“Jehovah Ọfọn ye Ami Etieti!”

KE ATA ediye mbubịteyo usen kiet ke March 1985, iren ye iban ẹdude ke Itieutom Uwetn̄wed ke ibuot itieutom Mme Ntiense Jehovah ke New York, U.S.A., ẹma ẹkụt akpan n̄kpọntịbe. Adan̄aoro, Karl F. Klein ama anam utom ukwọrọikọ uyọhọ ini ke isua 60. Ye nduaidem, Brọda Klein ama ọdọhọ ete: “Jehovah ọfọn ye ami etieti!” Enye ama ọdọhọ ete ke Psalm 37:4 edi itien̄wed Bible oro imọ imade. Ekem, enye ama anam kpukpru owo ẹkop idatesịt ebe ke ndibre ndido urụk esie.

Ke isua 15 emi ẹketienede, Brọda Klein ama aka iso ndinam utom nte andibuana ke otu mme ewetn̄wed ndinyụn̄ nnam utom ke Otu Ukara eke Mme Ntiense Jehovah. Ekem, ke January 3, 2001, ke edide isua 95 ke emana, Karl Klein ama okụre utom esie eke isọn̄ ke edinam akpanikọ.

Karl akamana ke Germany. Ubon esie ama ọwọrọ idụn̄ aka United States, ndien Karl ọkọkọri ke esịt obio Chicago, Illinois. Ke adan̄aemi ẹkesụk ẹdide n̄kparawa, Karl ye Ted udọeka esie ẹma ẹnen̄ede ẹnyene udọn̄ ke Bible. Karl akana baptism ke 1918, ndien mme aduai-owo-idem n̄kpọ oro enye okokopde ke mbono Nditọ Ukpepn̄kpọ Bible ke 1922 ẹma ẹdemede ima ke esịt esie ẹnọ utom ukwọrọikọ ke ofụri eyouwem esie. Enye ikoyomke urua kiet ebe ye unana enye ndibuana ke utom ukwọrọikọ, anamde ntre idem ke mme akpatre urua uwem esie.

Karl akakabade edi andibuana ke ibuot itieutom ke 1925, ebemde iso anam utom ke itie umịn̄n̄wed. Enye ama enen̄ede ama ikwọ, ndien ke ndusụk isua enye ama esibre ndido urụk ke n̄ka ikwọ oro ẹkesibrede ikwọ ke ndutịm usuanetop Christian ke ekebe ukopikọ. Ke oro ebede, enye ama anam utom ke Itieutom Utịmutom, okopde inem nsan̄a akpan akpan ye esenyịn itieutom oro, T. J. Sullivan. Kan̄a ke emi, Ted ama ọdọ ndọ ndien enye ye Doris, n̄wan esie, ẹma ẹtọn̄ọ utom isụn̄utom ke Puerto Rico.

Karl Klein ama anam utom ke Itieutom Uwetn̄wed ke isua 50, ebiet emi enye eketịpde ata ekese esịn koro enye akamade ndinam ndụn̄ọde okonyụn̄ enyenede ntotụn̄ọ ifiọk Bible. Ke 1963, Karl ama ọdọ Margareta, isụn̄utom otode Germany emi akanamde utom ke Bolivia. Ye ima ima un̄wam Margareta, akpan akpan sia Karl ekesinyenede mfịna unana nsọn̄idem, Karl ama ekeme ndika iso nnam utom tutu isua emi ata ediwak owo ẹsikpọn̄de utom. Ndammana in̄wan̄-in̄wan̄ edu Karl, adianade ye ifiopesịt esie nte ebre ikwọ, ẹma ẹnam enye ekeme ndisinọ mme n̄wọrọnda utịn̄ikọ ke mme esop ye ke ikpọ mbono. Esisịt ini mbemiso n̄kpa esie, enye ama ada usụn̄ ke edineme itien̄wed usenubọk ke akamba ubon Bethel New York, adade idatesịt ye ufọn ọsọk kpukpru owo.

Ediwak mme andikot Enyọn̄-Ukpeme kpukpru ini ẹyeti mbụk eyouwem Brọda Klein, kpa edemede-udọn̄ ifiọkutom esie emi ẹkemịn̄de ke nsiondi eke April 15, 1985. Afo oyokop inem ndikot m̀mê ndifiak n̄kot mbụk oro, enyenede ke ekikere ete ke andiwet enye ama odu uwem isua 15 efen nte anam-akpanikọ ye ifịk ifịk Christian.

Nte kiet ke otu mbon oro Ọbọn̄ eyetde aran, Brọda Klein ama enyene udọn̄ ofụri esịt ndikara ye Christ ke heaven. Nnyịn imenyene kpukpru ntak ndinịm ke akpanikọ nte ke Jehovah oyụhọ udọn̄ oro idahaemi.—Luke 22:28-30.

[Ndise ke page 31]

Karl ke 1943 ye T. J. Sullivan ye Ted ye Doris

[Ndise ke page 31]

Karl ye Margareta, October 2000