“Ndedịbe N̄kpọndịk Nsọn̄idem Mbio Obio”

MBAHADE kiet ke itie ita ke otu ikpọ owo oro ẹdade Intanet ẹnam n̄kpọ ke United States ẹsidụk ndusụk orụk ikpehe idan̄, ntem ke ndụn̄ọde ndondo emi ke idan̄ Intanet akayararede. Ata ediwak owo ẹyak idem idahaemi ẹnọ udọn̄ idan̄ mmọ ebe ke Intanet. Dr. Al Cooper, ekpepn̄kpọ mban̄a ekikere oro akanamde ndụn̄ọde oro ọdọhọ ete: “Emi edi ndedịbe n̄kpọndịk nsọn̄idem mbio obio oro atarade, ke ubak ubak, koro ata esisịt owo ẹdiọn̄ọ enye nte n̄kpọndịk m̀mê se ikemede ndinọ unan.”

Mmanie akpan akpan ke idan̄ Intanet akara? Dr. Cooper ọdọhọ ete: “Mme andida Intanet nnam n̄kpọ oro ekemede ndidi ẹma ẹsụhọde ẹnyụn̄ ẹnịm adan̄a ke unam idan̄ mmọ ke ofụri uwem mmọ” edi oro “ke mbuari ẹkụtde mme ifet unam idan̄ oro mînyeneke adan̄a” ke Intanet.

Nte ededi, ata ediwak mbon oro ẹsiwakde ndidụk ikpehe idan̄ ẹsida edinam oro nte se mînọhọ unan. Edi nte enye inọhọ unan? Kpa nte enyene mbumehe uda n̄kpọsọn̄ ibọk esikade iso ada ibọk oro man ọyọ mbumehe esie, ediwak mbon oro ẹnyenede mbumehe edise idan̄ Intanet esiyom “akamba udomo” edinam idan̄ Intanet man ẹyụhọ udọn̄ mmọ. Kamse, mmọ ẹkeme ndikam nsịn utom mmọ ye itie ebuana mmọ ye nsan̄a ndọ mmọ ke itiendịk!

Nte ededi, mbon oro ẹyomde ndinem Abasi esịt ẹnyene udiana ntak ndifep ndidụk mme ikpehe idan̄ ke Intanet. Ikọ Abasi ọnọ item ete: “Mmọdo ẹwot mbak idem mbufo emi odude ke isọn̄. Ẹkpọn̄ use, ye ndek-ndek ido, ye idiọk udọn̄, ye idiọk itọn̄, ye edisịn esịt ke n̄kpọ owo, emi edide ukpono-ndem; mme ido emi ẹda iyatesịt Abasi ẹtiene nditọ ntụt-utọn̄.” (Colossae 3:5, 6) Man ‘owot mbakidem esie’ ọkpọn̄ oburobụt udọn̄ idan̄, oyom owo ọkọri ọkpọsọn̄ ima ọnọ Jehovah Abasi. (Psalm 97:10) Edieke n̄kpọndịk nsọn̄idem edide idan̄ Intanet atapde enye, enye ekpenyene ndinam ima oro enye enyenede ọnọ Jehovah ọsọn̄ ebe ke ndikpep Ikọ Abasi, kpa Bible. Eti itie ebuana ye Mme Ntiense Jehovah ke Ufọkmbono Obio Ubọn̄ n̄kann̄kụk ekeme ndinam ekese ke ndin̄wam owo ọsọn̄ọ ubiere esie ndinem Abasi esịt.