Mme Edidiọn̄ Obio Ubọn̄ Ẹkeme Ndidi Okwo

APOSTLE PAUL ekedide Christian ama esisem ndusụk ke otu akpan usem eyo esie udọn udọn. Enye ọkọbọ ukpep oro edide ukem ye ubọ ukpep ufọkn̄wed ntaifiọk mfịn. Enye ama enyene kpukpru idaha ye unen eyenisọn̄ Rome. (Utom 21:37-40; 22:3, 28) Nti idaha emi ẹkpeken̄wam enye ndikabade ndi imọ nnyụn̄ n̄wọrọ etop. Edi, enye ọkọdọhọ ete: “Mme n̄kpọ eke ẹkpedide udori ẹnọ mi, ke n̄kabat mmọ nte ntak-urua kaban̄a Christ . . . mmonyụn̄ nsịn mmọ ke mbio, man mbọ Christ nda nnyene.” (Philippi 3:7, 8) Ntak emi Paul eketịn̄de utọ ikọ oro?

Paul oro ẹkediọn̄ọde ke akpa nte Saul eke Tarsus ye andikọbọ mbon oro “ẹsan̄ade ke Usụn̄ oro,” ama akabade edi andinịm ke akpanikọ ke ama okokụt n̄kukụt aban̄ade Jesus oro ẹkenamde eset ẹkenyụn̄ ẹnọde ubọn̄. (Utom 9:1-19) Ye Paul, n̄kpọntịbe emi ke usụn̄ akade Damascus ama owụt ke usụn̄ emi owo mîkemeke ndineni nte ke Jesus ekedi Messiah, m̀mê Christ, oro ẹken̄wọn̄ọde, kpa andikara ini iso ke Obio Ubọn̄ oro ẹken̄wọn̄ọde. N̄kpọntịbe oro n̄ko ama okpụhọde usụn̄ uwem Paul ke n̄wọrọnda usụn̄, nte okopodudu ikọ esie oro ẹwetde ke enyọn̄ emi owụtde. Ke ikọ efen, ke enyenede esịt akpanikọ, Paul ama akabade esịt.—Galatia 1:13-16.

 Ke Bible, ẹsiwak ndikabade ikọedinam oro “kabade esịt” nto ikọ Greek oro ke ata ata usụn̄ ọwọrọde “ke ama ọkọfiọk,” nte se idide isio ye “ndibem iso mfiọk.” Ntem, edikabade esịt abuana edikpụhọde ekikere, edu, m̀mê uduak owo, owo ndisịn n̄kani usụn̄ esie nte se mîfọnke. (Utom 3:19; Ediyarade 2:5) Paul ikayakke akpan n̄kpọntịbe oro ke usụn̄ akade Damascus aka iso edi sụk edemede-udọn̄ n̄kpọntịbe m̀mê idem inuaokot n̄kpọntịbe eke spirit. Ye enye, n̄kpọntịbe oro ekedi edidi ndifiọk akpanikọ oro nte ke akani usụn̄ uwem imọ, ke unana edifiọk Christ, ekedi ikpîkpu. Enye ama edifiọk, n̄ko, nte ke man imọ ibọ ufọn ito obufa ifiọk oro imọ inyenede iban̄a Christ, ana imọ inam n̄kpọ ndinen̄ede usụn̄ uwem imọ.—Rome 2:4; Ephesus 4:24.

Ukpụhọde Oro Akadade Mme Edidiọn̄ Edi

Ke mbemiso, ifiọk oro Paul ekenyenede aban̄a Abasi ke akamba udomo okoto n̄ka mme Pharisee, emi enye ekedide andibuana. Mme edinịm ke akpanikọ mmọ ẹma ẹsịne ediwak ukpepn̄kpọ akwaifiọk ye ido eset. Ke ntak asari ido ukpono, Paul ama ada ifịk ye ukeme esie anam n̄kpọ ke ukwan̄ usụn̄. Okposụkedi enye ekekerede ke imọ ikanam n̄kpọ Abasi, ke akpanikọ enye akan̄wan̄wana ye enye.—Philippi 3:5, 6.

Ke ama ọkọbọ nnennen ifiọk aban̄ade Christ ye udeme esie ke uduak Abasi, Paul ama ekeme ndikụt nte ke imọ ikasak iso ise edimek: Nte enye ekpenyene ndika iso ndi Pharisee ndinyụn̄ n̄ka iso nnyene idaha ye uku esie, mîdịghe nte enye ekpenyene ndikpụhọde usụn̄ uwem esie nnyụn̄ ntọn̄ọ ndinam n̄kpọ ekededi oro ẹkeyomde man enye enyene unyịme Abasi? Nte enemde, Paul ama anam eti edimek, koro enye ọkọdọhọ ete: “Bụt inamke mi ye gospel [“eti mbụk,” NW]; koro enye edide odudu Abasi, emi ọwọrọde edinyan̄a ọnọ kpukpru owo eke ẹbuọtde idem; ọnọ mme Jew ke akpa-itie, onyụn̄ ọnọ mme Greek.” (Rome 1:16) Paul ama akabade ifịk ifịk andikwọrọ eti mbụk aban̄ade Christ ye Obio Ubọn̄.

Ediwak isua ke ukperedem, Paul ama ọdọhọ mme ekemmọ Christian ete: “Mbatke nte mmomụm n̄kpọ oro kan̄a n̄kama; edi n̄kpọ kiet emi ke nnanam; mfefre se idude mi ke edem, nnyụn̄ nnyanade mbịne se inade mi ke iso; mmesịn ifịk n̄ka iso mbịne utịt mbuba, man n̄kpọbọ utịp akwa ikot eke Abasi okokotde mi ke Christ Jesus.” (Philippi 3:13, 14) Paul ama ọbọ ufọn oto eti mbụk koro enye ama enyịme ndifehe n̄kpọn̄ se ikesidian̄arede enye ikpọn̄ Abasi ama onyụn̄ ebịne mme utịtmbuba oro ẹkedude ke n̄kemuyo ye uduak Abasi ke ofụri esịt.

Nso ke Afo Edinam?

Eyedi afo okop eti mbụk Obio Ubọn̄ ke ata ndondo emi. Nte idotenyịn edidu nsinsi uwem ke mfọnmma paradise edemede fi udọn̄? Enye ekpenyene ndidemede fi udọn̄, koro kpukpru nnyịn imenyene ndammana udọn̄ ndidu uwem ndinyụn̄ ndara uwem ke emem ye ifụre. Bible ọdọhọ ke Abasi esịn nnyịn “nsinsi ini ke esịt.” (Ecclesiastes 3:11, NW) Ntre edi ndammana n̄kpọ ọnọ nnyịn ndidori enyịn mban̄a ini oro mme owo ẹdikemede ndidu nsinsi uwem ke emem ye inemesịt. Ndien oro edi se eti mbụk Obio Ubọn̄ ọnọde.

Nte ededi, man idotenyịn oro edi ata idem n̄kpọ, oyom afo odụn̄ọde ọfiọk se eti mbụk oro aban̄ade. Apostle Paul ọkọnọ item ete: “[Domo fiọk] se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:2) Ntre, ukem nte Paul, ke ama ekenyene ifiọk, ana afo anam edimek.

Ke n̄kan̄ eken, ekeme ndidi afo emenyenyene ndusụk edinịm ke akpanikọ ẹban̄ade ini iso fo. Ti ete ke Saul ama enyenyene mme ekikere idemesie aban̄a uduak Abasi mbemiso enye akakabarede edi apostle Paul. Edi utu ke ndidori enyịn mban̄a utịbe utịbe ediyarade otode Abasi, ntak mûsehe n̄kpọ oro ke eti usụn̄? Bụp idemfo: ‘Ndi ami mmenen̄ede mfiọk se idide uduak Abasi kaban̄a ubonowo ye isọn̄? Nso uyarade ke n̄keme ndida nsọn̄ọ mme edinịm ke akpanikọ mi? Nte uyarade mi ekeme ndibe udomo ke un̄wana Ikọ Abasi, kpa Bible?’ Afo utabake n̄kpọ ndomokiet ke ndidụn̄ọde mme edinịm ke akpanikọ ido ukpono fo ke usụn̄  emi. Ke akpanikọ, akpana afo esinam ntre koro Bible esịn udọn̄ ọnọ nnyịn ete: “Ẹdomo kpukpru n̄kpọ ẹse; ẹmụm se ifọnde ẹkama.” (1 Thessalonica 5:21) Kam se, nte idịghe edinyene unyịme Abasi edi akpan n̄kpọ akan?—John 17:3; 1 Timothy 2:3, 4.

Mme adaiso ido ukpono ẹkeme ndin̄wọn̄ọ ndinọ nnyịn nsinsi ini iso. Edi ibọhọke un̄wọn̄ọ oro ọkọn̄ọ ke mme ukpepn̄kpọ Bible, enye idin̄wamke nnyịn ndinyene mme edidiọn̄ Obio Ubọn̄ Abasi. Ke ọwọrọetop Ukwọrọikọ esie oro ke Obot, Jesus ama ọtọt ke okopodudu usụn̄ ete: “Idịghe kpukpru owo emi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven.”—Matthew 7:21.

Tịm fiọk nsọn̄uyo oro Jesus odoride ke edinam uyo Ete esie nte se ẹyomde man ẹbọ mme edidiọn̄ Obio Ubọn̄ Abasi. Ke ikọ efen, Abasi inyịmeke se ikemede nditie nte uten̄e Abasi. Ke akpanikọ, Jesus ama aka iso ndidọhọ: “Ediwak owo ẹyedọhọ Mi ke usen oro, ẹte, Ọbọn̄, Ọbọn̄, nte nnyịn iketịn̄ke nte prophet ke enyịn̄ Fo, inyụn̄ idaha enyịn̄ Fo iduọn̄ọ mme demon, inyụn̄ idaha enyịn̄ Fo inam ediwak n̄kpọ odudu? Ndien nyọdọhọ mmọ adan̄aoro, nte, Akananam ndiọn̄ọke mbufo: ẹdian̄ade Mi, mbufo mme anam-ukwan̄n̄kpọ.” (Matthew 7:22, 23) Nte an̄wan̄ade, akpan n̄kpọ edi nnyịn ikụt ite ke imọfiọk nnennen nnennen se eti mbụk Obio Ubọn̄ enen̄erede edi ndien ekem inam n̄kpọ ke n̄kemuyo ye enye.—Matthew 7:24, 25.

Un̄wam Odu

Ke se iwakde ibe isua 100, Mme Ntiense Jehovah ẹkwọrọ eti mbụk Obio Ubọn̄ Abasi. Mmọ ke ẹda mme n̄wed ye ke ikọ inua ẹn̄wam mme owo ke ofụri ererimbot ndinyene nnennen ifiọk mban̄a se Obio Ubọn̄ edide, mme edidiọn̄ oro enye edidade edi, ye se anade owo anam man enyene mme utọ edidiọn̄ oro.

Nnyịn imesịn udọn̄ inọ fi ndinam n̄kpọ mban̄a etop oro Mme Ntiense Jehovah ẹkwọrọde. Ebede ke ndinyịme nnyụn̄ nnam n̄kpọ mban̄a eti mbụk, afo emekeme ndibọ mme akwa edidiọn̄ idịghe idahaemi kpọt edi n̄ko ke ini iso ke ini Obio Ubọn̄ Abasi edikarade ofụri isọn̄.—1 Timothy 4:8.

Nam n̄kpọ idahaemi, koro mme edidiọn̄ Obio Ubọn̄ Abasi ke ẹkpere!

[Mme ndise ke page 7]

Mme Ntiense Jehovah ke ẹda mme n̄wed ye ikọ inua ẹkwọrọ eti mbụk Obio Ubọn̄ Abasi