Nte Ẹkemede Ndikan Mfụhọ

● Asaph ama eseme ete: “Mmanam esịt mi asana ikpîkpu ikpîkpu, mmonyụn̄ nyet ubọk mi ke edisana ido. Ndien n̄kụt ufen ofụri usen, ẹnyụn̄ ẹtụnọ mi ke usenubọk.”—Psalm 73:13, 14.

● Baruch ama okụni ete: “Ọdọdiọk ye ami ndien! koro Jehovah ọmọkọrọ ndutụhọ ke ubiak mi; mmakpa mba ke eseme mi, ndien n̄kwe nduọk-odudu.”—Jeremiah 45:3.

● Naomi ama eseme ete: “Ata Ọkpọsọn̄ ama ododoro ye ami eti-eti. Ami n̄kọwọrọ ke ọyọhọ ubọk, ndien Jehovah amada mi afiak ubọk-ubọk: nsinam mbufo ẹkotde mi, ẹte, Naomi, sia Jehovah ama ọdọhọ ikọ otụk mi, Ata Ọkpọsọn̄ ama onyụn̄ anam mi idiọk?”—Ruth 1:20, 21.

 BIBLE ọdọn̄ọ akpakịp uwụtn̄kpọ mme anam-akpanikọ andituak ibuot nnọ Jehovah oro ke ndusụk ini ẹkeyakde mfụhọ akan mmọ ubọk. Akpanikọ edi nte ke kpukpru nnyịn nte mme anana-mfọnmma owo imesikop mfụhọ ke ini ke ini. Ndusụk nnyịn imekeme ndisọp n̄kop mfụhọ—akam ekeme ndidi ye ndusụk udomo ediseme idem—n̄kan mbon efen ke ntak oro isobode mme n̄kpọntịbe mmọn̄eyet.

Nte ededi, edieke mûkarake, mme ntụk emi ẹkeme ndibiat itie ebuana fo ye mbon efen ye itie ebuana fo ye Jehovah Abasi. Christian an̄wan kiet oro enyenede ntụhọ ediseme idem enyịme ete: “Mmesịn ediwak ikot ndibuana ke edinam ebuana otuowo koro etiede mi ke idem nte ke ami ndịghe nsan̄a oro odotde nnọ mme owo ke esop.” Nso akama-nsobo utịp ke mme utọ ekikere oro ẹkeme ndinyene ntem ke uwem owo! Nso ke afo ekeme ndinam man akan mmọ?

San̄a Kpere Jehovah

Ke Psalm 73, Asaph ama ewet in̄wan̄-in̄wan̄ aban̄a editịmede esịt esie. Ke ini ekemende idaha esie ke uwem odomo ye uforo uforo uwem mme idiọkowo, enye ama efịbe mmọ ufịp. Enye ama okụt nte mme anana uten̄e Abasi ẹkeseride iseri ẹnyụn̄ ẹtiede afai afai, okonyụn̄ etie nte owo ikọnọhọ mmọ ufen. Ekem Asaph ama enyene eyịghe aban̄a ufọn edibịne eti usụn̄ uwem oro imọ ikebịnede.—Psalm 73:3-9, 13, 14.

Ukem nte Asaph, nte afo omokụt se itiede nte uforo mme idiọkowo oro ẹtorode idiọk edinam mmọ? Didie ke Asaph akakan mfụhọ esie? Enye aka iso ete: “Ntie n̄kere man mfiọk n̄kpọ emi; nse enye ke n̄kpọ ukụt, tutu ndidụk ke edisana ebiet Abasi; nyọfiọk utịt mmọ.” (Psalm 73:16, 17) Asaph ama anam mme in̄wan̄-in̄wan̄ usio-ukot ebe ke ndiwọn̄ọde mbịne Jehovah ke akam. Ke ndida mme ikọ oro apostle Paul akadade etịn̄ ikọ ke ukperedem, Asaph ama efịk “owo obụkidem” enịm ebe ke ndidemede “owo eke spirit” ke idem esie. Ye obufa ukeme ukụt n̄kpọ eke spirit, enye ama ọfiọk ete ke Jehovah asasua idiọkido ye nte ke ẹyenọ mme idiọkowo ufen ke edikem ini.—1 Corinth 2:14, 15, NW.

 Edi akpan n̄kpọ didie ntem nte afo ayak Bible an̄wam fi owụk ntịn̄enyịn ke ata idem n̄kpọ ke uwem! Jehovah eti nnyịn ete ke imọ imokụt se mme idiọkowo ẹnamde. Bible ekpep ete: “Ẹkûyak ẹbian̄a mbufo; owo ikemeke ndibian̄a Abasi: se ededi owo ọtọde, oro ke enye edinyụn̄ ọdọk. . . . Ẹyak ikûkpa mba ke edinam eti n̄kpọ.” (Galatia 6:7-9) Jehovah oyodori mme idiọkowo “ke mfọfiọnọ ebiet”; enye ọyọduọk mmọ “ke nditaha.” (Psalm 73:18) Kpukpru ini unenikpe Abasi ayakan ke akpatre.

N̄kaiso ndutịm unọ udia eke spirit ke okpokoro Jehovah ye eti ebuana ye ikọt Abasi ẹyen̄wam fi ndisọn̄ọ mbuọtidem fo nnyụn̄ n̄kan mfụhọ m̀mê ndiọi ekikere en̄wen. (Mme Hebrew 10:25) Ukem nte Asaph, ebede ke ndisan̄a n̄kpere Abasi, afo emekeme ndikụt ima ima un̄wam esie. Asaph aka iso ete: “Ami nsụk ndodu ye afo kpukpru ini: afo omụm mi ubọk nnasia. Afo ayada mi usụn̄ ke item fo, ndien ama ekem, ayada mi edisịm ke ubọn̄.” (Psalm 73:23, 24) Christian kiet oro ẹkesabarede ke ini uyen ama okụt eti ibuot oro odude ke mme ikọ emi. Enye ọdọhọ ete: “Ndinyene n̄kpet n̄kpet ebuana ye esop ama owụt mi nnennen usụn̄ ndikere mban̄a uwem. Mma n̄kụt ata in̄wan̄-in̄wan̄ nte ke mbiowo Christian ẹketie ima ima, nte ke mmọ idịghe mme bodisi edi ẹdi mme ekpemerọn̄.” Ih, mbiowo Christian oro ẹkopde mbọm ẹnyene akpan udeme ke ndibịn mme ntụk oro ẹkemede ndinọ unan mfep.—Isaiah 32:1, 2; 1 Thessalonica 2:7, 8.

Nyịme Item Jehovah

Baruch, ewetn̄wed prọfet Jeremiah, ama asiama ke ntak mfịghe eke ntụk otode utom esie. Nte ededi, Jehovah ke mfọnido ama odụri ntịn̄enyịn Baruch owụt ata idem n̄kpọ. “Afo osụk oyom ikpọ n̄kpọ ke idem fo. Kûyom: koro, sese, ami nyada idiọk ntiene kpukpru owo, Jehovah ọdọhọ: edi nyọnọ fi uwem fo ke n̄kpọ mbụme, ke kpukpru ebiet eke afo akade do.”—Jeremiah 45:2-5.

Jehovah ama ada in̄wan̄-in̄wan̄ ikọ anam an̄wan̄a Baruch nte ke ibụk ibụk udọn̄ esie ekedi ntak edikpu esie. Baruch ikekemeke ndikop idatesịt ke utom oro Abasi ọkọnọde enye ke adan̄aemi okoyomde ikpọ n̄kpọ ọnọ idemesie ke ukem ini oro. Afo n̄ko emekeme ndikụt nte ke ata in̄wan̄-in̄wan̄ usio-ukot ke ndikan mfụhọ edi ndifep mme n̄kpọ oro ẹwọn̄ọrede ntịn̄enyịn nnyụn̄ nnyene ifụre ekikere ke uyụhọ otode Abasi.—Philippi 4:6, 7.

Naomi oro ekedide ebeakpa ikayakke mfụhọ akan enye ubọk ke Moab ke ini ebe esie ye nditọiren esie iba ẹkekpan̄ade. Nte ededi, idiọn̄ọ odu nte ke odu ini emi enye ọkọdiọkde esịt aban̄a idemesie ye iban nditọ esie iba. Ke ini okosiode mmọ unyọn̄, Naomi ama  ọdọhọ ete: “Koro ọdiọkde ye ami [ke ntak] mbufo: koro Jehovah ama ada ubọk esie etiene mi.” Ini kiet efen, ke ini enye esịmde Bethlehem, enye ama eyịre ete: “Mbufo ẹkûkot mi, ẹte, Naomi (Edinem), ẹkot mi, ẹte, Marah (Ndot-ndot): koro Ata Ọkpọsọn̄ ama ododoro ye ami eti-eti.”—Ruth 1:13, 20.

Nte ededi, Naomi ikadianakede ida san̄asan̄a ke itie mfụhọ—ikpọn̄ Jehovah ye ikọt esie. Ke Moab enye ama okop ete ke “Jehovah ama ọkọfọn ye ikọt esie, onyụn̄ ọnọ mmọ udia.” (Ruth 1:6) Enye ama ọfiọk ete ke mfọnn̄kan itie imọ ndidu ekedi ye ikọt Jehovah. Naomi ama afiak ọnyọn̄ Judah ye Ruth n̄wan eyen esie ke oro ebede onyụn̄ akada mbufiọk eteme Ruth nte enye akpanamde n̄kpọ ye Boaz iman mmọ, andifak enye.

Ukem ntre mfịn, mme anam-akpanikọ oro ẹtabade nsan̄a mmọ ke n̄kpa ke ẹyọ mfụhọ uforo uforo ebe ke ndisịn idem ke utom ke esop Christian. Ukem nte Naomi, mmọ ẹka iso ndisịn idem ke mme edinam eke spirit, ẹkotde Ikọ Abasi ke usen ke usen.

Mme Ufọn Ẹtode Edida Ọniọn̄ Abasi Nsịn ke Edinam

Mme mbụk Bible emi ẹnọ ikike ke nte owo ekemede ndikan mfụhọ. Asaph ama oyom un̄wam ke ataya Jehovah onyụn̄ etie ke ime ebet Jehovah. Baruch ama okop item onyụn̄ efep uma inyene obụkidem oro ọwọn̄ọrede ntịn̄enyịn owo. Naomi ama aka iso ndinam utom ifịk ifịk ke otu ikọt Jehovah, etịmde n̄kaiferi oro Ruth idem ọnọ mme ifetutom esie ke utuakibuot ata Abasi.—1 Corinth 4:7; Galatia 5:26; 6:4.

Afo emekeme ndikan mfụhọ ye ndiọi ekikere eken ebe ke ndiwụk ntịn̄enyịn ke mme edikan oro Jehovah ọnọde ikọt esie, nte owo kiet kiet ye nte otu. Man anam oro, tie kere akakan edinam ima Jehovah ke ndinọ fi ufak. Wụt esịtekọm ban̄a ata ima itie nditọete Christian. Yak uwem fo owụhọ ke obufa ererimbot Abasi oro odude ke n̄kpet n̄kpet ini iso. Ndien afo akpakam ọdọhọ ukem nte Asaph ete: “Ama edi ami, ọfọn mi ndikpere Abasi: [mberi edem] ye Ọbọn̄ Jehovah, man mbụk kpukpru mme utịbe n̄kpọ fo.”—Psalm 73:28.