Nte Ido Ukpono Ayada Emem Ererimbot Edi?

ỌTỌN̄ỌDE ke August 28 esịm August 31, 2000, se iwakde ibe owo 500 ẹtode idụt 73 ẹma ẹsop idem ke New York City. Mmọ ẹkesop idem ọtọkiet ke Edidiana Mme Idụt kaban̄a “Mbono Ido Ukpono ye Mme Adausụn̄ eke Spirit Kaban̄a Emem Ererimbot eke Tọsịn Isua Emi.” Mme adausụn̄ oro—ediwak mmọ ẹyarade uyaraibuot, ẹsịnede utouto ekụra, ẹbọbọde bọkịt ntan̄inuen, m̀mê ẹsịnede nnyan mbubịt ewụra—ẹketo ata ediwak ido ukpono. Ido ukpono Baha’i, Buddha, Hindu, Islam, Jain, Ido Ukpono Mme Jew, Shinto, Sikh, Tao, Zoroastrian, ye mme ido ukpono Christendom, ẹma ẹdu ke otu emi.

Mme andidụk ẹkesop idem ke Edidiana Mme Idụt ke akpa usen iba eke mbono usen inan̄ oro. Nte ededi, idịghe Edidiana Mme Idụt eketịm m̀mê ọkọnọ mbono oro un̄wam okụk edi nsio nsio n̄ka un̄wam ẹketịm. Kpa ye oro, UN ye mme adaiso ido ukpono ẹma ẹtịn̄ ẹban̄a ufọn edinam utom ọtọkiet man ẹda utịt ẹsọk unana, usua eke orụk, mme mfịna n̄kann̄kụk, ekọn̄, ye mme n̄kpọekọn̄ ọkwọkudịm nsobo.

Mme andidụk ẹma ẹsịn ubọk ke n̄wed oro ẹkotde “Ediomi Emem Ofụri Ekondo.” Ke adan̄aemi ẹnyịmede nte ke “ndusụk ini ẹsikama enyịn̄ ido ukpono” ẹnam afai ẹnyụn̄ ẹn̄wana ekọn̄, n̄wed oro ama ọdọhọ ete ke mme andisịn ubọk “ẹyediana ye Edidiana Mme Idụt . . . ke ndiyom emem.” Nte ededi, owo ikesịmke akpan ubiere oro owụtde nte ẹdinamde emi.

Ke ọyọhọ usen iba, Bawa Jain, akwa ewetn̄wed mbono oro, ama ada ntọn̄ọikọ esie ekeberi ke ndinam an̄wan̄a nte ke ndusụk isua ke mbemiso imọ ima ikụt mbuwed kiet ke Edidiana Mme Idụt. Mbuwed oro ama owụt eren oro ọkọniọn̄de akan ufọk Ọfis Edidiana Mme Idụt. Enye ama ọkọn̄ ufọk oro nte n̄kpọ eke enye ekedide usụn̄ufọk. Ndise oro ama enyene uwetn̄kpọ emi ke idak: “Ọbọn̄ Emem.” Ete Jain ama ọdọhọ ete: “[Ndise oro] ama enen̄ede otụk mi ke ndondo oro n̄kokụtde enye. Mma mbụp nsio nsio owo m̀mê [enye] akada aban̄a nso. N̄kere ke mmenyene ibọrọ mfịn. Kpukpru mbufo, mme adausụn̄ eke spirit ye mme adaiso ido ukpono ererimbot, ndisop idem mi ọsọn̄ọ ọnọ mi nte ke [emi] edi ọbọn̄ emem oro ọkọn̄de usụn̄ufọk Edidiana Mme Idụt.”

Bible ọnọ isio isio ekikere. Enye owụt nte ke Jesus Christ edi Ọbọn̄ Emem. Enye ididaha emem ofụri ekondo idi ebe ke ukeme mme adausụn̄ ukaraidem ererimbot emi m̀mê mme adaiso ido ukpono, edi edida edi ebe ke Obio Ubọn̄ Abasi. Edi Obio Ubọn̄ emi—ukara Abasi eke heaven—edikụt unen ke ndidian okopitem ubonowo ọtọkiet onyụn̄ anam ẹnam uduak Abasi ke isọn̄.—Isaiah 9:6; Matthew 6:9, 10.