Nte Emi Ekeme Ndidi Mfọnn̄kan Ubọkọkọ nnọ Fi?

EDIEKE afo edide Christian oro ama akana baptism, eyịghe idụhe nte ke ima oro afo amade Abasi onụk fi ndinam uduak esie. Akan oro, ana utom ukwọrọikọ edi ubọkọkọ fo. Kamse, Jesus Christ ama ọnọ kpukpru mme anditiene enye utom ndidi mme anam mbet. (Matthew 28:19, 20) Ih, ekeme ndidi afo ke anam utom idịbi udia idahaemi ndin̄wam idemfo. Edi akpa ye akakan, nte anditiene Jesus ye kiet ke otu Mme Ntiense Jehovah, afo edi asan̄autom Christian—enye emi enịmde utom ukwọrọikọ Obio Ubọn̄ akpa ke uwem.—Matthew 24:14.

Ekeme ndidi afo odu ke utịt utịt isua uyen m̀mê ke ntọn̄ọ ntọn̄ọ iduọk isua 20. Eyedi afo emenen̄ede ekere aban̄a se afo edibịnede ke uwem. Ke ini ekerede aban̄a mme edimek oro ẹnade fi ke iso, eyedi ọkpọkpọ uyụhọ edidi akpan n̄kpọ.

Do, kere ban̄a se Jørgen ke Denmark etịn̄de aban̄a edimek oro enye akanamde. Jørgen etịn̄ aban̄a enye nte “eti usụn̄ uwem oro afo ekemede ndiwụk ntịn̄enyịn ke ata akpan utom.” Eva, n̄wan Greece emi edide isua 31 ke emana, ọdọhọ ete: “Ke mmende uwem mi ndomo ye eke mme ubọkn̄ka mi, mmesiwak ndisịm ubiere nte ke enye ọfọn akan, ọnọ uyụhọ akan, onyụn̄ enem akan.” Ewe ubọkọkọ ọnọ utọ uyụhọ oro? Didie ke afo ekeme nditiene utọ usụn̄ uwem oro?

Nte Abasi Owụt Fi Usụn̄?

Ndimek ubọkọkọ ekeme ndidi ata ọkpọsọn̄ n̄kpọ. Ke akpanikọ, ndusụk owo ẹkeme ndiyom Abasi owụt mmimọ nnennen se enye oyomde mmimọ inam.

Ke ini Moses okodude ke Midian, Jehovah ama eteme enye ete afiak ọnyọn̄ Egypt man akada nditọ Israel usụn̄ ọwọrọ ke ufụn. (Exodus 3:1-10) Angel Abasi ama ọbiọn̄ọde Gideon, emi ẹkemekde ndinyan̄a Israel nsio ke ufịk, ke iso. (Judges 6:11-14) David ekekpeme erọn̄ ke ini Abasi ọkọdọhọde Samuel ekeyet enye aran nte udiana edidem Israel. (1 Samuel 16:1-13) Owo idaha nnyịn usụn̄ ntre mfịn. Utu ke oro, nnyịn inyene ndidodomo mme n̄kpọ nnyụn̄ mbiere nte ididade mme ukeme oro Abasi ọnọde nnyịn inam n̄kpọ.

Jehovah eberede ‘akamba usụn̄ ndinam akwa utom’ ọnọ n̄kparawa Christian mfịn. (1 Corinth 16:9) Didie ke edi ntre? Ke isua duop oro ẹbede, ibat mme anditan̄a Obio Ubọn̄ ọmọdọk ke se ibede owo 2,125,000 esịm se iwakde ibe owo 6,000,000 ke ofụri isọn̄. Mmanie ẹn̄wam ke ndinọ ediwak miliọn Bible, n̄wed, ndiye uduot n̄kpri n̄wed, magazine, ye tract oro ẹyomde kaban̄a nsọn̄idem eke spirit ye kaban̄a utom edikwọrọ eti mbụk ke ofụri ekondo mi? Mme andibuana ke ubon Bethel ke ofụri ererimbot ẹnam utom emi asan̄ade ye edidiọn̄ mi.

Uwem Oro Ọnọde Utịp

Bethel ọwọrọ “Ufọk Abasi,” ndien mme ufọk Bethel ẹdi mme ufọkidụn̄ mme Christian oro ẹnamde utom unyịmesịt ke ibuot itieutom ye ke mme ọfis n̄kọk itieutom Watch Tower Society. (Genesis 28:19, ikọ idakisọn̄ NW) Ẹkeme ndimen mme ubon Bethel eyomfịn ndomo ye ‘ufọk oro ẹdade eti ibuot ẹbọp,’ oro ẹtịmde mfọn mfọn ẹnyụn̄ ẹbọpde ẹdori ke ima ẹnyenede ẹnọ Jehovah.—Mme N̄ke 24:3.

Nso ke ẹkeme nditịn̄ mban̄a idaha ebietde eke ubon oro odude ke Bethel? Andibuana ke ubon Bethel Estonia emi edide isua 25 ke emana ọdọhọ ete: “Esinem mi ndifiọk nte ke ndu ke otu mme ufan Jehovah kpukpru ini. Emi osụk ededi ata ọsọn̄urua n̄kpọ ọnọ mi ke Bethel.”—Psalm 15:1, 2.

 Ke ofụri ererimbot, n̄kpọ nte owo 19,500 ẹnyene ifet ndinam utom idahaemi ke Bethel. (Psalm 110:3) Ke United States, mbahade 46 eke ikie ke otu mbon oro ẹdude ke Bethel ẹdu ke ufọt isua emana 19 ye 29. Ukem nte Isaiah, mmọ ẹdọhọ ẹte: “Se mi, dọn̄ mi utom.” (Isaiah 6:8) Isaiah—oro ama akayayak idem ọnọ Jehovah—ama ọnọ idem unyịme unyịme ndinam utom efen efen. Emi nte an̄wan̄ade ọkọwọrọ ndiwa ndusụk ọkpọkpọ ufọn. Mbon oro ẹdude ke utom Bethel ẹkpọn̄ ufọk mmọ ye mme n̄kann̄kụk oro mmọ ẹmehede, ọkọrọ ye eka, ete, nditọeka, ye mme ufan. Ẹnam mme n̄waidem emi ke unyịmesịt ‘ke ntak gospel.’—Mark 10:29, 30.

Ke n̄kan̄ eken, nso edidiọn̄ eke spirit ẹdu ntem ke Bethel! Andibuana ke ubon Bethel emi edide uyen ke Russia anam an̄wan̄a ete: “Ebede ke ndinam n̄waidem, nnyịn imekeme ndikpep ekese n̄kpọ oro ẹdin̄wamde nnyịn ndidu uwem ke obufa ererimbot. Mmekeme ndidọhọ nte ke n̄kan̄ mi mme edidiọn̄ Jehovah ẹwak ẹkan mme n̄waidem mi.”—Malachi 3:10.

Uwem ke Bethel

Uwem etie didie ke Bethel? Mbonubon Bethel ẹnyịme nte ke uwem ọfọn onyụn̄ ọnọ uyụhọ, idem edide n̄kpọ nduaidem. Jens, emi edide isua 43 ke emana, okop inem utom Bethel. Ntak-a? Enye ọdọhọ ete: “Ke ntak ekikere oro nte ke nnyịn imenyene akamba udeme ke ndinam akpan utom. Mmekeme ndikụt nte utom Jehovah okponde onyụn̄ edide akpan n̄kpọ.”

Ọtọn̄ọde ke Monday esịm Saturday, edinam ke Bethel ẹsitọn̄ọ ye utuakibuot usenubọk. Emi esidi nneme Bible, emi ebiowo oro enyenede mbufiọk esidade usụn̄. Ke mbubịteyo Monday ẹsida hour kiet ẹnịm ukpepn̄kpọ Bible ubon ye un̄wam Enyọn̄-Ukpeme, ndusụk ini utịn̄ikọ oro ọkọn̄ọde ke ibuotikọ N̄wed Abasi oro enen̄erede odot ye ubon Bethel esitiene.

Nso isitịbe ke akpa ini emi owo edide Bethel? Man ẹnam mbufa mme andibuana ẹmehe ye uwem Bethel, nditọete oro ẹkọride ẹsịm ọyọhọ idaha ke ubon oro ẹsinọ mme utịn̄ikọ oro ẹtụkde nsio nsio ikpehe utom Bethel. Ke ediwak urua ke akpa isua, obufa owo ubon Bethel esidụk eti ufọkn̄wed eke urua ke urua oro ẹtịmde ndida nnam ifiọk N̄wed Abasi esie atara. Mbufa owo n̄ko ẹsidara san̄asan̄a ndutịm edikot Bible. Ke akpa isua mmọ ke utom Bethel, mbufa mbonubon ẹsikot ofụri Bible.

Nso idi utịp kpukpru ukpep emi? Joshua, owo ubon Bethel ke Hong Kong emi edide isua 33 ke emana, ọbọrọ ete: “Bethel enen̄ede anam esịtekọm oro ami nnyenede nnọ Jehovah otụn̄ọ. Mmekeme ndidụk nsan̄a ye ediwak nditọete oro ẹnyenede mbufiọk oro ẹma ẹkesịn ata akamba ikpehe uwem mmọ ke ndinam n̄kpọ Jehovah. Mmesinen̄ede n̄kop inem mme ndutịm eke spirit, utọ nte utuakibuot usenubọk ye Ukpepn̄kpọ Enyọn̄-Ukpeme ubon. Ke adianade do, mmama usụn̄ uwem oro ẹnamde n̄kpọ ke nde ke nde onyụn̄ edide mmemmem. Emi anam mi mbọhọ editịmede esịt oro mîdotke. Mmekpep n̄ko ndise mban̄a mme n̄kpọ ke usụn̄ Christian, ndien kpukpru ini emi esinyene ufọn.”

Mbonubon Bethel ẹsibiat ata ekese ini ye ukeme mmọ ndinam se mmọ ẹkenọde idemmọ unyịme unyịme ndinam. Oro edi, ndida ukeme ikpọkidem ye ukeme ekikere mmọ nnam n̄kpọ akpan akpan ke ndise mban̄a utom oro ẹnọde mmọ ke Bethel. Ediwak nsio nsio n̄kpọ ẹdu oro oyomde ẹnam. Ndusụk mmọ ẹsimịn̄ n̄wed mîdịghe ẹnam utom ke itie udian n̄wed, ẹnamde mme n̄wed oro ẹnọde ẹsọk ediwak esop. Mbon en̄wen ẹnam utom ke itie utem udia, ubet udia udia, m̀mê ke itie uyet ọfọn̄. Se ẹnọde ẹnam esisịne unam ebiet asana, utọ in̄wan̄, utom ubọpn̄kpọ, ye ntre ntre eken. Ndusụk owo ẹnyene mbiomo edise mban̄a mme n̄kpọutom ke mme itieutom emi. Mbon eken ẹse ẹban̄a nsọn̄idem m̀mê ẹnam utom ke ọfis. Kpukpru utom ke Bethel ẹbuana mme inem inem n̄kpọ-ata ẹnyụn̄ ẹnọ utịbe utịbe utịp. Utom oro ẹnamde ke Bethel ọnọ uyụhọ akpan akpan koro enye anam mme ufọn n̄kpọ Obio Ubọn̄ ẹkọri ẹnyụn̄ ẹnam enye ke ntak ima ẹnyenede ẹnọ Abasi.

Ẹdeme mbonubon Bethel ẹdọn̄ ke mme esop, ke ebiet emi mmọ ẹsikụtde mme ufọn utom mmọ nnennen nnennen. Mmọ ẹsikop inem ndidụk mme mbono esop ndinyụn̄ mbuana ke utom ukwọrọikọ. Nte utịp,  mbonubon Bethel ẹkọri itie ebuana oro ọsọn̄de idem ye nditọete mmọ iren ye iban ke mme esop n̄kann̄kụk.—Mark 10:29, 30.

Rita, owo ubon Bethel ke Britain, ọdọhọ ete: “Mmenen̄ede n̄wụt esịtekọm nnọ esop! Ke ini ndụkde mme mbono esop nnyụn̄ mbuanade ke utom ukwọrọikọ, ndikụt ndima nditọete iren, iban, nditọwọn̄, ye ikpọ owo do esinen̄ede ọsọn̄ọ mbuọtidem mi! Inamke n̄kpọ m̀mê nso itịbe, mmọ ẹsidu do. Oro an̄wam mi nnen̄ede nsịn ifịk ke utom Bethel mi.”

Uwem ke Bethel idịghe sụk utom, mbono esop, utom an̄wautom, ye ukpepn̄kpọ. Ubon oro esinyene mme ini nduọkodudu n̄ko. Ke ini ke ini, mme edinam “Mbubịteyo Ubon” oro ẹnọde inemesịt ẹnyụn̄ ẹnọde utịp ke n̄kan̄ eke spirit ẹsidu, emi ẹsinọde ifet ndidara mme ndammana ukeme ediwak owo ndinyụn̄ n̄kpep mme n̄kpọ ẹnọde nsịnudọn̄ mban̄a uwem mbon efen oro ẹnamde utom ke Bethel. N̄ko, ẹsikop inem nti ediwaha n̄kese oro ẹbọpde-bọp. Ẹkeme ndinam ndusụk itie ubọ nduọkodudu ẹdu, ọkọrọ ye mme itie ubon n̄wed kaban̄a ọkpọkpọ ukotn̄wed ye ndụn̄ọde. Ndien owo ikpenyeneke ndifre inem inem nneme ke okpokoro ke mme ini udia.

Tom, owo ubon Bethel ke Estonia, ọdọhọ ete: “Inyan̄ odu ekpere Bethel, ndien ediye akai odu ekpere emi ami ye n̄wan mi isimade ndinam ekpri edisan̄a n̄kanade. N̄ko, ke ini ke ini mmesibre golf, hockey, tenis ye mme ufan ke esop ye ke Bethel. Ndien ke ini idaha eyo ayakde, nnyịn imesiwat enan̄ukwak nnyịn.”

Nso ke Afo Ekeme Ndinam Man Odot?

Nte ededi, Bethel edi itie emi mme Christian oro ẹkọride ẹsịm ọyọhọ idaha ẹnamde edisana utom ẹnọ Jehovah ẹnyụn̄ ẹnamde utom ke ufọn mme ekemmọ andinịm ke akpanikọ ke ofụri ererimbot. Ana mbon oro ẹkabarede ẹdi mbonubon Bethel ẹsịm ndusụk n̄kpọ oro ẹnamde owo odot. Nso ke afo ekeme ndinam man odot ndinam utom ke Bethel?

Ukem nte Timothy, oro akanamde utom ye  apostle Paul, ana mbon oro ẹdade ke utom Bethel ẹnyene eti idaha ke esop. (1 Timothy 1:1) “Nditọ-ete emi ẹdude ke Lystra ye Iconium [ẹma] ẹbụk eti mbụk ẹban̄a” Timothy. (Utom 16:2) Okposụkedi enye ekedide ekpri akparawa, Timothy ama ọfiọk N̄wed Abasi onyụn̄ enen̄ede ọdọn̄ n̄kam ke akpanikọ. (2 Timothy 3:14, 15) Ukem ntre, oyom mbon oro ẹdade ke utom Bethel ẹnyene ifiọk Bible.

Oyom mbonubon Bethel ẹnyene edu n̄waidem. Ẹma ẹtịm ẹkụt edu n̄waidem Timothy ye unyịme esie ndinam mme ufọn n̄kpọ Obio Ubọn̄ ẹbe eke esie iso tutu Paul ekeme nditịn̄ mban̄a enye ete: “Nnyeneke owo eke ebietde enye, eke edikerede n̄kpọ mbufo ke akpanikọ. Koro kpukpru owo ke ẹyoyom n̄kpọ idem mmọ, idịghe n̄kpọ Jesus Christ. Edi mbufo ẹmefiọk nte ẹdomode enye ẹse ẹte, nte eyen asan̄ade  ye ete anam utom, ke enye ama asan̄a ye ami asuan gospel.”—Philippi 2:20-22.

Utom Bethel oyom iren ye iban eke spirit. Mme ndutịm oro ẹnamde ẹnọ mbonubon Bethel anam edi mmemmem n̄kpọ ọnọ mmọ ndikọri ke n̄kan̄ eke spirit ebe ke ukpepn̄kpọ Bible, edidụk mme mbono esop Christian ye edibuana ke an̄wautom kpukpru ini, ye edidụk nsan̄a ye mme Christian oro ẹkọride ẹsịm ọyọhọ idaha. Ntem ẹn̄wam mbon oro ẹdude ke Bethel nditiene item Paul emi: “Ẹsasan̄a ke [Christ Jesus] ndien, yak mbufo ẹmụm n̄kam, ẹnyụn̄ ẹkọri ẹdaha ẹda ke Enye, ẹnyụn̄ ẹdọdiọn̄ ẹsọn̄ọ ẹda ke mbuọtidem, kpa nte ẹkekpepde mbufo, ẹnyụn̄ ẹnọ Abasi ekọm eti-eti.”—Colossae 2:6, 7.

Ke ntak orụk utom oro ẹnamde ke Bethel, ana mbon oro ẹdade ke ifetutom emi ẹkop odudu ẹnyụn̄ ẹnyene eti nsọn̄idem. Edieke afo esịmde mme n̄kpọ ẹyomde oro nnyịn isiakde mi, edide isua 19 ke emana m̀mê ọsọn̄de akan oro, onyụn̄ anade baptism ke nsụhọde n̄kaha isua kiet, nnyịn imesịn udọn̄ inọ fi ndikere mban̄a utom Bethel.

Kpukpru Nnyịn Imenyene Ebuana

Nte mme Christian, ke akpanikọ kpukpru nnyịn imoyom ndinịm mme ufọn n̄kpọ Obio Ubọn̄ akpa ke uwem ndinyụn̄ nnam utom ofụri ukpọn̄ nnọ Jehovah. (Matthew 6:33; Colossae 3:23) Nnyịn n̄ko imekeme ndisịn udọn̄ nnọ mbon oro ẹnamde utom ke Bethel ndika iso ndinam edisana utom do. Ndien ẹkpenyene ndisịn udọn̄ akpan akpan nnọ nditọete iren ẹdide uyen oro ẹdotde ndinam utom Bethel ndinyanade mbịne ifetutom oro asan̄ade ye edidiọn̄ mi.

Utom Bethel edi usụn̄ uwem oro ọnọde uyụhọ ke n̄kan̄ eke spirit—ke akpanikọ utom oro ekeme ndidi mfọnn̄kan ubọkọkọ nnọ fi. Enye edi ọnọ Nick, emi ọkọtọn̄ọde ndinam utom ke Bethel ke edide isua 20 ke emana. Ke ama akanam utom Bethel ke isua duop, enye ọdọhọ ete: “Mmesiwak ndibọn̄ akam nnọ Jehovah man n̄kọm enye ke mfọnido esie oro owo mîdotke. Nso efen ke n̄kpoyom n̄kan oro? Mme anam-akpanikọ Christian emi ẹsịnde ofụri ukeme mmọ ndinam n̄kpọ Jehovah, ẹdu ẹkanade nnyịn ẹkụk mi.”

[Ekebe/Ndise ke page 22]

Nso ke Mbiowo ye Mme Ete ye Eka Ẹkeme Ndinam?

Mbiowo ye mme esenyịn oro ẹsan̄ade-san̄a ẹkpenyene ndisịn udọn̄ akpan akpan nnọ n̄kparawa iren ndisịn n̄wed eben̄e utom Bethel. Ke ndondo emi, ndụn̄ọde oro ẹkenamde ye mbonubon Bethel ẹdide uyen ama owụt nte ke mme esenyịn Christian ẹkesịn udọn̄ ẹnọ mbahade 34 eke ikie ke otu mmọ ndinịm utom Bethel nte utịtmbuba mmọ. Ih, mme ẹsop n̄kann̄kụk ẹkeme nditaba mmọ. Edi ọfọn nditi nte ke adan̄aemi Timothy nte eyịghe mîdụhe ekenyenede eti odudu ke idem n̄kparawa owo eken ke Lystra ye Iconium, mbiowo do ikọbiọn̄ọke enye ndinam utom ye Paul. Mmọ ikebiereke ite ke ndiyak Timothy asan̄a ye Paul oyosụn̄ọ ke akwa ntakurua ọnọ esop mmimọ.—1 Timothy 4:14.

Oyom mme ete ye eka ẹdide Christian akpan akpan ẹnyene eti odudu ke idem nditọ mmọ ke n̄kpọ emi. Ke ndụn̄ọde oro iketịn̄de iban̄a mi, mbahade 40 eke ikie ke otu mbon oro ẹkebụpde mbụme ẹma ẹsiak ete ye eka mmọ nte akpan ebiet nsịnudọn̄ ndidụk utom Bethel. Eyenete an̄wan kiet oro anamde utom ke Bethel ke isua ifan̄ ọkọdọhọ ete: “Uwem ete ye eka mi ke utom Jehovah ekedi okopodudu n̄kpọ nsịnudọn̄ ọnọ mi ndidụk utom Bethel. Ke n̄kụtde uwụtn̄kpọ mmọ ke utom ukwọrọikọ uyọhọ ini, mma mfiọk nnennen nnennen nte ke emi edidi mfọnn̄kan ye ata ọnọ-uyụhọ usụn̄ uwem ndimek.”

[Ekebe ke page 24]

MMỌ ẸWỤT ESỊTEKỌM ẸBAN̄A UTOM BETHEL

“Mmama utom mi ke Bethel. Edi n̄kpọ ọnọde uyụhọ ndifiọk nte ke mmanam n̄kpọ Jehovah ke ofụri usen ye nte ke nyanam ukem oro n̄kpọn̄, okụt, ye ntre ntre eken. Emi anam mi nnyene eti ubieresịt onyụn̄ anam esịt mi ọyọhọ ye nti ekikere.”

“Bethel edi itie emi afo ekemede ndiyak ofụri ini ye ukeme fo nsịn ke utom Jehovah ye unana n̄kpọ ndiwọn̄ọde ntịn̄enyịn fo. Emi anam fi okop idatesịt. Edi afo n̄ko emekeme ndikụt esop Jehovah ke usụn̄ efen. Etie fi ke idem nte ke afo emenen̄ede ekpere ọwọn̄esịt esop oro, ndien emi anam enye enen̄ede enem.”

“Ami ndidi Bethel edi mfọnn̄kan n̄kpọ oro akanam etịbede ọnọ mi. Ukpep ikụreke mi tutu amama. Ndien mbọhọ ukpep mi man nda nnam n̄kpọ nnọ idemmi, edi man nda nnam n̄kpọ Jehovah. Utom mi mi ididịghe ikpîkpu tutu amama.”

“Ndida mme ndammana ukeme mi nnam n̄kpọ ke Bethel anam mi n̄kop uyụhọ nnyụn̄ nnyene emem koro ndade mmọ nnam n̄kpọ nnọ Jehovah ye nditọete.”

“N̄kekemeke ndikop ata uyụhọ ye inemesịt ke akani ubọkọkọ mi. Ke ediwak isua, mma nnyene udọn̄ ndinam utom ye nditọete mi ndinyụn̄ nnam utom nnọ nditọete mi. Ntak n̄kedide Bethel edi oro. Mmokop ata uyụhọ ke ndifiọk nte ke kpukpru ukeme mi ẹyenyene ufọn ẹnọ mbon efen ke n̄kan̄ eke spirit ke ẹyenyụn̄ ẹda itoro ẹsọk Jehovah.”