Eti Mbụk Obio Ubọn̄—Nso ke Enye Edi?

Isua oko ke idụt 235 ke ofụri ererimbot, owo 6,035,564, n̄kpri ye ikpọ, ẹma ẹbiat hour 1,171,270,425 nditịn̄ nnọ mbon en̄wen mban̄a enye. Ke adianade ye editịn̄ ke inua, mmọ ẹma ẹnịm se iwakde ibe n̄wed miliọn 700 ẹnọ mme owo man ẹtan̄a ẹnyụn̄ ẹnam enye an̄wan̄a. Mmọ n̄ko ẹma ẹsuan ediwak tọsịn ọkpọ umụmikọ ye kaset vidio nditan̄a enye. Nso ke “enye” edi?

“ENYE” edi eti mbụk Obio Ubọn̄ Abasi. Ke akpanikọ, akananam idụhe ini ke mbụk owo oro ẹkwọrọde “eti mbụk obio ubọn̄ emi” ke udomo oro nnyịn ikụtde mfịn.—Matthew 24:14, NW.

Kpukpru mbon oro ẹnamde utom ukwọrọikọ ye utom unọ ukpep ofụri ererimbot emi ẹdi mme anamutom unyịmesịt. Ke idaha ekikere ererimbot, ekeme nditie nte mmọ idotke ndinam utom emi. Nso, ndien, inam mmọ ẹnyene uko ẹnyụn̄ ẹkụt unen? Odudu eti mbụk Obio Ubọn̄ edi ata akpan ntak, koro enye edi mbụk aban̄ade mme edidiọn̄ oro ubonowo edinyenede. Mmọ emi ẹdi mme edidiọn̄ oro kpukpru owo ẹnen̄erede ẹyom—inemesịt, edibọhọ nsọn̄ọn̄kpọ ndutịm uforo, eti ukara, emem ye ifụre, ye n̄kpọ efen oro ata ediwak owo mîsikam ikereke-kere iban̄a—nsinsi uwem! Ke akpanikọ, emi edi eti mbụk ọnọ mbon oro ẹdụn̄ọrede ẹyom se uwem ọwọrọde. Ih, kpukpru edidiọn̄ emi ye mme edidiọn̄ efen efen ẹkeme ndidi okwo edieke afo anamde n̄kpọ nte ọfọnde aban̄a eti mbụk Obio Ubọn̄ oro ẹtan̄ade.

Nso Idi Obio Ubọn̄?

Nte ededi, nso idi Obio Ubọn̄ oro ẹtan̄ade nte eti mbụk? Enye edi Obio Ubọn̄ oro ẹkpepde ediwak miliọn owo ndibọn̄ akam mben̄e ke mme ikọ emi ẹtịmde ẹmehe mi: “Ete nnyịn emi odude ke heaven: yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:9, 10.

Enye edi Obio Ubọn̄ oro prọfet Daniel eyen Hebrew eketịn̄de aban̄a ke se iwakde ikan isua 2,500 oro ẹkebede ke ini enye ekewetde ete: “Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”—Daniel 2:44.

Ntem, eti mbụk oro aban̄a Obio Ubọn̄, m̀mê ukara, Abasi oro edisiode kpukpru idiọkido  efep edinyụn̄ akarade ofụri isọn̄ ke emem. Enye ayanam akpa uduak Andibot kaban̄a ubonowo ye isọn̄ osu.—Genesis 1:28.

“Ubọn̄ Heaven ke Ekpere”

Ke se ikperede isua 2,000 emi ẹkebede, enyene-ifịk eren emi usịnen̄kpọ ye edu esie ẹkedụride ekese ntịn̄enyịn ekebem iso atan̄a eti mbụk Obio Ubọn̄ an̄wa an̄wa. Eren oro ekedi John Andinịm Owo Baptism, eyen Zechariah oku Jew ye n̄wan esie, Elizabeth. John ekesịne edisịnen̄kpọ eke ẹdade idet camel ẹnam, onyụn̄ ọbọbọ mbọbọ ikpaunam ke isịn ukem nte prọfet Elijah, oro akadade aban̄a enye. Edi etop esie ama odụri ntịn̄enyịn ediwak owo. Enye akatan̄a ete: “Mbufo ẹkabade esịt; koro Ubọn̄ Heaven ke ekpere.”—Matthew 3:1-6.

Mme andikpan̄ utọn̄ nnọ John ẹkedi mme Jew, oro ẹkedọhọde nte idide mme andituak ibuot nnọ ata Abasi, Jehovah. Nte idụt, mmọ ẹma ẹbọ Ibet ediomi ebe ke Moses n̄kpọ nte isua 1,500 ke mbemiso. Akwa temple okosụk owowụhọ ke Jerusalem, ebiet emi ẹkesiwade mme uwa nte ekemde ye Ibet. Mme Jew ẹma ẹtịm ẹnịm ẹte ke utuakibuot mmimọ ama enen ke enyịn Abasi.

Nte ededi, ke ẹkpan̄de utọn̄ ẹnọ John, ndusụk owo ẹma ẹtọn̄ọ ndikụt nte ke ido ukpono mmimọ ikenenke ke enyịn Abasi. Ido ye akwaifiọk mbon Greece ẹma ẹnyọni ẹdụk mme ukpepn̄kpọ ido ukpono mme Jew. Idahaemi ẹma ẹsabade ibet oro ẹkebọde ẹto Abasi ebe ke Moses, idem ẹnamde ẹdi ikpîkpu, ebe ke mme ukpepn̄kpọ ye item owo. (Matthew 15:6) Ke ẹdide se mme ọsọn̄esịt ye mme anana-esịtmbọm adaiso ido ukpono mmọ ẹdade ẹtụn usụn̄, ata ediwak owo ikatuakke ibuot aba inọ Abasi nte enye enyịmede. (James 1:27) Ama oyom mmọ ẹkabade esịt ẹkpọn̄ idiọkn̄kpọ oro mmọ ẹkenamde ẹdian Abasi ye Ibet ediomi.

Ke ini oro, ediwak mme Jew ke ẹkedori enyịn ẹban̄a edidi Messiah, m̀mê Christ, oro ẹken̄wọn̄ọde, ndien ndusụk mmọ ke ẹkeneni ẹban̄a John ẹte: “M̀mê enye ekpedi Christ”? Nte ededi, John ama afan̄a ete ke imọ idịghe ndien utu ke oro ama ada mmọ owụt owo efen, oro enye eketịn̄de aban̄a ete: “[Ndotke] nditat ikpaukot Esie.” (Luke 3:15, 16) Ke emende Jesus owụt mme mbet esie, John ama ọdọhọ ete: “Sese, Eyen-erọn̄ Abasi emi emende mme idiọk-n̄kpọ ererimbot efep”!—John 1:29.

Ke akpanikọ, oro ekedi eti mbụk, koro John, ke nditịm ntịn̄, akanyan ubọk owụt kpukpru owo usụn̄ adade esịm uwem ye inemesịt—Jesus, kpa enye emi “emende mme idiọk-n̄kpọ ererimbot efep.” Nte mme andito ubon Adam ye Eve, ẹman kpukpru owo ẹsịn ke idak ufịk idiọkn̄kpọ ye n̄kpa. Rome 5:19 anam an̄wan̄a ete: “Koro nte ẹkedade nsọn̄-ibuot owo kiet [Adam] ẹnam ediwak owo ẹkabade ẹdi mme idiọk owo, kpa ntre ke ẹyeda nsụk-ibuot owo kiet [Jesus] ẹnam ediwak owo ẹkabade ẹdi ndinen owo.” Jesus, ukem nte eyenerọn̄ uwa, ekenyene ‘ndimen idiọkn̄kpọ mfep’ ndinyụn̄ n̄kpụhọde mfụhọ mfụhọ idaha edinam ubonowo.  Bible anam an̄wan̄a ete: “N̄kpọ-eyen-utom idiọk-n̄kpọ edi n̄kpa, edi enọ Abasi edi nsinsi uwem ke Christ Jesus Ọbọn̄ nnyịn.”—Rome 6:23.

Nte mfọnmma owo—ke akpanikọ, akakan owo oro akanam odude uwem—Jesus ama ọtọn̄ọ ndikwọrọ eti mbụk. Mbụk Bible ke Mark 1:14, 15 asian nnyịn ete: “Edi ke ẹma ẹkeyak John ẹnọ, Jesus aka ke Galilee ọkọkwọrọ gospel [“eti mbụk,” NW] Abasi, ete, Ini emekem, Ubọn̄ Abasi ke ekpere: mbufo ẹkabade esịt ẹnyụn̄ ẹnịm gospel ke akpanikọ.”

Ẹma ẹnen̄ede ẹdiọn̄ mbon oro ẹkenamde n̄kpọ ẹban̄a etop Jesus ẹkenyụn̄ ẹwụtde mbuọtidem ke eti mbụk. John 1:12 ọdọhọ ete: “Edi kpukpru owo eke ẹdarade [Jesus], Enye ọnọ mmọ unen ndikabade ndi nditọ Abasi, kpa mmọ emi ẹbuọtde idem ke enyịn̄ Esie.” Sia ẹdide nditọ Abasi, mmọ ẹma ẹdu ke idaha ndibọ utịp nsinsi uwem.—1 John 2:25.

Edi ifet edibọ mme edidiọn̄ Obio Ubọn̄ iketreke ye mbon akpa isua ikie kpọt. Nte ẹketịn̄de ke mbemiso, ke ẹtan̄a ẹnyụn̄ ẹkpep eti mbụk Obio Ubọn̄ Abasi ke ofụri ekondo mfịn. Ntre mme edidiọn̄ Obio Ubọn̄ ẹsụk ẹdodu. Nso ke ana afo anam man ọbọ mme utọ edidiọn̄ oro? Ibuotikọ oro etienede ayanam an̄wan̄a.