Ndin̄wam Mme Ebeakpa ke Ukụt Mmọ

KIET ke otu mbụk ẹban̄ade mme ebeakpa oro ẹtịmde ẹmehe edi mbụk Bible aban̄ade Ruth ye eka ebe esie, Naomi. Iban iba oro ẹkedi mme ebeakpa. Nte ededi, Naomi ikatabake ebe kpọt edi ama ataba n̄ko nditọiren esie iba, emi kiet ke otu mmọ ekedide ebe Ruth. Sia mmọ ẹkedụn̄de ke idụt oro ẹtọde in̄wan̄, oro ẹkenen̄erede ẹberi edem ke irenowo, itie mmọ ama enen̄ede akama mmọn̄eyet.—Ruth 1:1-5, 20, 21.

Nte ededi, Naomi ama enyene n̄wan eyen, Ruth, nte n̄wọrọnda ufan ye owo ndọn̄esịt oro mîkamaha ndidian̄ade n̄kpọn̄ enye. Nte ini akakade, Ruth ama akabade ‘ọfọn ye Naomi akan nditọ-iren itiaba.’—idịghe n̄kukụre koro enye ekenen̄erede ama Naomi edi n̄ko koro enye akamade Abasi. (Ruth 4:15) Ke ini Naomi ọkọdọhọde Ruth afiak ọnyọn̄ etiene ubon ye mme ufan esie ke Moab, Ruth ama ada kiet ke otu mme ikọ nsọn̄ọnda emi ẹnen̄erede ẹtụk owo oro akanam ẹwetde ọbọrọ ete: “Nyaka ke ebiet eke afo akade; nyonyụn̄ ndụn̄ ke  ebiet eke afo odụn̄de: orụk fo eyedi orụk mi, Abasi fo oyonyụn̄ edi Abasi mi: nyakpa ke ebiet eke afo edikpade, nyonyụn̄ mbụhọ do; yak Jehovah anam mi ntem, onyụn̄ ọdọdiọn̄ anam ntem, ke mîdịghe n̄kpa n̄kpa adianade mi ye afo.”—Ruth 1:16, 17.

Jehovah Abasi ama okụt edu Ruth. Enye ama ọdiọn̄ ekpri ubon Naomi ye Ruth, ndien ke akpatre Ruth ama ọdọ Boaz eyen Israel. Naomi ama ese aban̄a eyen mmọ, oro akakabarede edi ete ete Jesus Christ, nte n̄kpọ eke ekedide eyen esie. Mbụk emi owụt nte Jehovah amade mme ebeakpa oro ẹsan̄ade ẹkpere enye ẹnyụn̄ ẹbuọtde idem ye enye. Ke adianade do, Bible asian nnyịn ete ke enye ama mbon oro ẹnọde mme ebeakpa ima ima un̄wam ke ukụt mmọ. Ntre didie ke nnyịn ikeme ndin̄wam mme ebeakpa oro ẹdude ke otu nnyịn mfịn?—Ruth 4:13, 16-22; Psalm 68:5.

Nọ Akpan Un̄wam edi Kûtie Ukara Ukara

Ke ini inọde ebeakpa un̄wam, enen̄ede ọfọn nditie in̄wan̄-in̄wan̄ nnyụn̄ nnam akpan n̄kpọ edi idịghe nditie ukara ukara. Fep mme utọ ikọ emi mîn̄wan̄ake nte, “Edieke oyomde n̄kpọ ekededi nam mi mfiọk.” Oro ekeme ndidi ukem nte ndidọhọ owo oro okopde tuep ye biọn̄, “Akpakam afo okụt edisịne-n̄kpọ ye udia,” edi unamke n̄kpọ ndomokiet ndin̄wam. (James 2:16) Ediwak owo idiben̄eke un̄wam ke ini mmọ ẹyomde n̄kpọ; utu ke oro, mmọ ẹyeyọ ke ndopuyo. Oyom ọniọn̄ man in̄wam utọ mbon oro, ifiọkde se idide mme udọn̄ mmọ. Ke n̄kan̄ eken, nditie ukara ukara—akarade uwem ebeakpa oro ofụri ofụri—ekeme ndisụn̄ọ ke iyatesịt m̀mê utọk. Ntem, Bible ọsọn̄ọ etịn̄ ete ke oyom ida ukem ukem ke nte nnyịn inamde n̄kpọ ye mbon efen. Ke adan̄aemi Bible esịnde udọn̄ ọnọ nnyịn ndinyene ọkpọkpọ udọn̄ unana ibụk ke idem mme owo, enye eti nnyịn ete ikûdi mme andinọhọ ke mbubehe owo.—Philippi 2:4; 1 Peter 4:15.

Ruth ama owụt Naomi utọ edu edida ukem ukem oro. Ke adan̄aemi ọkọsọn̄ọde adiana ye eka ebe esie ke edinam akpanikọ, Ruth ikenyịkke m̀mê ndikara enye. Enye ama anam mme usio-ukot oro ẹkewụtde eti ibuot, utọ nte ediyom udia nnọ idemesie ye Naomi, edi enye n̄ko ama etiene mme item Naomi.—Ruth 2:2, 22, 23; 3:1-6.

Nte ededi, se owo kiet oyomde ekeme ndinen̄ede n̄kpụhọde ye eke owo en̄wen. Sandra oro ẹketịn̄de ẹban̄a ke mbemiso ọdọhọ ete: “Mma n̄kụt se n̄koyomde ke ukụt mi—ata ndima ufan oro ẹkedude ẹkanade mi.” Ke n̄kan̄ eken, Elaine, oro ẹketịn̄de ẹban̄a ke mbemiso, ama oyom ini ndidu ikpọn̄. Ke ntre, ndidi n̄kpọ un̄wam ọwọrọ ndifiọk nnyụn̄ nda ukem ukem ke ndikpono ini oro owo en̄wen oyomde ndidu ikpọn̄ ye ndidu do man an̄wam ke ini ẹyomde.

Un̄wam Otode Ubon

Edieke ufiop ufiop, ima ima ubon odude, emi ekeme ndinam ekese ndinam ebeakpa ọfiọk ete ke imọ iyekeme ndiyọ. Okposụkedi ndusụk mbonubon ẹkemede ndinọ un̄wam n̄kan mbon efen, kpukpru owo ẹkeme nditịp n̄kpọ nsịn. “Edieke ebe-akpa enyenede nditọ m̀mê nditọ nditọ, yak mmọ oro ẹkpep ndibem iso nnam se idotde ye mbon ufọk mmọ, nnyụn̄ nsio usiene nnọ mme eka mmọ; koro emi ọfọnde Abasi ke enyịn.”—1 Timothy 5:4.

Ke ndusụk idaha, ekeme ndidi idiyomke ẹnọ un̄wam m̀mê ẹsio “usiene” ke okụk. Ndusụk mme ebeakpa ẹsinyene okụk oro ekemde ndida nse mban̄a se mmọ ẹyomde, ndien ndusụk mmọ ẹsidot ndibọ un̄wam okụk nto ukara, emi ndusụk idụt ẹsinọde. Edi ke ebiet emi  mme ebeakpa ẹdude ke unana, mbonubon ẹkpenyene ndin̄wam. Edieke ebeakpa mînyeneke n̄kpet n̄kpet iman ndin̄wam m̀mê edieke mme utọ iman oro mîkemeke ndin̄wam, N̄wed Abasi esịn udọn̄ ọnọ mme ekemmọ andinịm ke akpanikọ ete ẹn̄wam enye: “Ido Abasi eke asanade, mînyụn̄ ideheke ke iso Abasi Ete nnyịn edi, ndisan̄a nse nditọ-akpa ye mme ebe-akpa ke ukụt mmọ.”—James 1:27.

Mbon oro ẹdade mme edumbet Bible emi ẹsịn ke edinam ẹnen̄ede ‘ẹkpono mme ebe-akpa.’ (1 Timothy 5:3) Ke nditịm ntịn̄, ndikpono owo ọwọrọ nditen̄e owo oro. Mme owo oro ẹkponode ẹsifiọk ke ẹda mmimọ ke ọsọn̄urua, ẹma mmimọ, ẹnọ mmimọ uku. Mmọ isikereke ke mbon efen ẹn̄wam mmimọ n̄kukụre sia edide mbiomo mmọ. Okposụkedi Ruth ke idemesie ekedide ebeakpa ke ndusụk ini, enye ama enen̄ede okpono Naomi ebe ke ndikụt nte ke imese iban̄a udọn̄ n̄kpọ obụkidem ye eke ntụk Naomi unyịme unyịme ye ke ima. Ke akpanikọ, edu Ruth ama anam enye ọsọsọp enyene eti enyịn̄, anamde ebe esie eke ini iso ọdọhọ enye ete: “Kpukpru mbio-obio nnyịn [ẹfiọk] ẹte ke afo edi enyene-ido an̄wan.” (Ruth 3:11) Ke ukem ini oro, ima oro Naomi akamade Abasi, edu unana ediyom n̄kpọ n̄kaha, ye ntotụn̄ọ esịtekọm oro enye ekenyenede aban̄a mme ukeme oro Ruth ekesịnde ke ntak esie nte eyịghe mîdụhe ẹma ẹnam edi inem inem n̄kpọ ọnọ Ruth ndin̄wam enye. Nso eti uwụtn̄kpọ ke Naomi edi ntem ọnọ mme ebeakpa mfịn!

San̄a Kpere Abasi

Nte ededi, mbonubon ye mme ufan ikemeke ndisịri ufan̄ oro n̄kpa nsan̄a ndọ adade edi. Ke ntak emi edi akpan n̄kpọ nte ebeakpa enen̄ede asan̄a ekpere “Ete mbọm ye Abasi kpukpru ndọn̄esịt: emi ọdọn̄de nnyịn esịt ke kpukpru ukụt nnyịn.” (2 Corinth 1:3, 4) Kere ban̄a uwụtn̄kpọ Anna, enyene-ifịk ebeakpa oro ekedide isua 84 ke emana ke ini Jesus akamanade.

Ke ini ebe Anna akakpade ke mmọ ẹma ẹkedọ ndọ ke isua itiaba kpọt, enye ama ọwọn̄ọde ebịne Jehovah okoyom ndọn̄esịt. “Enye [ikọkpọn̄ke] temple, edi atuak ibuot ọnọ Abasi ke editre udia ye n̄kpe-ubọk okoneyo ye uwemeyo.” (Luke 2:36, 37) Nte Jehovah ama anam n̄kpọ aban̄a edu uten̄e Abasi Anna? Ih! Enye ama owụt enye ima ke ata san̄asan̄a usụn̄ ebe ke ndiyak enye okụt nsekeyen oro edikọride akabade Andinyan̄a ererimbot. Emi akanam Anna okop nduaidem onyụn̄ ọbọ ndọn̄esịt didie ntem! Nte an̄wan̄ade, enye ama okụt nte Psalm 37:4 edide akpanikọ: “Yak Jehovah onyụn̄ adat fi esịt; ndien enye ọyọnọ fi se esịt fo oyomde.”

Abasi Ada Mme Ekemmọ Christian Ọnọ Un̄wam

Elaine, ọdọhọ ete: “Ke anyan ini ke David ama akakpa, mma n̄kop ata ata ubiak, nte n̄kpọ eke ikwa ekịmde mi ọkpọn̄kan̄. N̄kekere ke udia itahake mi ke idịbi. Usen kiet ama abiak mi tutu n̄kere ke nnyene ndika mbịne abiaibọk. Enyene-ifiọk eyenete an̄wan emi edide ufan mi ama ọnọ ekikere ete ke ekeme ndidi mfụhọ mi edi ntak onyụn̄ esịn udọn̄ ọnọ mi ete mben̄e Jehovah un̄wam ye ndọn̄esịt. Mma nda item esie nsịn ke edinam ke ebe oro nnyụn̄ mbọn̄ akam ofụri esịt ke ndopuyo, mben̄ede nte Jehovah omụm mi akama ke mfụhọ mi. Ndien enye ama omụm mi akama!” Elaine ama ọtọn̄ọ ndikop idem inem, ndien ikebịghike ke oro ebede enye ikakam ikopke ubiak aba.

Mbiowo esop akpan akpan ke mfọnido ẹkeme ndinam ufan ye mme ebeakpa oro ẹfụhọde. Ebede ke ndida mbufiọk nnọ un̄wam ye ndọn̄esịt eke spirit kpukpru ini, mbiowo ẹkeme ndin̄wam mmọ ndisan̄a n̄kpere Jehovah kpa ye ukụt mmọ. Ke ebiet ẹyomde, mbiowo ẹkeme n̄ko ndin̄wam ke ndinam ndutịm kaban̄a edinọ un̄wam n̄kpọ obụkidem. Mme utọ enyene-ifiọk mbiowo oro ẹkopde mbọm mi ẹnen̄ede ẹdi “ọtọ udịbe ofụm.”—Isaiah 32:2; Utom 6:1-3.

Nsinsi Ndọn̄esịt Otode Obufa Edidem Isọn̄

Enye emi akanian̄wan Anna akadatde esịt ndikụt ke n̄kpọ nte isua tọsịn iba emi ẹkebede amakabade edi Edidem Messiah Obio Ubọn̄ Abasi eke heaven idahaemi. Ibịghike ukara emi ọyọsọhi kpukpru ntak mfụhọ, esịnede n̄kpa,  efep. Ke afan̄ emi, Ediyarade 21:3, 4 ọdọhọ ete: “Sese, ebiet idụn̄ Abasi omodu ye owo. . . . Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” Ndi afo ama etịm ọfiọk ete ke ufan̄ikọ emi etịn̄ aban̄a “owo”? Ih, ẹyenam mme owo ẹbọhọ n̄kpa ye kpukpru mfụhọ ye ntuan̄a oro enye esidade edi.

Edi eti mbụk efen efen akam odu! Bible ọn̄wọn̄ọ n̄ko ete ke ẹyenam mme akpan̄kpa ẹset. “Ini ke edi eke kpukpru mme andidu ke udi ẹdikopde Enye [Jesus] uyo ẹwọn̄ọ ẹdi.” (John 5:28, 29) Kpa nte Lazarus, emi Jesus akanamde eset ke n̄kpa, mmọ ẹdiwọn̄ọ ẹdi nte mme owo, idịghe nte mme edibotn̄kpọ eke spirit. (John 11:43, 44) Ẹyemenede mbon oro ‘ẹnamde se ifọnde’ ke oro ebede ẹsịm mfọnmma eke owo ndien kpukpru mmọ ẹyenyene ukpeme Jehovah ebietde eke ete nte enye ‘atatde ubọk esie ọnọ kpukpru mme andidu uwem se mmọ ẹmade, ẹyụhọ.’—Psalm 145:16.

Mbon oro mbon ima mmọ ẹkekpan̄ade oro ẹnyụn̄ ẹnyenede mbuọtidem ke idotenyịn emi mîdikpụhu mi ẹkụt nte emi ọnọde akwa ndọn̄esịt. (1 Thessalonica 4:13) Ntre edieke afo edide ebeakpa, kụt ete ke imọ ‘idopke ndibọn̄ akam’ mben̄e ndọn̄esịt ye un̄wam oro afo oyomde ke usen ke usen man obiom nsio nsio mbiomo fo. (1 Thessalonica 5:17; 1 Peter 5:7) Ndien sio ini ke usen kiet kiet nịm ndida n̄kot Ikọ Abasi man ekikere Abasi ekeme ndidọn̄ fi esịt. Edieke afo anamde mme n̄kpọ emi, afo oyokụt ke idemfo nte Jehovah ekemede ndin̄wam fi enyene emem kpa ye kpukpru ukụt ye mme n̄kpọ-ata oro afo osobode nte ebeakpa.

[Se Ẹwetde ke Ikpọ Abisi ke page 5]

Ndinọ un̄wam ọwọrọ ndida ukem ukem ke edikpono ini oro owo en̄wen oyomde ndidu ikpọn̄ ye ndidu do ke ini ẹyomde

[Ndise ke page 7]

Abasi ama ọdiọn̄ akanian̄wan ebeakpa oro Anna