Dat Esịt ye Abasi Inemesịt
Dat Esịt ye Abasi Inemesịt
“Ke akpatre, nditọete, ẹka iso ndidat esịt, . . . ndien Abasi ima ye emem oyodu ye mbufo.”—2 CORINTH 13:11, NW.
1, 2. (a) Ntak emi ediwak owo mîkopke idatesịt ke uwem? (b) Nso ke idatesịt edi, ndien didie ke nnyịn ikeme ndinyene enye?
KE MME mfụhọ mfụhọ eyo emi, ediwak owo inyeneke ntak ndidat esịt. Ke ini n̄kpọ mmọn̄eyet etịbede ọnọ mmọ m̀mê owo oro mmọ ẹmade, ekeme nditie mmọ ke idem nte eketiede Job eke eset, emi ọkọdọhọde ete: “Owo eke n̄wan amande omụhọ usen, onyụn̄ oyụhọ ukụt.” (Job 14:1) Mme Christian ibọhọke mme mfịghe ye nsịn̄ede eke “ndiọk eyo” emi, ndien idịghe n̄kpọ n̄kpaidem nte ke idem esimem mme anam-akpanikọ asan̄autom Jehovah ndusụk ini.—2 Timothy 3:1.
2 Edi, mme Christian ẹkeme ndidat esịt, idem ke ini ẹsobode idomo. (Utom 5:40, 41) Man ọfiọk nte emi ekemede nditịbe, bem iso kere ban̄a se idatesịt edide. Ẹkabade idatesịt nte “ntụk emi mfọnọn̄kpọ m̀mê idotenyịn mfọnọn̄kpọ edemerede.” * Mmọdo, edieke nnyịn idade ini ndibat mme edidiọn̄ nnyịn eke idahaemi ke adan̄aemi itiede ikere mme edidiọn̄ oro ẹnade ẹbet nnyịn ke obufa ererimbot Abasi, nnyịn imekeme ndikop idatesịt.
3. Ke nso usụn̄ifiọk ke ẹkeme ndidọhọ ke kpukpru owo ẹnyene ke nsụhọde n̄kaha ndusụk ntak ndidat esịt?
3 Kpukpru owo ẹnyene ndusụk edidiọn̄ ndiwụt esịtekọm mban̄a. Ibuot ufọk ekeme nditaba utom esie. Nte ido edide, esịt eyetịmede enye. Enye oyom nditịm n̄kpọ nnọ mbonima esie. Kpa ye oro, edieke enye okopde odudu onyụn̄ enyenede nsọn̄idem, enye ekeme ndiwụt esịtekọm mban̄a oro. Edieke enye enyenede utom, enye eyekeme ndinam utom ọkpọsọn̄. Ke n̄kan̄ eken, Christian an̄wan ekeme ndidọn̄ọ udọn̄ọ emi akamade ọkpọsọn̄ mmemidem. Edi, enye ekeme ndiwụt esịtekọm mban̄a ibetedem ndima ufan ye mbonubon oro ẹn̄wamde enye ndiyọ udọn̄ọ esie ye uku ye uko. Ndien kpukpru ata Christian, inamke n̄kpọ m̀mê nso idi idaha mmọ, ẹkeme ndidat esịt mban̄a ifet edifiọk Jehovah, kpa “Abasi inemesịt,” ye Jesus Christ, “okop-inemesịt emi enye ikpọn̄-ikpọn̄ edide Andikara.” (1 Timothy 1:11, NW; 6:15, NW) Ih, Jehovah Abasi ye Jesus Christ ẹnen̄ede ẹkop inemesịt. Mmọ ẹka iso ẹdat esịt kpa ye akpanikọ oro nte ke mme idaha ke isọn̄ ẹnen̄ede ẹdi isio ye se Jehovah akaduakde ke ntọn̄ọ. Uwụtn̄kpọ mmọ ekeme ndikpep nnyịn ekese mban̄a nte nnyịn ikemede ndika iso ndat esịt.
Akananam Mmọ Iduọkke Idatesịt Mmọ
4, 5. (a) Didie ke Jehovah akanam n̄kpọ ke ini mme akpa owo ẹkesọn̄de ibuot? (b) Ke nso usụn̄ ke Jehovah ekenyene in̄wan̄-in̄wan̄ edu aban̄a ubonowo?
4 Ke in̄wan̄ Eden, Adam ye Eve ẹma ẹnyene mfọnmma nsọn̄idem ye mfọnmma ekikere. Mmọ ẹma ẹnyene eti utom ndinam ye ediye n̄kann̄kụk ndidu nnam oro. Ke akande kpukpru, mmọ ẹma ẹnyene ifet edinyene nneme ye Jehovah kpukpru ini. Ekedi uduak Abasi nte mmọ ẹnyene inem inem ini iso. Edi akpa ete ye eka nnyịn ikoyụhọke ye kpukpru nti enọ emi; mmọ ẹma ẹyịp mfri oro ẹkekpande ke “eto ifiọk, eti ye idiọk.” Edinam nsọn̄ibuot emi ekedi ntak kpukpru unana inemesịt oro nnyịn, nditọ mmọ, inyenede mfịn.—Genesis 2:15-17; 3:6; Rome 5:12.
5 Nte ededi, Jehovah ikayakke edu unana esịtekọm Adam ye Eve abiat idatesịt esie. Enye ama enyene mbuọtidem nte ke nsụhọde n̄kaha esịt oyonụk ndusụk ke otu nditọ mmọ ndinam n̄kpọ esie. Ke akpanikọ, enye ama enen̄ede enyene mbuọtidem tutu enye ọtọt uduak esie ndifak okopitem nditọ Adam ye Eve idem mbemiso mmọ ẹkenyenede akpa eyen mmọ! (Genesis 1:31; 3:15) Ke ediwak isua ikie oro ẹketienede, n̄wakn̄kan owo ẹketiene nde ikpat Adam ye Eve, edi Jehovah ikakpaha edem iwụt ekpụk ubonowo ke ntak utọ ntatara nsọn̄ibuot oro. Utu ke oro, enye okowụk ntịn̄enyịn ke iren ye iban oro ‘ẹkedatde enye esịt,’ mbon oro ẹkesịnde ọkpọsọn̄ ukeme ndinem enye esịt koro mmọ ẹkemade enye.—Mme N̄ke 27:11; Mme Hebrew 6:10.
6, 7. Mme n̄kpọ ewe ẹken̄wam Jesus ndika iso n̄kop idatesịt?
6 Nso kaban̄a Jesus—didie ke enye okomụm idatesịt esie akama? Nte okopodudu edibotn̄kpọ eke spirit ke heaven, Jesus ama enyene kpukpru ifet ndikụt mme edinam owo ke isọn̄. Mme unana mfọnmma mmọ ẹkena in̄wan̄-in̄wan̄, kpa ye oro Jesus ama ama mmọ. (Mme N̄ke 8:31) Ke ukperedem, ke ini enye ekedide isọn̄ onyụn̄ enen̄erede “odụn̄” ye owo, ekikere esie kaban̄a ubonowo ikokpụhọkede. (John 1:14) Nso ikan̄wam mfọnmma Eyen Abasi ndika iso nnyene utọ in̄wan̄-in̄wan̄ ekikere oro mban̄a anam-idiọk ekpụk ubonowo?
7 Akpa kan̄a, Jesus ama owụt eti ibuot ke se enye okoyomde oto idemesie ye mbon efen. Enye ama ọfiọk ete ke imọ idikabakede ofụri ererimbot esịt. (Matthew 10:32-39) Ntre enye ama okop idatesịt idem ke ini owo kiet oro enyenede esịt akpanikọ anamde n̄kpọ nte ọfọnde aban̄a etop Obio Ubọn̄. Okposụkedi edu ye edinam ndusụk mbet esie mîkekemke ndusụk ini ye se ẹkeyomde, Jesus ama ọfiọk ete ke mmọ ẹma ẹnen̄ede ẹyom ndinam uduak Abasi ke esịt mmọ, ndien enye ama ama mmọ ke ntak oro. (Luke 9:46; 22:24, 28-32, 60-62) Ke edide akpan n̄kpọ, ke akam oro enye ọkọbọn̄de ọnọ Ete esie eke heaven, Jesus ama etịn̄ ibio ibio aban̄a eti usụn̄ oro mme mbet esie ẹkenamde n̄kpọ tutu esịm ini oro ete: “Mmọ ẹma ẹnyụn̄ ẹnịm mme ikọ Fo.”—John 17:6.
8. Siak ndusụk usụn̄ emi nnyịn ikemede ndikpebe Jehovah ye Jesus ke edide edisịm edimụm idatesịt nnyịn n̄kama.
8 Nte eyịghe mîdụhe, kpukpru nnyịn iyọbọ ufọn ito editie n̄kere uwụtn̄kpọ oro Jehovah Abasi ye Christ Jesus ẹkenịmde ke afan̄ emi. Nte nnyịn imekeme ndinen̄ede n̄kpebe Jehovah eyedi ebe ke nditre nditịmede esịt ke ini mme n̄kpọ mîsan̄ake nte nnyịn ikodoride enyịn? Nte nnyịn imekeme ndinen̄ede ntiene nde ikpat Jesus ebe ke ndika iso nnyene in̄wan̄-in̄wan̄ ekikere mban̄a mme idaha nnyịn eke idahaemi, ọkọrọ ye ke ndiwụt eti ibuot ke se iyomde ito idem nnyịn ye mbon efen? Ẹyak nnyịn ise nte ẹkemede ndibuan ndusụk ke otu mme edumbet emi ke usụn̄ enyenede ufọn ke ikpehe kiet emi mme ifịk ifịk Christian ke kpukpru ebiet ẹnen̄erede ẹma—utom ukwọrọikọ.
Nyene In̄wan̄-In̄wan̄ Ekikere Ban̄a Utom Ukwọrọikọ
9. Didie ke Jeremiah akafiak okop idatesịt, ndien didie ke uwụtn̄kpọ esie ekeme ndin̄wam nnyịn?
9 Jehovah oyom nnyịn ikop idatesịt ke utom esie. Idatesịt nnyịn ikpọkọn̄ọke ke utịp oro nnyịn inyenede. (Luke 10:17, 20) Prọfet Jeremiah ama ọkwọrọ ikọ ediwak isua ke efakutom oro mîn̄wụmke mfri. Ke ini enye okowụkde ekikere ke idiọk usụn̄ oro mme owo ẹkenamde n̄kpọ, enye ama ataba idatesịt esie. (Jeremiah 20:8) Edi ke ini enye ekekerede nte etop oro ọkọfọnde, enye ama afiak okop idatesịt. Jeremiah ama ọdọhọ Jehovah ete: “Ẹmekụt ikọ fo, ndien ndia mmọ; ndien ikọ fo ẹkabade ẹdi n̄kpọ idara ye inemesịt mi: koro n̄kerede enyịn̄ fo, O Jehovah.” (Jeremiah 15:16) Ih, Jeremiah ama adat esịt ke ifet oro enye ekenyenede ndikwọrọ ikọ Abasi. Nnyịn n̄ko imekeme ndidat esịt.
10. Didie ke nnyịn ikeme ndika iso ndat esịt ke utom ukwọrọikọ idem ọkpọkọm efakutom nnyịn in̄wụmke mfri idahaemi?
10 Idem ọkpọkọm ata ediwak owo inamke n̄kpọ iban̄a eti mbụk, nnyịn imenyene kpukpru ntak ndidat esịt nte nnyịn ibuanade ke utom ukwọrọikọ. Ti ete ke Jehovah ama enen̄ede enyene mbuọtidem nte ke ọyọdọn̄ ndusụk owo ndinam n̄kpọ esie. Ukem nte Jehovah, nnyịn ikpedehede iduọk idotenyịn nte ke nsụhọde n̄kaha ndusụk owo ẹyedifiọk eneni emi abuanade ẹnyụn̄ ẹnyịme etop Obio Ubọn̄. Inaha nnyịn ifre ite ke idaha mme owo ẹsikpụhọde. Ke ini ẹsobode ndusụk ntakurua m̀mê afanikọn̄ ke unana idotenyịn, idem owo oro okopde idatesịt akan ekeme nditọn̄ọ ndinen̄ede n̄kere mban̄a se uwem ọwọrọde. Nte afo oyodu do ndin̄wam ke ini utọ owo oro ‘ọdiọn̄ọde aban̄a udọn̄ n̄kpọ spirit esie’? (Matthew 5:3, NW) Kamse, owo ke efakutom mbufo ekeme ndiben̄e idem ndikpan̄ utọn̄ nnọ eti mbụk ke ini afo afiakde awaha!
11, 12. Nso iketịbe ke obio kiet, ndien nso ke nnyịn ikeme ndikpep nto oro?
11 Nte efakutom nnyịn etiede ekeme n̄ko ndikpụhọde. Kere ban̄a uwụtn̄kpọ kiet. Otu mme ọdọ ndọ ẹdide uyen oro ẹtịmde ẹdiana kiet ẹnyụn̄ ẹnyenede nditọ ẹkedụn̄ ke ekpri obio kiet. Ke ini Mme Ntiense Jehovah ẹkekade do, mmọ ẹma ẹsikop ukem ikọ ke kpukpru enyịnusụn̄, “Nnyịn inyeneke udọn̄!” Edieke owo ekededi okowụtde udọn̄ ke etop Obio Ubọn̄, mme mbọhọidụn̄ oro ẹma ẹsọsọp ẹbiọn̄ọ enye ndika iso nnyene nneme ye Mme Ntiense oro. Ufọn idụhe nditetịn̄, ekedi n̄kpọ-ata ndikwọrọ ikọ do. Nte ededi, Mme Ntiense oro ikakpaha mba; mmọ ẹma ẹka iso ndikwọrọ ikọ. Ye nso utịp?
12 Nte ini akakade, ediwak ke otu nditọwọn̄ obio oro ẹma ẹkọri ẹkponi, ẹdọ ndọ, ẹnyụn̄ ẹtọn̄ọ ubon do. Ke ẹfiọkde ẹte ke usụn̄ uwem mmimọ ikosụn̄oke ke ata inemesịt, ndusụk ke otu uyen emi ẹma ẹtọn̄ọ ndiyom akpanikọ. Mmọ ẹma ẹkụt akpanikọ ke ini mmọ ẹkenamde n̄kpọ nte ọfọnde ẹban̄a eti mbụk oro Mme Ntiense ẹketan̄ade. Ntre ke ediwak isua ẹma ẹkebe, ekpri esop oro ama ọtọn̄ọ ndikọri. Kere ban̄a idatesịt mme asuanetop Obio Ubọn̄ oro mîkakpaha mba! Edisọn̄ọ nyịre ke edibuana ubọn̄ ubọn̄ etop Obio Ubọn̄ akpakam ada idatesịt ọsọk nnyịn n̄ko!
Mme Ekemmọ Andinịm ke Akpanikọ Ẹyen̄wam Fi
13. Nnyịn ikeme ndika mbịne mmanie ke ini idem ememde nnyịn?
13 Ke ini mme mfịghe ẹkponde m̀mê ke ini osobode afanikọn̄, m̀mọ̀n̄ ke afo ekeme ndika n̄koyom ndọn̄esịt? Ediwak miliọn mme asan̄autom Jehovah oro ẹyakde idem ẹnọ ẹsibem iso ẹka ẹbịne Jehovah ke akam, ekem ẹka ẹbịne nditọete Christian mmọ. Ke adan̄aemi okodude ke isọn̄, Jesus ke idemesie ama ada un̄wam oro mme mbet esie ẹkenọde ke ọsọn̄urua n̄kpọ. Ke okoneyo oro ekebemde n̄kpa esie iso, enye ama etịn̄ aban̄a mmọ nte “mmọ emi ẹkesọn̄ọde ẹda ye Ami ke idomo Mi.” (Luke 22:28) Edi akpanikọ, mme mbet oro ẹkedi mme anana-mfọnmma owo, edi nsọn̄ọnda mmọ ekedi n̄kpọ ndọn̄esịt ọnọ Eyen Abasi. Nnyịn n̄ko imekeme ndibọ ndọn̄esịt nto mme ekemmọ andituak ibuot.
14, 15. Nso ikan̄wam ebe ye n̄wan kiet ndiyọ n̄kpa eyen mmọ, ndien nso ke afo ekpep oto ifiọk n̄kpọntịbe mmọ?
14 Ebe ye n̄wan ẹdide Christian emi ẹkerede Michel ye Diane ẹma ẹfiọk nte un̄wam nditọete mmọ ekedide akpan n̄kpọ. Ẹma ẹdụn̄ọde ẹkụt ke Jonathan, eyeneren mmọ emi ekedide isua 20 ke emana, kpa Christian emi okokopde idem onyụn̄ enyenede nyayama ini iso, ama ọdọn̄ọ mbufịt mfre. Mbiaibọk ẹma ẹdomo uko uko ndinyan̄a enye, edi idem Jonathan ama ọdọdiọn̄ ọdiọk tutu ke ufọt uwemeyo usen kiet, enye ama akpa. Idem ama emem Michel ye Diane. Mmọ ẹma ẹfiọk ẹte ke akayak esisịt Esoputom oro ẹkenịmde ke mbubịteyo oro ndisuana. Edi, ke ẹyomde ndọn̄esịt ke mbrenyịn, mmọ ẹma ẹben̄e ẹte ebiowo oro okodude ye mmọ asan̄a ye mmimọ aka Ufọkmbono Obio Ubọn̄. Mmọ ẹkesịm ke ata ini oro ẹketọtde ẹsop ẹban̄a n̄kpa Jonathan. Ke mbono esop ama akasuana, nditọete iren ye iban ẹma ẹkanade ete ye eka oro ẹketuan̄ade mi ẹkụk, ẹfatde ẹnyụn̄ ẹnọde mmọ mme ikọ ndọn̄esịt. Diane eti ete: “Idem ama enen̄ede emem nnyịn ke ini ikakade ikesịm ufọkmbono, edi nso ndọn̄esịt ke nnyịn ikọbọ ntem ito nditọete—mmọ ẹkesọn̄ọ nnyịn idem didie ntem! Okposụkedi mmọ mîkemeke ndimen ubiak nnyịn mfep, mmọ ẹma ẹn̄wam nnyịn ndiyọ mfịghe oro!”—Rome 1:11, 12; 1 Corinth 12:21-26.
15 Nnama ama anam Michel ye Diane ẹsịk ẹkpere nditọete mmọ. Enye n̄ko ama anam mmọ ẹnen̄ede ẹsịk ẹkpere kiet eken. Michel ọdọhọ ete: “Mmekpep ndinen̄ede mma edima n̄wan mi. Ke mme ini mmemidem, nnyịn imesineme ye kiet eken iban̄a akpanikọ Bible ye nte Jehovah omụmde nnyịn akama.” Diane adian do ete: “Idotenyịn Obio Ubọn̄ akam enen̄ede enyene se ọwọrọde ọnọ nnyịn idahaemi.”
16. Ntak edide akpan n̄kpọ ndinam usio-ukot ke ndinam nditọete nnyịn ẹfiọk se nnyịn iyomde?
16 Ih, nditọete Christian nnyịn ẹkeme ndidi “n̄kpọ un̄wam” nnọ nnyịn ke n̄kpọsọn̄ ini ke uwem ndien ke ntem ẹn̄wamde nnyịn ndimụm idatesịt nnyịn n̄kama. (Colossae 4:11, NW) Nte ededi, mmọ ikemeke ndifiọk esịt nnyịn. Ke ntre, ke ini nnyịn iyomde un̄wam, ọfọn ndinam mmọ ẹfiọk. Do nnyịn imekeme ndiwụt ata esịtekọm ke se ededi ndọn̄esịt oro nditọete nnyịn ẹkemede ndinọ, idade nte ke oro oto Jehovah.—Mme N̄ke 12:25; 17:17.
Se Esop Mbufo
17. Mme n̄kpọ-ata ewe ke eka kiet oro ọbọkde nditọ ikpọn̄ osobo, ndien didie ke nnyịn ise mme utọ owo nte enye?
17 Adan̄a nte afo etịmde ese mme ekemmọ andinịm ke akpanikọ, ntre ke afo edikpep ndima mmọ nnyụn̄ n̄kop idatesịt ndibuana ye mmọ. Se esop mbufo. Nso ke afo okụt? Nte omokụt eka oro ọbọkde nditọ ikpọn̄ oro odomode ndibọk nditọ esie ke usụn̄ akpanikọ? Nte afo emenen̄ede ekere aban̄a eti uwụtn̄kpọ oro enye enịmde? Domo ndikere ndusụk mfịna oro enye osobode. Eka oro ọbọkde nditọ ikpọn̄, emi ekerede Jeanine, asiak ndusụk ke otu mme mfịna emi: ndobo, idomo edinam idan̄ otode irenowo ke itieutom, unana okụk. Edi ndiọkn̄kan n̄kpọ ubiọn̄ọ, nte enye ọdọhọde, abuana edise mban̄a udọn̄ eke ntụk nditọ, sia eyen kiet kiet edide isio. Jeanine asiak mfịna efen: “Ekeme ndidi ata n̄kpọ-ata ndibiọn̄ọ ntụhọ edinam eyeneren fo ibuot ufọk man ada itie ebe oro mîdụhe. Mmenyene eyenan̄wan, ndien esidi ọkpọsọn̄ n̄kpọ nditi nditre ndibiom enye ndodobi mbiomo ke ndinam enye edi owo emi nsitịn̄de ikọ idịbi nnọ.” Ukem nte ediwak tọsịn mme ete m̀mê eka oro ẹbakde Abasi, emi ẹbọkde nditọ ikpọn̄, Jeanine anam utom ofụri ini onyụn̄ ese aban̄a ikọtufọk esie. Enye n̄ko esikpep nditọ esie Bible, ọnọ mmọ ukpep ke an̄wautom, onyụn̄ ada mmọ edi mme mbono esop. (Ephesus 6:4) Anaedi Jehovah okop inemesịt didie ntem nte enye ke usen ke usen okụtde ukeme oro ubon emi esịnde ndimụm nsọn̄ọnda n̄kama! Nte nnyịn ikopke idatesịt ndinyene mme utọ owo oro ke otu nnyịn? Ih, imokop.
18, 19. Nam an̄wan̄a nte nnyịn ikemede ndinam esịtekọm emi inyenede iban̄a mme andibuana ke esop otụn̄ọ.
18 Fiak se esop mbufo. Afo emekeme ndikụt mme ebeakpa m̀mê iren oro iban mmọ ẹkpan̄ade emi ‘akananam mîtabake’ mbono esop. (Luke 2:37, NW) Nte mmọ ẹsikop ndobo ndusụk ini? Ih, ẹsikop. Mmọ ẹnen̄ede ẹtaba nsan̄a ndọ mmọ! Edi mmọ ẹka iso ndiyọhọ ye utom Jehovah ẹnyụn̄ ẹnyene ọkpọkpọ udọn̄ ke idem mbon efen. Enyene-iwụk, in̄wan̄-in̄wan̄ edu mmọ etịp esịn ke idatesịt esop! Christian oro anamde utom ukwọrọikọ uyọhọ ini ke se ibede isua 30 ama ọdọhọ ete: “N̄kponn̄kan idatesịt mi edi ndikụt nte nditọete iren ye iban emi ẹsọn̄de ẹnyụn̄ ẹsobode ediwak idomo ẹsụk ẹnamde n̄kpọ Jehovah ke edinam akpanikọ!” Ih, nditọete Christian oro ẹsọn̄de ke otu nnyịn ẹdi akwa nsịnudọn̄ ẹnọ n̄kparawa owo.
19 Nso kaban̄a mbufa owo emi ẹtọn̄ọde-tọn̄ọ ndibuana ye esop ke ata ndondo emi? Nte nnyịn isibọhọ nsịnudọn̄ ke ini mmọ ẹtan̄ade mbuọtidem mmọ ke mbono esop? Kere ban̄a n̄kọri oro mmọ ẹnamde tọn̄ọ nte mmọ ẹketọn̄ọ ndikpep Bible. Anaedi Jehovah enen̄ede okop inemesịt ye mmọ. Nte nnyịn imokop inemesịt? Nte nnyịn imesiwụt esịtekọm, itorode mmọ ke mme ukeme mmọ?
20. Ntak emi ẹkemede ndidọhọ ke andibuana kiet kiet ke esop enyene akpan udeme ke esop?
20 Nte afo edi ọdọ ndọ, owo emi mîdọhọ ndọ, m̀mê ete m̀mê eka oro ọbọkde nditọ ikpọn̄? Nte afo edi eyen oro mînyeneke ete m̀mê eka, ebeakpa m̀mê eren oro n̄wan akpade? Nte afo edi enye emi abuanade ye esop ke ediwak isua m̀mê enye emi ọtọn̄ọde ndibuana ke ata ndondo emi? Nịm ke akpanikọ ete ke uwụtn̄kpọ edinam akpanikọ fo edi n̄kpọ nsịnudọn̄ ọnọ kpukpru nnyịn. Ndien ke ini afo adiande uyo ke ndikwọ ikwọ Obio Ubọn̄, ke ini afo ọnọde ibọrọ m̀mê ọnọde utịn̄ikọ eyen ufọkn̄wed ke Ufọkn̄wed Utom Ukara Abasi, se afo etịpde esịn anam idatesịt nnyịn ọkọri. Akande oro, enye anam esịt Jehovah adat.
21. Nnyịn inyene ediwak ntak ndinam nso, edi mme mbụme ewe ẹdemede?
21 Ih, idem ke mme ini afanikọn̄ emi, nnyịn imekeme ndikop idatesịt ndituak ibuot nnọ Abasi inemesịt nnyịn. Nnyịn imenyene ediwak ntak ndinam n̄kpọ mban̄a nsịnudọn̄ Paul emi: “Ẹka iso ndidat esịt, . . . ndien Abasi ima ye emem oyodu ye mbufo.” (2 Corinth 13:11, NW) Nte ededi, nso edieke nnyịn isobode oto-obot afanikọn̄, ukọbọ, m̀mê nsọn̄ọn̄kpọ? Nte imekeme ndika iso ndat esịt idem ke mme utọ idaha oro? Sịm ubiere ke idemfo nte afo odụn̄ọrede ibuotikọ etienede.
[Ikọ idakisọn̄]
^ ikp. 2 Se Insight on the Scriptures, Eboho 2, page 119, emi Mme Ntiense Jehovah ẹsiode.
Nte Afo Emekeme Ndibọrọ?
• Didie ke ẹnam se idatesịt edide an̄wan̄a?
• Didie ke ndinyene in̄wan̄-in̄wan̄ edu an̄wam nnyịn ndika iso n̄kop idatesịt?
• Nso ikeme ndin̄wam nnyịn ndinyene in̄wan̄-in̄wan̄ ekikere mban̄a efakutom esop nnyịn?
• Ke mme usụn̄ ewe ke afo ama nditọete ke esop mbufo?
[Mme Mbụme Ukpepn̄kpọ]
[Mme ndise ke page 10]
Mme owo ke efakutom nnyịn ẹkeme ndinam ukpụhọde
[Ndise ke page 12]
Mme n̄kpọ-ata ewe ke mme owo ke esop mbufo ẹsobo?