Ntọt Mme Anditan̄a Obio Ubọn̄

Ẹnam Enyịn̄ Abasi Asana Ọbọhọ Esuene

IKỌ Abasi, kpa Bible, ọdọhọ ete: “Ẹkama idem nte odotde ke iso mme Gentile, man ke nde eke mmọ ẹtịn̄de n̄kpọ ẹbiat mbufo ẹte ẹdi mme anam-idiọk, mmọ ẹkpeda nti ido mbufo, emi ẹdikụtde ke ini eke ẹdide ndidomo mbufo nse, ẹnọ Abasi ubọn̄.” (1 Peter 2:12) Ke ntre, mme ata Christian ẹsidomo ndikama idem nte odotde man ẹfep ndida esuene nsọk enyịn̄ Jehovah.

Ke nsannsan ikpehe Zambia oro ẹkotde Senanga, ẹma ẹdụk ufọk andikpep kiet ẹyịp ekebe ukopikọ esie. Sia Mme Ntiense Jehovah ẹsikwọrọde ikọ ke n̄kann̄kụk oro, andikpep oro ama odori mmọ ikọ ete ke mmọ ẹkeyịp. Enye ama ọkọtọt ọnọ mme bodisi ete ke Mme Ntiense ẹyịp ekebe ukopikọ imọ. Enye ama owụt tract oro enye ekemende ke isọn̄ufọk esie nte n̄kpọ ntiense nte ke Mme Ntiense ẹma ẹdi ufọk imọ. Nte ededi, mme bodisi ikenịmke ikọ esie ke akpanikọ. Mmọ ẹma ẹteme enye ẹte aka eketịm odụn̄ọde.

Otu mbiowo ẹma ẹsịn udọn̄ ẹnọ Mme Ntiense emi ẹkenamde utom usen oro ke n̄kann̄kụk andikpep oro ẹte ẹka ẹkeneme n̄kpọ oro ye andikpep oro. Ndusụk ke otu nditọete oro ẹma ẹka ẹkeneme ye enye, ẹnamde an̄wan̄a ẹte ke mmimọ iyom ndinam enyịn̄ Jehovah asana ọbọhọ esuene. Ke nneme mmọ, mmọ ẹma ẹsian enye ẹte ke mmimọ ima isobo akparawa kiet ke ufọk esie inyụn̄ inọ enye tract. Otode se mmọ ẹketịn̄de, andikpep oro ama ọfiọk owo oro. Ke akpanikọ, mmọ ẹkesika ufọkabasi kiet. Andikpep oro ama enyene nneme ye akparawa oro, edi enye ama akan̄. Ekem andikpep oro ama eketịn̄ n̄kpọ oro ọnọ ete ye eka akparawa oro onyụn̄ ọnyọn̄ ufọk. Ke ufan̄ hour kiet, eka akparawa oro ama ada ekebe ukopikọ oro ẹkeyịpde, edi.

Ke atuade n̄kpọfiọk, andikpep oro ama aka ebịne otu mbiowo ekekpe ubọk ete ẹfen ẹnọ imọ ke ndiketịn̄ mme nsunsu edori ikọ oro. Mbiowo ẹma ẹkop n̄kpeubọk esie edi ẹben̄e ẹte ẹtọt mme owo utịp ndụn̄ọde emi man kpukpru owo ẹkpefiọk ẹte ke Mme Ntiense oro ikeduehe. Ẹma ẹnọ ntọt ke ufọkn̄wed, ke ntem ẹnamde enyịn̄ Jehovah asan̄a ọbọhọ esuene. Mme Ntiense Jehovah ẹkeme ndika iso n̄kwọrọ ikọ ifụre ifụre ke n̄kann̄kụk oro.

[Mme ndise obio ke page 19]

(Ama oyom ndikụt nte enye enen̄erede etie, se n̄wed)

AFRICA

Zambia

[Ebiet Ẹdade N̄kpọ Ẹto]

Mountain High Maps® Copyright © 1997 Digital Wisdom, Inc.