ ndinem Jehovah esịt ọyọwọn̄ọde nnyịn osio ke ndiọi “ubọkutom obụkidem.”—Galatia 5:16, 19-23; Psalm 15:1, 2.
11. Didie ke afo akpanam an̄wan̄a nte ke ibet Jehovah oro akpande use edi ukpeme ọnọ nnyịn?
11 Didie ke nnyịn ikeme ndikọri ntotụn̄ọ ukpono ye ima nnọ ibet Jehovah? Usụn̄ kiet edi ke nditịm ndụn̄ọde ufọn esie. Kere ban̄a ibet Abasi oro ọdọhọde yak ebuana idan̄ etre ke ndọ, onyụn̄ akpande use ye efịbe. (Mme Hebrew 13:4) Nte ndinịm ibet emi anam nnyịn itaba n̄kpọ ekededi? Nte ima ima Ete eke heaven okpowụk ewụhọ oro anamde nnyịn itaba n̄kpọ oro enyenede ufọn? Ke akpanikọ ikpowụkke! Se se itịbede ke uwem ediwak mbon oro mîdụhe uwem ikekem ye mme idaha ido uwem Jehovah. Uyomo idịbi emi owo mîyomke esiwak ndida mmọ n̄kosụn̄ọ ke usion̄o idịbi m̀mê ndusụk ada mmọ ekesịn ke ndọ oro owo mîsịmke ọyọhọ idaha ye ndọ unana inemesịt. Ediwak owo ẹsinyene ndibọk eyen ye unana ebe m̀mê n̄wan. N̄ko-n̄ko, mbon oro ẹnamde use ẹsidu ke idaha edinyene mme udọn̄ọ ẹmende ẹto idan̄. (1 Corinth 6:18) Ndien edieke asan̄autom Jehovah anamde use, mme utịp ke n̄kan̄ eke ntụk ẹkeme ndikama ubiak. Ndidomo ndidịp mfiomo otode ubieresịt oro obiomde owo ikpe ekeme ndida ataba-idap ye editịmede esịt ndi. (Psalm 32:3, 4; 51:3) Do, nte inaha in̄wan̄-in̄wan̄ nte ke ẹtịm ibet Jehovah oro akpande use man ẹkpeme nnyịn? Ih, ke akpanikọ akamba ufọn odu ke ndika iso nsana ke ido uwem!
Bọn̄ Akam Yom Un̄wam Jehovah
12, 13. Ntak odotde ndibọn̄ akam ke ini inyenede mme udọn̄ unam idiọkn̄kpọ?
12 Ke akpanikọ edikere n̄kpọ spirit oyom akam ofụri esịt. Odot iben̄e un̄wam spirit Abasi, koro Jesus ọkọdọhọ ete: “Edieke mbufo . . . ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak Edisana Spirit ọnọ mmọ eke ẹben̄ede Enye?” (Luke 11:13) Ke akam, nnyịn imekeme nditịn̄ nte nnyịn iberide edem ke spirit iyom un̄wam kaban̄a mme mmeme nnyịn. (Rome 8:26, 27) Edieke nnyịn ifiọkde ite ke mme udọn̄ m̀mê mme edu unam idiọkn̄kpọ ke ẹfịna nnyịn, mîdịghe edieke ima ima ekemmọ andinịm ke akpanikọ odụride nnyịn ntịn̄enyịn owụt emi, okpowụt eti ibuot ndisiak akpan mfịna oro ke akam nnyịn nnyụn̄ mben̄e Abasi nte an̄wam nnyịn ndikan mme ntụhọ emi.
13 Jehovah ekeme ndin̄wam nnyịn ndiwụk ntịn̄enyịn ke mme n̄kpọ oro ẹnende, ẹsanade, ẹdide nti, ẹnyụn̄ ẹdotde itoro. Ndien odot didie ntem ndikpe enye ubọk ke ofụri esịt man “emem Abasi” ekpekpeme nnyịn esịt ye ekikere! (Philippi 4:6-8) Ẹyak nnyịn ke ntre ibọn̄ akam iben̄e Jehovah un̄wam ‘ndibịne edinen ido, ye uten̄e Abasi, ye mbuọtidem, ye ima, ye ime, ye nsụhọde-esịt.’ (1 Timothy 6:11-14) Ye un̄wam Ete nnyịn eke heaven, mme editịmede esịt ye idomo idikọrike isịm idaha oro ẹkande nnyịn ubọk. Utu ke oro, nnyịn iyenyene emem oro Abasi ọnọde.
Kûyat Spirit Esịt
14. Ntak emi spirit Abasi edide odudu oro anamde nnyịn isana?
14 Mme asan̄autom Jehovah oro ẹkọride ẹsịm ọyọhọ idaha ẹsinam item Paul emi: “Ẹkûnịme Spirit.” (1 Thessalonica 5:19) Sia spirit Abasi edide ‘spirit ata edisana,’ enye edi edisana. (Rome 1:4) Ke ini anamde utom ke idem nnyịn, spirit oro ke ntem esidi odudu oro anamde nnyịn isana. Enye esin̄wam nnyịn ndidu edisana uwem oro ẹdade nsụk ibuot nnọ Abasi ẹdiọn̄ọ. (1 Peter 1:2) Ndek ndek edinam ekededi edi edifụmi spirit oro, ndien oro ekeme ndikama ndiọi utịp. Didie ke edi ntre?
15, 16. (a) Didie ke nnyịn ikeme ndiyat spirit Abasi esịt? (b) Didie ke nnyịn ikeme ndifep ndiyat spirit Jehovah esịt?
15 Ọfọn, Paul ekewet ete: “Ẹkûnyụn̄ ẹyat Edisana Spirit Abasi esịt, emi edi ke Enye ke ẹma ẹfịk mbufo idiọn̄ọ ẹben̄e usen edifak.” (Ephesus 4:30) N̄wed Abasi anam ẹdiọn̄ọ spirit Jehovah nte ufịkn̄kpọ, m̀mê ‘idiọn̄ọ kaban̄a se ikenyenede ndidi,’ ọnọ mme anam-akpanikọ Christian oro ẹyetde aran. Ndien oro edi uwem eke heaven oro mîkemeke ndikpa. (2 Corinth 1:22, NW; 1 Corinth 15:50-57; Ediyarade 2:10) Spirit Abasi ekeme ndida mbon oro ẹyetde aran ye mme nsan̄a mmọ oro ẹnyenede idotenyịn eke isọn̄ usụn̄ ke uwem edinam akpanikọ onyụn̄ ekeme ndin̄wam mmọ ẹfep idiọkn̄kpọ.
16 Apostle oro ama odụri owo utọn̄ ọbiọn̄ọ edinyene ntụhọ edisu nsu, ediyịp inọ, edidu oburobụt uwem, ye ntre ntre eken. Edieke ikpayakde mme utọ n̄kpọ oro ẹdụri nnyịn, nnyịn ikpanam n̄kpọ emi atuahade ye item Ikọ Abasi eke odudu spirit. (Ephesus 4:17-29; 5:1-5) Ke nsụhọde n̄kaha, nnyịn ke ntem imekeme ndiyat edisana spirit Abasi esịt ke ndusụk udomo, ndien ke akpanikọ oro edi n̄kpọ oro nnyịn iyomde ndifep. Ke ntak oro, edieke owo nnyịn ekededi ọtọn̄ọde ndifụmi item Ikọ Jehovah, nnyịn imekeme nditọn̄ọ ndikọri mme edu ye ido oro ẹkemede ndisụn̄ọ ke n̄koinnam idiọkn̄kpọ ye editaba mfọn Abasi ofụri ofụri. (Mme Hebrew 6:4-6) Okposụkedi ekemede ndidi nnyịn inamke idiọkn̄kpọ idahaemi, nnyịn imekeme ndisan̄a n̄ka afan̄ oro. Ke ndika iso nnam n̄kpọ ke ntuaha ye ndausụn̄ spirit, nnyịn ikpayat enye esịt. Nnyịn n̄ko ikpọbiọn̄ọ inyụn̄ iyat Jehovah esịt, kpa ebiet emi edisana spirit otode. Nte mme andima Abasi, nnyịn iyomke ndinam oro tutu amama. Utu ke oro, nnyịn ikpakam ibọn̄ akam iben̄e Jehovah un̄wam man nnyịn ikûyat spirit esie esịt edi ikeme ndinọ edisana enyịn̄ esie ukpono ebe ke ndika iso n̄kere n̄kpọ spirit.
Ka Iso Ndikere N̄kpọ Spirit
17. Nso idi ndusụk utịtmbuba eke spirit oro nnyịn ikemede ndinịm, ndien ntak emi edinam n̄kpọ mbịne ndisịm mmọ okpowụtde eti ibuot?
17 N̄wọrọnda usụn̄ nnyịn ndika iso n̄kere n̄kpọ spirit edi ndinịm mme utịtmbuba eke spirit nnyụn̄ nnam n̄kpọ man isịm mmọ. Ọkọn̄ọde ke mme udọn̄ ye mme idaha nnyịn, utịtmbuba nnyịn ekeme ndibuana edifori edu ukpepn̄kpọ nnyịn, edifori ebuana nnyịn ke utom ukwọrọikọ, m̀mê edinyanade mbịne mme akpan ifetutom, utọ nte utom usiakusụn̄ uyọhọ ini, utom Bethel m̀mê utom isụn̄utom. Emi ayanam ekikere nnyịn ọyọhọ ye mme udọn̄ n̄kpọ eke spirit oyonyụn̄ an̄wam nnyịn ndibiọn̄ọ ediyak idem nnọ mme mmeme nnyịn m̀mê ndidi se mme utịtmbuba inyene obụkidem ye mme udọn̄ oro mîkemke ye N̄wed Abasi, oro ẹdide ọsọ n̄kpọ ke editịm n̄kpọ emi, ẹnụkde. Emi enen̄ede edi usụn̄ uwem oro owụtde eti ibuot, koro Jesus eketeme ete: “Ẹkûbon n̄kpọ-uto ẹnịm ẹnọ idem ke isọn̄, ke ọtọ nte uta-n̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọ-uto ẹnịm ẹnọ idem ke heaven, ke ọtọ nte uta-n̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp: koro ọtọ nte n̄kpọ-uto fo odude, do ke esịt fo edinyụn̄ odu.”—Matthew 6:19-21.
18. Ntak emi enen̄erede edi akpan n̄kpọ nnyịn ndika iso n̄kere n̄kpọ spirit ke ukperedem ini emi?
18 Ndikere n̄kpọ spirit nnyụn̄ mfịk mme udọn̄ ererimbot nnịm enen̄ede edi usụn̄ uwem oro owụtde eti ibuot ke “ukperedem ini” emi. (2 Timothy 3:1-5) Kamse, “ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:15-17) Ke uwụtn̄kpọ, edieke akparawa Christian ebịnede utịtmbuba eke utom uyọhọ-ini, emi ekeme ndida enye usụn̄ ke mme ini uwọrọ ndụk akwa owo m̀mê isua uyen oro esikamade n̄kpọ-ata. Ke ini ẹnyịkde ndikan̄ mbuọtidem, utọ owo oro eyenen̄ede ada okụt se imọ iyomde ndinam ke utom Jehovah. Utọ owo oro enyenede udọn̄ n̄kpọ eke spirit do oyokụt ke nditaba edisịm mme utịtmbuba eke spirit ke ntak edibịne n̄kpọ obụkidem m̀mê inemesịt ekededi oro idiọkn̄kpọ ọn̄wọn̄ọde ndinọ edi unana eti ibuot, idem ndisịme. Ti ete ke Moses oro ekekerede n̄kpọ spirit ‘ekemek ndibiom ukụt ye ikọt Abasi, akan ndidia inemesịt idiọk-n̄kpọ ke ekpri ini.’ (Mme Hebrew 11:24, 25) Edide idi n̄kpri owo m̀mê ikpọ owo, nnyịn inam ukem edimek oro ke ini ikade iso ndikere n̄kpọ spirit utu ke ndikere mmeme ikpọkidem.
19. Mme ufọn ewe ke nnyịn idinyene edieke ikade iso ndikere n̄kpọ spirit?
19 “Edikere n̄kpọ obụkidem edi edin̄wana ye Abasi,” ke adan̄aemi ‘edikere n̄kpọ spirit edide uwem ye emem.’ (Rome 8:6, 7) Edieke nnyịn ikade iso ndikere n̄kpọ spirit, nnyịn iyenyene ọsọn̄urua emem. Ẹyenen̄ede ẹkpeme esịt ye ekikere nnyịn ẹsio ke odudu idaha idiọkn̄kpọ nnyịn. Nnyịn iyenen̄ede ikeme ndibiọn̄ọ mme idomo edisịn idem ke idiọk edinam. Ndien Abasi ayan̄wam nnyịn ndiyọ en̄wan oro akade-ka iso ke ufọt obụkidem ye spirit.
20. Ntak emi nnyịn ikemede nditịm nnịm nte ke imekeme ndikan ke en̄wan ke ufọt obụkidem ye spirit?
20 Ebede ke ndika iso n̄kere n̄kpọ spirit, nnyịn iyaka iso ndinyene eti itie ebuana ye Jehovah, kpa ebiet emi uwem ye edisana spirit ẹtode. (Psalm 36:9; 51:11) Satan kpa Devil ye mme isụn̄utom esie ke ẹnam kpukpru se mmọ ẹkekeme ndibiat itie ebuana nnyịn ye Jehovah Abasi. Mmọ ẹdomo ndikara ekikere nnyịn, ẹfiọkde ẹte ke edieke nnyịn iyakde idem inọ, emi ke akpatre ayada ekesịm edidi usua ye Abasi onyụn̄ ada esịm n̄kpa. Edi nnyịn imekeme ndikan ke en̄wan emi odude mi ke ufọt obụkidem ye spirit. Se iketịbede inọ Paul edi oro, koro ke ini enye ekewetde aban̄a en̄wan esie, enye ama ebem iso obụp ete: “Anie edinyan̄a mi osio ke ikpọkidem n̄kpa emi?” Ekem, ke owụtde nte ke ẹkeme ndinyan̄a imọ, enye ama ofiori ete: “Mmọkọm Abasi ke Jesus Christ Ọbọn̄ nnyịn.” (Rome 7:21-25) Nnyịn n̄ko imekeme ndikọm Abasi ebe ke Christ ke enye ndinọ nnyịn usụn̄ ndin̄wana mbiọn̄ọ mme mmeme eke owo ndinyụn̄ n̄ka iso n̄kere n̄kpọ spirit ye utịbe utịbe idotenyịn nsinsi uwem.—Rome 6:23.
Nte Afo Emeti?
• Nso ke edikere n̄kpọ spirit ọwọrọ?
• Didie ke nnyịn ikeme ndiyak spirit Jehovah anam utom ke idem nnyịn?
• Nam an̄wan̄a ntak edide akpan n̄kpọ ndikpep Bible, ndinịm ibet Jehovah, ndinyụn̄ mbọn̄ akam nnọ enye ke en̄wan oro in̄wanade ndibiọn̄ọ idiọkn̄kpọ.
• Didie ke edinịm mme utịtmbuba eke spirit ekeme ndimụm nnyịn n̄kama ke usụn̄ uwem?
[Mme Mbụme Ukpepn̄kpọ]
[Ndise ke page 16]
Ukpepn̄kpọ Bible an̄wam nnyịn ndisọn̄ọ nda mbiọn̄ọ mme en̄wan oro ẹdade ẹtiene idaha eke spirit nnyịn
[Ndise ke page 17]
Odot ndibọn̄ akam mben̄e Jehovah un̄wam ndikan mme udọn̄ unam idiọkn̄kpọ
[Mme ndise ke page 18]
Mme utịtmbuba eke spirit ẹkeme ndin̄wam nnyịn ndika iso n̄kere n̄kpọ spirit