Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Ke Rome 5:3-5, ntak emi apostle Paul akasiakde idotenyịn ke utịt udịmikọ emi?

Paul ama asiak udịm udịm n̄kpọ oro mme Christian ẹsisobode—ukụt, ime, eti edu, ye idotenyịn. “Idotenyịn” emi idịghe idotenyịn oro owo ekenyenede ke akpa ini oto Bible, edi edi idotenyịn oro ẹsọn̄ọde, otụn̄ọde, onyụn̄ akarade oro Christian ekemede ndinyene nte ini ebede.—12/15, page 22-23.

• Ntak emi Christian mfịn ekpenyenede udọn̄ ke mme mbre mbuba oro ẹkesibrede ke Greece eset?

Ndifiọk nte mme mbre oro ẹketiede ye nte ẹkesibrede mmọ ekeme ndisịn un̄wana ke ediwak ufan̄ikọ Bible. Ndusụk ke otu mme ufan̄ikọ oro ẹtịn̄ ẹban̄a ‘ndisan̄a ke item n̄n̄wana,’ ‘ndikpọnọde kpukpru mbiomo nnịm n̄kan̄ kiet nnyụn̄ nse uwụtn̄kpọ Jesus,’ ‘ndifehe mbuba mma,’ ye ndibọ anyanya, m̀mê utịp. (2 Timothy 2:5; 4:7, 8; Mme Hebrew 12:1, 2; 1 Corinth 9:24, 25; 1 Peter 5:4)—1/1, page 28-30.

• Nso obufa usụn̄ nditan̄a eti mbụk ke ẹketọn̄ọ ke January 1914?

Ini oro ke ẹkesio “Photo-Drama of Creation.” Enye ama esịne ndise oro ekenyenede ikpehe inan̄ oro ẹsịnede mme ikpehe ndise oro ẹnamde-nam n̄kpọ ẹwụt ye ndiye uduot akrasi slide ke mme itie ikie, ẹnamde ediwak ke otu emi ẹsan̄a ukem ye mme utịn̄ikọ edinam an̄wan̄a oro ẹkemụmde ẹdọn̄ ke usanikwọ. Ẹma ẹtịm Drama emi ẹsịn ke otu 20 ẹnyụn̄ ẹda ẹnam n̄kpọ ntatara ntatara ke ndikpep mme owo etop Bible.—1/15, page 8-9.

• Didie ke Otu Ukara Okpụhọde ye N̄ka Oro Ibet Enyịmede?

Ke adan̄aemi edide mme andibuana ke n̄ka oro ibet enyịmede ẹsimek mme eseutom ẹsịn ke itie, idịghe owo ndomokiet emek Otu Ukara edi edi Jesus Christ emek. Ufọn idụhe kpukpru mme eseutom ke nsio nsio n̄ka oro Mme Ntiense Jehovah ẹdade ẹnam n̄kpọ ndidi mbon Otu Ukara. Ke mbono ofụri isua eke Watch Tower Bible and Tract Society of Pennsylvania oro ẹkenịmde ke ndondo emi, mbon Otu Ukara emi ẹkenamde utom nte mme eseutom ye mme akamautom ẹma ẹwọn̄ọ unyịme unyịme ẹkpọn̄ mme itie mmọ. Ẹma ẹmek nditọete iren emi ẹkọride ẹsịm ọyọhọ idaha oro ẹdide eke “mme erọn̄ en̄wen” ẹsịn ke itie oro. (John 10:16) Ntem Otu Ukara ekeme ndiyak ekese ini nsịn ke nditịm udia eke spirit ndien ke n̄kan̄ eken, ese aban̄a udọn̄ n̄kpọ eke spirit nditọete ofụri ererimbot.—1/15, page 29, 31.

• Ewe uwụtn̄kpọ Bible iba ke nnyịn ikeme ndidụn̄ọde ke ndikpep nte ikemede ndikan mmemidem?

Akpa edi Hannah, eka Samuel. Enye ekpekekeme ndikop mmemidem ke ini Eli, akwa oku Israel, okodoride enye ikọ. Utu ke oro, enye ama etịn̄ in̄wan̄-in̄wan̄ se iketịbede ọnọ enye ukpono ukpono. Ke adianade do, Hannah ikesịnke Eli ke esịt. Udiana edi Mark, oro anade edi ama okop mmemidem ke ini apostle Paul mîkoyomke ndisịn enye ke isan̄ isụn̄utom. Utu ke ndikop idiọkesịt ke ntak ediduọk ifetutom esie, enye ama aka iso ifịk ifịk ke utom esie, asan̄ade ye Barnabas.—2/1, page 20-22.

• Ntak emi mme Christian ẹkpedude ke ukpeme ẹban̄a edinọ, m̀mê edibọ mbon efen, mme ndutịm kọmputa?

Ata ediwak ndutịm kọmputa (esịnede mme mbre kọmputa), ẹnyene n̄wed unyịme oro enyịmede andinyene/andida enye nnam n̄kpọ ẹsịn ndutịm oro ke kọmputa kiet kpọt. Nte ido edide, edifiak nsion̄o mme idem ndutịm emi nnọ mbon efen edi edibiat ibet unen edifiak nsion̄o n̄kpọ, idem ke ini nnyịn idemede-deme mmọ ke mfọn. Mme Christian ẹyom ndinịm ibet, ‘ẹnọde Caesar se inyenede Caesar.’ (Mark 12:17)—2/15, page 28-29.

• Cyril ye Methodius ẹkedi mmanie, ndien didie ke mmọ ẹketịp ẹsịn ke ukpepn̄kpọ Bible?

Mmọ ẹkedi nditọeka iba oro ẹkemanade ke Thessalonica, Greece, ke ọyọhọ isua ikie usụkkiet. Mmọ ẹma ẹsion̄o mme abisi usem Slav ẹdi ẹnyụn̄ ẹkabade akamba ubak Bible ẹsịn ke usem Slav.—3/1, page 28-29.

• Nso ke ikọ oro “edikere n̄kpọ spirit” ọwọrọ?—Rome 8:6.

Enye ọwọrọ ndidi se anamutom odudu Jehovah akarade onyụn̄ onụkde. Nnyịn imekeme ndiyak spirit Abasi anam utom ke idem nnyịn ebe ke ndikot nnyụn̄ n̄kpep Bible, ke ndinịm ibet Abasi ke ofụri esịt, ye ke ndibọn̄ akam mben̄e spirit Abasi.—3/15, page 15.

• Nso ke nnyịn ikeme ndinam edieke ikerede ke ẹda nnyịn ke ukwan̄ usụn̄?

Edi akpan n̄kpọ ndiyom ndinam n̄kpọ oro an̄wan̄a ke edu ima. Edieke etiede nte oro ikwe unen, kûduọk idotenyịn. Ben̄e Jehovah, emi ‘odomode esịt,’ ifiọk ye un̄wam. (Mme N̄ke 21:2; 1 Samuel 16:7)—4/1, page 21-23.